1 Áádóó baa hoolzhiizh tʼáá díí yihah góneʼ, áko shooh, Nephi éí hastiin Cezoram wolyéego ándahwiiʼaahii-dah sidáádóó hooʼááł yę́ę yeidiníʼą́.

2 Háálá bibee hazʼáanii dóó bindahatʼá hazʼą́ą́dóó éi diné ádaanínígíí bikʼehgo hadadilyaa, dóó doo yáʼáshóonii ádaatʼį́ daazlį́ʼígíí éí yáʼátʼéehii nídeidiiláhígíí yilááh ánéelą́ą́ʼ silį́į́ʼ, éí bąą ábidiʼdooldįįłgo baa hoolzhiizh, háálá bee hazʼáanii deiyííłchxǫʼ.

3 Aooʼ, doo díí tʼéiyá da; diné doo ndabíʼdídzilígíí danilį́, honáásóó bee hazʼáanii éí doodaiiʼ tʼáá ákohgo ánahwiitʼaah doo nidabiloʼ da silį́į́ʼ, tʼáá hazhóʼó ábidiʼdooldįįłgo tʼéiyá.

4 Áádóó baa hoolzhiizh Nephi éí diné bąąhági ádaatʼínígíí yąąh niníyá; dóó ándahwiiʼaahii-dahsidáádóó yę́ę yitsʼáníyá, dóó Diyin God bizaad yee naʼnitingo abiyííłką́, dóó biʼkis Lehi ałdóʼ, tʼáá naʼnitingo abiyííłką́.

5 Háálá bizhéʼé Helaman saad yee bichʼįʼ haadzíʼę́éʼ yénáálniiʼ. Áádóó díí saad yee yichʼįʼ haadzííʼ:

6 Áko shooh, shiyeʼ nohłíinii, Diyin God bibee hazʼáanii bénáłniihgo bikʼeh honołʼį́į doo nihíínishní; áádóó díí saad diné bee bichʼįʼ hadohdzih. Áko shooh, tsʼídá áłtsé nihishchíinii Jerusalem kéyahdę́ę́ʼ chʼíníʼazhígíí bizhíʼ bee nihíízhiʼ; áádóó bénáłniihgo binaanish áyiilaa yę́ę béédołnih; dóó yindaashnish yę́ę bénáłniihgo bee haʼoodzihígíí nihił bééhodoozįįł, dóó ałdóʼ bee naʼasdzo, éí diné yáʼátʼéehii danilį́į́ ńtʼę́ę́ʼ.

7 Éí bąą, shiyeʼ nóhłíinii, yáʼátʼéehii ółʼį́į dooleeł nihííníshní, áko ánihidiʼníi dooleeł, dóó ałdóʼ baa naʼiisdzo doo, tsʼídá bee hadaʼiisdzííʼ dóó bá nídaʼiisdzo yę́ęgi átʼée doo.

8 Áádóó áko shiyeʼ nohłíinii, áko shooh nááná łaʼ bee náánihíínishníi doo, éí nisinígíí éiyá, doo bee ádaazíínohdlíi da dooleeł, ákondi díí beʼdoohłííł áko yáʼąąshdi daʼílíinii ndoohnił; aooʼ, éí hoolʼáágóó éí doo ninítʼiʼii átʼé, éí doo bił yóóʼáhodoogááł da, aooʼ áko hoolʼáágóó iiná ílíinii ílį́įgo aaʼiilyéhígíí nihí dooleeł, díí biniyé nihizází baa daheesyá daniidzin.

9 O béínáłniih, béínáłniih, shiyeʼ nóhłíinii, aláahdi naatʼáanii Benjamin saad bidineʼé yee yichʼįʼ haadziʼę́ę; aooʼ, béínáłniih doo nááná łahgi átʼáo diné yisdádootʼish da éí doodaiiʼ doo nááná łahgi átʼéego ahóótʼiʼ da, Jesus Christ bidił yee nináʼnídláhígíí tʼéiyá binahjįʼ, éí náasdi doogááł; aooʼ, béínáłniih éí nihokááʼ dineʼé yisdeidooʼish yiniyé nahasdzáán yikáaʼjįʼ doogááł.

