1 Áádóó baa hoolzhiizh ashdladiin dóó biʼaan dį́į́ʼ yihah góneʼ ląʼí da sodizin daʼatahígíí ałkʼijįʼ daazlį́į́ʼ, dóó ałdóʼ diné ałkʼinéíjah, áko ląʼída ndaʼahistseed.

2 Áádóó akʼijįʼ ńdíijéʼígíí éí łaʼ ndabiʼdistseed dóó łaʼ éí kéyahdóó chʼibidiʼnoozood, áádóó Laman dineʼé bialáahdi naatʼáanii yichʼįʼ adahineezchą́ą́ʼ.

3 Áádóó baa hoolzhiizh Laman dineʼé éí Nephi dineʼé yikʼijįʼ anaaʼ ádeidoolííłgo yíká ádaatʼį́; ákondi shooh, Laman dineʼé tʼáá íiyisíí ndaasdzííd, áko akʼijįʼ danilínígíí bizaad doo deiyóostsʼą́ą́ da.

4 Ákondi baa hoolzhiizh ashdladiin dóó biʼaan hástʼááʼ yiihah góneʼ ándahwiiʼaahii dahwééʼaahgo, atsʼą́ą́jí daazliʼígíí Nephi dineʼé bitahdóó Laman dineʼé yił ahíikai, áádóó Nephi dineʼé yikʼijįʼ yá dahółchįįd; áádóó ałkʼiidoojah biniyé hashtʼeʼádaʼdilnééhgo ałtso yíhai.

5 Áádóó ashdlaʼdiin dóó biʼaan tsʼostsʼid yihahgo Nephi dineʼé yichʼįʼ dadeezbaaʼ, dóó ałkʼiijééʼ, aooʼ, áko ashdlaʼdiin dóó biʼaan tsʼeebíí yihah góneʼ ándahwiiʼaahii dahwééʼaahgo Zarahemla kéyah yee ádídahoosniiʼ; aooʼ, dóó kéyah tʼáá ałtso, kéyah Bountifulbíighahjįʼígíí ałdóʼ.

6 Áádóó Nephi dineʼé dóó Moronihah bindaabaahí kéyah Bountiful biyiʼjįʼ abiʼinoodzood;

7 Dóó áadi Laman dineʼé yikʼijįʼ hódziilgo ádahoolaa, tónteel eʼeʼaahdééʼ, dóó haʼaʼaahjįʼ; éí Nephi dineʼé yigááłgo tʼááłaʼí jį́ bíighah, bidziilgo ádahoolaa yę́ę bikáaʼgi dóó bindaabaahí ákweʼé náhookǫsjigo yichʼą́ą́h ndaabaah doogo.

8 Áádóó áko Nephi dineʼé yitsʼą́ą́jí daazlį́į́ʼyę́ę, Laman dineʼé bindaabaahí ląʼígo yíkáʼííjééʼ, éí Nephi dineʼé yee bídahónííh yę́ę yee ádídahoosnííʼ kéyah shádiʼááhjigooʼígíí. Dóó díí tʼáá átʼé ashdlaʼdiin dóó biʼaan tsʼeebíí dóó náhastʼéíjįʼ yihahgo ándahwiiʼaahii dahwééʼaahgo biiʼ ádahóótʼįįd.

9 Áádóó baa hoolzhiizh ándahwiiʼaahii hastą́diin yihah góneʼ dahwééʼaahgo, Moronihah bindaabaahí yił ląʼí kéyah yee ádídahoosniiʼ aooʼ, ląʼ kin dah naazhjaaʼ shónídayoostʼeʼ éí Laman dineʼé yee ádídahoosniiʼ ńtʼę́ę́ʼ.

10 Áádóó baa hoolzhiizh ándahwiiʼaahii hastą́diin yihah góneʼ dahwééʼaahgo ałnííʼdóó daabíhę́ęʼ shónídayoostʼeʼ.

11 Áko ayóó átʼáo Nephi dineʼé bąąh ádaʼasdįįd, dóó bitahdóó ayóó átʼáo ndabiʼdiztseed, díí doo ádzaadadoo ńtʼę́ę́ʼ doo tsʼídá woolchʼįdígíí bitah hólǫ́ǫ́góó; aooʼ, éí Diyin God bisodizin atah daniidlį́ danínígíí bitahdę́ę́ʼ.

12 Áádóó díí éí bijéí yee ádaadadzodlíhígíí biniinaa, ayóó daʼatʼinígíí biniinaa, aooʼ, baa dahojoobaʼígíí atídeiłʼínígíí biniinaa, dichin danilinígíí chʼiyáán yąąh deiʼį́, biééʼ ádaadinígíí ééʼ yichʼįʼ yaa danichįʼ, bikéí aʼoh danilinígíí biniiʼ ndeiniłtsʼin, dadilzin yę́ę tʼóó yaa daadloh, diyingo áhodooníłígíí dóó diyingo ił ííshją́ą́ ályaaígíí doo bił danilį́į da, ndaʼałtseed, aghadaʼiiʼnííł, dabiyoochʼííd, daʼniʼįįh, aadaʼdilé, ayóó átʼáo saad dahólǫ́ǫ ałkʼinéíjah, Nephi bikéyahjįʼ yooʼahijeeh, Laman dineʼé bitah—

13 Áádóó ayóó bąąhági ádaatʼinígíí biniinaa, dóó beʼadziil yee ádaadazódlí, tʼáá bí beʼadziil chodeiyołʼį́įgo beʼalniiʼ; éí bąą tʼáadoo łaʼ deiyiilaiʼí da, ákondi atídabiʼdiilyaa dóó bichʼįʼndahwiisnááʼ, dóó Laman dineʼé adabineeschą́ą́ʼ, bikéyah kʼasdą́ą́ ałtso bighadahasniljįʼ ndi.

