1 Áko shooh, baa hoolzhiizh ándahweeʼáahii Nephi bidineʼé yikʼi dahwéeʼaahgo tsostsʼidiin dóó biʼaan naaki nááhai góneʼ ałchʼįʼ ádahachʼįʼ dekódaadzaa, áko hónáásiiʼ tʼáá ałtso kédaayahgóó anaaʼ dahazlį́į́ʼ tʼáá ałtso Nephi dineʼé bitahgóó.

2 Áádóó díí ndanitʼingo daʼniʼįįhii dayikahígíí díí naʼatseedgo naʼanish dóó bąąhági átʼéii bee dahʼooldah tʼáá náás deiyíłtʼééh. Áádóó tʼáá anaaʼ hólǫ́ǫgo ałtso nááhai; áádóó tsostsʼid dóó biʼaan tááʼ ałdóʼ ałtso nááhai.

3 Áádóó baa hoolzhiizh díí yihahígíí biyiʼ Nephi Diyin Bóhólníihii yéego yichʼįʼ sodoolzin, kóníigo:

4 O Diyin Bóhólníihii, tʼáadoo díí diné béésh hał bee ádooldįįłgo áníléhé; ákondi O diyin Bóhólníihii, kéyah bikááʼgóó naałniihjígo hólǫ́ǫgo aníleeh, áko éí yee Diyin Bóhólníihii biDiyin God yéédadoolnih, áko da ádaa ńdaʼdookąął dóó nichʼįʼ nináhidookah.

5 Áádóó éí bohoolyaa, Nephi saad yee haadzííʼ yę́ę bikʼehgo. Áádóó kéyah bikááʼgóó ayóó átʼáo naałniih hazlį́į́ʼ, tʼáá ałtso Nephi bidineʼé bitahgóó. Áádóó áko tsostsʼidiin dóó biʼaan dį́į́ nááhai tʼáhdii naałnih bitah hólǫ́ ńtʼę́ę́ʼ, áádóó béésh hał bee naʼatseed yę́ę niʼkódzaa ákóndi naałniih yéego bitah níłniiʼ.

6 Áádóó naʼatseedgo naʼanish tʼahdii hólǫ́ǫgo tsostsʼidiin dóó biʼaan ashdlaʼgóó nááhai. Háálá nahasdzáán atídzaa áko yíłtseii silį́į́ʼ, áádóó tʼáadoo iitsoi da ndaʼniltʼį́į́h yę́ęgi átʼáo; dóó tʼáá ałtso nahasdzáán bikááʼgóó naałniih bee atílyaa, Laman dineʼé dóó Nephi dineʼé tʼáá áłah bitahgóó, ákohgo atídabiʼdiilyaago ádabiʼdisdįįd dimííl yázhí bilááhgóó yéego bąąhági ádaatʼéii yaa nidaakaigóó.

7 Áádóó baa hoolzhiizh áko diné yaa ákódaniidzį́į́ʼ díí naałniih kʼadę́ę ábíłdįįhgo, áadi índa Bóhólníihii biDiyin God yéédaasniiʼ; dóó Nephi saad yee haadzį́į́ʼ yę́ę yéédaasniiʼ.

8 Áádóó diné aláahdi ánahwiiʼaahii dóó binaatʼáanii nídeiyookąąhgo yaa nídiikai, áko Nephi kódeididooniił: Áko shooh, nihił béédahózin Diyin God éí bikééʼ sínízį́, éí bąą Bóhólníihii nihiDiyin God yéego bichʼįʼ sodilzin áko díí naałniih nihá nahjįʼ kwíidoolííł, áko tʼáá átʼé saad ánihidiʼdooldįįł diníigo bee nihichʼįʼ háínídzííʼ yę́ę bóhodoolnííł.

