1 Áádóó áko baa hoolzhiizh dizdiin dóó biʼaan tááʼ yihah góneʼ ándahwiiʼaahii dahwééʼaahgo, Nephi bidineʼé bitahgóó doo ahináádiijah da tʼáá hozhóʼí sodizin biyiʼ tʼáá dikwíhígo adaadadzóódlí, éí biniinaa diné łaʼ tʼóóyó ałtsʼą́ąjįʼ daazlį́į́ʼ, éí ákóhoodzaaʼígíí dizdiin dóó biʼaan tááʼ nahááhgo hashtʼeilyaa.

2 Áádóó diné doo ahináádiijah da dizdiin dóó biʼaan dį́į́ʼ yihahgo, doodaiiʼ dizdiin dóó biʼaan ashdlaʼ yihah góneʼ doo yéego saad dahółǫ́ǫ da.

3 Áádóó baa hoolzhiizh dizdiin dóó biʼaan hastʼą́ą́ yihahgo, aooʼ, tʼáá ląʼí saad dahółǫ́ dóó tʼáá ląʼí ałtsʼą́ąjįʼ daazlį́į́ʼ, áko biniinaa tʼóó ahayóí Zarahemla bikéyahdééʼ chʼídahaazná, áádóó nahookǫs kéyahjigo tʼáá daabí dadooleełgo yiihdahaazná.

4 Áádóó tʼáá íiyisíí danízaadgóó daníná, ákotʼáo tó ląʼí dah naazyį́įjįʼ dóó tooh ląʼí danilį́įjįʼ.

5 Aooʼ, dóó áajigo ndi tʼáá ałtso kéyah bikááʼgóó háánootʼą́, tʼáá kéédahojitʼį́ bohónéídzą́ą́góó dóó tsin dahólǫ́ǫ́góó, háálá tʼah bítséédi akǫ́ǫ́ kéyahgóó łaʼ kéédahojitʼį́į́ ńtʼę́ę́ʼ.

6 Áádóó áko kéyah bikááʼgóó tʼáá yáʼáhootʼééh, tʼáá hozhóʼí tsin éí bąą ádin; ndi tʼóó báhádzidgo dahoochxoʼígíí biniinaa diné ákǫ́ǫ́ kéédahatʼinééʼ díí kéyah bitsʼą́ą́dóó doo chohooʼį́į da deiłníí ńtʼę́ę́ʼ.

7 Áádóó tʼáá díkwíhí tsin kéyah bikááʼ yilʼá, ákotʼée ndi diné ákǫ́ǫ́ adahaznánígíí tsé nádleehí yee ndaalnishgo ayóó deiyiichį́į́ʼ; éí bąą hooghan tsé nádleehí yee ádeiyiilaa, éí yiiʼ dabighan ńtʼéé.

8 Áádóó baa hoolzhiizh ałʼąą dínééstʼą́ dóó ałtsʼá dahaazná, áádóó shadiʼaahjigo dóó nahookǫsjigo kéyahgóó adaahazná, áádóó ndinééstʼą́ą́go nahasdzáán tʼáá siʼáán ńtʼéé bikááʼgóó adahaazná, tónteel shádiʼááhjigo dóó tónteel nahookǫsjigo, tónteel eʼeʼaahjigo dóó tónteel haʼaʼaahjigo.

9 Áádóó diné nahookǫsjigo kéédahatʼinígíí éí níbaal yiiʼ dabighan, dóó hooghan tsé nádleehí biyiʼ, biniʼ tsin náhodoodleeh danízingo tsin bináágóó dadeidínéésą́, áko náás hodeeshzhiizhgo tsin yee bighan ádeiłʼį́į́ doo, aooʼ, bikin dah naazhjaaʼgóó, dóó diyin bighan naaznilgóó, dóó yiiʼ sodadilzingóó, dóó dahodísingóó, dóó tʼáá ałtso ałʼąą átʼéego kin naaznilgóó.

10 Áádóó baa hoolzhiizh tsin tʼáá íiyisíí doo dahólǫ́ǫ da nahookǫs kéyahdi, tʼáá ląʼí ákǫ́ǫ́ yił daʼníłʼéél.

