1 Áko shooh, baa hoolzhiizh ándahweeʼáahii Nephi bidineʼé yikʼi dahwéeʼaahgo tsostsʼidiin dóó biʼaan naaki nááhai góneʼ ałchʼįʼ ádahachʼįʼ dekódaadzaa, áko hónáásiiʼ tʼáá ałtso kédaayahgóó anaaʼ dahazlį́į́ʼ tʼáá ałtso Nephi dineʼé bitahgóó.

2 Áádóó díí ndanitʼingo daʼniʼįįhii dayikahígíí díí naʼatseedgo naʼanish dóó bąąhági átʼéii bee dahʼooldah tʼáá náás deiyíłtʼééh. Áádóó tʼáá anaaʼ hólǫ́ǫgo ałtso nááhai; áádóó tsostsid dóó biʼaan tááʼ ałdóʼ ałtso nááhai.

3 Áádóó baa hoolzhiizh díí yihahígíí biyiʼ Nephi Diyin Bóhólníihii yéígo yichʼįʼ sodoolzin, kóníigo:

4 O Diyin Bóhólníihii, tʼáadoo díí diné béésh hał bee ádooldįįłgo áníléhé; ákondi O diyin Bóhólníihii, kéyah bikááʼgóó naałniihjígo hólǫ́ǫgo aníleeh, áko éí yee Diyin Bóhólníihii biDiyin God yéédadoolnih, áko da ádaańdaʼdookąął dóó nichʼįʼ nináhidookah.

5 Áádóó éí bohoolyaa, Nephi saad yee haadzííʼ yę́ę bikʼehgo. Áádóó kéyah bikááʼgóó ayóó átʼáo naałniih hazlį́į́ʼ, tʼáá ałtso Nephi bidineʼé bitahgóó. Áádóó áko tsostsidiin dóó biʼaan dį́į́ nááhai tʼáhdii naałnih bitah hólǫ́ ńtʼę́ę́ʼ, áádóó béésh hał bee naʼatseed yę́ę niʼkódzaa ákóndi naałniih yéego bitah níłniiʼ.

6 Áádóó naʼatseedgo naʼanish tʼahdii hólǫ́ǫgo tsostsidiin dóó biʼaan ashdlaʼgóó nááhai. Háálá nahasdzáán atʼídzaa áko yíłtsei silį́į́ʼ, áádóó tʼáadoo iitsoi da ndaʼniltʼį́į́h yę́ęgiʼ átʼáo; dóó tʼáá ałtso nahasdzáán bikááʼgóó naałniih bee atílyaa, Laman dineʼé dóó Nephi dineʼé tʼáá áłah bitahgóó, ákóhgo atídabiʼdiilyaago ádabiʼdisdįįd dimííl yázhí bilááhgóó yéego bąąhági ádaatʼéí yaa ndaakaigóó.

7 Áádóó baa hoolzhiizh áko diné yaa ákódaniidzį́į́ʼ díí naałniih kʼadę́ę ábíłdįįhgo, áadi índa Bóhólníihii biDiyin God yéé daasniiʼ; dóó Nephi saad yee haadzį́į́ʼ yę́ę yéédaasniiʼ.

8 Áádóó diné aláahdi ánahwiiʼaahii dóó binaatʼáanii nídeiyookąąhgo yaanídiikai, áko Nephi kódeididooniił: Áko shooh, nihił béédahózin Diyin God éí bikéé sínízį́, éí bąą Bóhólníihii nihiDiyin God yéego bichʼįʼ sodilzin áko díí naałniih nihá nahjįʼ kwíídoolííł, áko tʼáá átʼé saad ánihidiʼdooldįįł diníigo bee nihichʼįʼ háínídzííʼ yę́ę bóhodoolnííł.

9 Áádóó baa hoolzhiizh ándahwiiʼaahii Nephi kódeidííniid, saad bee hadaʼiisdzííʼ yę́ę bikʼehgo. Áádóó baa hoolzhiizh Nephi éí diné ádaańdaʼooskan yaa ákoniidzį́į́ʼgo dóó tłʼohyishbizh ééʼ yee hojoobaʼ ádaʼdiilyaago, Diyin Bóhólníihii yéígo yichʼįʼ sonáádoolzin, kóníigo:

10 O Diyin Bóhólníihii, áko shooh díí diné ádaańdaʼooskan, dóó Gadianton dahyiikahígíí bitahdóó nahjįʼ kódeiyiilaa hónáásiiʼ ádeisdįįd, dóó binahatʼá ndeiniłin yę́ę nahasdzáán yiiʼ ńdeideesʼį́į́ʼ.

11 Áko, O Diyin Bóhólníihii, díí hojoobaʼ ádeinízinígíí biniinaa niʼáháchįʼ niʼ kónílééh, áádóó diné doo yáʼádaashóonii nisiniłtseedyę́ę bineʼ náháchįʼ áajigo bił áhodoodįįł.

12 O Diyin Bóhólníihii, niʼáháchįʼ nihá nahjįʼ kónílééh, aooʼ, yéego náháchįʼígíí, dóó díí naałniih kéyah bikááʼdóó niʼ kónílééh.

