1 Áádóó baa hoolzhiizh ándahweeʼáahii dahwéeʼaahgo hástʼą́díín dóó biʼaan naaki ałtso nááhai, díí tʼáá átʼé ádahóótʼįįd dóó Laman dineʼé, hózhǫ́ ląʼí, diné diyin yikʼehgo deíkááh daazlį́į́ʼ, hónáásiiʼ Nephi dineʼé yiláahgo diyin yikʼehgo deíkááh daazlį́į́ʼ, háálá beʼoodląʼ doo nahjįʼ kódeilééh da dóó yéego deiyótʼą́ʼígíí biniinaa.

2 Háálá áko shooh, ląʼí Nephi dineʼé doo ndabíʼdídzil da dóó doo ádaa nídaʼookąąh da dóó tsʼídá tʼáá awołíbee bąąhʼígi ádaatʼį́ daazlį́į́ʼ, hónáásiiʼ Diyin God bizaad doo deiniidzį́į́ʼ da áádóó tʼáá ałtso bee ndabidiʼnitin dóó Diyin bikʼeh áhodooníiłgo bee bił dahóóneʼę́ę éí bitahgo bohoolyaa.

3 Ákótʼée ndi, diné sodizin yitah danilínígíí tʼáá íiyisíí bił dahóózhǫǫd háálá Laman dineʼé idahidiikaiʼígíí biniinaa, aooʼ, háálá Diyin God bisodizin biniinaa, éí bitahgóó hadilyaa. Áádóó kʼé daʼahidiʼníí ńtʼę́ę́ʼ, dóó tʼáá íiyisíí bił dahózhǫ́ǫ ńtʼę́ę́ʼ, dóó ayóó átʼáo bil dahózhǫ́.

4 Áádóó baa hoolzhiizh ląʼí Laman dineʼé Zarahemla bikéyahjįʼ níná, dóó haitʼáo idahidiikaiʼígíí Nephi dineʼé yee yił chʼídeizʼą́ dóó daʼiinohdlą́ dóó ádaa ńdaʼoohkąąh deidííniid.

5 Aooʼ, ląʼí ayóó átʼáo adziil dóó óhólnííh bee dahólǫ́ǫgo nidaʼneeztą́ą́ʼ, dóó ląʼí ayáhígo ádaantsídaakees daazlį́į́ʼ, ayáhígo danilį́įgo Diyin God dóó Diyin biDibé Yázhí Nilíinii yikééʼ naazį́.

6 Áádóó baa hoolzhiizh Laman dineʼé tʼóó ahayóí náhookǫsjigo kéyah yiih yíkai; dóó Nephi dóó Lehi ałdóʼ náhookǫsjigo kéyah yiih yíʼáázh, diné neidínóotʼį́į́ł biniyé. Áádóó ákótʼáo hástʼą́diin dóó biʼaan tʼáá ííhai.

7 Áádóó áko shooh, tʼáá ałtso kéyah bikááʼgóó kʼé bił nahaztʼiʼ, áko Nephi dineʼé tʼáá bí adeinízingóó kéyah yikááʼ tádadinééh, Nephi dineʼé éí doodaiiʼ Laman dineʼé bitahgóó.

8 Áádóó baa hoolzhiizh Laman dineʼé ałdóʼ tʼáá bí adeinízingóó tádadinééh, Laman dineʼé éí doodaiiʼ Nephi dineʼé bitahgóó; áádóó áko tʼáá bí ádeinízingo ahiłnidaaldeeh, ałhaandaʼiiłniih dóó baandaʼiiniih, áko yee daʼatʼį́į́ dooleeł, tʼáá bí ádeinízinígíí bikʼehgo.

9 Áádóó baa hoolzhiizh tʼáá íiyisíí daʼátʼį́ daazlį́į́ʼ, tʼáá áłah Laman dineʼé dóó Nephi dineʼé; dóó béésh óola dóó béésh łigaii dóó tʼáá ałʼąą ádaatʼéego béésh daʼílíinii tsʼídá ląʼígo bee dahólǫ́, tʼáá áłah shádiʼááh dóó náhookǫsjigo kéyah bikááʼgóó.