11 Áádóó áko éí nahookǫsjigo diné kéédahotʼinígíí kin dashijaaʼ ádeidoolííłgo chodeidoołʼííłígíí yee yíká ííjééʼ, tʼáá áłah tsin dóó tsé nádleehí bee.

12 Áádóó baa hoolzhiizh ląʼí da éí Ammon bidineʼé ádaatʼį́, éí Laman dineʼé yitsʼą́ą́dóó ndaʼhaazhchį́, éí ałdóʼ díí kéyahgóó aheezná.

13 Áádóó áko ląʼída díí diné ádaʼiilaahígíí baa ndaʼíísdzoh, ląʼí díí diné tʼáá bí ádeiyiilaa, éí tsʼídá nizhónígo alyaa dóó tʼáá íiyisíí ląʼígo sinil, éí bí bidadeitʼiʼígíí baa haneʼ.

14 Ákondi shooh, áko tʼááłʼáʼígíí neeznádiin bideitʼą́ą́ʼgo díí diné baa hooneʼ, aooʼ, Laman dineʼé dóó Nephi dineʼé yaa halneʼ, biʼdanaaʼ dóó ałchʼįʼ ndadiikʼąąh, dóó ałtsʼą́ą́jí danilinígíí, dóó yee ndaʼahinitinígíí, dóó diyingo bił ííshjááʼ ádaalyaahígíí, dóó tółkááʼ ndaʼayéhígíí, dóó tsin naaʼeeł ádeiłʼínígíí, dóó diyin bighan adeileʼígíí, dóó yiiʼ sodadilzinígíí dóó yiiʼ dahodísinígíí, dóó Diyinkʼehgo dahiinánígíí, dóó bąąhági ádaatʼinígíí, dóó ndaʼałtseedígíí, dóó daʼniʼįįhígíí, dóó adaʼiiyeehígíí, dóó tʼáá ałʼąą átʼéego bąąhági ádaatʼįįd dóó atsʼíís yee tsiʼndaaskaiʼígíí, éí díí ndaʼíísdzohígíí biyiʼ doo baahodoonih da.

15 Ákondi shooh, ląʼí ndaʼíísdzoh dóó ląʼí ałʼąą átʼéego badahaneʼ, dóó Nephi dineʼé íiyisíí yaa ádahalyą́ą ńtʼę́ę́ʼ.

16 Áádóó ałkééʼ daʼáchííhgo Nephi dineʼé ndaʼasdzohígíí ałkééʼ deiyíjaah ńtʼéé, azhą́ ndaʼiisííʼ dóó ndabiʼdiltseed ndi, adaʼiizhjaaʼ, dóó ndabiʼdilzheeh, dóó ndabidiʼneeskaad, dóó nahasdzáán bikáaʼjįʼ daʼníłtsʼą́ąjigo ałtsʼádabidiʼneeskaad, dóó Laman dineʼé yił ahiikai honáásdóó Nephi dineʼé doo bee biʼdoojíí da, bąąhági ádaatʼį́, dóó daʼałchin, dóó tʼóóʼ bádahádzid, aooʼ, Laman dineʼé daazlį́į́ʼ.

17 Áádóó shaa haneʼ áshléhígíí baa nínáádiisdzá, áko, saad bee yááłtiʼ yę́ę biláhooshzhiizh éí bikéédóó ayóó átʼáo saad ałkʼijįʼ adajiiznil, dóó hadahojinííłchaad, dóó anaaʼ, dóó ałtsʼádaʼiisdeeʼ, Nephi bidineʼé bitahgóó.

18 Ándahwiiʼaahii dahwééʼaahgo dizdiin dóó biʼaan hastʼą́ą́ nááhai.

19 Áádóó baa hoolzhiizh tʼahdii yéego kéyah bikʼááʼgóó ałkʼijįʼ daʼídlį́, aooʼ, dizdiin dóó biʼaan tsostsʼid yihahdi hoolzhish ndi, dóó ałdóʼ dizdiin dóó biʼaan tseebii yihahgi ndi.

