1 Áádóó kʼad nááná Samuel, Laman dineʼé nilíinii, ląʼígo Diyin bikʼeh ádahodooníłígíí yaa nááhoolneʼ ei éí doo náájíyózóóh átʼéii da.

2 Áádóó áko shooh, ííłní: áko shooh, bee ééhózinii łaʼ nihił ííshją́ą́ áshłééh; ashdlaʼ nináádoohah, áádóó áko shooh, Diyin God biYeʼ doogááł tʼáá ałtso bízhiʼ dayoodlánígíí shónéidoołtʼeeł.

3 Áádóó áko shooh, díí bee ééhózinii nihił ííshją́ą́ ádeeshłííł áadi níyáago; háálá áko shooh, yádiłhił biyiʼ ayóó ndaʼdeezdíin dooleeł, áko índa díí tłʼééʼ yigháahgo doo chahodoołhił da, áko índa diné bichʼįʼgo éí tʼóó jį́ dooleeł.

4 Éí bąą, łaʼ ajį́ dóó łaʼ atłʼééʼ dóó łaʼajį́ adooleeł, áko kótʼáo tʼááłaʼajíní dooleeł dóó tłʼéʼę́ę éí ádin nahalin dooleeł; dóó díí éí bee ééhózinii nihichʼįʼ kólyaii átʼée dooleeł; jóhonaaʼéí hanádááh dóó anádaahgo nihił bééhózin dooleeł; éí bąą tʼáá aaníí bił béédahózin dooleeł naaki jį́ dóó łaʼ atłʼééʼ áhóótʼįįdígíí; ákótʼée ndi łaʼ atłʼééʼ éí doo chahodoołhił da; dóó yiską́ bidiʼdoochíiłgo bitłʼééʼ kódoonííł.

5 Áádóó áko shooh, sǫʼ ániidígíí łaʼ hadoogááł, éí sǫʼ tsʼídá tʼahdoo daołtsééh da; dóó díí ałdóʼ bee ééhózinii hádasídóoʼį́įʼ dooleeł.

6 Áádóó áko shooh díí éí doo ałtso da, tʼóó ahayóí ałʼąą átʼéego bee éédahózinii dóó ayóó ádaatʼéii yá biyiʼ doo.

7 Áádóó baa hodoolzhish tʼáá ánółtso bee nihiyaa hodiʼdoolyis, dóó nihił ayóó ádahodoonííł, áko niʼjįʼ adínóodah.

8 Áádóó baa hodoolzhish tʼáá háíshį́į́ Diyin God biYeʼ yoosdląądgo, éí hoolʼáágóó iiná baa doolyééł.

9 Áádóó áko shooh, ákótʼéego Diyin Bóhólníihii kóshiłníigo, bá naalʼaʼí yee shił halneʼgo, baa díínááł dóó díí bee bił hodíílnih shidííniid; aooʼ, díí Diyin bikʼeh áhodooníłígíí bee nihił hodeeshnih shidííniid; aooʼ, kóshidííniid: Yéego hodiitsʼaʼgo díí diné, ádaańdaʼoohkąąh dóó Diyin Bóhólníihii doogáłígíí bibaʼ hashtʼeʼádadółnééh.

10 Áádóó kʼad, Laman dineʼé nishłínígíí biniinaa, dóó Diyin Bóhólníihii saad yee shił hoolneʼígíí bee nihichʼįʼ haasdzííʼ, dóó bikeʼeshchʼííʼgo nihikʼijįʼ haadzíʼígíí biniinaa, shichʼįʼ nihádahachįʼ dóó dadiyiilyééł dashíínóhʼní, dóó nihitahdóó chʼídashinoołchą́ą́ʼ.

11 Áádóó shizaad dadidoohtsʼį́į́ł, háálá, díí biniyé díí tsé kintah binázʼáhígíí bikááʼ haséyá, Diyin God bibee ánihwiitʼaahii dadidoohtsʼį́į́ł dóó nihił béédahodoozįįł biniyé éí bąąhági ádaotʼínígíí biniinaa nihibaʼ, dóó ałdóʼ ádaanáʼoohkąąh bídadéétʼiʼígíí nihił béédahodoozįįł biniyé.

