1 Áádóó áko baa hoolzhiizh Nephi díí saad yee haadzíiʼgo, áko shooh, hastóí ándahwiiʼaahii danilíinii, Gadianton nidanitʼinii yitah danilíinii, éí bádahóóchįįd, éí yikʼijįʼ hadadoolghaazhgo diné kódeiłní: Haʼátʼíí biniyé díí diné doo daołtsóódgóó ndanohłóós da, áko doo ákótʼínígíí biniyé da bikʼijįʼ hadaodziihgo bándahonohʼaah da?

2 Haʼátʼíí biniyé díí diné tʼóó danółʼį́, dóó díí diné dóó nihibee hazʼáanii yikʼijįʼ hahadziihgo tʼóó dadoohtsʼaʼ.

3 Háálá áko shooh, Nephi éí bibee hazʼáanii doo ákótʼé silį́ʼígíí yee yichʼįʼ haadzííʼ, aooʼ, Nephi ląʼí doo ákótʼéí yee yichʼįʼ haazdzíʼígíí doo náhádzóóh átʼée da; dóó Diyin God bibee hazʼáanii bikʼijįʼígíí tʼáadoo łaʼ yee yichʼįʼ haadzíiʼ da.

4 Áádóó éí ándahwiiʼaahii hakʼijįʼ bádahóóchįįd háálá chahałheełgo nidanilʼingo bindaanishígíí doo nanilʼingóó yikʼijįʼ hahaasdzííʼ; ákótʼée ndi, tʼáadoo deiyiiłtsood da, háálá diné yéédaasdzííd bikʼijįʼ da hadadidoolwoshígíí biniinaa.

5 Áko diné yichʼįʼ hadadoolghaaz, kódaaníigo: Haʼátʼíí biniyé díí hastiin nihikʼijįʼ hahadziihgo bá dahoolʼaʼ? Háálá áko shooh díí diné tʼáá átʼé yánahoníʼą́, ádooldįįłjįʼ ndi; aooʼ, áádóó ałdóʼ díí kintah ayóó ádaatʼéii nihighadadoonił, áko doo biiʼ honiidlǫ́ǫ da doo.

6 Áádóó nihił béédahózin díí éí doo bóhónéidzą́ą da, háálá áko shooh, danihidziil, dóó nihikintah ayóó ádaatʼé, áko niheʼenaʼí doo nihikʼi dabidziil da.

7 Áádóó baa hoolzhiizh, áko diné éí Nephi yikʼijįʼ yádahóółchįįd, dóó akʼijįʼ saad dahółǫ́; áko łaʼ hadadoolghaazh: Díí hastiin tʼáadoo baa nídaahtʼíní, háálá diné yáʼátʼéehii nilį́, áádóó yee haadziʼígíí tʼáá aaníí baa hodoolzhish tʼáá hazhóʼó ádaa ńdaʼsiikango tʼéiyá;

8 Aooʼ, áko shooh, nidahwiitʼaah tʼáá átʼé tʼáá aaníigo yee haadziʼígíí nihikʼindoolyééł; háálá bąąhági ádeitʼínígíí tʼáá aaníigo yaa hoolneʼgo nihił béédahózin. Áádóó áko shooh éí éí tʼóó ahayóí, áádóó nihił béédahózin dóó tʼáá ałtso nihikʼindoolyééł háálá nihibąąhági ádaatʼéii bił bééhózin;

9 Aooʼ, áádóó áko shooh, Diyin yá yáłtiʼii doo nilį́įgo doo shį́į́ díí tʼáá aaníigo yaa hoolneʼ da doo ńtʼę́ę́ʼ.

10 Áádóó baa hoolzhiizh diné Nephi deidiyoołhéłígíí náhádzid dabinéeʼááh, áko tʼáadoo deisił da; éí bąą bichʼįʼ hanáánáádzííʼ, łaʼ bichʼijí daazlį́įʼgo haideesʼį́į́ʼ, łaʼígíí éí nídaasdzííd.