20 Ákotʼée ndi Helaman anahwiiʼaahii tʼáá ákótʼáo dóó ahehoołtʼéego nahwiiʼaah ńtʼę́ę́ʼ, aooʼ, bee hazʼą́ bee ndahwiistʼáanii, dóó Diyin God bibee hazʼáanii yikʼehgo eʼéłʼį́į ńtʼéeʼ; áádóó áłahjįʼ Diyin God yáʼátʼéehii yinááł iiłʼį́į ńtʼéeʼ; dóó bizhéʼé yikʼehgo eʼéłʼį́į ńtʼę́ę́ʼ; áko kéyah bikááʼgóó náásdeeyá.

21 Áádóó baa hoolzhiizh naaki biyeʼ. Alą́ąjįʼ naagháhígíí éí Nephi yee yiyíízhiʼ, áádóó akéédóó naagháhígíí éí, Lehi yee yiyíízhiʼ. Áádóó Diyin Bóhólníihii yá hodísingo biyaa hooʼaʼ.

22 Áádóó baa hoolzhiizh anaaʼ dóó ałkiʼjįʼ daʼídlį́ yę́ę ábiʼdiʼniidįįd, éí ałchʼįįdí yileełgo, Nephi dineʼé bitahgóó, éí dizdiin dóó biʼaan tseebíí niihááh góneʼ ándahwiiʼaahii yikʼidahwéeʼaah ńtʼę́ę́ʼ.

23 Áádóó baa hoolzhiizh ándahwiiʼaahii dizdiin dóó biʼaan náhástʼéí yihah góneʼ dahwééʼaahgo, tʼáá áłahjįʼ kéyah bikááʼgóó kʼé bee hazʼą́ągo daʼíníísh, tʼáá hazhoʼó nanitʼingo dahʼooldah éí Gadianton aniʼįįhii kéyah hashtʼedahoolyaagi báhazʼą́ áyiilaa, íídą́ą́ʼ nahatʼájí binaatʼáanii doo bił béédahózin da; áko doo kéyahdóó ábiʼdisdįįd da.

24 Áádóó baa hoolzhiizh éí yihah góneʼ ayóó átʼéego sodizin dínééstʼą́ áko dimííl yázhí bilááhgóó sodizin yihidiikai dóó ádaańdaʼooskango tó bee dabiʼdoolzį́į́ʼ.

25 Áádóó ayóó átʼéego sodizin ąą dínééstʼą́ągo, dóó diné tʼóó ahayóí akʼihojídlí bikʼijįʼ kólyaa, high priest dóó ndaʼnitiní danilínígíí ndi ił hóyééʼ bilááhgóó bił ádahoodzaa.

26 Áádóó baa hoolzhiizh Diyin Bóhólníihii binaanish tó beeʼalzį́į́h yee dínééstʼą́ dóó, tʼóó ahayóí iiʼ sizíinii, Diyin God bisodizin yee łąʼí silį́į́ʼ, dimííl yázhí bilááhgóó ndi.

27 Díígiʼ átʼáó bééhoozin tʼáá ałtsóní ádeinízinígíí Diyin Bóhólníihii yaa joobaʼ, bijéí yee tʼáá aaníí ádaaníigo, Diyin bízhiʼ dílzinii yichʼįʼ sodadilzin.

28 Aooʼ, nihił bééhoozin tʼáá ałtsóní yáʼąąsh biʼaanídítį́į́h bichʼįʼ ąą ádaalneʼ, tʼáá háida Jesus Christ, Diyin God biYeʼ, bízhiʼ deiyoodlánígíí.

29 Aooʼ, tʼáá háida ádeinízinígíí Diyin God bizaad da yaa ákodadínóozįįł, éí ayóó bidziil dóó hiiná, éí biʼiiníziinii tʼáá átʼé binaʼagiz dóó yee tsistłʼaʼ niʼiiłcheihii dóó doo biyáʼátʼéehi nahjįʼ kwííłʼį́, dóó diné Christ yikééʼ yigááłígíí kʼéhásdon dóó ahoołtsʼóózí honítʼiʼ góneʼ chʼíídoolóós éí bąąhági ádaatʼíínii hooʼáálgóó tiʼhooʼnííh bidoosiłígíí átʼé.