12 Áádóó ałdóʼ díí Jesus Christ, Diyin God biYeʼ, Yáʼąąsh dóó nahasdzáán yiTaaʼ nilíinii, tʼáá ałtsoní hodeeyáádą́ą́ʼ Tʼáá Ałtsoní Áyilaií doogáłígíí, nihił béédahodoozįįł biniyé; dóó doogááłgo bee ééhózinii nihił béédahodoozįįł, ákodashį́į́ bízhiʼ deidoohdląął hwiinízingo.

13 Áádóó bízhiʼ deisoohdląądgo éí tʼáá ałtso nihibąąhági ádaatʼéii baa ádaańdaʼdoohkąął, áko éí binahjįʼ nihaa ndiʼdootʼááł nihá ádzaaʼígíí binahjįʼ.

14 Áádóó áko shooh, nááná, bee ééhózinii łaʼ nihił ííshją́ą́ ánáádeeshdlííł, aooʼ, éí náábiʼdiilyáago bee ééhózin doo.

15 Háálá áko shooh, éí tʼáá aaníí bidiʼdoolyééł áko yisdáʼiildéhígíí hodooleeł; aooʼ, bidiʼdoolyéłígíí éí bee bá nihootʼáanii átʼé, áko daneeznánée náádahidooʼnaał biniyé, áko diné Diyin Bóhólníihii bidááhdę́ę́ʼ nihidootʼish.

16 Aooʼ, áko shooh, díí biʼdiisyínígíí éí binahjįʼ nááʼiiná hazlį́į́ʼ, dóó tʼáá ałtso nihokááʼ dineʼé tsʼídá áłtsé anoonééłdę́ę́ʼ yá nináʼnídlá—éí díí iiʼ sizíiniikʼehgo anoonéłígíí; háálá tʼáá ałtso nihokááʼ dineʼé, Adam asiihgo biniinaa Diyin Bóhólníihii doo bił hólǫ́ǫgo ábiʼdiilyaa, éí atsʼíís dóó iiʼ sizíiniikʼehgo, daneezná nahalingo baa ntsáhákees.

17 Ákondi shooh, Christ nááhiinaʼígíí bee nihokááʼ dineʼé yá nináʼnídlá, áko, tʼáá ałtso nihokááʼ dineʼé, dóó Diyin Bóhólníihii bił hazʼą́ góneʼ yah anáhidootʼish.

18 Aooʼ, áádóó ádaanáʼookąąh bá ahóótiʼgo bá ályaa, áko tʼáá háíshį́į́ ádaanáʼooskanígíí doo kʼíhidookał da dóó doo kǫʼ biiʼ hidoolghą́ął da; ndi doo ádaańaʼooskanígíí éí kʼíbidiʼdookał dóó kǫʼ biih hidoolghą́ą́ł; dóó iiʼ sizíiniikʼehgo anoonééł bikʼi náánásdláa dooleeł, aooʼ, naaki góneʼ anoonéłígíí, háálá éí tʼáá ałtso tʼáá ákogi ádaatʼéii bitsʼą́ą́dóó nahjįʼ kʼíhidookał.

19 Éí bąą ádaańdaʼoohkąąh, ádaańdaʼoohkąąh, díí nihił bééhózinígíí dóó doo bidaʼołʼį́į́góó biniinaa nihánahodootʼaał, dóó díí naaki góneʼ ánoonéłígíí biyiʼjįʼ konihiʼdidoonííł.

20 Ákondi shooh, nááná łaʼ bee ééhózinii dishnínée, biʼdiisyį́įgo bee ééhózinii, áko shooh, biʼdiisyį́ bijį́įdi jóhonaaʼéí yidoojį́į́ł dóó doo nihikʼi adiníłdíin da dooleeł; dóó ooljééʼ dóó sǫʼ ałdóʼ; dóó díí kéyah bikááʼgóó bee holʼínígíí ádin dooleeł, índa biʼdiisyį́įgo ákótʼée doo, tágí jį́, dóó náádiidzáajįʼ kótʼée dooleeł.