10 Áádóó ałdóʼ béínáłniih Amulek saad Zeezrom yee yichʼįʼ haadzííʼ, Ammonihah kin dashijaaʼgi; háálá kwíidííniid Diyin Bóhólníihii tʼáá aaníigo bidineʼé yisdéídooʼish, ákondi bąąhági ádaatʼį́įgo doo yisdéídooʼish da, ákondi bąąhági ádaatʼéii yitsʼą́ąjį yisdéídooʼish.

11 Áádóó nihiTaaʼ nilíinii bitsʼą́ą́dóó adziilii baa doolyééł bąąhági ádaadzaaígíí yitsʼą́ą́dóó yisdéidooʼish ádaa ńdaʼooskanígíí binahjįʼ; éí bąą bá nidaalʼaʼí ayiisaʼ éí ádaa náʼookąąh bił siláhígíí yaa dahalneʼ, éí binahjįʼ báNináʼnídláii bibeʼadziil choidooʼįįł, éí bee biiʼ sizíinii yisdádadootʼish.

12 Áádóó áko, shiyeʼké, béínáłniih, béínáłniih niháNináʼnídláii bikááʼdóó haʼdoohtłʼį́į́ł, éí Christ átʼį́, Diyin God biYeʼ, éí íiyisíí bikááʼdóó haʼdoohtłʼį́į́ł; áko biʼiiníziinii biníyol ntsaaígíí nihichʼįʼ kóyiilaago, biníyol bitsʼą́ą́dóó tsiniltłʼish kwííłʼį́įgo, bilóh dóó yéego nahałtin nihikʼijįʼ kóyiilaago, doo nihikʼi bidziil da dooleeł doo hóyééʼgóyaa anihidoodzį́į́s da dóó ahoolʼáágóó tiʼhooʼnííh góyaa, háálá tsé bikááʼ soozínígíí biniinaa, éi tʼáá aaníigo haʼootłʼin, éí haʼootłʼinígíí diné yikááʼdóó dahadiitłʼingo doo nahjįʼ kóbidiʼdoolnííł da.

13 Áádóó baa hoolzhiizh díidí saad éiyá Helaman biyeʼké yee neineeztą́ą́ʼ; aooʼ, ląʼí tʼáadoo ńdaháasdzoohígíí yee neineeztą́ą́ʼ, áádóó ląʼígo ndaháasdzooʼígíí ałdóʼ.

14 Áádóó bizaadígíí yénálniih; dóó éí yinahjįʼ dahdiiʼáázh, Diyin God bibee hazʼáanii yikʼeh hółʼį́įgo, áko Diyin God bizaad Nephi bidineʼé tʼáá ałtso yee neidínóotʼį́į́ł, Bountiful kin dashijaaʼdóó bee hahodoolzhish;

15 Áádóó éí Gid kin dashijaaʼgóó, Gid kin dashijaaʼdóó dóó níléí Mulek kin dashijaaʼjįʼ;

16 Áádóó łaʼ kin dashijaaʼ dóó nááná łaʼ dashijaaʼjįʼ, Nephi bidineʼé shádiʼáahjigo kéédahatʼínígíí tʼáá átʼé yitah tádííʼáázh, áádóó Zarahemla kéyahjigo, Laman dineʼé bitahgóó.

17 Áádóó baa hoolzhiizh ayóó átʼáo adziilgo naʼneeztą́ą́ʼ, Nephi dineʼé bikʼijįʼ danilį́įgo atsʼáhaaskai yę́ę neinitingo hónáásdóó deidiiłheel, hónáásdóó baa daheeskai dóó bąąhági ádaatʼínée yaa dahoolneʼ dóó ádaa ńdaʼooskango tó bee dabiʼdoolzį́į́ʼ, áádóó Nephi dineʼé tsxį́įłgo yaa nákai doo yáʼáshǫ́ǫ́góó atídeiyiilaayę́ę hashtʼeńdeidoodlííł biniyé.

18 Áádóó baa hoolzhiizh Nephi dóó Lehi ayóó átʼáo adziilii dóó óhólnííh bee hólǫ́ǫgo Laman dineʼé neineeztą́ą́ʼ, háálá adziil dóó óhólnííh yinahjįʼ hadoodzihgo beiyílyá, áádóó haʼátʼíí yee hadoodzihígíí ałdóʼ beiyílyá.

