Sehluko 12
Nefi ubona embonweni live lesetsembiso; kulunga, bubi, kanye nekuwa kwalabahlala kulo; kuta kweliWundlu laNkulunkulu emkhatsini wabo; nekutsi baFundzi labaLishumi nakuBili kanye nebaPhostoli labaLishumi nakuBili batawumehlulela kanjani Israyeli; kanye nekunengeka kanye nekungcola kwesimo salabo labancishelwe lukholo. Cishe ngemnyaka wema-600–592 ngaphambi kwekutalwa kwaKhristu.
1 Futsi kwenteka kutsi ingilosi yatsi kimi: Buka, ubone intalelwane yakho, ngalokunjalo nentalelwane yabomnakenu. Ngabuka ngalibona live lesetsembiso; ngabona ticuku tebantfu, yebo, kwaba shangatsi linani linyenti njengesihlabatsi saselwandle.
2 Futsi kwenteka kutsi ngabona ticuku tibutsene ndzawonye kute tilwe, lesinye sibhekene nalesinye; ngabona timphi, kanye nemahemuhemu etimphi, kanye nekubulalana lokukhulu ngenkemba emkhatsini webantfu bami.
3 Futsi kwenteka kutsi ngabona letinyenti titukulwane tishona, ngendlela yetimphi, kanye netincabano kulelive; ngabona emadolobha lamanyenti, yebo, kangangekutsi angikhonanga kuwabala.
4 Futsi kwenteka kutsi ngabona inkhungu yebumnyama ebusweni belive lesetsembiso; ngabona imibane, ngeva kudvuma, kanye nekutamatama kwemhlaba, kanye nato tonkhe tinhlobonhlobo temsindvo wekuphitsitela; ngabona umhlaba kanye nemadvwala, kutsi kwadzabuka; ngabona tintsaba tidzilika tiba tincetu; ngabona ematsafa emhlaba, kutsi bekaklayekile; ngabona lamanyenti emadolobha kutsi bekacwilile; ngabona lamanyenti kutsi ashiswa ngemlilo; ngaphindze ngabona lamanyenti kutsi adzilikela phansi, ngenca yekutamatama kwemhlaba.
5 Futsi kwenteka kutsi emvakwekutsi sengitibonile leti tintfo, ngabona inkhungu yebumnyama, kutsi yandlula ebusweni bemhlaba; buka, ngabona ticuku letatingawanga ngenca yebukhulu kanye nekwesabeka kwetehlulelo teNkhosi.
6 Futsi ngabona emazulu avuleka, liWundlu laNkulunkulu lehla ezulwini; futsi lehla latibonakalisa kuto.
7 Ngaphindze ngabona ngaphindze nganika bufakazi kutsi Moya loNgcwele wehlela etukwalabanye labalishumi nakubili; babekwa nguNkulunkulu futsi bakhetfwa.
8 Futsi ingilosi yakhuluma kimi, yatsi: Buka bafundzi labalishumi nakubili beliWundlu, labakhetsiwe kutsi basebentele intalelwane yakho.
9 Yatsi kimi: Uyabakhumbula yini labaphostoli labalishumi nakubili beliWundlu na? Buka ngibo labo labayawukwehlulela tive letilishumi nakubili taka-Israyeli; ngaloko-ke, bafundzisi labalishumi nakubili bentalelwane yakho bayawukwehlulelwa ngibo; ngoba nine nibendlu yaka-Israyeli.
10 Futsi laba bafundzisi labalishumi nakubili lobabonako bayawukwehlulela intalelwane yakho. Buka, balungile ingunaphakadze; ngoba ngenca yelukholo lwabo labanalo kulo liWundlu laNkulunkulu tembatfo tabo tentiwe taba mhlophe engatini yalo.
11 Ingilosi yatsi kimi: Buka! Ngabuka, ngabona titukulwane letintsatfu tindlula tisekulungeni; tembatfo tato tatimhlophe njengeteliWundlu laNkulunkulu. Futsi ingilosi yatsi kimi: Leti tentiwe taba mhlophe engatini yeliWundlu, ngenca yelukholo lwato kulo.
12 Mine, Nefi, ngaphindze ngabona labanyenti besitukulwane sesine labendlula nabo basekulungeni.
13 Futsi kwenteka kutsi ngabona ticuku temhlaba tibutsene ndzawonye.
14 Ingilosi yatsi kimi: Buka intalelwane yakho, ngalokunjalo nentalelwane yabomnakenu.
15 Futsi kwenteka kutsi ngabuka ngabona bantfu bentalelwane yami babutsene ndzawonye ngeticuku babhekene nebentalelwane yabomnaketfu; bebabutsene ndzawonye kute balwe.
16 Ingilosi yakhuluma kimi, yatsi: Buka umtfombo wemanti langcolile lowo uyihlo lawubona; yebo, nemfula lowo lakhuluma ngawo; futsi kujula kwawo kukujula kwesihogo.
17 Inkhungu yebumnyama tilingo tadeveli, letiphumphutsekisa emehlo, tente tinhlitiyo tebantfwana bebantfu tibe lukhuni, tibaholele kudze emigwacweni lebanti, kute bashabalale futsi balahleke.
18 Sakhiwo lesikhulu nalesivulekile, leso uyihlo lasibona, yimicabango nje lelite kanye nekutigcabha kwebantfwana bebantfu. Umhosha lomkhulu kanye nalowesabekako uyabehlukanisa, yebo, nelivi lekulunga laNkulunkulu waPhakadze, kanye naMesiya loliWundlu laNkulunkulu, loyo Moya loNgcwele lofakaza ngaye, kusukela ekucaleni kwemhlaba kute kube ngulesikhatsi sanyalo, futsi kusukela kulesi sikhatsi kuchubeka futsi ingunaphakadze.
19 Futsi ngesikhatsi ingilosi ikhuluma lamavi, ngabuka ngabona kutsi intalelwane yabomnaketfu yalwa nentalelwane yami, njengelivi lengilosi; futsi ngenca yekutigcabha kwentalelwane yami, kanye netilingo tadeveli, ngabona kutsi intalelwane yabomnaketfu yabehlula bantfu bentalelwane yami.
20 Futsi kwenteka kutsi ngabuka, ngabona bantfu bentalelwane yabomnaketfu kutsi bese babancobile laba bentalelwane yami; futsi bahamba ngeticuku etikwebuso balelive.
21 Futsi ngababona babutsene ndzawonye ngeticuku, ngabona timphi kanye nemahemuhemu etimphi emkhatsini wabo; kuto timphi kanye nemahemuhemu etimphi ngabona titukulwane letinyenti tendlula.
22 Ingilosi yatsi kimi: Buka laba bayawuncishelwa lukholo.
23 Futsi kwenteka kutsi ngabona, emvakwekube sebancishelwe lukholo baba mnyama, baphindze benyanyeka, futsi baba bantfu labangcolile, labagcwele buvila kanye nayo yonkhe inhlobo yetinengiso.