1 Áádóó áko, baa hoolzhiizh ląʼí Samuel, Laman dineʼé nilínígíí, deidiiztsʼą́ąʼ, kin tsé binázʼáhígíí bikááʼdóó yáłtiʼgo. Áádóó yee haadzíʼígíí daʼoosdląądgo Nephi hadeídínéestą́ą́ʼ; dóó yikʼídaaskaigo bąąhági ádáátʼįįdyę́ę yee yił dahoolneʼ dóó ałtso ádaa dahoolneʼ, áko da Diyin Bóhólníihii bichʼįʼ tó bee danihidiʼdoolzį́į́ł danízin.

2 Ákondi Samuel bizaad tʼáadoo dayoosdląąyę́ę éí bá dahóóchįįd; dóó tsé yistłʼinígíí yikááʼ dah sizį́įgo tsé yee dayółneʼ dóó tʼóó ahayóí éí kʼaaʼ yee dayoołtʼoh ńtʼę́ę́ʼ tsé yistłʼinígíí yikááʼ dah sizį́įgo; ndi Diyin Bóhólníihii biʼIiʼ Sizį́ Diyinii baa áhályą́ą́ ńtʼę́ę́ʼ, áko índa chʼééh tsé yee dayółneʼ dóó kʼaaʼ yee dayoołtʼóh.

3 Áko chʼééh ndeidiiłneʼ dóó dayołkááhgo, tʼóó ahayóí doo daʼoodlánée bizaad dayoosdląąd, dóó Nephi tó yee dabidoozį́į́ł biniyé yichʼįʼ eekai.

4 Háálá áko shooh, Nephi éí tó yee iisį́įhgo, dóó Diyin bikʼeh áhodooníłígíí yaa hoolneʼ, dóó naʼnitin, diné ádaańdaʼoohkąąh yił níigo, bee éédahózinii dóó ayóó ádaatʼéii yił ííshją́ą́ ííłʼį́įgo, diné bitahgóó álíleekʼeh naalnishgo, áko Christ hodíinaʼgo bidiʼdoochííłgo bił béédahodoozįįł biniyé—

5 Hodíinaʼgo ádahodooníłígíí yee yił halneʼgo, áko ádahodooníłígíí bił béédahózin dóó yéédaalniih doo áko tʼahdoo adahanéehgo bił béédahózin dooleeł biniyé, áko daʼoodlą́ą dooleeł biniyé; éí bąą tʼáá átʼé Samuel bizaad dayoosdląądígíí Nephi yaa heeskai tó bee dabidiʼdoolzį́į́ł biniyé, háálá ádaańdaʼooskan dóó bąąhági ádáátʼįįdyę́ę yaa dahalneʼ.

6 Ákondi ałnííʼ biláahgo éí Samuel bizaad tʼáadoo dayoosdląąd da; éí bąą chʼééh tsé yee ndeidiiłneʼgo dóó chʼééh dayółtʼóóh yaa ákodaniizį́įʼgo, binaatʼáanii yichʼįʼ hadadeesghaazh, kódaaníigo: Díí hastiin daohsił dóó beʼohtłʼó, háálá áko shooh biʼiiníziinii bił hólǫ́; dóó háálá biʼiiníziinii bibee adziilii iiʼ bee hólónígíí biniinaa tsé dóó kʼaaʼ chʼééh bee deiyíníílneʼ dóó chʼééh deíníilkááh; éí bąą bił dadoohdeeł dóó biʼohtłʼó, dóó yíwohjįʼ ádaahłééh.

7 Áádóó dajiisił biniyé bichʼįʼ dahdiijééʼgo, áko shooh, tsé yistłʼinée yikááʼdóó adah dahyiiteʼ, dóó hakéyahdóó chʼélwod, aooʼ, tʼáá bí bikéyahgóó anáálwod, dóó bidineʼé neinitin dóó Diyin bikʼeh áhodooníiłii yee yił ahoʼniilneʼ.

8 Áádóó áko shooh, Nephi dineʼé bitahgóó tʼáadoo baa nááhóóneʼ da; dóó kótʼáo diné bitahgóó ádahóótʼįįd.

9 Áádóó ańdahwiiʼaahii Nephi dineʼé yikʼi dahwéeʼaahgo naadiin dį́į́ʼ yihahgo ahoolzhiizh.

10 Áádóó ándahwiiʼaahii tseebídiin dóó biʼaan tsostsʼid ałdóʼ ałtso nááhai, diné ałnííʼ bilááhdóó tʼahdii ádaa dahaʼniih dóó bąąhági átʼéii yaa naakai, dóó tʼáá díkwíhígo hazhóʼó Diyin God bibee hazʼáanii yikééʼ deíkááh.

11 Áádóó ałdóʼ díigi ádahootʼéé ńtʼę́ę́ʼ, áádóó kótʼáó tseebídiin dóó biʼaan tseebíí ańdahwiiʼaahii dahwééʼaahgo ałtso nááhai.

12 Áádóó dineʼé yaa naakaiígíí tʼįįhdígo łahgo ádzaa, tʼáá hazhóʼó diné tʼóó hózhǫ́ bąąhági átʼéii yee daastłʼis, dóó hónáásiiʼ Diyin God bibee hazʼáanii ląʼí kʼídeiyitííhgo dahdiikai, ándahwiiʼaahii dahwéeʼaahgo tseebídiin dóó baʼaan náhástʼéí yíhai.