11 Éí bąą hazhóʼó łą́ągo yichʼįʼ hanáánáádziiʼ kóníigo: Áko shooh, shikʼéí, baaʼísh daʼíínóółtah Diyin God tʼááłáʼígo diné adziilii yeinílá, Moses ndi, Tónteel Łichííʼ tó yéego yichʼįʼ haadzííʼ, dóó kojigo dóó áajigo ałtsʼą́ą́ʼ kódzaa, áko Israel dineʼé, éí danihizází ádaatʼį́, niʼ hóltsei yikááʼ chʼékai, daʼ Egypt dineʼé bindaabaahí tó bikʼijįʼ ałchʼįʼ kódzaa dóó ábísdįįd?

12 Áádóó kʼad áko shooh, Diyin God kótʼáo díí hastiin adziilii yeiníláago, haʼátʼíí biniyé bee ałghaʼdaʼdohtʼááh, dóó ádadohní tʼáadoo adziilii sheílyáa da áko shił bééhózingo binahjįʼ tʼáá hazhóʼó ádaanáʼiisiníkango tʼéiyá?

13 Ákondi, shooh, doo tʼóó shizaadígíí tʼéiyá doo deinohdlą́ą da, ákondi nihizází yee hadahaasdzííʼ yę́ę ałdóʼ doo deinohdlą́ą da, áádóó díí diné, Moses, yee hahaasdzííʼ yę́ę ałdóʼ, éí ayóó átʼáo adziilii beiyílyá, aooʼ, saad Messiah doogááł níigo yee haadzííʼ yę́ę.

14 Aooʼ, daʼ Diyin God biYeʼ tʼáá aaníigo doogááł yee haadzííʼ? Áádóó tłʼiish béésh łitsoi beʼályaago doo kééhatʼínídi de dahyidiitą́ągo, diyin doogáłígíí ałdóʼ de kóbidiʼdoolnííł.

15 Áádóó ląʼí tłʼiish deinééłʼį́įgo dahiná dadooleeł, éígi átʼáo ląʼí Diyin God biYeʼ dayoodlą́ągo yichʼįʼ dadéezʼį́įʼgo, biiʼ sizíinii yínííł danilį́įgo, éí dahináa doo, iiná doo ninítʼiʼii bichʼįʼ ndi.

16 Áádóó kʼad shooh, Moses doo díí tʼéiyá tʼáá aaníigo yee haadzíiʼ da, ákondi Diyin yá yádaałtiʼii dadiyinii tʼáá ałtso ndi, éí biiníłką́ą́dę́ę́ʼ dóó Abraham biiníłką́ąjįʼ.

17 Aooʼ, áádóó áko shooh, Abraham éí doogáałgo bił ííshją́ą́ ályaa, dóó ił hózhóonii biiʼ hazlį́į́ʼ dóó bił hóózhǫǫd.

18 Aooʼ, áádóó áko shooh bee nihił hashneʼ, áko Abraham doo tʼáá bí tʼéiyá bił bééhózin da, ákondi Abraham tʼahdoo biʼdichííhyę́ędą́ą́ʼ ndi Diyin God bikʼehgo tʼóó ahayóí bikʼidahodiiniiʼ; aooʼ, biYeʼ bihoogááł bikʼehgo ndi; áko díí diné bił ííshjání ádadoolnííł, dimííl yázhí deiyíhai bilááhdę́ę́ʼ tʼahdoo biʼdichííhgóó, ákótʼée ndi bá nináʼdoolyééł.

19 Áádóó kʼad nihił bééhózin doo, Abraham hináá dóó kojįʼ ląʼí Diyin yá yádaałtiʼí díí tʼáá aaníigo yaa hadahaasdzííʼ; aooʼ, áko shooh, Diyin yá yáłtiʼí Zenos doo nináhinilyéésgóó tʼáá aaníigo yaa haadzííʼ; éí yikʼee biʼdiisxį́.

20 Áádóó áko shooh, Zenock ałdóʼ, áádóó Ezias ałdóʼ, dóó Isaiah ałdóʼ, dóó Jeremiah, (Jeremiah tʼáá éí Jerusalem doochxǫǫł níigo tʼáá aaníigo yaa haadzííʼ) áko kʼad nihił béédahózin Jerusalem ałtso yílchxǫ́ éí Jeremiah yaa haadzííʼ. O haʼátʼíí biniyé Diyin God biYeʼ doo doogááł da, Diyin bikʼehgo áhodoonííł haʼnínée bikʼehgo?

