1 Áádóó áko, shikʼiské ayóó ánihííníshʼníinii, áko shooh, ánihidishní ádaańdaʼsookango tʼéiyá danihighanée dááchxǫʼgo naaznil dooleeł.

2 Aooʼ, tʼáá hazhóʼó ádaańdaʼsookango tʼéiyá, nihizáanii awééʼ yiʼdaʼiiłtʼoʼígíí ayóó átʼéego yiniinaa daachaaígíí hólǫ́ǫ dooleeł; háálá dadínóochą́ąʼgo tʼáadoo yisdáhóótʼiʼ da silį́įʼ doo, aooʼ, dóó yíiyá dooleeł áadi awééʼ yił daaltsánígíí, háálá dandaazgo chʼééh dahdadiiltłʼééh dooleeł; éí bąą, bikʼi chʼízhdoojah dóó tʼáá ákǫ́ǫ́ dadínóonééł.

3 Aooʼ, yíi díí Nephi bidineʼé dajoolyéhígíí tʼáá hazhóʼó ádaańdaʼjooskango tʼéiyá, díí tʼáá ałtso bee ééhózinii dóó ayóó ádahoodzaaígíí bichʼįʼ ííshją́ą́ ádaalyaago dayiiłtsą́ągo; háálá áko shooh, Diyin Bóhólníihii aláahdi baa ntsékees ńtʼę́ę́ʼ, aooʼ, Nephi bidineʼé ayóó áyóʼní, dóó ałdóʼ tiʼhooʼnííh yichʼįʼ kwííłʼį́į́ ńtʼę́ę́ʼ; aooʼ, bąąhági átʼéii yaa naakaiyę́ędą́ą́ʼʼ tiʼhooʼnííh yichʼįʼ kwííłʼį́į́ ńtʼę́ę́ʼ háálá ayóó áyóʼnínígíí biniinaa.

4 Ákondi shooh shidineʼé, Laman dineʼé áłahjįʼ doo yáʼáshóonii yaa naakaigo biniinaa yijoołáá ńtʼę́ę́ʼ, dóó díí dabizhéʼé bibee oʼoolʼįįł doo yáʼádaatʼéhígíí biniinaa. Ákondi shooh, Nephi dineʼé ndabinitinígíí binahjįʼ yisdáʼiildéhígíí bił béédahózin; dóó díí biniinaa Diyin Bóhólníihii nízaadgóó dahináago áyiilaa.

5 Áádóó nihił béédahózin dooleeł nisin ałnííʼ biláahgo éí diyinkʼehgo ndaakai, dóó hazhóʼó Diyin God yikʼeh naaldeeh, dóó yee hahasdzíʼígíí dóó bibee hazʼáanii dóó yaa ntsékeesígíí Moses bibee hazʼáanii áyiilaa yę́ę yikʼehgo naaldeeh.

6 Aooʼ, ánihidishní, ałnííʼ biláahgo éí kótʼéego dahiná, dóó yéego doo chʼééh dadikááhgóó deilníísh áko bidineʼé tʼáá ałtso tʼáá aaníinii bił bééhózin danízingo; áko tʼáá ákwíí jį́ daʼoosdląądígíí bihidiikááh.

7 Áádóó áko shooh, nihił béédahózin, háálá danółʼį́, áko ląʼí tʼáá aaníinii bił béédahózingo, dóó dabizhéʼé bąąhági ádaatʼéii dóó tsʼídá aláahdi dajoodláhígíí ádeiłʼínée bił béédahodoozįįł, dóó Diyin bizaad dílzingo bee akʼedaʼashchínígíí woohdlą́ąjįʼ ndabidiitʼéésh, aooʼ, Diyin God yá yádaałtiʼii dadiyinii náasdi ádahodooníiłii, ńdaháasdzo, éí Diyin Bóhólníihii dayoodlą́ągo ádabiilaa, dóó binahjįʼ ádaańdaʼooskango, éí oodląʼ dóó ádaanáʼookąąh bee bijéí łahgo ádayiilaa—

8 Éí bąą, ląʼí kótʼáo náhaaskaiígíí, éí nihił béédahózingo dabidziil dóó doo nahjįʼ kódaalneʼ átʼéego daʼoodlą́, dóó binahjįʼ doo naalteʼé danilį́į da.

