Helaman Binaaltsoos
Nephi dineʼé baa haneʼ. Beʼanaaʼ dóó ałkʼinéíjahyę́ę, dóó ałtsʼákaiígíí. Áádóó ląʼí Diyin yá yádaałtiʼii dadiyinii náásgóó yaa dahalneʼígíí, éí tʼah doo Christ yigháahgo, éí Helaman naʼiizohígíí bikʼehgo, éí Helaman biyeʼ nilį́, áádóó ałdóʼ biyeʼké ndaʼíídzohígíí bikʼehgo ałdóʼ, azhą́ ńléí Christ níyáajįʼ ndi. Áádóó ląʼí da Laman dineʼé ałdóʼ daʼoosdląąd. Éí akééʼ niikaiígíí baa haneʼ. Áádóó Laman dineʼé diyinkʼehgo deíkáahgo baa haneʼ, dóó Nephi dineʼé doo yáʼáshóonii dóó tsʼídá dajoodláhígíí yaa naakaiígíí baa haneʼ, éí Helaman dóó biyeʼké bikʼehgo baa haneʼ, azhą́ ńléí Christ níyáajįʼ ndi, éí Helaman binaaltsoos wolyé, áádóó náás dahaneʼígíí.
Wóltaʼii 1
Pahoran naaki góneʼ aláahdi ánahwiiʼaah silį́į́ʼ áádóó Kishkumen biisxį́—Pacumeni anhwiiʼaahii yitséskʼeh góneʼ dah neezdá—Coriantumr éí Laman dineʼé bindaabaahí dah yidiiʼeezh, Zarahemla hazʼą́ągi akʼeh dadeesdlį́į́ʼ, dóó Pacumeni seesxį́—Moronihah Laman dineʼé yikʼeh deesdlį́į́ʼ dóó Zarahemla yee ádíńdahoosníí, áádóó Coriantumr seesxį́. Jesus bidiʼdoochííłjįʼ 52–50 B.C. yihahgo ádahóótʼįįd.
1 Áádóó kʼad shooh, ándahwiiʼaah Nephi bidineʼé yikʼidahóóʼaahgo dízdiin nídoohahgo bił hahoolzhiizh, Nephi dineʼé bitahgóó tʼáá íiyisíí tiʼhooʼníihgo hooʼaʼ.
2 Háálá áko shooh, Pahoran bizééʼ hazlį́į́ʼ, niʼ bikááʼdóó dah nídiidzá; éí bąą ánihwiiʼaahii-dah náádinóodaałígíí ałkʼis danilínígíí yaa saad dahasłį́į́ʼ, éí Pahoran biyeʼké dajílį́.
3 Díí kódaalyéhígíí ánihwiiʼaahii dah dínóodaałígíí yaa saad dahasłį́į́ʼ, diné ałdóʼ yá dahóółchįįd: Pahoran, Paanchi, and Pacumeni.
4 Áko Pahoran doo tʼáá díí tʼéiyá baʼáłchíní da (háálá tʼááʼ ahayóí) ndi díí tʼéiyá ánihwiiʼaahii deeshłeeł danízingo saad dahółǫ́; éí bąą, diné táaʼgo ałtsʼáákai.
5 Ákótʼée ndi, baa hoolzhiizh Pahoran bidineʼé ádaaníigo éí aláahdi ánihwiiʼaahii dóó Nephi bidineʼé bibee hazʼáanii yikʼideezʼį́į́go bikʼi dadiilniiʼ.
6 Áádóó baa hoolzhiizh Pacumeni, ánihwiiʼaahii dooleełgo doo baa didootʼááłgóó yaa ákoniizį́į́, diné ádaanínígíí biinééʼ yee tʼááłáʼí danílį́įgo áyiilaa.
7 Ákondi shooh, Paanchi, éí áájí diné binaatʼáanii dooleełgo yichą́dadíneilniiʼgo, tʼáá íiyisíí bádahóóchįįd; éí bąą, bikʼis yikʼijįʼ dadooleełgo diné dahyidíniiʼaaʼ.
