1 Áádóó áko baa hoolzhiizh dízdiin dóó biʼaan tááʼ yihah góneʼ ándahwiiʼaahii dahwéeʼaahgo, Nephi bidineʼé bitahgóó doo ahináádiijah da tʼáá hazhóʼó sodizin biyiʼ tʼáá díkwíhígo ádaa dadzódlí, éí biniinaa diné łaʼ tʼóóyó ałtsʼą́ąjįʼ daazlį́į́ʼ, éí ákóhoodzaaʼígíí dízdiin dóó biʼaan tááʼ nahááhgo hashtʼeilyaa.

2 Áádóó diné doo ahináádiijah da dízdiin dóó biʼaan dį́į́ʼ yihahgo, éí doodaiiʼ dízdiin dóó biʼaan ashdlaʼ yihah góneʼ doo yéego saad dahółǫ́ǫ da.

3 Áádóó baa hoolzhiizh dízdiin dóó biʼaan hastą́ą́ yihahgo, aooʼ, tʼáá ląʼí saad dahółǫ́ dóó tʼáá ląʼí ałtsʼą́ąjįʼ daazlį́į́ʼ, áko biniinaa tʼóó ahayóí Zarahemla bikéyahdę́ę́ʼ chʼídahaazná, áádóó náhookǫs kéyahjigo tʼáá daabí dadooleełgo yiih dahaazná.

4 Áádóó tʼáá íiyisíí danízaadgóó daníná, ákótʼáo tó ląʼí dah naazyį́įjįʼ dóó tooh ląʼí danilį́įjįʼ.

5 Aooʼ, dóó áajigo ndi tʼáá ałtso kéyah bikááʼgóó háánootʼą́, tʼáá kéédahojitʼį́ bohónéídzą́ą́góó dóó tsin dahólǫ́ǫ́góó, háálá tʼah bítséedi akǫ́ǫ́ kéyahgóó łaʼ kéédahojitʼį́į́ ńtʼę́ę́ʼ.

6 Áádóó áko kéyah bikááʼgóó tʼáá yáʼáhootʼééh, tʼáá hazhóʼó tsin éí bąąh ádin; ndi tʼóó báhádzidgo dahoochxoʼígíí biniinaa diné ákǫ́ǫ́ kéédahatʼínée díí kéyah bitsʼą́ą́dóó doo chohooʼį́į da deiłníí ńtʼę́ę́ʼ.

7 Áádóó tʼáá díkwíhí tsin kéyah bikááʼ yilʼá, ákótʼée ndi diné ákǫ́ǫ́ adahaznánígíí hashtlʼish tsé nádleehé yee nidaalnishgo ayóó deiyiichį́į́ʼ; éí bąą hooghan hashtłʼish tsé nádleehé yee ádeiyiilaa, éí yiiʼ dabighan ńtʼéé.

8 Áádóó baa hoolzhiizh ałʼąą dínéestʼą́ dóó ałtsʼá dahaazná, áádóó shádiʼáahjigo dóó náhookǫsjigo kéyahgóó adahaazná, áádóó nidínéestʼą́ągo nahasdzáán tʼáá siʼáán ńtʼééʼ bikááʼgóó adahaazná, tónteel shádiʼáahjigo dóó tónteel náhookǫsjigo, tónteel eʼeʼaahjigo dóó tónteel haʼaʼaahjigo.

9 Áádóó diné náhookǫsjigo kéédahatʼínígíí éí níbaal yiiʼ dabighan, dóó hooghan hashtlʼish tsé nádleehé biyiʼ, bíniʼ tsin náhodoodleeh danízingo tsin bináágóó dadeidínéésą́, áko náás hodeeshzhiizhgo tsin yee bighan ádeiłʼį́į́ doo, aooʼ, bikin dah naazhjaaʼgóó, dóó diyin bighan naaznilgóó, dóó yiiʼ sodadilzingóó, dóó dahodísingóó, dóó tʼáá ałtso ałʼąą átʼéego kin naaznilgóó.

10 Áádóó baa hoolzhiizh tsin tʼáá íiyisíí doo dahólǫ́ǫ da náhookǫs kéyahdi, tʼáá ląʼí ákǫ́ǫ́ yił daʼníłʼéél.

