1 Manje kwenteka kutsi emvakwekutsi mine, Nefi, sengicedzile kukhuluma nabomnaketfu, buka batsi kimi: Usitjele tintfo letimatima, ngetulu kwaloko lesingakwati kukubeketelela.

2 Futsi kwenteka kutsi ngatsi kubo ngangati kutsi ngangikhulume tintfo letimatima ngalababi, ngekweliciniso; futsi labalungile angibabekanga licala, futsi ngafakaza ngekutsi bayophakanyiswa ngelilanga lekugcina; ngaloko-ke, labanelicala batsatsa liciniso ngekutsi limatima, ngoba lidzabula ekhatsi etibilinini tabo.

3 Manje bomnaketfu, kube benilungile futsi nitimisele kulalela liciniso, futsi nilinake, kute nihambe ngebucotfo phambi kwaNkulunkulu, uma kunjalo beningayuvungama ngenca yeliciniso, nitsi: Ukhuluma tintfo letilukhuni ngatsi.

4 Futsi kwenteka kutsi mine, Nefi, ngabancenga bomnaketfu, ngako konkhe kukhutsala, kutsi bagcine imiyaleto yeNkhosi.

5 Futsi kwenteka kutsi batitfoba phambi kweNkhosi; kangangekutsi ngaba nenjabulo kanye nelitsemba lelikhulu ngabo, kutsi batawuhamba etindleleni tekulunga.

6 Manje, tonkhe leti tintfo tashiwo futsi tenteka ngesikhatsi babe ahlala ethendeni esigodzini lasibita ngekutsi yiLemuweli.

7 Futsi kwenteka kutsi mine, Nefi, ngatsatsa lenye yemadvodzakati a-Ishmayeli ngayenta umkami; ngalokunjalo, nabomnaketfu batsatsa emadvodzakati a-Ishmayeli bawenta bafati babo; ngalokunjalo naZoramu watsatsa indvodzakati lendzala ya-Ishmayeli wayenta umkakhe.

8 Futsi ngaleyo ndlela babe besekayigcwalisile yonkhe imiyaleto yeNkhosi lebekaniketwe yona. Futsi ngetulu kwaloko, mine, Nefi, bese ngibusisiwe kakhulu yiNkhosi.

9 Futsi kwenteka kutsi livi leNkhosi lakhuluma kubabe ebusuku, lamyaleta kutsi ngakusasa kwakufanele achubeke neluhambo lwakhe loluya ehlane.

10 Futsi kwenteka kutsi ngesikhatsi babe avuka ekuseni, aya emnyango welithende, wamangala kakhulu kubona phansi ibhola leyindingilizi leyakhiwe ngebuciko; futsi leyakhiwe ngelitfusi lelicolisakele. Ngekhatsi kulebhola bekukhona tintsi letimbili; lolunye lwalukhomba indlela lapho kwakufanele siye ngakhona ehlane.

11 Futsi kwenteka kutsi sagcogcela ndzawonye tonkhe tintfo lebekufanele sititfwale siye nato ehlane, kanye nayo yonkhe insalela yemiphako yetfu iNkhosi leyayisinike yona; futsi satsatsa inhlanyelo letinhlobonhlobo kute siyitfwale siye ehlane.

12 Futsi kwenteka kutsi satsatsa emathende etfu futsi sesuka saya ehlane, ngesheya kwemfula iLamani.

13 Futsi kwenteka kutsi sahamba sikhatsi lesingemalanga lamane, sacondza ngaseningizimu lengasemphumalanga, saphindze samisa emathende etfu futsi; sayibita lendzawo ngeligama lelitsi kuseShazeri.

14 Futsi kwenteka kutsi satsatsa butjoki kanye nemicibisholo yetfu, sahamba sachubekela ehlane kuyotingelela imindeni yetfu kudla; futsi emvakwekutsi sesiyitingelele imindeni yetfu kudla saphindze sabuyela kuyo imindeni yetfu ehlane, endzaweni yaseShazeri. Saphindze sahamba sachubeka ehlane, silandzela yona leyo ndlela, sitigcina kuleto tincenye lebetivundzile kakhulu tasehlane, lebetisemnceleni dvutane neLwandle loluBovu.