10 Áko shádiʼáahjigo kéyahígíí éí Lehi wolyé, dóó náhookǫsjigo kéyah éí Mulek wolyé, éí Zedekiah biyeʼ bízhiʼ bee wóójiʼ; háálá Diyin Bóhólníihii náhookǫsjigo Mulek yinílóóz, dóó Lehi éí shádiʼáahjigo kéyah yiih yiyílóóz.

11 Áádóó áko shooh, díí tʼáá áłah kéyah béésh óola ałʼąą ádaatʼéego biiʼ hólǫ́ǫ, dóó béésh łigaii, dóó béésh daʼílíinii ałʼąą ádaatʼéego; áádóó diné yee ndaʼachąąhígíí ałdóʼ, éí tʼáá ałʼąą átʼéego yindaalnish dóó daʼílį́įgo ádeileʼ; áádóó ákótʼáo yee daʼastʼįįd.

12 Áádóó ląʼígo kʼidaʼdíílá, tʼáá áłah náhookǫs dóó shádiʼáahjigo; dóó ląʼígo dínéestʼą́, tʼáá áłah náhookǫs dóó shádiʼáahjigo. Áádóó ałʼąą dínéestʼą́ dóó tʼáá ałtsoní kéyah bikááʼgóó yee daʼatʼį́į́go bił hooʼaʼ. Áádóó ląʼígo łį́į́ʼ dóó nanilkaadígíí deineesą́, aooʼ, ląʼí daneeskʼahígíí ałdóʼ.

13 Áko shooh bizáanii éí tʼáá ahą́ą́h nidaalnish dóó daʼadiz, dóó tʼóó ahayóí ałʼąą átʼéego naʼatʼą́hí ádeiłʼį́, áłtsʼóózígo yisdizígíí beiʼádaalyaa dóó naʼatʼą́hí ałʼąą ádaatʼéhígíí, biʼééʼ ádaadinígíí yee hadeidileʼ. Áádóó áko hastą́diin dóó biʼaan dį́į́ʼ yihahígíí kʼé bił naaztʼiʼgo ahoolzhiizh.

14 Áádóó áko hastą́diin dóó biʼaan ashdlaʼ yihah góneʼ ałdóʼ ayóó atʼáo bił dahózhǫ́ dóó kʼé bił dahólǫ́, aooʼ, ląʼí naʼnitin dóó ląʼí diyingo náás ádahodoonííłígíí yaa dahoolneʼ. Áádóó ákótʼáo hastą́diin dóó biʼaan ashdlaʼ ałtso bił ahoolzhiizh.

15 Áádóó baa hoolzhiizh hastą́diin dóó biʼaan hastą́ą́ nááhai ándahwiiʼaahii dahwéeʼaahgo, áko shooh, Cezoram éí ándahwiiʼaahii-dah sidáádóó dah sidáago háí shį́į́ biisxį́. Áádóó baa hoolzhiizh tʼáá éí yihahígíí biyiʼ, biyeʼ, diné bikʼi dadiilniiʼgo bitsáskʼeh góneʼ dah neezdá, éí ałdóʼ biʼdiisxį́. Áádóó kótʼáo hastą́diin dóó biʼaan hastą́ą́ yihahígíí ahoolzhiizh.

16 Áádóó hastą́diin dóó biʼaan tsostsʼid yihah bee hahoolzhíízhgo diné tʼáá íiyisíí bąąhági ádaatʼį́ náádaasdlį́į́ʼ.