9 Áádóó baa hoolzhiizh ándahwiiʼaahii Nephi kódeidííniid, saad bee hadaʼiisdzííʼ yę́ę bikʼehgo. Áádóó baa hoolzhiizh Nephi éí diné ádaa ńdaʼooskan yaa ákoniidzį́įʼgo dóó tłʼohyishbizh ééʼ yee hojoobaʼ ádaʼdiilyaago, Diyin Bóhólníihii yéego yichʼįʼ sonáádoolzin, kóníigo:

10 O Diyin Bóhólníihii, áko shooh díí diné ádaa ńdaʼooskan, dóó Gadianton dah yikahígíí bitahdóó nahjįʼ kódeiyiilaa hónáásiiʼ ádeisdįįd, dóó binahatʼá ndeiniłin yę́ę nahasdzáán yiiʼ ńdeideesʼį́į́ʼ.

11 Áko, O Diyin Bóhólníihii, díí hojoobaʼ ádeinízinígíí biniinaa niʼáháchįʼ niʼ kónílééh, áádóó diné doo yáʼádaashóonii nisiniłtseedyę́ę bíniʼ náháchįʼ áajigo bił áhodoodįįł.

12 O Diyin Bóhólníihii, niʼáháchįʼ nihá nahjįʼ kónílééh, aooʼ, yéego náháchįʼígíí, dóó díí naałniih kéyah bikááʼdóó niʼ kónílééh.

13 O Diyin Bóhólníihii, shidinitsʼį́į́h, dóó saad bee haasdzíʼígíí bíniʼdii bikʼehgo áhodoonííł, dóó nahasdzáán bikááʼgóó ndahałtingo ádíílííł, áko bineestʼąʼígíí náhodoodleeł, dóó binaniseʼ náníłtʼįįh dooleeł.

14 O Diyin Bóhólníihii, shizaad shidisínítsʼą́ą́ʼ kódíshníyę́ędą́ą́ʼ, Naałniihii hólǫ́ǫ dooleeł; béésh hał bee naʼatseed yę́ę niʼ kódoolnííł; áádóó tʼáá aaníí shił bééhózin, kʼad ndi, shizaadígíí yísiniłtsą́ą́ʼ: Háálá áko ádiníniid: Díí diné ádaa ńdaʼooskango aadadeesį́į́ł.

15 Aooʼ, O Diyin Bóhólníihii, áádóó nił bééhózin ádaa ńdaʼooskanígíí, háálá naałniih dóó naʼatseed dóó nahjįʼ kódaʼalneʼ bitah hazlį́ʼígíí biniinaa.

16 Áádóó kʼad, O Diyin Bóhólníihii, niʼáháchįʼ nahá nahjįʼ kónílééh yaʼ, áko nánidaalʼaʼgo bínáádíníítʼaał? Áádóó ákwiinlaago, O Diyin Bóhólníihii, saad bee báháínídzííʼ yę́ę bikʼehgo bikʼihojidíídliił.

17 Áádóó baa hoolzhiizh tsostsʼidiin dóó biʼaan hastą́ą́ yihah góneʼ Diyin Bóhólníihii biʼáháchįʼ diné bitahdóó nahjįʼ kóyiilaa, áádóó nahasdzáán bikáaʼjįʼ ndahałtingo áyiilaa, áko bineestʼaʼígíí náhodoodleeł náʼnítʼį́į́h hoolzhish góneʼ. Áádóó baa hoolzhiizh binaniseʼ náʼnítʼį́į́h baa hoolzhiizh góneʼ.

18 Áádóó áko shooh, diné Diyin God yaa bił dahóózhǫǫd dóó yaa dahaznih, dóó kéyah tʼáá átʼé bikááʼgóó ił hózhóonii biiʼ hazlį́į́ʼ áádóó Nephi deidiyoołheełgo doo yíká ádaatʼį́į da daazlį́į́ʼ ákondi Diyin yá yáłtiʼii nilį́įgo yaa dahaznih, dóó diné Diyin God yá sizʼíinii, Diyin God bitsʼą́ą́dóó ayóó átʼáo adziilii dóó bee óhólníihii beiyilyą́ągo.

19 Áádóó áko shooh, Lehi, éí bikʼis, yáʼátʼéehgo oodááł bídadéétʼiʼígíí doo aʼohgo ndi yee akééʼ sizʼį́į ńtʼę́ę́ʼ.

