1 Áádóó baa hoolzhiizh ándahweeʼáahii dahwééʼaahgo hástʼą́díín dóó biʼaan naaki ałtso nááhai, díí tʼáá átʼé ádahóótʼįįd dóó Laman dineʼé, hózhǫ́ ląʼí, diné diyin yikʼehgo deiyíkááh daazlį́į́ʼ, hónáásiiʼ Nephi dineʼé yilááhgo diyin yikʼehgo deiyíkááh daazlį́į́ʼ, háálá beʼoodląʼ doo nahjį kódeilééh da dóó yéego deiyótʼą́ʼígíí biniinaa.

2 Háálá áko shooh, ląʼí Nephi dineʼé doo ndabíʼdídzil da dóó doo ádaanídaʼookąąh da dóó tsʼídá tʼáá awołíbee bąąhʼígi adaatʼį́ daazlį́į́ʼ, hónáásiiʼ Diyin God bizaad doo deiniidzį́į́ʼ da áádóó tʼáá ałtso bee ndabidiʼnitin dóó Diyin bikʼeh áhodoonííłgo bee bił dahooneʼę́ę éí bitahgo bohoolyaa.

3 Ákotʼée ndi, diné sodizin yitah danilínígíí tʼáá íiyisíí bił dahóózhǫǫd háálá Laman dineʼé idahidiikaiʼígíí biniinaa, aooʼ, háálá Diyin God bisodizin biniinaa, éí bitahgóó hadilyaa. Áádóó kʼé daʼahidiʼníí ńtʼę́ę́ʼ, dóó tʼáá íiyisíí bił dahózhǫ́ǫ ńtʼę́ę́ʼ, dóó ayóó átʼáo bil dahózhǫ́.

4 Áádóó baa hoolzhiizh ląʼí Laman dineʼé Zarahemla bikéyahjįʼ níná, dóó haitʼáo idahidiikaiʼígíí Nephi dineʼé yee yił chʼídeizʼą́ dóó daʼiinohdlą́ dóó ádaańdaʼoohkąąh deidííniid.

5 Aooʼ, ląʼí ayóó átʼáo adziil dóó óhólnííh bee dahólǫ́ǫgo ndaʼneeztʼą́ą́ʼ, dóó ląʼí ayáhígo ádaantsídaakees daazlį́į́ʼ, ayáhígo danilį́įgo Diyin God dóó Diyin biDibé Yázhí Nilíinii yikééʼ naazį́.

6 Áádóó baa hoolzhiizh Laman dineʼé tʼóó ahayói náhookǫsjigo kéyah yiih yikai; dóó Nephi dóó Lehi ałdóʼ náhookǫsjigo kéyah yiih yíʼáázh, diné neidínóotʼį́į́ł biniyé. Áádóó ákotʼáo hástʼą́diin dóó biʼaan tʼáá ííhai.

7 Áádóó áko shooh, tʼáá ałtso kéyah bikááʼgóó kʼé bił nahazʼtiʼ, áko Nephi dineʼé tʼáá bí adeinízingóó kéyah yikááʼ tádadinééh, Nephi dineʼé doodaiiʼ Laman dineʼé bitahgóó.

8 Áádóó baa hoolzhiizh Laman dineʼé ałdóʼ tʼáá bí adeinízingóó tádadinééh, Laman dineʼé doodaiiʼ Nephi dineʼé bitahgóó; áádóó áko tʼáá bí ádeinízingo ahiłnidaaldeeh, ałhaandaʼiiłniih dóó baandaʼiiniih, áko yee daʼatʼį́į́ dooleeł, tʼáá bí ádeinízinígíí bikʼehgo.

9 Áádóó baa hoolzhiizh tʼáá íiyisíí daʼátʼį́ daazlį́į́ʼ, tʼáá áłah Laman dineʼé dóó Nephi dineʼé; dóó béésh óola dóó béésh łigaii dóó tʼáá ałʼąą ádaatʼéego béésh daʼílíinii tsʼídá ląʼígo bee dahólǫ́, tʼáá áłah shadiʼááh dóó nahookǫsjigo kéyah bikááʼgóó.