9 Áádóó nihił béédahózingo bee daʼahijooghą́ą́ʼii yikʼi dahoogeed, dóó nínéídidoodléłígíí yéédaaldzid ákódeiidzaago bąąhági ádadiiʼnííł danízin; aooʼ, tʼáá bééhózínígo daʼdoosihígíí yéédaaldzid—háálá áko shooh anaʼí bikʼi chʼídoojah dóó ndabidoołtsiłgo éí yá nahazʼą́, dóó doo bibéésh hał yichʼįʼ dah deididootį́į́ł da, díí éí Christ dayoodlánígíí biniinaa.

10 Áádóó áko, daʼoodlą́ągo éí beʼoodląʼígíí doo ndahaʼnánígíí biniinaa, háálá, diyinkʼehgo bił éédahozįįhgo doo nahjįʼ kódaaneʼ átʼéhígíí biniinaa, áko shooh, Diyin Bóhólníihii bikʼijidoodliił dóó nízaadgóó dahináago íidoolííł, azhą́ bąąhági átʼéii yaa naaskai ndi—

11 Aooʼ, azhą́ doo daʼoodlą́ą́góó naaldeeh silį́įʼ ndi Diyin Bóhólníihii nízaadgóó dahináago íidoolííł, ńléí danihizhéʼé baa hodoolzhish dadííniid yę́ęjįʼ ahoolzhiizhgo índa, dóó ałdóʼ Diyin yá yáłtiʼii Zenos yaa hoolneʼę́ę, dóó ląʼída Diyin yá yádaałtiʼii yaa dahóóneʼę́ę, éí bił haiijééʼ, Laman dineʼé, tʼáá aaníinii bił ííshją́ą́ áńdoolnííł—

12 Aooʼ, ánihidishní, akéeʼdi yoołkáłígíí biyiʼ Diyin Bóhólníihii yáʼátʼéehii yee nihwiisʼánée, bił haiijééʼ, Laman dineʼé bichʼįʼ kódoolnííł, dóó azhą́ łą́ągo atíbidiʼdoolnííł ndi, dóó nahasdzáán bikááʼgóó łaʼ ayóígóó ndinóolkał ndi, dóó ndibiʼdilzheeh doo ndi, dóó atídadoolnííł dóó adahwiisʼáago daʼníłtsʼą́ąjigo ałtsʼádahidínóołkał, dóó tʼáadoo yisdáhóótʼiʼ da silį́įʼ ndi, Diyin Bóhólníihii éí baa joobaʼ dooleeł.

13 Áádóó díí éí Diyin bikʼehgo áhodooníłígíí bikʼehgo, éí tʼáá aaníinii bééhózinígíí bichʼįʼ kóńdoolnííł, éí éí bá Nináʼnídláhígíí bił béńdahodoodzįįł, dóó ayóó átʼéii tʼáá aaníí dibé baa áhályáanii, dóó bidibé yitah danilį́į doo.

14 Éí bąą ánihidishní, bí bá yáʼátʼéeh dooleeł nihí éí doo nihá yáʼátʼéeh da dooleeł tʼáá hazhóʼó ádaańdaʼooskango tʼéiyá.

15 Háálá áko shooh, diyinkʼehgo naʼanish ayóó átʼéii nihichʼįʼ kwíilyaaígíí éídóʼ bichʼįʼ kólyaago, aooʼ, dabizhéʼé bibee oʼoolʼįįł biniinaa doo daʼoosdląądígíí, nihił béédahózin doo éí doo daʼoodlą́ą da náádadoodleeł da ńtʼę́ę́ʼ.

16 Éí bąą, Diyin Bóhólníihii ání: Doo éí ałtso ádeeshdįįł da, ndi shí íínísinígíí bijį́įdi bikʼehgo índa shichʼįʼ nínáhidookah, ní Diyin Bóhólníihii.

17 Áádóó áko shooh, Nephi dineʼé yaa ntsékeesgo, Diyin Bóhólníihii ání: Doo ádaańdaʼookąąhgóó, dóó doo shikʼeh dahółʼį́į́góó, ałtso ndeestsił, ní Diyin Bóhólníihii, doo daʼoodlánígíí biniinaa azhą́ bitahgi ląʼída ayóó átʼáo bitahgóó nishishnish ndi; dóó Diyin Bóhólníihii hiná bééhózinígíí bikʼehgo díí bidaʼdoolnííł, ní Diyin Bóhólníihii.