13 O Diyin Bóhólníihii, shidinitsʼį́į́h, dóó saad bee haasdzíʼígíí bineʼ bikʼehgo áhodoonííł, dóó nahasdzáán bikááʼgóó ndahałtingo ádíílííł, áko bineestʼaʼígíí náhodoodleeł, dóó binaniseʼ náníłtʼįįh dooleeł.

14 O Diyin Bóhólníihii, shizaad shidinítsʼą́ą́ʼ kódíshníyę́ędą́ą́ʼʼ, Naałniihii hólǫ́ǫ dooleeł; béésh hał bee naʼatseed yę́ę niʼkódoolnííł; áádóó tʼáá aaníí shił bééhózin, kʼad ndi, shizaadígíí yíísiniłtsą́ą́ʼ: Háálá áko ádiníniid: Díí diné ádaa ńdaʼooskango aadadeesį́į́ł.

15 Aooʼ, O Diyin Bóhólníihii, áádóó nił bééhózin ádaańdaʼooskanígíí, háálá naałniih dóó naʼatseed dóó nahjįʼ kódaʼalneʼ bitah hazlį́ʼígíí biniinaa.

16 Áádóó kʼad, O Diyin Bóhólníihii, niʼáháchįʼ nahá nahjįʼ kónílééh yaʼ, áko nánidaalʼaʼgo bínáádíníítʼaał? Áádóó ákwiinlaago, O Diyin Bóhólníihii, saad bee báháínídzííʼ yę́ę bikʼehgo bikʼihojidíídliił.

17 Áádóó baa hoolzhiizh tsostsidiin dóó biʼaan hastą́ą́ yihah góneʼ Diyin Bóhólníihii biʼáháchįʼ diné bitahdóó nahjįʼ kóyiilaa, áádóó nahasdzáán bikáaʼjįʼ ndahałtingo áyiilaa, áko bineestʼaʼígíí náhodoodleeł náʼnítʼį́į́h hoolzhish góneʼ. Áádóó baa hoolzhiizh binaniseʼ náʼnítʼį́į́h baaʼhoolzhiizh góneʼ.

18 Áádóó áko shooh, diné Diyin God yaa bił dahóózhǫǫd dóó yaa dahaznih, dóó kéyah tʼáá átʼé bikááʼgóó ił hózhóonii biiʼ hazlį́į́ʼ áádóó Nephi deidiyoołheełgo doo yiká ádaatʼį́į da daazlį́į́ʼ ákondi Diyin yá yáłtiʼii nilį́įgo yaa dahaznih, dóó diné Diyin God yá sizʼíinii, Diyin God bitsʼą́ą́dóó ayóó átʼáo adziilii dóó bee óhólníihii beiyilyą́ągo.

19 Áádóó áko shooh, Lehi, éí bikʼis, yáʼátʼéehgo oodááł bídadeitʼiʼígíí doo aʼohgo ndi yee akéé sizʼį́į ńtʼę́ę́ʼ.

20 Áádóó áko baa hoolzhiizh Nephi bidineʼé kéyah yikáágóó náásdeeskai, áádóó dahoochxǫʼę́ęgóó háádeidiidlaa, áádóó ndaʼiiłchííh dóó kʼeeʼąą dínééstʼą́, kéyah tʼáá átʼé bikááʼgóó dahazʼlį́įgo índa, tʼáá áłah nahookǫsjigo dóó shádiááhjigo, eʼeʼaahjigo tónteel nihiníyį́ dóó haʼaʼaahigo tónteel nihoniyį́įjįʼ.

21 Áádóó baa hoolzhiizh tsostsʼidiin dóó biʼaan hastą́ą́ʼ yihahgo kʼé bee nihoolzhiizh. Áádóó tsostsʼidiin dóó biʼaan tsostsʼid yiihah góneʼ kʼé bee hahoolzhiizh; dóó sodizin kéyah tʼáá átʼé bikááʼgóó hazlį́į́ʼ; dóó ałnííʼ bilááhgóó diné, tʼáá áłah Nephi dineʼé dóó Laman dineʼé, sodizin yidahidiikai, dóó tsʼídá ayóó átʼáo kéyah bikááʼgóó kʼé bił hólǫ́ǫ ńtʼę́ę́ʼ; áádóó díígiʼ átʼáo tsostsʼidiin dóó biʼaan tsostsʼid yihahígíí bił nahoolzhiizh.

22 Áádóó tsostsʼidiin dóó biʼaan tseebíí yiihah góneʼ ałdóʼ kʼé bił dahólǫ́ǫ́ ńtʼę́ę́ʼ, tʼáá hazhóʼó tʼáá dikwííhígo Diyin yá yádaałtiʼii naʼnitin ndeiyizláhę́ę́ yee ałchʼįʼ daʼdeeztsih.

