1 Áádóó áko baa hoolzhiizh tseebídiin dóó biʼaan hastą́ą́ yihahgo, Nephi dineʼé tʼahdii bąąhági átʼéii yaa naakai, aooʼ tsʼídá yéego bąąhági átʼéii yee yildah, áko Laman dineʼé éí Diyin God bibee hazʼáanii tʼáá íiyisíí yikʼeh dahółʼį́, Moses bibee hazʼáanii bikʼehgo.

2 Áádóó baa hoolzhiizh éí yihahígíí biyiʼ hastiin Samuel wolyéii léiʼ, Laman dineʼé nilį́įgo, Zarahemlagi níyá, dóó diné neidíníitą́ą́ʼ. Áádóó baa hoolzhiizh naʼnitingo, ląʼída yiską́, ádaańdaʼoohkąąh níigo diné yee neineeztą́ą́ʼ, dóó chʼídayiisxan, dóó tsʼídá kʼad bikéyahgo ńdeesdzáago.

3 Ákondi shooh, Diyin Bóhólníihii bichʼįʼ haadzíiʼgo biinééʼ yidiiztsʼą́ą́ʼ, nátʼą́ą́ʼ ńdíídááł bidííniid, dóó nijéí biyiʼdi Diyin bikʼeh áhodooníłígíí baa haneʼ nił hodoonihígíí diné bee bił hodíílnih.

4 Áádóó baa hoolzhiizh kintah yah adoogáałgo bichʼįʼ baa hóchįʼ; éí bąą kintah tsé binázʼáhą́ą yikááʼ haayá, dóó bílaʼ yee yichʼįʼ dadiilniiʼ dóó iinééʼ ayóo íitsʼaʼgo yee yichʼįʼ hadoolghaazh, dóó Diyin Bóhólníihii náasjįʼ ádahodooníiłii bijéí yiih yiléhígíí diné yee yił hoolneʼ.

5 Áádóó kwíyidííniid: Áko shooh, shí, Samuel, Laman dineʼé nishłį́, dóó Diyin Bóhólníihii bizaad shijéí yiih yiyiiléhígíí bee yáshtiʼ; áádóó áko shooh díí shijéí yiih yiyííláago diné bee bichʼįʼ haasdziih tʼáá ákohgo nihwiitʼaahii bibéésh hał díí diné bikʼiʼdasitą́; dóó tʼáadoo dį́įʼdi neeznádiin náháhí díí diné tʼáá ákohgo nihwiitʼaahii bibéésh hał bikʼindookǫs.

6 Aooʼ, tsʼídá ląʼí diné ndootsxiłgo bá silá, dóó tʼáá aaníí díí diné éí bikʼiidooldoh, dóó tsʼídá tʼáadoo bee yisdáhóótʼiʼí da tʼáá hazhóʼó ádaańdaʼooskango dóó Diyin Bóhólníihii Jesus Christ dayoosdlą́ągo tʼéiyá, éí tʼáá aaníí nihokááʼgi doogááł, dóó ląʼí yikʼee tiʼhwiidoonih dóó bidineʼé bá bidiʼyoolyééł.

7 Áádóó áko shooh, Diyin Bóhólníihii yá naalaʼí yee shił hoolneʼ, dóó shiiʼ sizíinii haneʼ yáʼátʼéehii yeinílá. Áádóó áko shooh, nihí áłdóʼ bee nihiłhodeeshnihgo nihichʼįʼ ashiʼdoolʼaʼ, áko haneʼ yáʼátʼéehii nihí dooleeł; ákondi shooh doo dashinoozį́įʼ da.

8 Éí bąą, Diyin Bóhólníihii ání: Nephi dineʼé bijéí dantłʼizígíí biniinaa, tʼáá hazhóʼó ádaańdaʼooskango tʼéiyá doo shizaad bitsʼáńdideeshʼáał da, dóó shiiʼ sizíinii nátʼą́ą́ʼ kóńdeeshdlííł, dóó doo tʼóó bá deeshnih da dooleeł, dóó bikʼéí danilíinii bikʼijįʼ kódeeshłííł.

