Wóltaʼii 12
Nihokááʼ diné bąąhági átʼéii doo yichʼįʼ dabidziil da dóó doo ádahaalyą́ą da dóó tʼáá hooshchįʼ yaanídiikah—Diyin Bóhólníihii Bidineʼé yichʼahashké—Nihokááʼ dineʼé doo ílínígóó éí Diyin God bibeʼadziil bił ałhąąh niiʼnilgo nélʼį́—Ándahwiitʼaahdi nihokááʼ dineʼé hoolʼáago iiná doodago hoolʼáago iiʼ sizíiniikʼehgo iiná ninítiʼígíí baahidoolyééł. Jesus bidiʼdoochííłjįʼ 6 B.C. yihahgo ádahóótʼįįd.
1 Áádóó áko haitʼáó tʼóó átʼéhígíí baa ákodíníídzįįł, áádóó nihokááʼ dineʼé baʼáłchíní bijéí biyiʼdóó daʼoodlánígíí áłahjįʼ tsxííłgo ánááʼniił; aooʼ, Diyin Bóhólníihii ayóó átʼáo doo ninítiʼgóó akʼihojídlí dóó háída yaʼoolíhígíí náás yidoolóósgo baa ákodadíníidzįįł.
2 Aooʼ, dóó bidineʼé náás yideezheezh tsʼídá baa hoolzhiizhgo baa ákódadíníídzįįł, aooʼ, bidaʼákʼeh ląʼí da dadooleeł, bidibé, dóó naaldlooshii yee, áádóó béésh óola, dóó béésh łigaii, dóó tʼáá áłtso ałʼąą ádaatʼáo daʼílíinii yee; yisdáyiiʼeezhgo, dóó beʼanaaʼí yilákʼeedóó hayiʼééshgo; beʼenaʼí bijéí doo akʼijįʼ danilį́įgo íídoolííł áko doo hakʼijįʼ anaaʼ ádeidoolííł da; aooʼ, áádóó baa nááháneʼgo, díí tʼáá ałtso bidineʼé bee baaʼaháyą́ądoo baa bił hózhǫ́ǫ doo biniyé; aooʼ áadi índa bijéí deiłtłʼis, dóó Bóhólníihii biDiyin God yaadeiyooná, dóó Diyin Ayóó Átʼéii tʼóó yikʼinaajééh—aooʼ, dóó doo bichʼįʼ ndahwiiʼnánígíí biniinaa, dóó ayóó átʼáo náás deeskaiʼígíí biniinaa.
3 Áádóó baa ákodaniidzį́į́ʼ Diyin Bóhólníihii bidineʼé ląʼígo tiʼhooʼnííh yee yichʼahashkéego tʼéiyá, aooʼ, anoonééł dóó yéego náhadzid yikʼijįʼ kóyiłʼįįhgo tʼéiyá, dóó naałniih dóó chʼosh ałʼąą ádaatʼéí, doo yéédadoolnih da.
4 O dooládóʼ doo ádahalyáa da, dóó bił dahatso, dóó yéego doo yáʼádaashǫ́ǫ da, dóó bidaʼiinízįįdgo ádaʼdilʼį́, dóó tsxį́įłgo bąąhági ádaatʼį́, dóó hazhóóʼígo yáʼátʼéehii ádeiłʼį́, éí nihokááʼ dineʼé ádaatʼį́; aooʼ, haitʼáo tsxį́įłgo chʼį́įdii bizaad dayóóstʼą́ą́ʼ dóó niʼ bikáaʼgi bee ádaahódzídlíhígíí bijéí yiih ndeiyiilé!
5 Aooʼ, haitʼáo tsxį́įłgo ádaadazódlí ndahaleeh; aooʼ, haitʼáo tsxį́į́ł ádaadazódlį́įgo hadahadziih, dóó bąąhí ałʼąą ádaatʼéí adeiłʼį́; dóó haitʼáo hazhǫ́ǫ́ʼígo Bóhólníihii biDiyin God yéédahalniih, dóó binaʼnitin deiyíístsʼą́ą́ʼ, aooʼ, hatiʼáo hazhóóʼígo saad beehódzáanii yikééʼdeiyíkááh!
6 Áko shooh, Bóhólníihii biDiyin God, ádabiilai, bikʼibóhólnííh dóó bikʼihooʼááłgo doo deinízin da, ayóó átʼáo biʼyáʼátʼéehii dóó biʼajoobaʼ bichʼįʼ kóyiilaa ńdi, binaʼnitin doo bił danilį́į da, dóó bá ndahaʼáa dooleełígíí doo deinízin da.
7 Dooládóʼ nihokááʼ dineʼé baʼáłchíní biiʼ ádahadin da; aooʼ, niʼdi łeezh ndi yiʼohgo danilį́.
8 Háálá áko shooh, niʼ bikááʼ łeezh kojigo dóó nahjigo bił ndaayol, ałtsʼá needééhjįʼ, Diyin God hoolʼáágóó ayóó átʼéii áníigo.