15 Futsi kwenteka kutsi sahamba sikhatsi lesingemalanga lamanyenti, sitingela kudla endleleni, ngebutjoki nangemicibisholo yetfu nangematje etfu kanye netilingi tetfu.

16 Salandzela indlela ngekuyalelwa yibhola, leyasiholela kuleyo ncenye yasehlane lebeyivundze kakhulu.

17 Futsi emvakwekutsi sesihambe sikhatsi lesingemalanga lamanyenti, samisa emathende etfu kwesikhashana, kute sitfole kuphumula siphindze sitfole kudla kwemindeni yetfu.

18 Futsi kwenteka kutsi ngesikhatsi mine, Nefi, ngichubekela phambili ngiyotingela kudla, buka ngabephula butjoki bami, lebebakhiwe ngensimbi lecolisakele; futsi emvakwekutsi sengibephulile butjoki bami, buka, bomnaketfu bangitfukutselela ngenca yekulahlekelwa butjoki bami, ngoba asikutfolanga kudla.

19 Futsi kwenteka kutsi sabuyela emuva emindenini yetfu ngaphandle kwekudla, futsi bakhatsele kakhulu, ngenca yeluhambo lwabo, bahlupheka kakhulu ngekweswela kudla.

20 Futsi kwenteka kutsi Lamani naLemuweli kanye nemadvodzana a-Ishmayeli bacala kuvungama kakhulu, ngenca yebuhlungu babo kanye netinhlupheko ehlane; ngalokunjalo nababe wacala kuyivungamela iNkhosi Nkulunkulu wakhe; yebo, futsi bonkhe bebadzabukile kakhulu, kangangekutsi bayivungamela iNkhosi.

21 Manje kwenteka kutsi mine, Nefi, sengihlushwe bomnaketfu ngenca yekulahlekelwa butjoki bami, lobu babo butjoki bulahlekelwe kunwebeka kwabo, kwacala kutsi kube matima kakhulu, yebo, kangangekutsi asikhonanga kutfola kudla.

22 Futsi kwenteka kutsi mine, Nefi, ngakhuluma kakhulu nabomnaketfu, ngoba bese batente lukhuni tinhlitiyo tabo futsi, bate bakhonona kuyo iNkhosi Nkulunkulu wabo.

23 Futsi kwenteka kutsi mine, Nefi, ngenta butjoki ngelugodvo, kanye nemcibisholo ngendvuku lecondzile; ngaloko-ke, ngahloma ngebutjoki kanye nangemcibisholo, ngesilingi kanye nangematje. Ngabese ngitsi kubabe: Ngingaya ngakuphi kute ngitfole kudla na?

24 Futsi kwenteka kutsi wabuta eNkhosini, ngoba bese batitfobile ngenca yemavi ami; ngoba ngakhuluma letinyenti tintfo kubo ngemandla ami onkhe.

25 Futsi kwenteka kutsi livi leNkhosi lafika kubabe; futsi ngempela wajeziswa ngenca yekuyivungamela iNkhosi, kangangekutsi wehliswa ekujuleni kwelusizi.

26 Futsi kwenteka kutsi livi leNkhosi latsi kuye: Buka kulebhola, bese ubuka tintfo letibhaliwe.

27 Futsi kwenteka kutsi ngesikhatsi babe abona tintfo lebetibhalwe kulebhola, waba nekwesaba kanye nekutfutfumela lokukhulu, ngalokunjalo nabomnaketfu kanye nemadvodzana a-Ishmayeli kanye nebafati betfu.

28 Futsi kwenteka kutsi mine, Nefi, ngabona tinkhomba leto lebetisebholeni, kutsi betisebenta ngelukholo nekukhutsala kanye nangekutinaka lebesikuniketa kuto.