30 Áádóó biiʼ sizíinii, aooʼ, biiʼ naazíinii doo daatsaahii, Diyin God bilaʼ binishnáájí, yáʼąąsh hazʼą́ądi doogááł, éí Abraham, dóó Isaac, dóó Jacob, dóó tʼáá ałtso dabizází dahodisinii yił dahdínóobįįł, doo éí áádę́ę́ʼ hánáádookah da.

31 Áádóó éí yihahígíí biiʼ Zarahemla kéyahdi áłahjįʼ ił hózhǫ́ bił dahólǫ́, dóó tʼáá átʼé bináágóó ndahazʼánígíí biiʼ, kéyah tʼáá átʼé Nephi dineʼé bee bídahólnííhgóó ndi.

32 Áádóó baa hoolzhiizh dizdiin dóó biʼaan náhastʼéí ííhahjįʼ kʼé dóó ayóó átʼáo ił hózhǫ́ hólǫ́ǫgo ahoolzhiizh; aooʼ, áádóó tʼáá kʼé dóó ayóó átʼáó ił hózhǫ́ hólǫ́ǫgo ándahwiiʼaahii dahwééʼaahgo ashdladiin ałtso nááhai.

33 Áádóó ashdladiin dóó biʼaan łaʼ góneʼ ándahwiiʼaahii dawééʼaahgo kʼé ałdóʼ tʼahdii hólǫ́ǫ́ ńtʼę́ę́ʼ, tʼáá hazhoʼó ádaahodzódlí tʼéiyá sodizin biiʼ hooleeł silį́į́ʼ—Diyin God bisodizin biiʼ éí dooda, ákondi Diyin God bisodizin biyiʼ daʼniitah daniidlį́ daanínígíí bijéí biyiʼ.

34 Áádóó ádaa hodzódlí yee dahdiikai, bikʼéí tʼóó ahayóí yichʼįʼ ndahwiiłnáágo ndi. Áko díí éí ayóó átʼáo doo yáʼáshóonii átʼé, éí diné aʼohgo ntsédaakeesígíí yéego tʼidahoonííhgo doo yáʼádaatʼéehii bichʼįʼ ndahwiisnááʼ, áádóó ayóó átʼáo ká yiyiʼ chʼékai.

35 Ákotʼée ndi áłahjįʼ sodadilzin dóó chʼiyáán ádąąhdeitʼį́, dóó aʼohgo ídlį́ yéego dóó tsʼídá yéego bidziilgo yee dadínéísą́, áádóó Christ woodlą́ dóó tsʼídá yéego yadaʼóólíigo, biiʼ sizíinii ił hózhǫ́ dóó biiʼ háádahwiisdoh bił hooleʼ, aooʼ, áko bijéí daniłtólí dóó hadaałtʼé daazlį́į́ʼ, éí hadaałtʼé adaalyaago Diyin God bijéí yaa deideezʼánígíí biniinaa.

36 Áádóó baa hoolzhiizh ashdladíín dóó biʼaan naaki yíhai kʼé bił naaztʼiʼgo bee ahoolzhiizh, tʼáá hazhóʼó tsʼídá yéego ádaa hodzódlí diné bijéí biyiʼ daazlį́ʼígíi tʼéiyá, háálá ayóó daʼatʼį́į doo kéyah yiiʼ náás deiskaiʼígíí biniinaa, áádóó tʼáá ákwííjįʼ yee yikékʼeh deeskai.

37 Áádóó baa hoolzhiizh ándahwiiʼaahii ashdladiin dóó biʼaan tááʼ yihah góneʼ dahwééʼaahgo, Helaman dahnídiidzá, áádóó biyeʼ Nephi alą́ąjįʼ naaghahígíí bitséskʼeh góneʼ nahaʼáágo dahnááneezdá. Áádóó baa hoolzhiizh anahwiiʼaahii tʼáá ákótʼáo dóó ahehoołtʼéego nahaʼáá ńtʼę́ę́ʼ; aooʼ, dóó Diyin God bibee hazʼáanii yikʼeh hołʼį́į ńtʼę́ę́ʼ dóó bizhéʼé hooʼáłę́ęgiʼ átʼáo hooʼááł ńtʼę́ę́ʼ.