1 Áko shooh, baa hoolzhiizh ándahweeʼáahii Nephi dineʼé yikʼi dahwéeʼaahgo hástʼą́diin dóó biʼaan náhástʼéí nááhai, áko Nephi, Helaman biyeʼ, náhookǫsdę́ę́ʼ Zarahemlajįʼ nádzá.

2 Háálá diné náhookǫsdí kéédahatʼínígíí yitah naagháá ńtʼę́ę́ʼ, dóó Diyin bizaad yee nideineeztą́ą́ʼ, dóó ląʼí Diyin bikʼeh áhodooníłígíí yił ííshją́ą́ʼ áyiilaa;

3 Áádóó tʼáá átʼé bizaad doo deiyoosdląąd da, honáásdiiʼ yitsʼą́ą́dóó dah diiyá, áko kéyah biiʼ bidizhchį́ yę́ęgóó nádzá.

4 Áádóó diné tsʼídá doo yáʼátʼéehgo bąąhági átʼéii bee bił hazʼą́ągo yiyiiłtsą́, áádóó ándawiiʼaahii-dah naháaztánée dóó Gadianton daʼniʼįįhii dahdineezbin—kéyah bikááʼ adziilii dóó óhólnííh yee ádídahoosnííʼ; Diyin God bibee hazʼáanii doo yikʼeh dahółʼį́į da, azhą́ áłtsʼísígo yáʼátʼééh ndi; nihokááʼ dineʼé doo tʼáá ákógi átʼáo yá ádaʼałʼį́į da;

5 Diyinkʼehgo deíkáhígíí atídeiłʼį́įgo yándahwéeʼaah háálá yáʼátʼéehgo ádaʼałʼínígíí biniinaa; bikʼídahatʼáhígíí dóó bąąhági ádaatʼínígíí bibéeso dahólónígíí biniinaa doo bá ndahweetʼaah da; dóó ałdóʼ binahatʼá tʼahdii yilą́ąjįʼ dah náháaztą́, tʼáá bí ádeinízingo dahwééʼaah, áko da adahweesʼáágo bee bééʼhoʼdílzin doo dóó yee daʼatʼį́į doo, dóó, ałdóʼ, doo nanitłʼagóó aaʼdaʼdilé, dóó daʼniʼįįh, dóó nidaʼałtseed, dóó tʼáá bí ádeinízingo deíkááh.

6 Áko díí ayóó átʼáo bąąhági átʼéii Nephi dineʼé bił hooʼaʼ, doo ląʼí náhááhgóó; áádóó Nephi yiyiiłtsą́ągo, bijéí yínííł biiʼ hadéébįįd biyid biyiʼdi; dóó biiʼ sizíinii yéego neezgaigo kódííniid:

7 O, dooládóʼ shizhéʼé Nephi Jerusalem kéyahdę́ę́ʼ tsʼídá áłtsé háánánéídą́ą́ʼ hinishnáa leʼ, áko kéyah aa deetʼánée baa nihił hózhǫ́ǫ doo ńtʼę́ę́ʼ, dóó bidineʼé doo nanitłʼahgóó ndabidiʼnitinyę́ędą́ą́ʼ, Diyin God bibee hazʼáanii yéego yikʼeh dahółʼíníyę́ędą́ą́ʼ, dóó bąąhági átʼéii doo tsxį́į́ł ádeiłʼíníyę́ędą́ą́ʼ; dóó Diyin Bóhólníihii bizaad tsxį́įłgo yikʼeh dahółʼíníyę́ędą́ą́ʼ—

8 Aooʼ, éí íídą́ą́ʼ shiyoołkááłgóó hinishnáago, shikʼéí diyinkʼehgo deíkáhígíí biniinaa shiiʼ sizíinii bił hózhǫ́ǫ doo ńtʼę́ę́ʼ.

9 Ákondi shooh, díigi átʼáo shił hoolzhiizh, dóó shiiʼ sizíinii yínííł biiʼ haʼdeezbin dóó shiʼsizʼíinii háálá shikʼéí bąąhági átʼéii yiiʼ yiikahígíí biniinaa.