17 Háálá áko shooh, Diyin Bóhólníihii tʼáá nízaadgóó bikʼihojisdliʼ nahasdzáán bikááʼ dooʼígíí yee daʼatʼį́įgo áko háiida tʼáadoo bádahóółchįįdí da, anaaʼ, éí doodaiiʼ naʼatseed; éí bąą bee daʼatʼíinii bijéí yiih deiyiiléego yaa nídiikai, aooʼ, daʼatʼį́ yíká ádaatʼį́ daazlį́į́ʼ áko ahidiniłná yee alááh ádaatʼée doogo; áko ndanitʼingo nidaʼahiltseedgo yaa nídiikai, áádóó aheedaʼnitʼįįh dóó aghadaʼiiʼnííł, éí yinahjįʼ daʼátʼį́į doogo.

18 Áádóó áko shooh, nidaʼałtseedii dóó aghadaʼiiʼníiłii éí Kishkumen dóó Gadianton haiyíyíłwod yę́ę yihidiikai. Áádóó áko baa hoolzhiizh ląʼí silį́į́ʼ, Nephi dineʼé bitahgóó ndi, Gadianton dah ooʼishígíí. Ákondi shooh, éí Laman dineʼé doo yáʼádaashónígíí bilááh ánéelą́ą́ʼgóó. Áádóó éí Gadianton daʼniʼįįhii dóó nidaʼałtseedii daosyeʼ.

19 Áádóó bí éí aláahdí ánihwiiʼaahii Cezoram deiyiisxį́, dóó biyeʼ ałdóʼ, ánihwiiʼaahii-dah sidáádóó hooʼáałgo; áádóó áko shooh, tʼáadoo habiʼdoolʼį́į da.

20 Áádóó áko baa hoolzhiizh Laman dineʼé bitah daʼniʼįįhii dahólǫ́ǫgo bił béédahózingo tʼáá íiyisíí yaa yínííł daazlį́į́ʼ; dóó tʼáá ałtso adziil yídaneelʼánígíí yee nahasdzáán bikááʼdóó nahjįʼ kódeidoolíiłgo nideidoołtsxił.

21 Ákondi shooh, Chʼį́įdii éí Nephi dineʼé ląʼígo bijéí yádahóółchįįd, hónáásdóó daʼniʼįįhii dah yikahę́ę yihidiikai, dóó ahadaʼdeestʼą́ dóó ałchʼįʼ ádee hadahaasdzį́į́ʼ, áko ałhánidaabaah dóó ałhaa ádahalyą́ tʼáá bichʼįʼ nidahwiiʼná bił nídahootʼaahgo, áko nidaʼałtseedígíí, dóó aghadaʼiijááh, dóó daʼniʼįįh doo yikʼee tiʼdahoonííh da doo.

22 Áádóó baa hoolzhiizh yee ahéédahoolzinígíí bee dahólǫ́, aooʼ, nidanitʼingo yee ahéédahoolzinígíí, dóó nanilʼingo dabizaadígíí, áádóó díí yee dabikʼis béédahózin yił ahadaʼdeestʼánígíí, áko bikʼis bąąhági ádzaaʼígíí doo atíbidoolíił da, éí doodaiiʼ yił ndaʼahijaahígíí, díí yee yił ahadaʼdeestʼánígíí.

23 Áádóó áko nidaʼałtseed, dóó aghadaʼiiʼnííł, dóó daʼniʼįįh, dóó atsʼíís tʼóó yee nidaané dóó bąąhági átʼéii tʼáá ałtso ałʼąą átʼéego, bikéyah bibee hazʼáanii bitsʼą́ąjigo áádóó ałdóʼ biDiyin God bibee hazʼáanii bitsʼą́ą́jí ádaʼałʼį́.

24 Áádóó tʼáá háí shį́į́ dah yikahgo daʼatahígíí adahwiisʼáágóó bibąąhági ádaatʼínígíí dóó aláahgo woolchʼį́dígíí ííshją́ą́ ályaago, éí baa náhódóotʼįįł, doo bikéyah bibee hazʼáanii bikʼehgo da, ákondi bibąąhági átʼéii bibee hazʼáanii bikʼehgo, éí Gadianton dóó Kishkumen áyiilaaʼígíí bikʼehgo.