10 Áko shádiʼaahjigo kéyahígíí éí Lehi wolyé, dóó nahookǫsjigo kéyah éí Mulek wolyé, éí Zedekiah biyeʼ bízhiʼ bee wóójiʼ; háálá Diyin Bóhólníihii nahookǫsjigo Mulek yinílóóz, dóó Lehi éí shádiʼaahjigo kéyah yiih yiyílóóz.

11 Áádóó áko shooh, díí tʼáá áłah kéyah béésh óola ałʼąą ádaatʼéego biiʼ hólǫ́ǫ, dóó béésh łigaii, dóó béésh daʼílínii ałʼąą ádaatʼéego; áádóó diné yee ndaʼachąąhígíí ałdóʼ, éí tʼáá ałʼąą átʼéego yindaalnish dóó daʼílį́įgo ádeileʼ; áádóó ákótʼáo yee daʼastʼįįd.

12 Áádóó laʼígo kʼidaʼdíílá, tʼáá ałah nahookǫs dóó shádiʼááhjigo; dóó ląʼígo daʼneestʼą́, tʼáá ałah nahookǫs dóó shádiʼááhjigo. Áádóó ałʼąą dínééstʼą́ dóó tʼáá ałtsóní kéyah bikááʼgóó yee daʼatʼį́į́go bił hooʼaʼ. Áádóó ląʼígo łį́į́ʼ dóó nanilkaadígíí deineesą́, aooʼ, ląʼí daneeskʼahígíí ałdóʼ.

13 Áko shooh bizáanii éí tʼáá ahą́ą́h ndaalnish dóó daʼadiz, dóó tʼóó ahayóí ałʼąą átʼéego naʼatʼą́hí ádeiłʼį́, áłtsʼóózígo yisdizígíí beiʼádaalyaa dóó naʼatʼą́hí ałʼąą ádaatʼéhígíí, biʼééʼ ádaadinígíí yee hadeidileʼ. Áádóó áko hastʼą́díín dóó biʼaan dį́į́ʼ yihahígíí kʼé bił naaztʼiʼgo ahoolzhiizh.

14 Áádóó áko hastʼą́díín dóó biʼaan ashdlaʼ yihah góneʼ ałdóʼ ayóó atʼáo bił dahózhǫ́ dóó kʼé bił dahólǫ́, aooʼ, ląʼí naʼnitin dóó ląʼí diyingo náás ádahodoonííłígíí yaa dahoolneʼ. Áádóó ákótʼáo hastʼą́díín dóó biʼaan ashdlaʼ ałtso bił ahoolzhiizh.

15 Áádóó baa hoolzhiizh hastą́diin dóó biʼaan hastʼą́ą́ nááhai ándahwiiʼaahii dahwéeʼaahgo, áko shooh, Cezoram éí ándahwiiʼaahii-dahsidáádóó dasidáago háíshį́į́ biisxį́. Áádóó baa hoolzhiizh tʼáá éí yihahígíí biyiʼ, biyeʼ, diné bikʼidadiilniiʼgo bitsáskʼeh góneʼ dahneezdá, éí ałdóʼ biʼdiisxį́. Áádóó kótʼáó hastą́diin dóó biʼaan hastʼą́ą́ yiihahígíí ahoolzhiizh.

16 Áádóó hastʼą́díín dóó biʼaan tsostsʼid yihah bee hahoolzhíízhgo diné tʼáá íiyisíí bąąhági ádaatʼį́ náádaasdlį́į́ʼ.