10 Áádóó áko shooh, baa hoolzhiizh yaʼdiitłʼin bikááʼ, éí Nephi bidáʼákʼehgi, éí atiin bíighahígíí, aláahdi naalyéhé bá hooghan bichʼįʼ atiin, éí Zarahemla bikintahdi; éí bąą, Nephi bidáʼákʼehdi yaʼdiitłʼin bikáaʼgi ntsidinígoʼ, éí yaʼdiitłʼinígíí dáʼákʼeh bidanidíʼtį́hígíí bíighahgi atiin.

11 Áádóó baa hoolzhiizh łaʼ hastóí Nephi yitsį́į́góó chʼíkaigo yaʼdiitłʼin bikááʼdóó biiʼ sizíinii yéego Diyin God yichʼįʼ sodilzingo deiyiiłtsą́; áádóó dahdiijééʼ dóó deiyiiłtsánígíí diné yee yił dahoolneʼ, áádóó diné ląʼígo ahíikai áko haʼátʼíí biniyé diné bibąąhági átʼéii ayóó átʼáo baa yínííł jinízin.

12 Áádóó áko, Nephi yiizįʼgo diné ląʼígo ahíikaiʼígíí yiyiiłtsą́.

13 Áádóó baa hoolzhiizh bizééʼ ąą áyiilaa dóó kóyidííniid: Áko shooh, haʼátʼíísh biniyé ahoohkai? Daʼ nihibąąhági ádaatʼéii daatsʼí bee nihił hodeeshnih?

14 Aooʼ, háálá shiyaʼdiitłʼin bikááʼ hasíyá áko shiDiyin God bichʼįʼ shiiʼ sizíinii biyiʼdóó hadeesdzih, háálá shijéí tʼáá íiyisíí yínííł nilínígíí biniinaa, éí nihibąąhági ádaatʼéii biniinaa!

15 Áádóó yínííł nishłínígíí dóó yishchaaígíí biniinaa ahóóhkai, dóó nihił áyóí ádahoodzaah; Aooʼ, dóó biniyéí hólǫ́ǫgo ayóó ádeínóhsin; aooʼ, ayóó da ádanohsin hááłá biʼiiníziinii baa daʼsidooʼą́ągo nihijéí yéego yiyiiłtsood.

16 Aooʼ, háísh yitʼáo chʼíídii yiʼoołkąąhígíí baa dahsidoohʼą́ éí nihiiʼ naazíinii hoyééʼ dóó hoolʼáágóó yíí biyiʼgóó anihidiyooloosgo yíká átʼį́?

17 O ádaa ńdaʼoohkąąh, ádaa ńdaʼoohkąąh! Haʼátʼíí biniyé dadinóhnééł? Diyin Bóhólníihii nihiDiyin God bichʼįʼ ninánohkááh, bichʼįʼ ninánóhkááh. Haʼátʼíí biniyé nihitsʼą́ąjįʼ kódzaa?

18 Nihijéí dasołtłʼisígíí biniinaa; aooʼ, háálá dibé yaa áhályáanii bizhí doo deisinółtsʼą́ą da; aooʼ, tʼáá nihí nihikʼijįʼ bádahóółchįįd.

19 Áádóó áko shooh, ahanihidooʼish ńtʼééʼ, ádaa ńdaʼsookango tʼéiyá, áko shooh, daʼníłtsʼą́ąjigo ałtsʼánihidínóołkał áko łééchąąʼí dóó naaldlooshii daʼałchinii bichʼiiyąʼ dadohłeeł.

20 Yaa, haash yitʼáó nihiDiyin God baa deisoonah éí bijį́įdi yisdá nihidooʼishgo?

21 Ákondi shooh, bitsʼą́ą́dóó nídideeshłééł, áko diné shaa dahaniih doo, aooʼ, áko béésh óola dóó béésh łigaii da nihaa dahidooʼnił danohsin. Áádóó nihijéí bee daʼatʼínígíí yídin danilį́įgo dóó adahwiisʼáágóó bee nihaa dahaʼniihígíí ádá ádaołaa, háálá éí biniinaa nidaʼołtseed, diné bighadaʼayohjááh, dóó daʼnohʼįįh, nihikʼéí bitahgóó atseezį́ baa dahołneʼ, dóó tʼáá átʼé doo yáʼátʼéehii baa nidaahkai.