14 Ákondi shooh, Moronihah éí diné ląʼígóó yee neineeztʼą́ą́ʼ bąąhági ádaatʼinígíí biniinaa, dóó Nephi dóó Lehi ałdóʼ, éí tʼáá áłah Helaman biyeʼ nilį́, éí ląʼígóó diné neineeztʼą́ą́ʼ, aooʼ, dóó ląʼígo Diyin bikʼeh áhodooníłígíí éí bąąhági ádaatʼinígíí yee yił hodoolnih, dóó haada shą́ dadoonííł biʼbąąhági ádaatʼéii doo yaa ńdaʼooskangóó.

15 Áádóó baa hoolzhiizh ádaańdaʼooskan, dóó ádaańdaʼooskango tʼáá náásdeeskai.

16 Áko ádaańdaʼooskango Moronihah yaa ákoniizį́į́ʼ tʼáá hastʼiʼ ndi daʼníłtsʼą́ą́góó tʼaidííʼeezh, áádóó kin dah naazhjaaʼgóó, binaadeełii dóó bikédayah ałnííʼdóó shońdeiyoostʼeʼ.

17 Áádóó hastą́diin dóó biʼaan tʼááłʼáʼí nááhai ándahwiiʼaahii dahwééʼaahgo.

18 Áádóó baa hoolzhiizh ándahwiiʼaahii hastą́diin dóó biʼaan naaki yihah góneʼ dahwééʼaahgo, Moronihah éí Laman dineʼé doo kéyah yighá náádahodidootʼááł da.

19 Éí bąą kéyah chʼínééłnaʼígíí yighadahodidootʼáałgo yindahaʼáʼą́ą ááʼdeisįįd, háálá Laman dineʼé tʼóó ahayóíʼígíí biniinaa Nephi dineʼé yikʼeh dadidoodlééłígíí doo yí daneelʼą́ą da silį́į́ʼ, éí bąą Moronihah bándaabaahí tʼáá átʼé yee ádídahoosnííʼígíí yaa ádahalyą́ągo áyiilaa.

20 Áádóó baa hoolzhiizh, Laman dineʼé tʼóó ahayóí silį́ʼígíí biniinaa Nephi dineʼé tʼáá íiyisíí bikʼee bił dahóóyééʼ, bikʼeh hodidoodleeł danízin, dóó bikʼiʼndooldah, dóó ndadootsxił, dóó abiʼdiʼdooldįįł.

21 Aooʼ, Alma náásdí adahidoonííł nínééʼ yéédaasniiʼ, áádóó Mosiah ádííniid yę́ę ałdóʼ; áádóó diné doo ndabíʼdídzil da daazlį́į́ʼgo yaa ákodaniizį́į́ʼ, dóó Diyin God bibee hazʼáanii doo yadaʼoolį́į da.

22 Áádóó Mosiah bibee hazʼáanii łahgo ádeiyiilaa dóó tʼóó yikʼinaaskai, doodaiiʼ Diyin Bóhólníihii ádííniidgo diné yee ndeineeztʼą́ą́ yę́ę; dóó bibee hazʼáanii ádeiyiilaa yę́ę deiyííłchxǫʼ, dóó diné bąąhági ádaatʼinígíí daazlį́į́ʼ, hónáásdóó Laman dineʼé nahalingo bąąhági ádaatʼį́.

23 Áádóó bąąhági ádaatʼínígíí biniinaa ląʼí sodizin yitsʼáhaskai; dóó diyingo áhodooníłígíí dóó diyingo ił ííshją́ą́ ályaaígíí doo deiyoodlą́ą da daazlį́į́ʼ; Diyin God bá nahidooʼáłígíí bá bikʼihoolyaa.

24 Áádóó doo dabziil da daazlį́įʼgo yaa ákodaniizį́į́ʼ, bikʼéí, Laman dineʼé nahalingo, dóó Diyin Bóhólníihii biʼIiʼ Sizį́ Diyinii doo bikʼidéézʼį́į́ʼ da silį́į́ʼ; háálá Diyin Bóhólníihii biʼIiʼ Sizį́ Diyinii atsʼíís doo biiʼ dahodílzinígíí éí doo yiiʼ hólǫ́ǫ da.

25 Éí bąą Diyin Bóhólníihii beʼálilee adziil dóó beʼadziil tʼáadoo bináłtʼéí doo yisdáʼbidooʼish da, háálá biʼoodląʼ yaa dáádiikai dóó bąąhági átʼéii tʼáá íiyisíí tʼóó baaʼihgo bee bił hooʼaʼ; dóó Laman dineʼé bilááh ánéílą́ągo deiyiiłtsą́, áádóó Bóhólníihii Diyin God deiyiiłtsoodgo tʼéiyá doo ábiʼdiʼdooldįįł da.

26 Háálá áko shooh, Laman dineʼé beʼadziil éí tʼáá bí beʼadziil bíneilą́ągo yaa ákodaniizį́į́ʼ, tʼááłaʼí nízinígo diné tʼáá aheełtʼéego dabidziil. Áádóó áko ayóó átʼáo ndaʼiisdzíʼígíí yiih yikai; aooʼ, áko doo dabidziil da daazlį́į́ʼ, ndaʼiisíhígíí biniinaa, tʼahdoo ląʼí náhááhgóó.