9 Áádóó doo dį́įʼdi neeznádiin ńdoohah da áko ałtso ndahodiʼdootsxił; aooʼ, béésh hał dóó dichin dóó naałniihii bee atídahodeeshłííł.

10 Aooʼ, tʼáá íiyisíí hachʼįʼ shá háchįʼgo hataadeeshaał, dóó niheʼenaʼí, dį́įʼdi są́ náʼoogą́ą́ʼgóó biyiʼ, łaʼ ałtso ásooʼdįįdgo deidoołtsééł; dóó tʼáá aaníí áhodoonííł tʼáá hazhóʼó ádaańdaʼsookango tʼéiyá, ní Diyin Bóhólníihii; dóó dį́įʼdi są́ náʼoogą́ąʼdi nootʼį́łígíí éí ałtso ndanihidoołtsxił.

11 Ákondi ádaańdaʼsookango dóó Bóhólníihii nihiDiyin God bichʼįʼ kóńdaoohdzaago shá háchįʼígíí nihitsʼą́ąjįʼ kódeeshłííł, ní Diyin Bóhólníihii; aooʼ, Diyin Bóhólníihii ání, ádaańdaʼsookanígíí dóó shichʼįʼ kódaadzaaʼígíí éí bikʼihodeeshdliił, ndi yíi tʼáadoo ádaańdaʼsookanígíí éí hóyéeʼgo tiʼhooʼnííh bił hwiidooʼaał.

12 Aooʼ, yíi díí ayóó átʼáo kintah Zarahemla atídoolnííł; háálá áko shooh, diyin yikʼehgo dahiinánígíí biniinaa éí doo doolchxǫǫł da; aooʼ, yíi díí ayóó átʼáo kintahígíí atídoolnííł, háálá shił bééhózin, ní Diyin Bóhólníihii, atixsgo ánéelą́ąʼgo, aooʼ, díí ayóó átʼáo kintahdóó ndi, doo dashíístsʼą́ąʼ da dadooleeł, ní Diyin Bóhólníihii.

13 Ákondi ádaańdaʼooskanígíí éí bikʼihozhdeeshdliił, éí doo atídeeshłííł da. Ákondi shooh, díí kintah ayóó átʼéii biyiʼ łaʼ diyin yikʼehgo deiyíkahígíí bąą, áko shooh, yáʼąąshdę́ę́ʼ kǫʼ ádadidoonał dóó bee adideeshkʼą́ą́ł.

14 Ákondi shooh, diyin yikʼehgo dahinánígíí biniinaa doo yighą́ąʼ da. Ákondi shooh, Diyin Bóhólníihii ání, bichʼįʼ éí hoolzhish, diyin yikʼehgo dahiináanii chʼídahisoohłtłʼíidgo, índa bąąhági átʼéii dasinoołtsʼą́ągo nihididoogą́łígíí baa hoolzhíish dooleeł; aooʼ, díí kintah hóyéeʼgi siʼą́ą dooleeł, háálá doo yáʼátʼéehii dóó tsʼídá aláahdi dajoodláhígíí biyiʼ hólónígíí biniinaa.

15 Aooʼ, kintah Gideon hóyééʼgo bił hwiidooʼaał, doo yáʼátʼéehii dóó tsʼídá aláahdi dajoodláhígíí biyiʼ hólónígíí biniinaa.

16 Aooʼ, yíi tʼáá ałtso díí Nephi dineʼé bikéyah bikááʼgóó kin hadaalʼáhígíí hóyéeʼgo bił nahazʼą́ą dooleeł, doo yáʼáshóonii dóó aláahdi dajoodláhígíí biyiʼ dahólónígíí biniinaa.

17 Áádóó áko shooh, Diyin Tʼáá Ałtsoní bee Bóhólníihii ání, díí kéyah bikʼijįʼ haʼdoodzih, díí kéyah bikáaʼgi diné yaa naakaígíí biniinaa, aooʼ, doo yáʼáshóonii dóó dajoodláhígíí yaa naaskaiígíí biniinaa.