19 Ákohgo haadzíiʼgo Laman dineʼé ayóó átʼáo yikʼee tsídadeesyiz, yinahjįʼ akééʼ niikai, tseebíí dimííl yázhí ánéilą́ągo Laman dineʼé Zarahemla kéyah dóó bináágóóʼígíí ádaa ńdaʼooskango tó bee dabiʼdoolzį́į́ʼ, dóó dabizhéʼé bibee ádaʼoolʼįįł doo yáʼádaashónígíí bił ííshją́ą́ ádaalyaa.

20 Áádóó baa hoolzhiizh Nephi dóó Lehi dahdiiʼáázh Nephi kéyahjigo.

21 Áádóó baa hoolzhiizh Laman dineʼé bindaaba ahí dabisnááh dóó yah abiʼdooʼnil; aooʼ, éí Ammon dóó bikʼis biyiʼ yah abiʼdooʼnil yę́ę átʼé éí Limhi bá nidaalʼaʼí yah adabiiznil.

22 Áádóó yah adabiʼdooʼnilgo ląʼí da yiską́ chʼiyáán yąąh deiʼį́įgo, áko shooh, biʼdootʼą́ góneʼ yił yahííjééʼ áko yił chʼídoojahgo nideidoołtsxił biniyé.

23 Áádóó baa hoolzhiizh Nephi dóó Lehi kǫʼ nahalingo bináztʼiʼ, áko doo tʼáá kʼad bílaʼ yee yidoolchid da háálá abidoołkʼą́łígíí yináldzid. Ákótʼée ndi, Nephi dóó Lehi tʼáadoo abiʼdoolkʼą́ą́ʼ da; dóó kǫʼ ałníiʼgi sizį́į ndi tʼáadoo abiʼdoolkʼą́ą́ʼ da.

24 Áádóó kǫʼ yadadiitʼiʼ bináztʼiʼgo deiyiiłtsą́, dóó áko tʼáadoo abiiłką́ą́ʼgóó, bijéí haʼólní silį́į́ʼ.

25 Háálá Laman dineʼé doo dabidoosiłgóó yaa ákodaniizį́į́ʼ; áádóó doo tʼáá áhánígóó bichʼįʼ dadikááh da, ákondi chʼééh hadaadziih nahalingo dadeesxizgo naazį́.

26 Áádóó baa hoolzhiizh Nephi dóó Lehi hachʼįʼ yiizįʼ dóó hachʼįʼ haadzííʼ, kóníigo: Tʼáadoo nídaałdzidí, háálá áko shooh, Diyin God díí ayóó átʼáo áhooníłígíí nihił ííshją́ą́ áyiilaa, éí nihił ííshjáá ályaa doo danihidoosił da dóó doo nanihidoołtsxił da.

27 Áádóó áko shooh, díí saad yee haadzíiʼgo, nahasdzáán yéego nahasnááʼ, áádóó yah abiʼdooʼnildi bitsé názʼą́ niʼjįʼ ndoołdas nahalingo nahasnááʼ; ákondi shooh, tʼáadoo nááłdááz da. Áádóó áko shooh, yah adabiʼdiisnilígíí éí Laman dineʼé dóó Nephi dineʼé átsʼą́ą́jí daazliʼę́ę́ʼ ádaatʼį́.

28 Áádóó baa hoolzhiizh diné kʼos diłhiłgo bikʼi hooleʼ, áádóó tsʼídá doo yáʼátʼééhgóó nídaasdzíidgo bikʼi hooleʼ.

29 Áádóó baa hoolzhiizh kʼos diłhił bilááhdę́ę́ʼ anééʼ bichʼįʼ haadzííʼ, kóníigo: Ádaa ńdaʼoohkąąh, ádaa ńdaʼoohkąąh, dóó shá nidaalʼaʼí kʼadí tʼáadoo ndaałtseedí éí saad yáʼátʼéehii yee nihił hodoolnihgo nihichʼįʼ ííłʼaʼ.