8 Áádóó baa hoolzhiizh kʼadę́ę kónéehgo, áko shooh, bił ndajizdéelgo, diné ádaanínígíí bikʼehgo baa hwiinístʼįįd, bidiʼyoolyééł hodooʼniid; háálá atsʼą́ą́jí ídlį́ yee hóółchįįd dóó diné tʼáá bí ádeinízingo kéédahatʼínée binahatʼá yiʼniiłchxǫ́.
9 Áko éí diné nihinaatʼáanii dooleeł danízinyę́ę bidiʼyoolyéłígíí bił béédahoozingo, éí bąą bádahóóchįįd, áádóó áko shooh, Kishkumen wolyéhígíí adeisʼaʼ, ánihwiiʼaahii Pahoran dahsidáajįʼ, dóó Pahoran, ánahwiiʼaahii-dahsidáági yiyiisxį́.
10 Áádóó Pahoran bá nidaalʼaʼí bikééʼ dahdiijééʼ; ákondi shooh, Kishkumen ayóó dilwoʼgo biniinaa doo łaʼ diné bélwod da.
11 Áádóó adabiisʼaʼígíí yaa nálwod, dóó tʼáá ałtso yee ahadaʼdeestʼą́, aooʼ, ahoolʼáágóó Ábiilaaígíí yinahjįʼ adeihadaasdzííʼ, áko Kishkumen Pahoran yiyiisxínígíí doo tʼáá háiida yił dahodoolnih da.
12 Éí bąą, Kishkumen éí Nephi bidineʼé bitahgóó doo bééhoʼdílzin da ńtʼę́ę́ʼ, háálá nanitʼingo haditʼéego Pahoran yiyiisxį́. Áádóó Kishkumen dóó yił naaldeehígíí, éí yił ahadaʼdeestʼą́, éí diné yitah, doo hadabidiʼdoolʼį́į́łgóó naaldeeh; ákondi béédaaskaʼígíí éí dabidiʼyoolyéełgo bá ndahastʼą́.
13 Áádóó áko shooh, Pacumeni bikʼihodiiniiʼ, diné ádaaníigo, aláahdi ánihwiiʼaahii dóó Nephi bidineʼé bibee hazʼáanii yikʼideezʼį́į́ dooleełgo; bikʼis Pahoran dah sidáhą́ą góneʼ hooʼááł dooleełgo; éí tʼáá bá ahóótʼiʼ. Áádóó díí tʼáá átʼé ahoodzaa ándahwiiʼaahii dahwéeʼaahgo dízdiin yihahígíí biyiʼ, áajįʼ nááhai.
14 Áádóó baa hoolzhiizh ándahwiiʼaahii dízdiin dóó biʼaan tʼááłáʼí yihah góneʼ dahwéeʼaahgo, Laman dineʼé bindaabaahí doo yídóoltah ánéelą́ąʼgo ahináánéikaigo, dóó béésh hał yaa deiyiiznil, dóó béésh hał nídaazhahí dóó ałtʼį́į́h, dóó kʼą́ą́ bił, dóó ndaabaahí bichʼah bee, dóó béésh ééʼ bee, dóó achʼą́ą́h nidaatʼá tʼáá ałʼąą ádaatʼéego.
15 Áádóó haanáánáʼná áko Nephi dineʼé yikʼiidoojahgo. Áádóó áko hastiin Coriantumr wolyéego biníʼeezh; dóó éí Zarahemla bizází danilį́, dóó éí Nephi dineʼé yitsʼáníyáhígíí nilį́, dóó hastiin bitah hótsxaazígíí nilį́ dóó diné ayóó bidziilígíí jilį́ʼ.