17 Háálá áko shooh, Diyin Bóhólníihii tʼáá nízaadgóó bikʼihojisdliʼ nahasdzáán bikááʼ dooʼígíí yee daʼatʼį́įgo áko háída tʼáadoo bádahóółchįįdí da, anaaʼ, doodaiiʼ naʼatseed; éí bąą bee daʼatʼíinii bijéí yiih deiléego yaa nídiikai, aooʼ, daʼatʼį́ yíká ádaatʼį́ daazlį́į́ʼ áko ahidiniłná yee alááh ádaatʼéí doogo; áko ndanitʼingo ndaʼahiltseedgo yaa nídiikai, áádóó aheidaʼnitʼįįh dóó aghadaʼiinííł, éí yinahjįʼ daʼátʼį́į doogo.

18 Áádóó áko shooh, ndaʼiłtseedii dóó aghadaʼiiʼnííłii éí Kishkumen dóó Gadianton haiyíyíłwod yę́ę yihidiikai. Áádóó áko baa hoolzhiizh ląʼí silį́į́ʼ, Nephi dineʼé bitahgóó ndi, Gadianton dahooʼishígíí. Ákondi shooh, éí Laman dineʼé doo yáʼádaashónígíí bilááh áneilą́ągo. Áádóó éí Gadianton daʼniį́į́hii dóó ndaʼałtseedii daosyeʼ.

19 Áádóó bí éí aláahdí anahwiiʼaahii Cezoram deiyiisxį́, dóó biyeʼ ałdóʼ, anahwiiʼáahii-dasidáádóó hooʼááłgo; áádóó áko shooh, tʼáadoo habiʼdoolʼį́į da.

20 Áádóó áko baa hoolzhiizh Laman dineʼé bitah daʼniʼįįhii dahólǫ́ǫgo bił béédahózingo tʼáá íiyisíí yaa yínííł daazlį́į́ʼ; dóó tʼáá ałtso adziil yidaneilánígíí yee nahasdzáán bikáádóó nahjįʼ kódeidoolííłgo nideidoołtsxił.

21 Ákondi shooh, Chʼį́įdii éí Nephi dineʼé ląʼígo bijéí yádahółchįįd, hónáásdóó daʼniʼį́į́hii dahyikahę́ę́ʼ yihidiikai, dóó ahadaʼdeestʼą́ dóó ałchʼįʼ ádéíhadahaasdzį́į́ʼ, áko ałhándaabaah dóó áłhaaʼádahaalyą́ tʼáá bichʼįʼ ndahwiiʼná bił nídahootʼaahgóó, áko ndaʼałtseedígíí, dóó aghaʼdaʼiijááh, dóó daʼniʼiih doo yikʼee tidahoonííh da doo.

22 Áádóó baa hoolzhiizh yee áhéé dahoolzinígíí bee dahólǫ́, aooʼ, ndantʼingo yee áhéé dahoolzinígíí, dóó nanilʼingo dabizaadígíí, áádóó díí yee dabikʼis béédahózin yił ahadaʼdeestʼánígíí, áko bikʼis bąąhági ádzaaʼígíí dóó atíbidoolííł da, doodaiiʼ yił ndaʼahijaahígíí, díí yee yił ahadaʼdeestʼánígíí.

23 Áádóó áko ndaʼałtseed, dóó aghadaʼiinííł, dóó daʼniʼį́į́h, dóó atsʼíís tʼóó yee ndaané dóó bąąhági átʼéí tʼáá ałtso ałʼąąh átʼéego, bikéyah bibee hazʼáanii bitsʼą́ą́jígo áádóó ałdóʼ biDiyin God bibee hazʼáanii bitsʼą́ą́jí ádaʼałʼį́.

24 Áádóó tʼáá háíshį́į́ dahyiikahgo daʼatahígíí adhwiisʼáago bibąąhági ádaatʼinígíí dóó aláahgo woolchʼidígíí ííshjáá ályaago, éí baa náhídóótʼįįł, doo bikéyah bibee hazʼáanii bikʼehgo da, ákondi bibąąhági átʼéii bibee hazʼáanii bikʼehgo, éí Gadianton dóó Kishkumen áyiilaaʼígíí bikʼehgo.