30 Áádóó baa hoolzhiizh díí iinééʼ deidiiztsʼą́ąʼgo, doo éí adiʼní nahalingo haʼoodzííʼ da, éí doodaiiʼ doo éí ayóó átʼáo tʼáá naʼníleʼdii haʼoodzííʼ da, ákondi shooh, hazhóóʼógo haałtʼéego haʼoodzííʼ, tʼáá ayiʼíjįʼ yáʼátiʼ nahalingo, dóó tʼáá hwiiʼ sizíinii deideesnááʼ—

31 Áádóó azhą́ hazhóóʼógo haałtʼéego haʼoodzííʼ ndi, áko shooh nahasdzáán yéego nahasnááʼ, áádóó yah abiʼdooʼnildi bitsé názʼą́ nááhideesnááʼ, niʼjįʼ ndoołdas nahalingo; áádóó áko shooh kʼos diłhił yę́ę, éí bikʼi hooleʼę́ę, tʼáadoo nahjįʼ kódzaa da—

32 Áádóó áko shooh iinééʼ náádeidiiztsʼą́ą́ʼ, kóníigo: Ádaa ńdaʼoohkąąh, ádaa ńdaʼoohkąąh, háálá yáʼąąsh hazʼą́ądi baa hoolzhiizh; dóó shá nidaalʼaʼí kʼadí tʼáadoo nidaałtseedí. Áádóó baa hoolzhiizh nahasdzáán ninááhasʼnááʼ, dóó tsé nazʼá nááhideesnááʼ.

33 Áádóó ałdóʼ táadi anééʼ náádiistsʼą́ą́ʼ, dóó saad tsʼídá danizhónígíí yee hahaasdzííʼ éí nihokááʼ dineʼé yee hadoodzihgo doo bá bíighah da; dóó tsé nazʼą́ nááhideesnááʼ, dóó nahasdzáán nááhideesnááʼ ałtsʼádooltǫǫł nahalingo.

34 Áádóó baa hoolzhiizh Laman dineʼé kʼos diłhił bikʼi hooleʼígíí biniinaa doo dahdadínííchééh da; aooʼ, áádóó náhádzid bikʼi hooleʼígíí biniinaa ałdóʼ doo dahidiʼnááh da.

35 Áko łaʼ bitahdóó Nephi dineʼé nilį́įgo biʼdizhchį́ yitsʼą́ą́dę́ę́ʼ, éí Diyin God bisodizin atah nilį́į́ ńtʼę́ę́ʼ ndi yitsʼą́ą́jí silį́į́ʼ.

36 Áádóó baa hoolzhiizh éí názyiz, áádóó áko shooh, kʼos diłhiłígíí biyiʼ Nephi dóó Lehi biniiʼ yiyiiłtsą́; áádóó áko shooh, dóó tʼáá áłah tʼáá íiyisíí bitsʼádinílííd, Diyin yá nidaalʼaʼí nidahalingo. Áádóó tʼáá áłah yáʼąąsh góde deizʼį́įʼgo yiyiiłtsą́; éí doodaiiʼ háí shį́į́ yiníłʼį́ nahalingo yichʼįʼ ayóó íítsʼaʼgo yáłtiʼ.

37 Áádóó baa hoolzhiizh díí hastiin ákweʼé dah ooldahígíí ayóó íítsʼaʼgo yichʼįʼ haadzííʼ, áko ndadooyisgo de dadidóoʼįįł. Áádóó áko shooh, adziil baa dahaasyá áko ndaazyiz dóó de dadéíʼį́į́ʼ; dóó Nephi dóó Lehi biniiʼ deiyiiłtsą́.

38 Áádóó hastiin kódeidííniid: Áko shooh, díí tʼáá átʼé haʼátʼíísh yaa halneʼ, dóó háísh éí díí hastóí yił ałchʼįʼ yádaałtiʼ.

39 Áko hastiin éí Aminadab joolyé. Áádóó Aminadab ábíłní: Diyin God bá nidaalʼaʼí yił ałchʼįʼ yádaałtiʼ.

40 Áádóó baa hoolzhiizh Laman dineʼé ádabiłní: Haash dadiiʼnííł, áko díí kʼos diłhił nihikʼi hooleʼígíí nahjįʼ nihá kódoolnííł?

