1 Áádóó baa hoolzhiizh ashdladiin dóó biʼaan dį́į́ʼ yihah góneʼ ląʼí da sodizin daʼatahígíí ałkʼijįʼ daazlį́į́ʼ, dóó ałdóʼ diné ałkʼinéíjah, áko ląʼí da ndaʼahistseed.

2 Áádóó akʼijįʼ ńdíijéʼígíí éí łaʼ nidabiʼdistseed dóó łaʼ éí kéyahdóó chʼíbidiʼnoozood, áádóó Laman dineʼé biʼaláahdi naatʼáanii yichʼįʼ adahineezchą́ą́ʼ.

3 Áádóó baa hoolzhiizh Laman dineʼé éí Nephi dineʼé yikʼijįʼ anaaʼ ádeidoolíiłgo yíká ádaatʼį́; ákondi shooh, Laman dineʼé tʼáá íiyisíí nídaasdzííd, áko akʼijįʼ danilínígíí bizaad doo deiyíistsʼą́ą́ʼ da.

4 Ákondi baa hoolzhiizh ashdladiin dóó biʼaan hastą́ą́ yihah góneʼ ándahwiiʼaahii dahwéeʼaahgo, atsʼą́ą́jí daazlį́ʼígíí Nephi dineʼé bitahdóó Laman dineʼé yił ahíikai, áádóó Nephi dineʼé yikʼijįʼ yá dahóółchįįd; áádóó ałkʼiidoojah biniyé hashtʼeʼádaʼdilnéehgo ałtso yíhai.

5 Áádóó ashdladiin dóó biʼaan tsʼostsʼid yihahgo Nephi dineʼé yichʼįʼ dadeezbaaʼ, dóó ałkʼiijééʼ, aooʼ, áko ashdladiin dóó biʼaan tsʼeebíí yihah góneʼ ándahwiiʼaahii dahwéeʼaahgo Zarahemla kéyah yee ádídahoosniiʼ; aooʼ, dóó kéyah tʼáá ałtso, kéyah Bountifulbíighahjįʼígíí ałdóʼ.

6 Áádóó Nephi dineʼé dóó Moronihah bindaabaahí kéyah Bountiful biyiʼjįʼ abidiʼnoodzóód;

7 Áádóó áadi Laman dineʼé yikʼijįʼ dabidziilgo ádabiʼdiilyaa, tónteel eʼeʼaahdę́ę́ʼ, dóó haʼaʼaahjįʼ; éí Nephi dineʼé yigáałgo tʼááłáʼí jį́ bíighah, bidziilgo ádahoolaa yę́ę bikáaʼgi dóó bindaabaahí ákweʼé náhookǫsjigo yichʼą́ą́h ndaabaah doo.

8 Áádóó áko Nephi dineʼé yitsʼą́ą́jí daazlį́į́ʼyę́ę, Laman dineʼé bindaabaahí ląʼígo yíkáʼííjééʼ, éí Nephi dineʼé yee bídahónííh yę́ę yee ádídahoosnííʼ kéyah shádiʼáahjigooʼígíí. Dóó díí tʼáá átʼé ashdladiin dóó biʼaan tsʼeebíí dóó náhastʼéíjįʼ yihahgo ándahwiiʼaahii dahwéeʼaahgo biiʼ ádahóótʼįįd.

9 Áádóó baa hoolzhiizh ándahwiiʼaahii hastą́diin yihah góneʼ dahwéeʼaahgo, Moronihah bindaabaahí yił ląʼí kéyah yee ádídahoosniiʼ aooʼ, ląʼí kin dah naazhjaaʼ shónídayoostʼeʼ éí Laman dineʼé yee ádídahoosniiʼ ńtʼę́ę́ʼ.

10 Áádóó baa hoolzhiizh ándahwiiʼaahii hastą́diin yihah góneʼ dahwéeʼaahgo ałnííʼdóó daabíhę́ęʼ shónídayoostʼeʼ.

11 Áko ayóó átʼáo Nephi dineʼé bąąh ádaʼasdįįd, dóó bitahdóó ayóó átʼáo nidabiʼdiztseed, díí doo ádzaa da doo ńtʼę́ę́ʼ doo tsʼídá woolchʼį́dígíí bitah hólǫ́ǫgo; aooʼ, éí Diyin God bisodizin atah daniidlį́ danínígíí bitahdę́ę́ʼ.

12 Áádóó díí éí bijéí yee ádaa dadzódlíhígíí biniinaa, ayóó daʼatʼínígíí biniinaa, aooʼ, baa dahojoobaʼígíí atídeiłʼínígíí biniinaa, dichin danilínígíí chʼiyáán yąąh deiʼį́, biʼééʼ ádaadinígíí ééʼ yichʼįʼ yaa danichįʼ, bikʼéí aʼoh danilínígíí biniiʼ ndeiniłtsʼin, dadílzin yę́ę tʼóó yaa daadloh, diyingo áhodooníłígíí dóó diyingo ił ííshją́ą́ ályaaígíí doo bił danilį́į da, nidaʼałtseed, aghadaʼiiʼnííł, dabiyoochʼííd, daʼniʼįįh, aadaʼdilé, ayóó átʼáo saad dahólǫ́ǫ ałkʼinéíjah, Nephi bikéyahjįʼ yooʼahijeeh, Laman dineʼé bitah—

13 Áádóó ayóó bąąhági ádaatʼínígíí biniinaa, dóó beʼadziil yee ádaa dadzódlí, tʼáá bí beʼadziil chodeiyołʼį́įgo beʼalniiʼ; éí bąą tʼáadoo łaʼ deiyiilaiʼí da, ákondi atídabiʼdiilyaa dóó bichʼįʼndahwiisnááʼ, dóó Laman dineʼé adabineeshchą́ą́ʼ, bikéyah kʼasdą́ą́ ałtso bighadahasniljįʼ ndi.