29 Futsi ngetulu kwaloko kwakubhalwe kuto umbhalo lomusha, lebekulula kuwufundza, lebewusinika kucondza mayelana netindlela teNkhosi; futsi wawubhalwa uphindze ushintjwe tikhatsi ngetikhatsi, ngelukholo kanye nekukhutsala lebesiyiniketa kona. Ngako-ke siyabona kutsi ngetintfo letincane iNkhosi ingaletsa tintfo letinkhulu.

30 Futsi kwenteka kutsi mine, Nefi, ngahamba ngaya etulu esicongweni sentsaba, njengekuyaletwa lebekuniketwe kulebhola.

31 Futsi kwenteka kutsi ngabulala tilwane tesiganga, kangangekutsi ngakutfola kudla kwemindeni yetfu.

32 Futsi kwenteka kutsi ngabuyela emathendeni etfu, ngitfwele tilwane leto lebengitibulele; manje ngesikhatsi babona kutsi besengikutfolile kudla, yaba yinkhulu kangakanani injabulo yabo! Futsi kwenteka kutsi batitfoba phambi kweNkhosi, futsi bayibonga.

33 Futsi kwenteka kutsi saphindze satsatsa luhambo lwetfu, sihamba cishe ngayo leyo ndlela lefanako njengasekucaleni; emvakwekutsi sesihambe sikhatsi lesingemalanga lamanyenti samisa emathende etfu futsi, kute sitsi kuhlala sikhashana.

34 Futsi kwenteka kutsi Ishmayeli wafa, wangcwatjwa endzaweni lebeyibitwa ngekutsi yiNahomi.

35 Futsi kwenteka kutsi emadvodzakati a-Ishmayeli akhala kakhulu, ngenca yekulahlekelwa nguyise, nangenca yetinhlupheko tabo ehlane; bamvungamela babe, ngoba bekabakhiphe eveni laseJerusalema, batsi: Babe sewufile; yebo, sesizulazule kakhulu ehlane, sahlushwa tinhlupheko letinyenti, yindlala, koma, kanye nekukhatsala; futsi emvakwako konkhe loku kuhlupheka kufanele sibhubhe lapha ehlane yindlala.

36 Bavungama ngalendlela kubabe, ngalokunjalo nakimi; futsi bebafuna kuphindze babuyele eJerusalema.

37 Lamani watsi kuLemuweli ngalokunjalo nakuwo emadvodzana a-Ishmayeli: bukani asimbulale babe, kanjalo nemnaketfu Nefi, lesekatitsatsele kutsi abe ngumbusi kanye nemfundzisi wetfu, lesibomnakabo labadzala.

38 Manje, utsi iNkhosi ikhulume naye, ngetulu kwaloko utsi tingilosi timfundzisile. Kodvwa bukani, siyati kutsi ucala emanga kitsi; futsi usitjela leti tintfo, wenta letinyenti tintfo ngebucili bakhe lobunemacebo, kute akhohlise emehlo etfu, ucabanga, mhlawumbe, kutsi angasiholela kudze ehlane lelitsite lelingakajwayeleki; emvakwekutsi asasiholele kudze, sewucabange kutsi atente inkhosi kanye nembusi ngetulu kwetfu, kute ente kitsi ngekwentsandvo nangekwesifiso sakhe. Futsi umnaketfu Lamani watiphehla ngalendlela tinhlitiyo tabo kute batfukutsele.

39 Futsi kwenteka kutsi iNkhosi yayinatsi, yebo, nelivi leNkhosi lefika futsi lakhuluma lamanyenti emavi kubo, labajezisa kakhulu; emvakwekutfotjiswa ngelivi leNkhosi bakuyekela kutfukutsela kwabo, baphendvuka etonweni tabo, kangangekutsi iNkhosi yaphindze yasibusisa ngekudla, kute singabhubhi.