18 Áádóó baa hodoolzhish, ní Diyin Tʼáá Ałtsoní bee Bóhólníihii, aooʼ, nihiDiyin God tʼáá aaníí dóó ayóó átʼéii, tʼáá háíshį́į́ daʼílíinii nahasdzáán biyiʼ néideesʼį́įʼgo chʼééh haidínóotaał, kéyah ayóó átʼáo bikʼijįʼ haʼoodzíʼígíí biniinaa, tʼáá hazhóʼó diné Diyin yikeʼhgo naagháii dóó Diyin Bóhólníihii díí baa áhólyą́ níigo néideesʼį́įʼgo tʼéiyá.

19 Háálá shí éí íinisin, ní Diyin Bóhólníihii, binaadeeł daʼílíinii bíniʼ ńdeidiłʼįįh; dóó bíniʼ baa áhólyą́ dashiłní; dóó doo binaadeeł daʼílíinii tʼáadoo shidaʼíłníhí ńdeidiłʼįįhii bikʼijįʼ hadeesdzih; dóó doo łaʼ binaadeeł daʼílíinii shił ńdeididoołʼį́įł da tʼáá hazhóʼó diyinkʼehgo dahináanii tʼéiyá; dóó doo binaadeeł daʼílíinii shił néideesʼį́ʼígíí, éí bikʼijįʼ haʼdoodzih, binaadeełii ałdóʼ, dóó doo łaʼ baa ńdoodił da háálá kéyah éí bikʼijįʼ haʼoodzííʼ.

20 Áádóó baa hodoolzhish binaadeeł daʼílíinii ńdeidiłʼįįhgo, naadeełii tʼéí bíniʼ danilį́įgo biniinaa, dóó binaadeełii daʼílíinii tʼéí bíniʼ ádayiilaaígíí biniinaa, dóó binaadeełí ńdeididoołʼį́į́ł beʼenaʼí yitsʼą́ąjįʼ danéíchʼééhgo; háálá doo shichʼįʼ ńdeidiłʼįįhígíí biniinaa, bí dóó binaadeełii daʼílíinii bikʼijįʼ haasdzííʼ; áadi yoołkáałgo bichʼįʼ ndahwiidiʼyooʼnaał, ní Dyin Bóhólníihii.

21 Áko shooh, díí ayóó átʼáo kintahdóó nohłínígíí, shizaad bikʼeh dahonołʼį́; aooʼ, Diyin Bóhólníihii bizaad yee yáłtiʼígíí deísínółtsʼą́ą́ʼ; háálá áko shooh, nihinaadeełii daʼílíinii biniinaa nihikʼijįʼ haʼoodzííʼ ní, dóó tʼáá éí tʼéí bidánoołníigo biniinaa nihinaadeełii daʼílíinii ałdóʼ bikʼijįʼ haʼoodzííʼ, dóó doo éí nihainíláhígíí bizaad dadoohtsʼaʼ da.

22 Bóhólníihii nihiDiyin God yee nihikʼihojisdliʼígíí doo béédaohłniih da, ndi nihinaadeełii daʼílíinii éí áłahjįʼ béédaohłniih, doo éí Bóhólníihii Diyin God bichʼįʼ baa ahééh danohsin da; aooʼ, Diyin Bóhólníihii éí doo deidísin da, ndi tʼóó báhádzidgo ádaa dadzódlí, dóó ádaadahaʼniih, bádahachįʼ, daʼoolchʼį́į́d, daʼahighą́, ákándeitʼá, akʼijįʼ daʼídlį́, dóó naʼatsxeed, dóó tʼáá ałtso bąąhági ádaatʼéii yiiʼ deeskai.

23 Háálá díí biniinaa Bóhólníihii Diyin God kéyah bikʼijįʼ haʼoodzíiʼgo yee hoołʼaʼ, dóó nihinaadeełii daʼílíinii ałdóʼ ákóyiilaa, dóó díí éí nihibąąhági ádaatʼéii biniinaa.

24 Aooʼ, yíi díí diné bił hólǫ́, háálá áajįʼ ahoolzhiizh, Diyin yá yádaałtiʼii chʼídahinoołkaad, dóó tʼóó bá ndahohłtʼiʼgo, dóó tsé bee ńdanoołneʼgo, dóó ndaałtseedgo, dóó tʼáá ahayóí ałʼąą átʼáo bąąhági ádaatʼéii bikʼijįʼ ádaołʼį́įgo, ałkʼidą́ą́ʼ diné ádáádzaa yę́ęgi átʼáo.