21 Aooʼ, biʼiiʼ sizíinii yiʼníłniiʼgoʼ adadiʼní dóó ndaʼdilchʼilgo ląʼída ahéédaʼdoolkił, dóó nahasdzáán éí nahaʼná dóó ditłid dooleeł; áádóó tsé nahasdzáán bikááʼ hólóonii, nahasdzáán bikáaʼgi dóó biyiʼdi hólóonii, éí bidziilgo nihił béédahózin, éí doodago kʼasdą́ą́ʼ tʼáá ńtʼę́ę́ʼ bidziilgo siʼánígíí, éí nihidootǫǫł.

22 Aooʼ, éí nihidootǫǫł, dóó dootsʼił dóó nihidoodlał, dóó nahasdzáán bikááʼgóó ádaałtsʼísígo ndadeeztąąd dooleeł, aooʼ, nahasdzáán bikáaʼgi dóó biyiʼdi.

23 Áádóó áko shooh, tʼáá íiyisíí níłtsą́ bił dooyoł, dóó ląʼída dził daniʼą́ą́góó deíldzis dooleeł, dóó deíldzisę́ęgo dził daniʼá dooleeł, éí doo deeghánígóó yadadiiʼáa dooleeł.

24 Áádóó ląʼígo ndaʼaztiinée dadoochxǫǫł, dóó ląʼída kin hadaalʼáhą́ą tʼóó ádoodįįł.

25 Áádóó ląʼída jishchááʼ ąą ádadoonííł, dóó ląʼída daneeznánée náádahiidooʼnaał; dóó ląʼída Diyin yá naazínígíí daneeznánée dahináago deidoołtsééł.

26 Áádóó áko shooh, ákótʼéego Diyin yá naalʼaʼí shichʼįʼ haadzííʼ; háálá dadiʼní dóó ndaʼdilchʼilgo ląʼí ahéédaʼdoolkił shidííniid.

27 Áádóó kóshidííniid dadiʼní dóó ndaʼdilchʼilgo, dóó níłtsą́ bił níyolgo, áko díí ádahodoonííł, dóó chahałheeł ałtso nahasdzáán bikʼídooltih tʼáá ákótʼéego tágí jį́ adooleeł.

28 Áádóó Diyin yá naalʼaʼí kóshidííniid tʼah bilááhágo ląʼída tʼáadoo leʼé deidoołtsééł, díí bee ééhózinii dóó ayóó ádahoodzaaígíí tʼáá ałtso nahasdzáán bikááʼgóó ádahoodzaago binahjįʼ daʼiidoodląął biniyé, nihokááʼ dineʼé baʼáłchíní yinahjįʼ beʼoodląʼ doo ádin da dooleeł biniyé—

29 Áádóó tʼáá háíshį́į́ iidoodląął dóó yisdádoogááł éí íiyisíí biniyé, dóó tʼáá háiida doo oodlánígíí, tʼáá ákogi átʼéii ánihwiitʼaahígíí bikʼehgo bá nihodootʼááł, dóó ałdóʼ doo yáʼátʼééhgóó bá nihootʼą́ągo tʼáá bí éí ádaa ndahastʼą́ą dooleeł.

30 Áádóó kʼad shidineʼé, béédaohłniih, béédaohłniih, tʼáá háiida ádin silį́įʼgo, tʼáá bí áátʼįįłígíí biniinaa ádin silį́į dooleeł; dóó tʼáá háiida bąąhági átʼéii yaa naagháago, tʼáá bí íinízingo yaa naagháa dooleeł; háálá áko shooh, tʼáá nihí nihíhólnííh; tʼáá nihí nohsinígíí ádoohłííłgo nihaa deetʼą́; háálá áko shooh, Diyin God nihił ééhózingo ánihiilaa dóó tʼáá nihí nihíhólníihgo ánihiilaa.

31 Yáʼátʼééh dóó doo yáʼádaatʼéhígíí nihił bééhózingo ánihiilaa, dóó iiná éí doodago anoonééł tʼáá háiida nihaadoolyéełgo nihá áyiilaa; dóó yáʼátʼéehii baa nanináago yáʼátʼéehii bee ánánihidiʼdoolnííł, éí doodago yáʼátʼéehii bee náánidiʼdoolyééł; éí doodago bąąhági átʼéii baa nanináago, éí doo yáʼáshóonii bee náánidiʼdoolyééł.