11 Áádóó áko éí náhookǫsjigo diné kéédahotʼinígíí kin dashijaaʼ ádeidoolíiłgo chodeidoołʼííłígíí yee yíká ííjééʼ, tʼáá áłah tsin dóó hashtlʼish tsé nádleehé bee.

12 Áádóó baa hoolzhiizh ląʼí da éí Ammon bidineʼé ádaatʼį́, éí Laman dineʼé yitsʼą́ą́dóó ndaʼhaazhchį́, éí ałdóʼ díí kéyahgóó aheezná.

13 Áádóó áko ląʼí da díí diné ádaʼiilaaígíí baa ndaʼíísdzoh, ląʼí díí diné tʼáá bí ádeiyiilaa, éí tsʼídá nizhónígo ályaa dóó tʼáá íiyisíí ląʼígo sinil, éí bí bidadeitʼiʼígíí baa haneʼ.

14 Ákondi shooh, áko tʼááłáʼígíí neeznádiin bideitʼą́ągo díí diné baa hóóneʼ, aooʼ, Laman dineʼé dóó Nephi dineʼé yaa halneʼ, bidaʼanaaʼ dóó ałchʼįʼ ndadiikʼąąh, dóó ałtsʼą́ą́jí danilínígíí, dóó yee ndaʼahinitinígíí, dóó diyingo bił ííshją́ą́ ádaalyaaígíí, dóó tółkááʼ ndaʼayéhígíí, dóó tsin naaʼeeł ádeiłʼínígíí, dóó diyin bighan ádeileʼígíí, dóó yiiʼ sodadilzinígíí dóó yiiʼ dahodísinígíí, dóó Diyinkʼehgo dahinánígíí, dóó bąąhági ádaatʼínígíí, dóó nidaʼałtseedígíí, dóó daʼniʼįįhígíí, dóó adaʼiiyeehígíí, dóó tʼáá ałʼąą átʼéego bąąhági ádáátʼįįdígíí dóó atsʼíís yee tsiʼnidaaskaiʼígíí, éí díí ndaʼíísdzohígíí biyiʼ doo baa hodoonih da.

15 Ákondi shooh, ląʼí ndaʼíísdzoh dóó ląʼí ałʼąą átʼéego badahaneʼ, dóó Nephi dineʼé íiyisíí yaa ádahalyą́ą́ ńtʼę́ę́ʼ.

16 Áádóó ałkééʼ daʼáchííhgo Nephi dineʼé ndaʼasdzohígíí ałkééʼ deiyíjaah ńtʼéé, azhą́ ndaʼiisííʼ dóó ndabiʼdiltseed ndi, adaʼiizhjaaʼ, dóó ndabiʼdilzheeh, dóó ndabidiʼneeskaad, dóó nahasdzáán bikáaʼjįʼ daʼníłtsʼą́ąjigo ałtsʼádabidiʼneeskaad, dóó Laman dineʼé yił ahíikai honáásdóó Nephi dineʼé doo bee biʼdoojíí da, bąąhági ádaatʼį́, dóó daʼałchin, dóó tʼóó báádahadzid, aooʼ, Laman dineʼé daazlį́į́ʼ.

17 Áádóó shaa haneʼ áshléhígíí baa nínáádiisdzá, áko, saad bee yááłtiʼ yę́ę biláhooshzhiizh éí bikééʼdóó ayóó átʼáo saad ałkʼijįʼ adajiiznil, dóó hadahojinííłchaad, dóó anaaʼ, dóó ałtsʼádaʼiisdeeʼ, Nephi bidineʼé bitahgóó.

18 Ándahwiiʼaahii dahwéeʼaahgo dízdiin dóó biʼaan hastą́ą́ nááhai.

19 Áádóó baa hoolzhiizh tʼahdii yéego kéyah bikááʼgóó ałkʼijįʼ daʼídlį́, aooʼ, dízdiin dóó biʼaan tsostsʼid yihahdi hoolzhish ndi, dóó ałdóʼ dízdiin dóó biʼaan tseebíí yihahgi ndi.