25 Áádóó kʼad yádaałtiʼgo, kódadohní: Danihizhéʼé dahinánéedą́ą́ʼ dahiniiʼnáago, Diyin yá yádaałtiʼii doo ndasiiltsxeed da doo ńtʼę́ę́ʼ; doo éí tsé bee ńdasíníilneʼ da doo ńtʼę́ę́ʼ, dóó doo chʼídahiniilkaad da doo ńtʼę́ę́ʼ.

26 Áko shooh nihí éí biláahgo ádanohtʼé; háálá Diyin Bóhólníihii tʼáá aaníí hináago, Diyin yá yáłtiʼii łaʼ nihitah níyáago dóó Diyin Bóhólníihii bizaad yee nihił ahoʼniilneʼgo, éí nihibąąhági ádaatʼéii dóó ndaʼasiyoosihígíí yaa halneʼ, éí bichʼįʼ nihá dahachįʼ doo, dóó chʼídadínóołchééł dóó ałʼąą átʼáo dadiyoołhéłígíí hadanohtá; aooʼ, Diyin yá yádaałtiʼí tʼóó ádaʼdilínígíí átʼé dadidóhniił, dóó bąąhági átʼíinii nilį́, dóó biʼiiníziinii átʼį́, háálá nihinaanish tʼáá aaníí doo yáʼádaashónígíí biniinaa.

27 Ákondi shooh, diné łaʼ nihitah níyáago dóó kóníigo: Díí baa naahkai, doo éí bąąhági átʼéii da; éídóʼ baa ndaahkai dóó doo éí tiʼdahwiidoohnih da; aooʼ, ádidooniił: Tʼáá nihí nohsinígíí bikʼeh dahinohná; aooʼ, danohłʼį́įgo danohsinígíí baa ndaahkai, dóó tʼáá ałtso nihijéí biyiʼdi danohsinígíí baa ndaahkai—áko diné łaʼ kóníigo nihitah níyáago, wóshdę́ę́ʼ dabididoohniił, dóó Diyin yá yáłtiʼii nilį́ dadohníi doo.

28 Aooʼ, baa dahohniih dooleeł, dóó nihinaadeełii baa dadoohnił; nihibéésh óola, dóó nihibéésh łigaii baa dadoohnił, dóó ééʼ daʼílíinii bee hadadidoohłííł; dóó tʼáá ádzaagóó nihaa haʼniihígíí biniinaa, dóó tʼáá ałtsogo hózhǫ́ǫgo nahazʼą́ níigo, índa éí doo nihił átʼéhégo baa ntsídidoohkos.

29 O nihí bąąhági ádanohtʼéii dóó yáʼátʼéehgo iináanii doo danohsinii; diné daastłʼisii dóó bikʼos daniłdzilii, haa nízahjįʼ lá Diyin Bóhólníihii tʼóó nihinéłʼį́įʼgo yił átʼée dooleeł? Aooʼ, haa nízahjįʼ shąʼ doo ádahalyáanii dóó doo daʼooʼíinii ndanihiʼeesh dooleeł? Aooʼ, haa nízahjįʼ éí adinídíín doo danohsingo chahałheeł deiyínóhtąʼ dooleeł?

30 Aooʼ, áko shooh, Diyin Bóhólníihii éí tʼáá íídą́ą́ʼ nihichʼįʼ bá hóóchįįd; áko shooh, nihibąąhági ádaatʼéii biniinaa nihikéyah yikʼijįʼ haadzííʼ.

31 Áádóó áko shooh, nihinaadeełii daʼílíinii yikʼijįʼ hadoodzihígíí bichʼįʼ hoolzhish, áko éí bídéeltǫʼ dadooleeł, áko chʼééh daołtsʼóod dooleeł; dóó nihaa dahojoobáʼí dasoolį́įʼgo chʼééh deinohtąʼ dooleeł.