25 Áko shooh, díí nanilʼingo ádee hadaʼiisdzííʼ dóó bee ahadaʼdeestʼánígíí éí Alma biyeʼ adawiisʼą́ą́góó doo baa hodoonih da yiłnínée átʼé, éí da binahjįʼ łą́ągo diné biiʼ sizíinii nidahidoochxǫǫł.

26 Áko shooh, díí nanilʼingo ádee hadaʼiisdzííʼ dóó bee ahadaʼdeestʼánée éí Gadianton Helaman ndaʼiisdzoh beiyítʼánée yitsʼą́ą́dóó doo bił bééhoozin da, ákondi shooh, éí Gadianton bijéí yiih yiyíílá éí áłtsé nihishchíinii tsin bineestʼąʼ yidooyį́įłgo yee yiníʼánée tʼáá éí átʼį́—

27 Aooʼ, tʼáá éí átʼį́ Cain yił nahazʼánée, éí bitsilí Abel yiyiisxį́įgo adahwiisʼáágóó doo bééhodoozįįł da níigo yił nahazʼą́. Áádóó Cain dóó bikééʼ naazínígíí yił dahwéeʼaahgo hahoolzhiizh.

28 Áádóó ałdóʼ tʼáá éí ánáánátʼį́ diné bijéí yiiʼ niinílá éí kin wótʼááh yíʼáii tsʼídá wódahgo yindaashnish áko yáʼąąshdi dookah. Áádóó tʼáá éí ánáánátʼį́ wótʼááh yíʼáiidę́ę́ʼ kojįʼ kéyah yiih ííʼeezh; éí chahałheełjí naʼanish ąą kwíyiilaa dóó tsʼídá woolchʼį́dígíí adahwiisʼáágóó ąą kwíyiilaa, diné ádooldįįłjįʼ niyiishóód dóó hoolʼáágóó chʼį́įdiitahgóóyaa.

29 Aooʼ, tʼáá éí ánáánátʼį́ Gadianton bijéí yiih yiyíílá chahałheełjí naʼanish tʼah ííłʼį́į doogo, dóó nanilʼingo naʼatseed; dóó diné hadilyaadą́ą́ʼ dóó kojįʼ yinílá.

30 Áádóó áko shooh, tʼáá éí ánáánátʼį́ tʼáá ałtso bąąhági ádaatʼéii haidiilaa. Áádóó áko shooh, dóó chahałheełjí naʼanish dóó nanitʼingo naʼatseed yinílá, dóó bindahatʼá aa yiizlá, dóó yee ádee hadahaasdzíʼígíí, dóó yee yił ahadaʼdeestʼánígíí, dóó tsʼídá doo yáʼátʼééhgóó bąąhági átʼéii binahatʼá, ałkééʼ oochííłdę́ę́ʼ nihokááʼ dineʼé baʼáłchíní bijéí yidoosiłígíí bikʼehgo.

31 Áádóó áko shooh, Nephi dineʼé tsʼídá ayóó átʼáo bijéí yiyiiłtsood; aooʼ, hónáásiiʼ tʼáá íiyisíí bąąhági ádaatʼį́ daazlį́į́ʼ, ląʼí yáʼátʼééjigo oodááł yitsʼádahaaskai, dóó Diyin God bibee hazʼáanii yikʼi naazhjééʼ, dóó tʼáá bí ádeinízinígíí bikʼehgo dah diikai, áádóó dílzingo beʼalyaaígíí bibéésh óola dóó bibéésh łigaii yee ádeiyiilaa.

32 Áádóó baa hoolzhiizh díí tʼáá átʼé bąąhági ádeiłʼínígíí tʼáadoo díkwíí da náháhí yichʼįʼ naheeskai, hónáásiiʼ ląʼí da hastą́diin dóó biʼaan tsostsʼid ándahwiiʼaahii Nephi bidineʼé yikʼi dahwéeʼaahgo yichʼįʼ nidahaaskai.