20 Áádóó áko baa hoolzhiizh Nephi bidineʼé kéyah yikááʼgóó náás deeskai, áádóó dahóóchxǫʼę́ęgóó háádeidiidlaa, áádóó ndaʼiiłchííh dóó kʼeeʼąą dínéestʼą́, kéyah tʼáá átʼé bikááʼgóó dahazʼlį́įgo índa, tʼáá áłah náhookǫsjigo dóó shádiʼáahjigo, eʼeʼaahjigo tónteel nihiníyį́ dóó haʼaʼaahjigo tónteel nihoniyį́įjįʼ.

21 Áádóó baa hoolzhiizh tsostsʼidiin dóó biʼaan hastą́ą́ʼ yihahgo kʼé bee nihoolzhiizh. Áádóó tsostsʼidiin dóó biʼaan tsostsʼid yihah góneʼ kʼé bee hahoolzhiizh; dóó sodizin kéyah tʼáá átʼé bikááʼgóó hazlį́į́ʼ; dóó ałnííʼ bilááhgóó diné, tʼáá áłah Nephi dineʼé dóó Laman dineʼé, sodizin yidahidiikai, dóó tsʼídá ayóó átʼáo kéyah bikááʼgóó kʼé bił hólǫ́ǫ ńtʼę́ę́ʼ; áádóó díigi átʼáo tsostsʼidiin dóó biʼaan tsostsʼid yihahígíí bił nahoolzhiizh.

22 Áádóó tsostsʼidiin dóó biʼaan tseebíí yihah góneʼ ałdóʼ kʼé bił dahólǫ́ǫ́ ńtʼę́ę́ʼ, tʼáá hazhóʼó tʼáá dikwííhígo Diyin yá yádaałtiʼii naʼnitin ndeiyiizláhę́ę́ yee ałchʼįʼ daʼdeeztsih.

23 Áádóó tsostsʼidiin dóó biʼaan náhástʼéí yihah góneʼ yéego ałchʼįʼ ndahoojiilnáago baazhnídiikai. Ákondi baa hoolzhiizh Nephi dóó Lehi, dóó ląʼí da bisodizin binaatʼáanii tʼáá aaníigo naʼnitin bídadéétʼiʼígíí bił béédahózin, tʼáá ákwíí jį́ bił ííshją́ą́ ádaʼoolįįłígíí biniinaa, éí bąą diné nideinitin, áko ałchʼįʼ saad dahółónée tʼáá éí yihahígíí niʼ kódeiyiilaa.

24 Áádóó baa hoolzhiizh tseebídiin yihah góneʼ ándahwiiʼáahii Nephi bidineʼé yikʼi dahwéeʼaahgo, Nephi bidineʼé bitahdóó díkwíigo shį́į́ atsʼádaheeskaiʼígíí, éí Laman dineʼé yił naaldeehgo díkwíí shį́į́ nááhai, dóó Laman dineʼé bízhiʼ ákʼideidiitʼą́, dóó łaʼ Laman dineʼé íiyiisíí yitsʼą́ą́dóó dahazlį́ʼígíí ałdóʼ, éí yádahóółchįįd, éí doodago atsʼádahaaskaiʼígíí, éí bąą bikʼis yił anaaʼ hadeeswod.

25 Áádóó éí nidaʼałtseed dóó aghadaʼiiʼnííł daazlį́į́ʼ; áádóó éí daadziłgóó anídahachééh, dóó diné doo kééhatʼínígóó dóó nahonitʼin nahazʼą́ą́góó, doo bikʼiʼ doodááłgóó ndanitin, tʼáá ákwíí jį́ diné bihidiikááh, atsʼádahaaskaiʼígíí áajigo yichʼįʼ adahaaskai.

26 Áádóó áko hoolzhishgo, aooʼ, tʼáadoo díkwíí da náhááhgóó, éí tsʼídá ayóó átʼáo daʼniʼįįhii dah yikah daazlį́į́ʼ; dóó Gadianton binanilʼingo nahatʼá yę́ę hadeinitá; áádóó kótʼáo Gadianton daʼniʼįįhii daazlį́į́ʼ.