9 Aooʼ, áko shooh bízhí bee dadaaskʼid dóó dził daníʼáhígíí nda haʼná dóó ndahaltǫǫh.
10 Áádóó bízhí bibeʼadziil yee nahaltǫǫh, dóó dikǫǫh ndahaleeh, aooʼ halgai nahalingo.
11 Aooʼ, bízhí beʼadziil bee nahasdzáán tʼáá átʼée ńtʼę́ę́ʼ ditsxiz.
12 Aooʼ, áko shooh bízhí yee tsé atłʼááh daníʼáhígíí nda haʼná, ałnííʼjįʼ ndi.
13 Aooʼ, dóó nahasdzáán ííłníigo—Hidínááh—áko hididooʼnááł.
14 Aooʼ, nahasdzáán ííłníigo—Nátʼą́ą́ʼ kónínééh yiłníigo, áko ląʼí ahééʼílkidjįʼ jį́ náás kóyiilaa—éí bohodoolnííł;
15 Ákohgo, bizaad bikʼehgo nahasdzáán tʼą́ą́ʼ kódoonííl, dóó diné yinéłʼį́įgo jóhonaaʼáí tʼáá łahígiʼ siʼą́ bił nahalin doo, aooʼ, áádóó áko shooh, díí kódoonííł; háálá nahasdzáánígíí hideesnááʼ jóhonaaʼáí éí dooda.
16 Áádóó áko shooh, ałdóʼ, tó dítą́ądi tó ííłníigo—yíłtsei nileeh—éí bohodoolnííł.
17 Áko shooh, díí dził ííłníigo—dekónínééh, dóó kojí anídééh dóó kin dashijaaʼ bikʼííłdáás, dóó yikʼi hodoogoł—áko shooh éí bohodoolnííł.
18 Áádóó áko shooh, łaʼ diné nahasdzáán biyiʼ daʼálíinii neideesʼį́įgo, áádóó Diyin Bóhólníihii ádidooniił—Biniʼdii hoyééʼgo báhaʼdoodzih, háálá bąąhági átʼéii yaanaagháhígíí niʼdeesʼįįʼ—áko shooh, éí hoyééʼgo bá hadoodzih.
19 Áádóó Diyin Bóhólníihii ádííniidgo—Hoyééʼgo ná haʼoodzííʼ, díí hoolzhishdóó diné doo łaʼ handinóótaał da—kʼad dóó ahoyoolʼáágóó—áko shooh, éí diné doo łaʼ yikʼídíʼnootaał da kʼad dóó ahoolʼáágóó.
20 Áádóó áko shooh, Diyin Bóhólníihii diné łaʼ ííłníigo—Bąąhági átʼéii baa naninánígíí biniinaa, hoolʼáágóó hoyééʼgo ná hadoodzih—éí bohodoolnííł.
21 Áádóó Diyin Bóhólníihii ádííniidgo—Háálá bąąhági ánítʼinígíí biniinaa shitsʼą́ą́dóó nahjįʼ kónihidiʼdoolnííł—éí ná nahodooʼááłgo bohodoolnííł.
22 Áádóó yíí háída díí yichʼįʼ kódidooniiłʼígíí, háálá bąąhági átʼínígíí yichʼįʼ kódidooniił, dóó yisdádoogáłę́ę doo bá bííghah da dooleeł; éí bąą, háálá díí biniinaa, diné da yisdábiʼdootʼish, ádaanáʼookąąh bee ndabidiʼneestʼą́ągo.
23 Éí bąą, bikʼihojídlį́į doo háída ádaanáʼooskango dóó Bóhólníihii biDiyin God bízhí yikʼeh hółʼínígíí; háálá díí éí yisdádabiʼdidootʼish.
24 Áádóó Diyin God lą́ adoohłeeł, yee ayóó átʼéii bee, áko da nihokááʼ dineʼé ádaańdaʼdookąąłjįʼ nihidootʼish dóó yáʼátʼéehgo ndaalnish doo, áko da diyingo ajoobaʼ haa dahidoolyééł bibee ajoobaʼ bee, naanish ádayiilaayę́ę bikʼehgo.
25 Áádóó tʼáá ałtso nihokááʼ dineʼé da yisdáʼdootʼishgo laanaa nisin. Ákondi ayóó átʼáo dóó ákéédi jį baadaʼííniiltaʼgo éí łaʼ diné nahjįʼ kódabidiʼdoolnííł, aooʼ, éí Diyin Bóhólníihii bitsʼą́ą́dóó nahjįʼ kódabiʼdiʼdoolnííł;
26 Aooʼ, háísh éí hoolʼáágóó doo bił dahatsiidgo bił hwiidooʼaał, díí saad bee haʼoodzííʼ yę́ę bohidoolnííł kóníigo: Yáʼátʼéehgo ádaʼiilaaʼígíí hoolʼáágóó iiná baa dahodoolyééł; dóó doo yáʼáshǫ́ǫ́góó adaʼiilaaʼígíí éí iiʼ sizíiniikʼehgo iiná ninítiʼígíí baa dahidoolyééł. Áádóó díí éí ákótʼée doo. Amen.