14 Ákondi shooh, Moronihah éí diné ląʼígóó yee neineeztą́ą́ʼ bąąhági ádaatʼínígíí biniinaa, dóó Nephi dóó Lehi ałdóʼ, éí tʼáá áłah Helaman biyeʼ nilį́, éí ląʼígóó diné neineeztą́ą́ʼ, aooʼ, dóó ląʼígo Diyin bikʼeh áhodooníłígíí éí bąąhági ádaatʼínígíí yee yił hodoolnih, dóó haada shąʼ dadoonííł bibąąhági ádaatʼéii doo yaa ádaa ńdaʼooskangóó.

15 Áádóó baa hoolzhiizh ádaa ńdaʼooskan, dóó ádaa ńdaʼooskango tʼáá náás deeskai.

16 Áko ádaa ńdaʼooskango Moronihah yaa ákoniizį́į́ʼ tʼáá hastiʼ ndi daʼníłtsʼą́ą́góó taidííʼeezh, áádóó kin dah naazhjaaʼgóó, binaadeełii dóó bikédayah ałnííʼdóó shońdeiyoostʼeʼ.

17 Áádóó hastą́diin dóó biʼaan tʼááłáʼí nááhai ándahwiiʼaahii dahwéeʼaahgo.

18 Áádóó baa hoolzhiizh ándahwiiʼaahii hastą́diin dóó biʼaan naaki yihah góneʼ dahwéeʼaahgo, Moronihah éí Laman dineʼé doo kéyah yighá náádahodidootʼááł da.

19 Éí bąą kéyah chʼínééłnaʼígíí yighadahodidootʼáałgo yindahaʼáʼą́ą ááʼdeisįįd, háálá Laman dineʼé tʼóó ahayóíʼígíí biniinaa Nephi dineʼé yikʼeh dadidoodlééłígíí doo yí daneelʼą́ą da silį́į́ʼ, éí bąą Moronihah bá ndaabaahí tʼáá átʼé yee ádídahoosnííʼígíí yaa ádahalyą́ągo áyiilaa.

20 Áádóó baa hoolzhiizh, Laman dineʼé tʼóó ahayóí silį́ʼígíí biniinaa Nephi dineʼé tʼáá íiyisíí bikʼee bił dahóóyééʼ, bikʼeh hodidoodleeł danízin, dóó bikʼiʼndooldah, dóó ndadootsxił, dóó abiʼdiʼdooldįįł.

21 Aooʼ, Alma náasdi ádahodoonííł nínée yéédaasniiʼ, áádóó Mosiah ádííniid yę́ę ałdóʼ; áádóó diné doo ndabíʼdídzil da daazlį́įʼgo yaa ákodaniizį́į́ʼ, dóó Diyin God bibee hazʼáanii doo yadaʼóolíi da.

22 Áádóó Mosiah bibee hazʼáanii łahgo ádeiyiilaa dóó tʼóó yikʼi naaskai, éí doodaiiʼ Diyin Bóhólníihii ádííniidgo diné yee ndeineeztą́ą́ʼ yę́ę; dóó bibee hazʼáanii ádeiyiilaa yę́ę deiyííłchxǫʼ, dóó diné bąąhági ádaatʼínígíí daazlį́į́ʼ, hónáásdóó Laman dineʼé nahalingo bąąhági ádaatʼį́.

23 Áádóó bąąhági ádaatʼínígíí biniinaa ląʼí sodizin yitsʼáhaskai; dóó diyingo áhodooníłígíí dóó diyingo ił ííshją́ą́ ályaaígíí doo deiyoodlą́ą da daazlį́į́ʼ; Diyin God bá nahidooʼáłígíí bá bikʼihoolyaa.

24 Áádóó doo dabidziil da daazlį́įʼgo yaa ákodaniizį́į́ʼ, bikʼéí, Laman dineʼé nahalingo, dóó Diyin Bóhólníihii biʼIiʼ Sizį́ Diyinii doo bikʼi déezʼį́į́ʼ da silį́į́ʼ; háálá Diyin Bóhólníihii biʼIiʼ Sizį́ Diyinii atsʼíís doo biiʼ dahodílzinígíí éí doo yiiʼ hólǫ́ǫ da.

25 Éí bąą Diyin Bóhólníihii beʼálilee adziil dóó beʼadziil tʼáadoo bináłtʼéí doo yisdábidooʼish da, háálá biʼoodląʼ yaa dáádiikai dóó bąąhági átʼéii tʼáá íiyisíí tʼóó baaʼihgo bee bił hooʼaʼ; dóó Laman dineʼé bilááh ánéílą́ągo deiyiiłtsą́, áádóó Bóhólníihii Diyin God deiyiiłtsoodgo tʼéiyá doo ábidiʼdooldįįł da.

26 Háálá áko shooh, Laman dineʼé beʼadziil éí tʼáá bí beʼadziil bíneilą́ągo yaa ákodaniizį́į́ʼ, tʼááłáʼí nízínígo diné tʼáá aheełtʼéego dabidziil. Áádóó áko ayóó átʼáo ndaʼiisdzíʼígíí yiih yíkai; aooʼ, áko doo dabidziil da daazlį́į́ʼ, ndaʼiisíhígíí biniinaa, tʼahdoo ląʼí náhááhgóó.