32 Áádóó nihaa dahojoobáʼí dasoolį́įʼgo Diyin Bóhólníihii tʼáá íiyisíí bichʼįʼ sodadołzin dooleeł; dóó nihisodadizin tʼáadoo biniyéhé da dooleeł, háálá ádahasdįįdii éí tʼáá íídą́ą́ʼ nihikʼiildoh, dóó nahidiʼdooltsxiłígíí ałdóʼ tʼáá aaníí; dóó índa áadi daoocha dóó dadohłwosh dooleeł, ní Diyin Tʼáá Ałtsoní bee Bóhólníihii. Dóó índa yínííł danohłį́įgo bee, kódadidohniił:

33 O dooládóʼ ádaaníséskan doo ńtʼę́ę́ʼgo, dóó doo Diyin yá yádaałtiʼii ndaséłtseedgoshąʼ ńtʼę́ę́ʼ, dóó doo tsé bee ndasiniilneʼgoshąʼ ńtʼę́ę́ʼ, dóó doo chʼídaniilchą́ąʼgoshąʼ ńtʼę́ę́ʼ. Aooʼ, áadi ádadohníi dooleeł: O Bóhólníihii nihiDiyin God béédeiilniih dooleeł ńtʼę́ę́ʼ lá naadeełii daʼílíinii nihaa yiiléhę́ędą́ą́ʼ, dóó índa doo éí bídéeltǫʼ daazlį́į́ʼgóó áko doo yóó adahiiʼníił da doo ńtʼę́ę́ʼ; háálá áko shooh, nihinaadeełii daʼílíinii éí nihitsʼádahaasdéél.

34 Áko shooh, bee naʼanishí ákǫ́ǫ́ niilyéehgo biiłkáhí ádin łeh; áádóó áko shooh, daʼahiʼniigą́ą́ʼ bijį́įdi nihibéésh hał nihighaaʼnilgo chʼééh hadadíníitaał.

35 Aooʼ, nihinaadeełii daʼílíinii ńdadiilʼįįhgo dóó nihitsʼą́ą́ʼ doo bééhoyoozįįh da, kéyah bikʼijįʼ haʼoodzíʼígíí biniinaa.

36 O Diyin Bóhólníihii bizaad nihichʼįʼ kólyaayę́ędą́ą́ʼʼ ádaańdaʼdiikąął ńtʼę́ę́ʼ; háálá áko shooh kéyah éí bikʼijįʼ haʼoodzííʼ, dóó tʼáá ałtsoní bídéeltǫʼ daazlį́į́ʼ, dóó chʼééh deiyíníitąʼ.

37 Áko shooh, chʼį́įdii danilíinii nihinásʼá, aooʼ, nihiiʼ sizíinii neidoołtsxił danízinígíí bá ndaalʼaʼí nihinásʼá. Áko shooh, nihibąąhági ádaatʼéii éí tʼóó ahayóí. O Diyin Bóhólníihii, daʼ doósh bíighah da ná háchįʼígíí nihitsʼą́ąjįʼ kónánídléehgo? Áajįʼ ahoolzhiizhgo nihizaad kódaatʼée dooleeł.

38 Ákondi shooh, nanihiʼdinitaahgo bá hooʼaʼ yę́ę kʼad biláahgo ahoolzhiizh; biyiʼ yisdádooháłę́ę ałtso ayííłką́ kʼad éí hoolʼáágóó doo bíighah da silį́į́ʼ, dóó atínihidíʼdoolníłígíí éí kʼad tʼáá aaníí; aooʼ, háálá tsʼídá doo bikʼídooháałii bíká ádaahtʼį́įgo nihiiníłką́; dóó nihí chʼééh ił hózhǫ́ bíká ádaohtʼįįd bąąhági átʼéii biyiʼ, éí éí ayóó átʼáo Hoolʼáágóó nihiTaaʼ bitsʼą́ą́dééʼígíí bitsʼą́ąjįʼ átʼéii átʼé.

39 O nihí diné díí kéyahdóó nohłíinii, shizaad dadidoohtsʼį́łę́ę! Áádóó Diyin Bóhólníihii bá háchįʼ nihitsʼą́ąjįʼ kódoolníłę́ę nisingo sodiszin, dóó ádaańdaʼdoohkąął dóó yisdádahidoohkahą́ą nisin.