16 Éí bąą, Laman dineʼé biʼaláahdi naatʼáanii, éí Tubaloth wolyé, éí Ammoron yiyeʼ nilį́, éí Coriantumr kóyóʼní, diné ayóó bidziilígíí nilį́, áko Nephi dineʼé yikʼeh didoodleeł nízin, beʼadziilii dóó ałdóʼ ayóó átʼáo bił ééhózinígíí bee, áko Nephi dineʼé yichʼįʼ ayííłʼaʼgo yikʼeh didoodleeł nízin—
17 Éí bąą yáhóółchįįd, dóó bá ndaabaahí ahíyiiʼeezh, dóó Coriantumr yinaatʼáanii nilį́įgo yikʼidiilniiʼ, dóó Zarahemla kéyahgóó ayííłʼaʼ Nephi dineʼé yikʼiidoojahgo.
18 Áádóó baa hoolzhiizh yéego saad dahólónígíí dóó diné yikʼi dahwéeʼaahii bichʼįʼ nidahwiiʼnánígíí biniinaa, Zarahemla hazʼą́ągi doo ląʼí bihaʼasídí dahólǫ́ǫ da; háálá Laman dineʼé kéyah ałníiʼjįʼ doo yah adadoonéeł da Zarahemla bidziilgo kin dashijaaʼgi yikʼiidoojahgo doo yídeiyíighah da dayóʼní.
19 Ákondi baa hoolzhiizh Coriantumr tʼóó ahayóí bindaabaahí yinaatʼááh nilį́įgo yiníʼeezh, dóó kin dashijaaʼgi kéédahatʼínígíí yikʼijįʼ haazjééʼ, dóó ayóó átʼáo tsxį́įłgo deínéłígíí biniinaa Nephi dineʼé bindaabaahí ahídaʼiidooʼishgo doo yíghah da silį́į́ʼ.
20 Éí bąą Coriantumr kin dahshijaaʼ yah ahóótʼiʼgi hadaʼasídí nideistseed, dóó bindaabaahí tʼáá átʼé kin dashijaaʼ góneʼ yił yah ííná, dóó tʼáá átʼé bikʼijįʼ danilínígíí nideistseed, áko tʼáá átʼé kin dashijaaʼ yee adídahoosniiʼ.
21 Áádóó baa hoolzhiizh Pacumeni, éí aláahdi ánahwiiʼaahii nilį́į́ ńtʼę́ę́ʼ, éí Coriantumr yitsʼą́ą́ʼ dahdínííchą́ą́ʼ, ńléí kin dashijaaʼ bináʼáztłʼinjįʼ. Áádóó baa hoolzhiizh Coriantumr éí tsé náztłʼin yikʼijįʼ átíyiilaa, áajįʼ yiyiisxį́. Áádóó Pacumeni kojįʼ beʼiinaʼ ninítʼiʼ silį́į́ʼ.
22 Áádóó áko Coriantumr Zarahemla kin dashijaaʼ yee adíhoosnííʼígíí yaa ákoniizį́įʼgo, dóó Nephi dineʼé bitsʼá daneezchą́ąʼgo yiyiiłtsą́, dóó łaʼ nidabiʼdiztseed, dóó łaʼ dabiʼdisnááh, áádóó łaʼ yah adabiʼdiisʼnil, áádóó yéego bidziilgo nidahazʼą́ą́góó yee ádíhoosʼnííʼ, bijéí doo yee náhinilyéésgóó tʼáá ałtso kédaayah yichʼįʼ dahdadiibaaʼ.
23 Áádóó áko Zarahemla kéyahgi tʼóó honíghaníjįʼ naazbaaʼ, ndi tʼóó ahayóí ndaabaahí yił dahdiiná, Bountiful kin dashijaaʼ bichʼijigo, háálá tʼáá íiyisíí náásjįʼ bíniʼgo dóó bibéésh hał yee naʼałtseedgo, áko náhookǫsjigo kédaayahígíí da yee adeihodoolnih.
24 Áádóó, kéyah ałníiʼgi ayóó átʼéego bidziilgo hazʼą́ danízin, éí bąą tʼáá náás yinééł, ahiidookahígíí doo yá hoołʼaʼ da tʼáá hazhóʼó tʼáá díkwíhí daaltʼéego tʼéiyá, dóó díigi átʼáo yikʼiiʼjééʼ dóó niʼ bikáaʼjįʼ deiyiighą́ą́ʼ.