13 Ákondi baa hoolzhiizh ándahweeʼáahii Nephi dineʼé yikʼi dahwéeʼaahgo náhástʼédiingóó yihah, diné ląʼí bee éédahózinii, dóó ayóó ádaatʼéii dayiiłtsą́; dóó Diyin yá yádaałtiʼí bizaadyę́ę bidahoolyaa.

14 Áádóó Diyin yá ndaalʼaʼí, diné dahóyáanii yichʼįʼ ííshją́ą́ ádaʼdiilyaa, dóó haneʼ ayóó átʼáo bitsʼą́ą́dóó hózhóonii yee yił dahoolneʼ; áko díí yihahígíí biyiʼ Diyin bizaad bee akʼedaʼashchínígíí bidaʼalnéehgo hahoolzhiizh.

15 Ákótʼée ndi, diné bijéí deistłʼis, tʼáá hazhóʼó diné hózhǫ́ daʼoodlánígíí tʼéiyá, Nephi dineʼé dóó Laman dineʼé tʼáá áłah, áko diné tʼáá bí bibee adziilii dóó tʼáá bí ééhózinii yadaʼólíigo hahoolzhiizh, dóó kódaaníigo:

16 Łaʼ shį́į́ éí tʼáá ákótʼéego dajíiniiʼ, ląʼída baa dahóóneʼígíí; ákondi shooh, díí tʼáá átʼé naanish ayóó ádaatʼéii dóó ayóó ádahodoonííł haʼnínígíí, doo ałtso bidaʼdoolníiłgóó nihił béédahózin.

17 Áádóó díí yaa ntsídaakeesgo dóó saad ahídeetʼáahgo hahoolzhiizh, kódaaníigo:

18 Áko doo shį́į́ ákótʼée da díí Christ nilíigo doogáłígíí; áko níyáago, dóó tʼáá aaníí Diyin God biYeʼ nilį́įgo, yáʼąąsh dóó nahasdzáán yiTaaʼ nilį́, baa hóóneʼę́ęgi átʼéego, haitʼáoósh doo nihichʼįʼ ííshją́ą́ ádiʼdidoolníił da Jerusalemdi ádzaaígi átʼáo?

19 Aooʼ, haitʼáoósh éí doo díí kéyah bikáaʼgi ííshją́ą́ íʼdílnéeh da Jerusalem kéyahdi ádzaaígi átʼáo?

20 Ákondi shooh, díí éí doo yáʼátʼéehgo haneʼígíí átʼéego nihił béédahózin, éí éí danihizhéʼé bitsʼą́ą́dę́ę́ʼ yidił, haʼátʼííshį́į́ ayóó átʼéego dóó ayóó ádahodoonííł haʼnínígíí deidoodląął nihidiʼníigo biniyé, ndi doo éí nihitah áhodooníił da, ndi kéyah doo deeghanídi siʼánígíí bikáaʼdi áhodoonííł, éí kéyah doo nihił béédahózin da; éí bąą tʼáadoo nihił béédahózinígóó ádanihósin, háálá tʼáá aaníí nihinááʼ bee deidiiltséłígíí doo bíighah da.

21 Áádóó ádoonííł, chʼį́įdii doo yáʼáshóonii bináʼágiz dóó doo bééhózingóó éʼélʼíinii bee, doo nihił béédahózinii ayóó átʼáo doo bééhózinii ádeidoolííł, dóó bizaadkʼehgo binaalteʼé daniidlį́įgo éí yee yaago kódanihósin ádanihidoolííł, dóó binaalteʼé ałdóʼ daniidlį́į doo, háálá naʼnitin yee ndanihinitingo baa daʼííníidlí; dóó ákótʼéego bikééʼ nihiikáahgo éí doo nihił éédahózin da dooleeł, ałtso niheʼiinaʼ ádeilyaajįʼ.

22 Áádóó ląʼí diné bijéí biyiʼdi yaa ntsídaazkézígíí dahaazlį́į́ʼ, éí éí tʼáá ádzaagóó ntsáhákees dóó tʼáadoo biniyéhé da; dóó tʼáá íiyisíí dabidiisnááʼ, háálá Chʼį́įdii dabidiisnáaʼgo áłahjįʼ bąąhági átʼéii yaa naakai daazlį́į́ʼ, aooʼ, tʼáá ałtso kéyah bikááʼgóó atseezį́ dóó saad hainiłchaad, áko diné yáʼátʼéehii dóó náasjįʼ ádahodooníiłii yikʼijįʼ bijéí deidoołtłʼis biniyé.

23 Áádóó azhą́ ákótʼéii ndi bee éédahózinii dóó ayóó ádaatʼéii Diyin Bóhólníihii bidineʼé bitah ádahoodzaa ndi, dóó ląʼída álíleekʼehgo ndaashnish ndi, Chʼį́įdii biʼiiníziinii diné bijéí tʼáá íiyisíí yisił tʼáá ałtso kéyah bikááʼgóó.

24 Áádóó kótʼáó ańdahwiiʼaahii Nephi bidineʼé yikʼi dahwéeʼaahgo náhástʼéítsʼáadah ałtso nááhai.

25 Áádóó ákótʼáo Helaman binaaltsoos ałtso ályaa, Helaman dóó biyeʼ binaʼasdzooígíí bikʼehgo.