25 Áko shooh, díí nanilʼingo adéíhadaʼiisdzííʼ dóó bee ahadaʼdeestʼánígíí éí Alma biyeʼ doo adawiisʼą́ą́góó baa hodoonih da yiłnínééʼ átʼé, éí da binahjįʼ łą́ągo diné biiʼ sizíinii nidahidoochxǫǫł.

26 Áko shooh, díí nanilʼingo adéíhadaʼiisdzííʼ dóó bee ahadaʼdeestʼánée éí Gadianton Helaman ndaʼiisdzoh beiyítʼánééʼ doo yitsʼą́ą́dóó bił bééhoozin da, ákondi shooh, éí Gadianton bijéí yiih yiyílá éí ałtsé nihishchíínii tsin bineestʼą yidooyį́į́łgo yee yinííʼaaʼ yę́ę tʼáá éí átʼį́—

27 Aooʼ, tʼáá éí átʼį́ Cain yił nahazʼánéé, éí bitsilí Abel yiyisxį́į́go adahwiisʼą́ągoo doo bééhodoozįįł da níigo yił nahazʼá. Áádóó Cain dóó bikééʼ naazínígíí yił dahwééʼaahgo hahoolzhiizh.

28 Áádóó ałdóʼ tʼáá éí ánáánítʼį́ diné bijéí yiiʼ niinílá éí kin wótʼááh yíʼáii tsʼídá wódahgo yindaashʼnish áko yáʼąąshdi dookah. Áádóó tʼáá éí ánáánitʼį́ wótʼááh yíʼáiidééʼ kojį́ kéyah yiih ííʼeezh; éí chahałheełjí naʼanish ąą kwíyiilaa dóó tsʼídá woolchʼidígíí adahwiisʼáago ąą kwíyiilaa, diné ádooldįįłjįʼ niyiishóód dóó hoolʼáago chʼį́įdiitahgóóyaa.

29 Aooʼ, tʼáá éí ánáánátʼį́ Gadianton bijéí yiih yiyíílá chahałheełjí naʼanish tʼah ííłʼį́į doogo, dóó nanilingo naʼatseed; dóó diné hadilyaadą́ą́ʼ dóó kojįʼ yinílá.

30 Áádóó áko shooh, tʼáá éí ánáánátʼį́ tʼáá ałtso bąąhágiʼ ádaatʼéii haidiilaa. Áádóó áko shooh, dóó chahałheełjí naʼanish dóó naʼnitʼingo naʼatseed yinílá, dóó bindahatʼá aayizlá, dóó yee ádéíhadahaasdzihígíí, dóó yee yił ahadaʼdeestʼánígíí, dóó tsʼídá doo yáʼátʼééhgóó bąąhági átʼéí binahatʼá, ałkééʼ oochííłdééʼ nihokááʼ dineʼé baʼáłchíní bijéí yidoosiłígíí bikʼehgo.

31 Áádóó áko shooh, Nephi dineʼé tsʼídá ayóó átʼáo bijéí yiyiiłtsood; aooʼ, hónáásiiʼ tʼáá íiyisíí bąąhági ádaatʼį́ daazlį́į́ʼ, ląʼí yáʼátʼééjigo oodááł yitsʼádahaaskai, dóó Diyin God bibee hazʼáanii yikʼi naazhjééʼ, dóó tʼáá bí ádeinízinígíí bikʼehgo dahdiikai, áádóó díłzingo beʼalyaaʼígíí bibéésh óola dóó bibéésh łigaii yee ádeiyiilaa.

32 Áádóó baa hoolzhiizh díí tʼáá átʼé bąąhági ádeiłʼínígíí tʼáadoo dikwíí da náhahí yichʼįʼ naheeskai, hónáásiiʼ ląʼí da hastʼą́díín dóó biʼaan tsostsʼid ándahwiiʼaahii Nephi bidineʼé yikʼi dahwéeʼaahgo yichʼįʼ ndahaaskai.