25 Ákondi shooh, Coriantumr díí kéyah ałnííʼ góneʼ iináágo ákótʼée ndi Moronihah ayóó átʼáo akʼehdidoodleeł, azhą́ Nephi dineʼé tsʼídá tʼóó ahayóí nidaaztseed ndi.
26 Háálá áko shooh, Moronihah éí Laman dineʼé doo kéyah ałnííʼ góneʼ yah adoonééł da yóʼníí ńtʼę́ę́ʼ, ákondi kin dah naazhjaaʼ binaagóó yikʼiidoojah nízin ńtʼę́ę́ʼ nighaidą́ą́ʼ ádaadzaa yę́ęgi átʼáo, éí bąą Moronihah bindaabaahí dabidziilígíí kéyah binaagóóʼígíí yaa ádahaalyą́ą doogo áyiilaa ńtʼę́ę́ʼ.
27 Ákondi shooh, kódadoonííł yóʼnínée Laman dineʼé doo yéédaaldzid da, ákondi kéyah ałnííʼ góneʼ yah ííná, dóó kin dashijaaʼ tʼáá íiyisíí bóhólnííhgi Zarahemla bikin dashijaaʼ yee adíhoosʼniiʼ, áádóó tʼáá íiyisíí kéyah bóhólníihgo hazʼą́ą́ góneʼ chʼíníná, diné tʼóó báhádzidgo ndeiłtseedgo, tʼáá ałtso hastóí, sáanii, dóó áłchíní, ląʼí kin dashiijaaʼ dóó bee daʼadziil bił nahazʼą́ą́góó yee ádídahoosʼnííʼ.
28 Ákondi Moronihah bił bééhózingo, Lehi dóó yił ndaabaahí yilą́ą́ʼjįʼ tsxį́įłgo ayííłʼaʼ bindaabaahí kéyah Bountifuljįʼ yichʼą́ą́h ndoonéełgo.
29 Áádóó ákódzaa, dóó kéyah Bountifuldi yichʼą́ą́h niníná, áádóó yił daʼahoogą́ą́ʼ, áko hónáásiiʼ tʼą́ą́ʼ hadaazbaaʼ Zarahemla bikéyahjigo dah dadíníichą́ą́ʼ.
30 Áádóó baa hoolzhiizh tʼą́ą́ʼ dadínéízchą́ą́ʼgo Moronihah yichʼą́ą́h niníná, dóó yikʼiijééʼ, hónáásdóóʼ tʼóó ahayóí átʼídaadzaa; aooʼ, ląʼí nidabiʼdiztseed, dóó nidaaztseedígíí Coriantumr atah yikʼídaaskai.
31 Áádóó áko, shooh, Laman dineʼé tʼáá háajigo dadinóochééłgo doo bá bíighah da, náhookǫsjigo ndi dooda, shádiʼáahjigo ndi dooda, haʼaʼaahjigo ndi dooda, eʼeʼaahjigo ndi dooda, háálá tʼáá ałtsodę́ę́ʼ Nephi dineʼé bináztʼiʼ.
32 Áádóó kótʼáo Coriantumr Laman dineʼé éí Nephi dineʼé ałníiʼjįʼ azáyííʼeezh, ákótʼáo Nephi dineʼé beʼadziil yee bikʼehdadeesdlį́į́ʼ, dóó tʼáá bí ałdóʼ biʼdiisyį́, áádóó Laman dineʼé Nephi dineʼé yaa ádadeestʼą́.
33 Áádóó baa hoolzhiizh Moronihah éi Zarahemla kin dashijaaʼ yee ádínááhoosniiʼ, dóó Laman dineʼé yisnááh ádabiʼdiilyaa yę́ę kéyah biyiʼdóó kʼé náhásdlį́į́ʼgo beeʼdaʼiisniiʼ.
34 Áádóó kótʼáo ándahwiiʼaahii dahwéeʼaahgo dízdiin dóó biʼaan tʼááłáʼí nááhai.