27 Kʼad áko shooh, díí daʼniʼįįhii tʼóó báhádzidgo hadahonííłchaad, aooʼ, Nephi bidineʼé bitahgóó tʼáá íiyiisíí dahóółchxǫ́, dóó Laman bidineʼé bitahgóó ałdóʼ kódzaa.

28 Áádóó baa hoolzhiizh díí adoolchxǫǫłgo naʼanish tʼáá íiyisíí niʼ kódoolníiłgo baa ákóhoniizį́į́ʼ, éí bąą diné nidaabaahii dabidziilígíí diné doo kééhotʼiní góneʼ dóó daadziłgóó daʼniʼįįhii hadanitáago abiʼdoolʼaad, ndeidootsxił biniyé.

29 Ákondi shooh, baa hoolzhiizh tʼáá éí yihah biyiʼ nátʼą́ą́ʼ tʼáá bí bikéyah biyiʼjigo anánoolkaad. Áádóó áko ándahwiiʼaahii Nephi bidineʼé yikʼi dahwéeʼaahgo tseebídiin ałtso nááhai.

30 Áádóó baa hoolzhiizh tseebídiin dóó biʼaan tʼááłáʼí yihah bee hahoolzhiizh góneʼ éí daʼniʼįįhii yikʼijįʼ náádeeskai, dóó tʼóó ahayóí nideistseed, áádóó tʼáá bí ałdóʼ ląʼígo nidabiʼdistseed.

31 Áádóó diné doo kééhótʼínídę́ę́ʼ dóó daadziłdę́ę́ʼ chʼínáábidiʼnoolkaad dabikéyahgóó, háálá tsʼídá ayóó ánéélą́ą́ʼ daʼniʼįįhii daadził dóó diné doo kééhatʼį́į́góó dááląądígíí biniinaa.

32 Áádóó baa hoolzhiizh díí bee ałtso nááhai. Áádóó daʼniʼįįhii tʼahdii ląʼí yiileeh dóó házhǫ́ dabidziil daazlį́į́ʼ, áko Nephi dineʼé bindaabaahí tʼáá átʼé doo yikʼijįʼ daastiʼ da daazlį́į́ʼ, dóó Laman dineʼé bindaabaahígíí ałdóʼ; díí kéyah tʼáá ałtso bikááʼgóó diné ayóó átʼáo beedaaldzidgo ádeiʼyiilaa.

33 Aooʼ, háálá tʼóó ahayóí kéyah dah naazʼánígíí yaa heeskai, dóó tʼáá íiyisíí deiyiiłchxǫʼ; aooʼ, ląʼí nideistseed, áko łaʼ éí deesnahgo diné doo kééhatʼínígóó adeiyiizhʼeezh, aooʼ, bizáanii dóó badaʼáłchíní íiyisíí.

34 Díí ayóó átʼáo bąąhági átʼéii, éí diné bąąhági ádaatʼínígíí biniinaa bikʼi hooleʼ, áko éí yee Diyin Bóhólníihii biDiyin God yéédadoolnih.

35 Áádóó kótʼáo ándahwiiʼaahii dahwéeʼaahgo tseebídiin dóó biʼaan tʼááłáʼí ałtso nááhai.

36 Áádóó tseebídiin dóó biʼaan naaki yihah góneʼ Bóhólníihii biDiyin God doo yikʼeh dahółʼį́įgo yaa nínáádiikai. Áádóó tseebídiin dóó biʼaan tááʼ yihah góneʼ yéego bąąhági ádaatʼį́ daazlį́į́ʼ. Áádóó tseebídiin dóó biʼaan dį́į́ʼ yihah góneʼ tʼáadoo beʼiinaʼ łahgo ándeiyiidlaa da.

37 Áádóó baa hoolzhiizh tseebídiin dóó biʼaan ashdlaʼ yihah góneʼ tsʼídá yéego bidziil dóó yéego ádaa dadzódlí daazlį́į́ʼ, dóó doo yáʼáshóonii yaa naakai; áádóó áko bidiʼdoolchxǫǫłgo yíká hashtʼeʼ ánáádaʼdiilyaa.

38 Áádóó kótʼáo tseebídiin dóó biʼaan ashdlaʼ yihahígíí ałtso bił ahoolzhiizh.