33 Áádóó hastʼą́díín dóó biʼaan tseebíí yihahgo ałdóʼ bąąhági ádaatʼinígíí yee dadínéísą́, diyinkʼehgo dahiinánígíí ayóó átʼáo yínííł danilį́į dóó daachahgo.

34 Áádóó áko baa ákodaniidzį́į́ʼ Nephi dineʼé beʼoodląʼ yaadáádiikahgo bee hahoolzhiizh, tsʼídá aláahdi woolchʼį́dígíí yee dadínéésá, áádóó Laman dineʼé éiyá biDiyin God yee dahodoosįįłgo tʼáá íiyisíí yee dadínéésą́; aooʼ, bibee hazʼáanii dóó bibee hazʼáanii yikʼeh dahółʼį́ daazlį́į́ʼ, áádóó tʼáá aaníinii dóó yáʼátʼéehgo bidááhdóó oodáłígíí ádeiyiilaa.

35 Áádóó áko baa ákodaaniidzį́į́ʼ Diyin Bóhólníihii biʼIiʼ Sizį́ Diyinii Nephi dineʼé yitsʼą́ą́dóó dahodiileʼ, háálá bąąhági ádaatʼinígíí dóó bijéí deistłʼisígíí biniinaa.

36 Áádóó áko baa ákodaaniidzį́į́ʼ Diyin Bóhólníihii biʼIiʼ Sizį́ Diyinii Laman dineʼé yichʼįʼ ąą áyiilaa, háálá bizaad doo nanitłʼahgóó dóó ádeinízingo deiyoodlánígíí biniinaa.

37 Áádóó baa hoolzhiizh Laman dineʼé Gadianton daʼniʼįįhii yiká ndaazbaaʼ; áádóó Diyin God bizaad hózhǫ́ doo yáʼádaatʼééhígíí bitahgóó ndaʼneeztą́ą́ʼ, hónáásiiʼ díí daʼniʼįįhii dahyiikahígíí Laman dineʼé bitahdóó tʼáá ałtso ndeistseed.

38 Áádóó baa hoolzhiizh nááná łahjigo éí, Nephi dineʼé bikáʼííjééʼ dóó bidziilgo ádabiilaa, tʼáá íiyisíí bąąhági átʼéii yaanaakaidóó, Nephi dineʼé bikéyah tʼáá átʼé bikááʼgóó dahazʼlį́į́ʼ, áádóó ląʼí yáʼátʼéehgo dahiinánígíí yindaʼazloʼ bindaanishígíí tʼáá aaníí átʼé daniizįįʼ dóó aghadeiyisnilyę́ę chodeiyoosʼįįd, dóó nanilʼingo naʼatseed dóó áajigo ádaʼalʼíinii atah yaanídiikai.

39 Áádóó áko ndahatʼá bídahólnííhígíí yikʼeh dadeesdlį́į́ʼgo tʼáá bí tʼéiyá ndeiloʼgo ádeiyiilaa, hónáásdóó téʼéʼį́ danilínígíí dóó baʼátʼeʼ ádaadinígíí, dóó aʼoh danilį́įgo Diyin God yikééʼ deiyíkahígíí yikʼi naazhjééʼ dóó ndeineestsʼin dóó atídeiyiilaa dóó yitsʼą́ą́jįʼ ńdaazʼyiz.

40 Áádóó áko baa ákodaniidzį́į́ʼ tsʼídá tʼóó baaʼihgo bił hooʼaʼ, dóó hoolʼáago ábiʼdiʼdooldįįłgo daneestʼą́.

41 Áádóó baa hoolzhiizh kotʼáo andahwiiʼaahíí Nephi bidineʼé yikʼidahwééʼaahgo hastʼą́díín dóó biʼaan tseebííʼ ałtso nááhai.