20 Ákótʼée ndi Helaman ánihwiiʼaahii tʼáá ákótʼáo dóó ahehoołtʼéego nahwiiʼaah ńtʼę́ę́ʼ, aooʼ, bee hazʼą́ bee ndahwiistʼáanii, dóó Diyin God bibee hazʼáanii yikʼehgo eʼéłʼį́į ńtʼéeʼ; áádóó áłahjįʼ Diyin God yáʼátʼéehii yinááł iiłʼį́į ńtʼéeʼ; dóó bizhéʼé yikʼehgo eʼéłʼį́į ńtʼę́ę́ʼ; áko kéyah bikááʼgóó náásdeeyá.

21 Áádóó baa hoolzhiizh naaki biyeʼ. Alą́ąjįʼ naagháhígíí éí Nephi yee yiyíízhiʼ, áádóó akééʼdóó naagháhígíí éí, Lehi yee yiyíízhiʼ. Áádóó Diyin Bóhólníihii yá hodísingo biyaa hooʼaʼ.

22 Áádóó baa hoolzhiizh anaaʼ dóó ałkʼijįʼ daʼídlį́ yę́ę ábidiʼniidįįd, éí ałchʼį́į́dí yileełgo, Nephi dineʼé bitahgóó, éí dízdiin dóó biʼaan tseebíí niihááh góneʼ ándahwiiʼaahii yikʼidahwéeʼaah ńtʼę́ę́ʼ.

23 Áádóó baa hoolzhiizh ándahwiiʼaahii dízdiin dóó biʼaan náhástʼéí yihah góneʼ dahwéeʼaahgo, tʼáá áłahjįʼ kéyah bikááʼgóó kʼé bee hazʼą́ągo daʼíníísh, tʼáá hazhóʼó nanitʼingo dahʼooldah éí Gadianton aniʼįįhii kéyah hashtʼedahoolyaagi bá hazʼą́ągo áyiilaa, íídą́ą́ʼ nahatʼájí binaatʼáanii doo bił béédahózin da; áko doo kéyahdóó ábiʼdisdįįd da.

24 Áádóó baa hoolzhiizh éí yihah góneʼ ayóó átʼéego sodizin dínéestʼą́ áko dimííl yázhí bilááhgóó sodizin yihidiikai dóó ádaa ńdaʼooskango tó bee dabiʼdoolzį́į́ʼ.

25 Áádóó ayóó átʼéego sodizin ąą dínéestʼą́ągo, dóó diné tʼóó ahayóí akʼihojídlí bikʼijįʼ kólyaa, high priest dóó ndaʼnitiní danilínígíí ndi ił hóyééʼ bilááhgóó bił ádahoodzaa.

26 Áádóó baa hoolzhiizh Diyin Bóhólníihii binaanish tó bee alzį́į́h yee dínéestʼą́ dóó, tʼóó ahayóí iiʼ sizíinii, Diyin God bisodizin yee łąʼí silį́į́ʼ, dimííl yázhí bilááhgóó ndi.

27 Díigi átʼáo bééhoozin tʼáá ałtsoní ádeinízinígíí Diyin Bóhólníihii yaa joobaʼ, bijéí yee tʼáá aaníí ádaaníigo, Diyin bízhiʼ dílzinii yichʼįʼ sodadilzin.

28 Aooʼ, nihił bééhoozin tʼáá ałtsoní yáʼąąsh biʼaanídítį́į́h bichʼįʼ ąą ádaalneʼ, tʼáá háiida Jesus Christ, Diyin God biYeʼ, bízhiʼ deiyoodlánígíí.

29 Aooʼ, tʼáá háiida ádeinízinígíí Diyin God bizaad da yaa ákodadínóozįįł, éí ayóó bidziil dóó hiná, éí biʼiiníziinii tʼáá átʼé binaʼagiz dóó yee tsistłʼaʼ niʼiiłcheihii dóó doo biyáʼátʼéehii nahjįʼ kwííłʼį́, dóó diné Christ yikééʼ yigááłígíí kʼéházdon dóó ahoołtsʼóózí honítʼiʼ góneʼ chʼíídoolóós éí bąąhági ádaatʼíinii hooʼáálgóó tiʼhooʼnííh bidoosiłígíí átʼé.