33 Áádóó hastą́diin dóó biʼaan tseebíí yihahgo ałdóʼ bąąhági ádaatʼínígíí yee dadínéesą́, diyinkʼehgo dahinánígíí ayóó átʼáo yínííł danilį́ dóó daacha.

34 Áádóó áko baa ákodaniidzį́į́ʼ Nephi dineʼé beʼoodląʼ yaa dáádiikahgo bee hahoolzhiizh, tsʼídá aláahdi woolchʼį́dígíí yee dadínéesą́, áádóó Laman dineʼé éiyá biDiyin God yéédahodoosįįłgo tʼáá íiyisíí yee dadínéesą́; aooʼ, bibee hazʼáanii dóó bibee hazʼáanii yikʼeh dahółʼį́ daazlį́į́ʼ, áádóó tʼáá aaníinii dóó yáʼátʼéehgo bidááhdóó oodáłígíí ádeiyiilaa.

35 Áádóó áko baa ákodaaniidzį́į́ʼ Diyin Bóhólníihii biʼIiʼ Sizį́ Diyinii Nephi dineʼé yitsʼą́ą́dóó dahodiileʼ, háálá bąąhági ádaatʼínígíí dóó bijéí deistłʼisígíí biniinaa.

36 Áádóó áko baa ákodaaniidzį́į́ʼ Diyin Bóhólníihii biʼIiʼ Sizį́ Diyinii Laman dineʼé yichʼįʼ ąą áyiilaa, háálá bizaad doo nanitłʼahgóó dóó ádeinízingo deiyoodlánígíí biniinaa.

37 Áádóó baa hoolzhiizh Laman dineʼé Gadianton daʼniʼįįhii yíká ndaazbaaʼ; áádóó Diyin God bizaad hózhǫ́ doo yáʼádaatʼéhígíí bitahgóó nidaʼneeztą́ą́ʼ, hónáásiiʼ díí daʼniʼįįhii dah yikahígíí Laman dineʼé bitahdóó tʼáá ałtso nideistseed.

38 Áádóó baa hoolzhiizh nááná łahjigo éí, Nephi dineʼé bikáʼííjééʼ dóó bidziilgo ádabiilaa, tʼáá íiyisíí bąąhági átʼéii yaa naakai dóó, Nephi dineʼé bikéyah tʼáá átʼé bikááʼgóó dahazʼlį́į́ʼ, áádóó ląʼí yáʼátʼéehgo dahinánígíí yindaʼazloʼ bindaanishígíí tʼáá aaníí átʼé daniizįįʼ dóó aghadeiyiisnil yę́ę chodeiyoosʼįįd, dóó nanilʼingo naʼatseed dóó áajigo ádaʼalʼíinii atah yaa nídiikai.

39 Áádóó áko ndahatʼá bídahólnííhígíí yikʼeh dadeesdlį́į́ʼgo tʼáá bí tʼéiyá ndeiloʼgo ádeiyiilaa, hónáásdóó téʼéʼį́ danilínígíí dóó baʼátʼeʼ ádaadinígíí, dóó aʼoh danilį́įgo Diyin God yikééʼ deíkáhígíí yikʼi naazhjééʼ dóó ndeineestsʼin dóó atídeiyiilaa dóó yitsʼą́ąjįʼ ńdaazʼyiz.

40 Áádóó áko baa ákodaniidzį́į́ʼ tsʼídá tʼóó baaʼihgo bił hooʼaʼ, dóó hoolʼáágóó ábidiʼdooldįįłgo daneestʼą́.

41 Áádóó baa hoolzhiizh kótʼáo andahwiiʼaahíí Nephi bidineʼé yikʼidahwéeʼaahgo hastą́diin dóó biʼaan tseebííʼ ałtso nááhai.