21 Áádóó áko daʼ Jerusalem doo yíchxǫʼ da diníigo bee ałghaʼdadohtʼááh dooleeł? Daʼ Zedekiah biyeʼké tʼáadoo naaztseed da didíínííł, tʼáá átʼé tʼáá hazhóʼó Mulek éí tʼáadoo da? Aooʼ, dóó dooísh béédaalniih da Zedekiah badaʼáłchíní éí kǫ́ǫ́ nihiłnaaldeeh, dóó Jerusalem kéyahdóó chʼíbidiʼnoolkaad? Ákondi shooh, doo díí tʼéiyá da—

22 Nihizhéʼé Lehi Jerusalemdę́ę́ʼ chʼíbidiʼnoolchą́ą́ʼ háálá díí tʼáá aníigo yaa hoolneʼígíí biniinaa. Nephi ałdóʼ díí tʼáá aaníigo yaa haadzííʼ, áádóó kʼasdą́ą́ʼ tʼáá ałtso danihizází ndi, kojįʼ hoolzhishjįʼ ndi; aooʼ, tʼáá aaníí Christ doogáałgo yaa hadahaasdzííʼ, dóó yíká dadéezʼį́į́ʼ ńtʼę́ę́ʼ, dóó níyáadi baa hoolzhiizhgo yaa bił dahozhǫ́ǫ doo.

23 Áádóó áko shooh, Diyin God éí nilį́, dóó yił hólǫ́, dóó yichʼįʼ ííshjání áʼdiilyaa, áko yisdábííʼeezh; dóó ayóó átʼáo yaadahaznih, doogáłígíí biniinaa.

24 Áádóó áko, díí nihił béédahózin dóó doo tʼáá aaníí átʼée da dadoohníigo tʼáá hazhóʼó danihiyoochʼíídgo tʼéiyá, éí bąą díí bee bąąhági ádaohdzaa, háálá díí tʼáá ałtso nahjįʼ kódáołaa, ląʼí nihił ííshją́ą́ ádaalyaa ndi, aooʼ, tʼáá ałtsoní ndi nihił ííshją́ą́ ádaalyaa, yáʼąąsh biyiʼígíí, dóó tʼáá áłtsoní nahasdzáán biyiʼ ndi, éí tʼáá aaníí ádaatʼéego daołtsą́.

25 Ákondi shooh, tʼáá aaníinii doo deinohdlą́ą da, nihiDiyin God dílzinii doo bikʼeh dahonołʼį́į da; áádóó kʼad ndi, yáʼąąsh biyiʼ daʼílíinii ndahohnííł doo ńtʼę́ę́ʼ, áadi ndahachxǫǫhii ádin, dóó áadi chin daabąąhígíí doo yah adoogáał da, nihánahootʼaah bijį́įdi áháchįʼ nihikʼijįʼ siláa dooleełígíí dekwáánííłgo ádaołééh.

26 Aooʼ, kʼad ndi danoołtʼą́ąjįʼ hoolzhish, háálá nidaʼołtseed dóó diné bee tsiʼnaʼadá dóó bąąhági ádaohtʼį́, hoolʼáágóó ánihidiʼdoodįįł bichʼįʼ hoolzhish; aooʼ, áádóó doo ádaa ńdaʼoohkąąhgóó tsxį́įłgo baa hodoolzhish.

27 Aooʼ, áko shooh éí kǫ́ǫ́ nihidááʼdílkałgi ndi áhoonííł; aooʼ, ánihwiiʼaahii-dah sidáágóó dohkááh, dóó ndaʼołkaah; áádóó áko shooh, nihá ánahwiiʼaahii éí biʼdiisxį́, dóó bidił yiiʼ sitį́; áádóó bikʼis éí biisxį́, éí ánihwiiʼaahii-daházʼą́ą́dóóʼígíí yíká átʼį́.

28 Áádóó áko shooh, éí tʼáá áłah nahonitʼinjí dahʼooldah atah nilį́, éí Gadianton dóó chʼį́įdii nihokááʼ dineʼé biiʼ sizíinii neidoołtsxił yíká átʼíinii haidiilaa.