30 Áádóó biiʼ sizíinii, aooʼ, biiʼ naazíinii doo daatsaahii, Diyin God bílaʼ binishnáájí, yáʼąąsh hazʼą́ądi doogááł, éí Abraham, dóó Isaac, dóó Jacob, dóó tʼáá ałtso dabizází dahodisinii yił dahdínóobįįł, doo éí áádę́ę́ʼ hánáádookah da.

31 Áádóó éí yihahígíí biiʼ Zarahemla kéyahdi áłahjįʼ ił hózhǫ́ bił dahólǫ́, dóó tʼáá átʼé bináágóó ndahazʼánígíí biiʼ, kéyah tʼáá átʼé Nephi dineʼé bee bídahólnííhgóó ndi.

32 Áádóó baa hoolzhiizh dízdiin dóó biʼaan náhastʼéí ííhahjįʼ kʼé dóó ayóó átʼáo ił hózhǫ́ hólǫ́ǫgo ahoolzhiizh; aooʼ, áádóó tʼáá kʼé dóó ayóó átʼáo ił hózhǫ́ hólǫ́ǫgo ándahwiiʼaahii dahwéeʼaahgo ashdladiin ałtso nááhai.

33 Áádóó ashdladiin dóó biʼaan łaʼ góneʼ ándahwiiʼaahii dahwéeʼaahgo kʼé ałdóʼ tʼahdii hólǫ́ǫ́ ńtʼę́ę́ʼ, tʼáá hazhóʼó ádaahodzódlí tʼéiyá sodizin biiʼ hooleeł silį́į́ʼ—Diyin God bisodizin biiʼ éí dooda, ákondi Diyin God bisodizin biyiʼ daʼniitah daniidlį́ daanínígíí bijéí biyiʼ.

34 Áádóó ádaa hodzódlí yee dah diikai, bikʼéí tʼóó ahayóí yichʼįʼ ndahwiiłnáago ndi. Áko díí éí ayóó átʼáo doo yáʼáshóonii átʼé, éí diné aʼohgo ntsédaakeesígíí yéego tiʼdahooníihgo doo yáʼádaatʼéehii bichʼįʼ ndahwiisnááʼ, áádóó ayóó átʼáo ká yiyiʼ chʼékai.

35 Ákótʼée ndi áłahjįʼ sodadilzin dóó chʼiyáán ádąąhdeitʼį́, dóó aʼohgo ídlį́ yéego dóó tsʼídá yéego bidziilgo yee dadínéesą́, áádóó Christ woodlą́ dóó tsʼídá yéego yadaʼóólíigo, biiʼ sizíinii ił hózhǫ́ dóó biiʼ háádahwiisdoh bił hooleʼ, aooʼ, áko bijéí daniłtólí dóó hadaałtʼé daazlį́į́ʼ, éí hadaałtʼé ádaalyaago Diyin God bijéí yaa deideezʼánígíí biniinaa.

36 Áádóó baa hoolzhiizh ashdladiin dóó biʼaan naaki yíhai kʼé bił naaztʼiʼgo bee ahoolzhiizh, tʼáá hazhóʼó tsʼídá yéego ádaa hodzódlí diné bijéí biyiʼ daazlį́ʼígíí tʼéiyá, háálá ayóó daʼatʼį́į doo kéyah yiiʼ náás deeskaiʼígíí biniinaa, áádóó tʼáá ákwíí jį́ yee yikékʼeh deeskai.

37 Áádóó baa hoolzhiizh ándahwiiʼaahii ashdladiin dóó biʼaan tááʼ yihah góneʼ dahwéeʼaahgo, Helaman dah nídiidzá, áádóó biyeʼ Nephi alą́ąjįʼ naaghahígíí bitséskʼeh góneʼ nahaʼáágo dahnááneezdá. Áádóó baa hoolzhiizh ánihwiiʼaahii tʼáá ákótʼáo dóó ahehoołtʼéego nahaʼáá ńtʼę́ę́ʼ; aooʼ, dóó Diyin God bibee hazʼáanii yikʼeh hołʼį́į́ ńtʼę́ę́ʼ dóó bizhéʼé hooʼáłę́ęgi átʼáo hooʼááł ńtʼę́ę́ʼ.