41 Áádóó Aminadab ábiłní: Ádaa ńdaʼdoohkąął, dóó iinééʼ yéego bichʼįʼ sodadołzin, Christ deisoodląądjįʼ índa, díí éí Alma, dóó Amulek, dóó Zeezrom yee ndanihineeztą́ą́ʼ; dóó kódaohdzaago tʼéiyá, kʼos diłhił nihikʼi hooleʼígíí nahjįʼ kódoolnííł.

42 Áádóó baa hoolzhiizh tʼáá átʼé iinééʼ nahasdzáán nahiyiłnánígíí yichʼįʼ sodadiʼniilzin; aooʼ, tʼáá yichʼįʼ sodadiilzingo kʼos diłhił bikʼidahooleʼígíí bá nahjįʼ kólyaa.

43 Áádóó baa hoolzhiizh dego dazhdéíʼį́įgo, dóó kʼos diłhił bikʼidahooleʼę́ę bá nahjįʼ kólyaago deiyiiłtsą́, áko shooh, tʼááłáʼí nízínígo, kǫʼ yadadiitʼiʼ, bináztʼiʼgo deiyiiłtsą́.

44 Áádóó Nephi dóó Lehi bíniʼ sizį́; aooʼ, dóó bináztʼiʼ; aooʼ, kǫʼ dookʼą́ą́ł yiniʼ sizį́ nahalingo, ákondi tʼáadoo atíbiilaa da, éí doodaiiʼ yah abiʼdooʼnildi tsé nazʼá tʼáadoo diiltłah da; áádóó ił hózhǫ́ doo baa haʼdoodzih átʼéhę́ę́ʼ biiʼ dahazlį́į́ʼ dóó éí íł hózhǫ́ ayóó átʼéii biiʼ hadadéébįįd.

45 Áádóó áko shooh, Diyin God biʼIiʼ Sizį́ Diyinii yáʼąąshdę́ę́ʼ adaaldoh, dóó bijéí biiʼ dahazlį́į́ʼ, dóó kǫʼ nahalingo biiʼ hadadéébįįd, áádóó saad tsʼídá nizhóníʼígíí yee yádááłtiʼ daazlį́į́ʼ.

46 Áádóó baa hoolzhiizh iinééʼ léiʼ bichʼįʼ haadzííʼ, aooʼ, iinééʼ tsʼídá nizhónígíí, tʼáá ayiʼíjįʼ yáʼátiʼ nahalingo, kóní:

47 Áhodiilzééh, áhodiilzééh nihił hólǫ́ǫ doo, háálá Tsʼídá Ayóó Ííníshʼníinii deinohdlánígíí biniinaa, éí nahasdzáán hadilnééhyę́ędą́ą́ʼ hiná.

48 Áádóó áko, díí deidiiztsʼą́ąʼgo dego dadéíʼį́į́ʼ háádę́ę́ʼ iinééʼ ánínígíí deidoołtséełgo; áádóó áko shooh, yáʼąąsh ąą ádzaago deiyiiłtsą́; áádóó Diyin yá nidaalʼaʼí yáʼąąshdę́ę́ʼ adáákai dóó ndabineeztą́ą́ʼ.

49 Áádóó táadi neeznádiin diné yiltʼéego díí deiyiiłtsą́ dóó deidiiztsʼą́ą́ʼ; dóó dah doohkááh dóó tʼáadoo nihiłdahiyóíʼí, éí doodaiiʼ tʼáadoo nihił naaki danilíní biʼdooʼniid.

50 Áádóó baa hoolzhiizh dah diikai, dóó diné ndeineeztą́ą́ʼ, deidiiztsʼą́ʼę́ę dóó deiyiiłtsánée tʼáá ałtso kédaayahgóó yaa ndahasneʼ, áko Laman dineʼé ląʼí da daboosdląąd, háálá ayóó átʼáo tʼáá ániigo bił dahóóneʼígíí biniinaa.

51 Áádóó tʼáá aaníigo daboosdląądígíí anaaʼgo yee ndaabaah yę́ę niʼ nidayiiznil, áádóó daʼoołchʼį́į́d yę́ę dóó dabizází bibee ádaʼoolʼįįł yę́ę ałdóʼ.

52 Áádóó baa hoolzhiizh kéyah yee adídahoosniiʼ yę́ę Nephi dineʼé yaa nídeiyiisnil.