22 Áádóó díí biniinaa éí yíí nihikʼi siláa dooleeł tʼáá hazhóʼó ádaa ńdaʼsookango tʼéiyá. Háálá doo ádaa ńdaʼsookangóó, áko shooh, díí kin dashijaaʼ ayóó átʼéii, áádóó ałdóʼ tʼáá ałtso nihináago kin dah naazhjaaʼígíí; éí kéyah bee nihídahólníhígíí bikááʼgóó naaznil, éí nihighahidooʼnił áko doo biiʼ nihá hazʼą́ą da doo; háálá áko shooh, Diyin Bóhólníihii éí doo nihidziilgo anihidoolííł da, nahdę́ę́ʼ nihidziil ánihósin yę́ęgi átʼáo, éí niheʼanaaʼí bikʼehnidadóhdleeh ńtʼéé.

23 Háálá áko shooh, Diyin Bóhólníihii ání: bąąhági ádaatʼínígíí doo sheʼadziil bił ííshją́ą́ ádeeshłííł da, doo éí nááná łaʼ atxisgo bił ííshją́ą́ ádeeshłííł da, tʼáá hazhóʼó bąąhági ádaatʼéii yaa ńdaʼooskango tʼéiyá, dóó shizaad yikʼeh dahółʼį́į́góó. Éí bąą ánihidishní, shikʼéí, díí bikʼeh daʼdidoohtʼį́į́ł nisin, Laman dineʼé nihilááhgo bá yáʼátʼééh dooleeł tʼáá hazhóʼó ádaa ńdaʼsookango tʼéiyá.

24 Háálá áko shooh, bí éí tsʼídá diyinkʼehgo deíkááh, háálá ayóó átʼáo ééhózinii nihee yílyáhígíí doo yikʼijįʼ bąąhági ádaatʼį́į da ńtʼę́ę́ʼ; éí bąą Diyin Bóhólníihii baa joobaʼ dooleeł; aooʼ, nízaago dahináago íidoolííł dóó ląʼí báʼáłchíní dahodooleeł, azhą́ ałtso ndanihiʼdistseed ndi tʼáá hazhóʼó ádaa ńdaʼsoohkango tʼéiyá.

25 Aooʼ, yíí bee nihił hazʼą́ą doo háálá ayóó átʼáo aláahgo woolchʼį́dígíí nihitah hazlį́ʼígíí biniinaa, áádóó áajigo bikééʼ dahdookaiʼígíí, aooʼ, éí ndahonitʼingo dah ooldah éí Gadianton haidiilaa!

26 Aooʼ, yíí nihikʼi hodooleeł háálá ádaa hodzódlí nihijéí biyiʼ hodooleełgo bá dahoołʼaʼ, éí yáʼátʼéehii bilááhgóó dah wohkahgo ánihiilaa háálá tsʼídá ayóó átʼáo daʼohtʼį́ dasoolį́ʼígíí biniinaa!

27 Aooʼ, háálá bąąhági ádaahtʼį́ dóó aláahdi woolchʼííd baa naahkaiʼígíí biniinaa hóyééʼ biih dinóohdah.

28 Áádóó dadinóhnééł tʼáá hazhóʼó ádaa ńdaʼsoohkango tʼéiyáʼ; aooʼ, nihikéyah ndi nihighadooʼnił, dóó nahasdzáán bikááʼdóó ánihidiʼdooldįįł.

29 Kʼad áko shooh, tʼáá shí, díí doo ákóhodoonííł dishníi da, háálá tʼáá shí shitsʼą́ą́dóó díí doo shił bééhózin da; ákondi shooh, díí tʼáá aníigo shił bééhózin háálá Bóhólníihii Diyin God shił ííshją́ą́ áyiilaa, éí bąą tʼáá aaníí ahodoonííł dishní.