23 Áádóó tsostsʼidiin dóó biʼaan náhástʼéí yiihah góneʼ yéego ałchʼįʼ ndahoojiilnáago baazhnídiikai. Ákondi baa hoolzhiizh Nephi dóó Lehi, dóó ląʼída bisodizin binaatʼáanii tʼáá aníigo naʼnitin bídadéítʼiʼígíí bił béédahózin, tʼáá ákwííjį́ bił ííshją́ą́ ádaʼoolįįłígíí biniinaa, éí bąą diné nideinitin, áko ałchʼįʼ saad dahółónéé tʼáá éí yiihahígíí niʼ kódeiyiilaa.

24 Áádóó baa hoolzhiizh tseebídiin yiihah góneʼ ándahwiiʼáahii Nephi bidineʼé yikʼi dahwééʼaahgo, Nephi bidineʼé bitahdóó díkwíígoshį́į́ʼ atsʼádaheeskaiʼígíí, éí Laman dineʼé yił naaldeehgo díkwíí shį́į́ nááhai, dóó Laman dineʼé bízhiʼ ákʼideidiitʼą́, dóó łaʼ Laman dineʼé íiyiisíí yitsʼą́ą́dóó dahazlį́ʼígíí ałdo, éí yádahoołchįįd, doodago atsʼádahaaskaiʼígíí, éí bąą bikʼis yił anaaʼ hadeeswod.

25 Áádóó éí ndaʼałtseed dóó aghadaʼiinííł daazlį́į́ʼ; áádóó éí daadziłgóó anídahachééh, dóó diné doo kééhatʼínígóó dóó nahonitin nahazʼą́ą́góó, doo bikʼiʼ doodááłgóó ndanitin, tʼáá ákwííjí diné bihidiikááh, atsʼádahaaskaiʼígíí áajigo yichʼįʼ adahaaskai.

26 Áádóó áko hoolzhishgo, aooʼ, tʼáadoo díkwíí da náhááhgóó, éí tsʼídá ayóó átʼáo daʼniʼįįhii dahyiikah daazlį́į́ʼ; dóó Gadianton binanilʼingo nahatʼá yę́ę hadeinitá; áádóó kótʼáo Gadianton daʼniʼįįhii daazlį́į́ʼ.

27 Kʼad áko shooh, díí daʼniʼįįhii tʼóó báhádzidgo hadahonííłchaad, aooʼ, Nephi bidineʼé bitʼahgóó tʼáá íiyiisíí dahóółchxǫ́, dóó Laman bidineʼé bitahgóó ałdóʼ kódzaa.

28 Áádóó baa hoolzhiizh díí adoolchxoołgo naʼanish tʼáá íiyisíí niʼ kódoolnííłgo baa ákóhoniizį́į́ʼ, éí bąą diné ndaabaahii dabidziilígíí diné doo kééhotʼiní góneʼ dóó daadziłgóó daʼniʼįįhii hadanitáago abiʼdoolʼaad, ndeidootsxił biniyé.

29 Ákondi shooh, baa hoolzhiizh tʼáá éí yiihah biyiʼ nátʼą́ą́ʼ tʼáá bí bikéyah biyiʼjigo anánoolkaad. Áádóó áko ańdahwiiʼaahii Nephi bidineʼé yikʼi dahwéeʼaahgo tseebídiin ałtso nááhai.

30 Áádóó baa hoolzhiizh tseebídiin dóó biʼaan tʼááłaʼí yiihah bee hahoolzhiizh góneʼ éí daʼniʼįįhii yikʼijįʼ náádeeskai, dóó tʼóó ahayói ndeestseed, áádóó tʼáá bí ałdóʼ ląʼígo ndabiʼdistseed.

31 Áádóó diné doo kééhótʼinídééʼ dóó daadziłdééʼ chʼínáábidiʼnoolkaad dabikéyahgóó, háálá tsʼídá ayóó ánéílą́ą́ daʼniʼįįhii daadził dóó diné doo kééhatʼíígóó dááląądígíí biniinaa.

32 Áádóó baa hoolzhiizh díí bee ałtso nááhai. Áádóó daʼniʼįįhii tʼahdii ląʼí yiileeh dóó házhǫ́ dabidziil daazlį́į́ʼ, áko Nephi dineʼé bindaabaahí tʼáá átʼé doo yikʼijįʼ daastiʼ da daazlį́į́ʼ, dóó Laman dineʼé bindaabaahígíí ałdóʼ; díí kéyah tʼáá ałtso bikááʼgóó diné ayóó átʼáo beedaaldzidgo ádeiʼyiilaa.

33 Aooʼ, háálá tʼóó ahayóí kéyah dah naazʼánígíí yaa heeskai, dóó tʼáá íiyisíí deiyiiłchxǫʼ; aooʼ, ląʼí ndeestseed, áko łaʼ éí deesnahgo diné doo keehatʼínígóó adeiyizheezh, aooʼ, bizáanii dóó bidaʼáłchíní íiyisíí.

34 Díí ayóó átʼáo bąąhági átʼéíi, éí diné bąąhági ádaatʼínígíí biniinaa bikʼihooleʼ, áko éí yee Diyin Bóhólníihii biDiyin God yéédadoolnih.

35 Áádóó kótʼáó ańdahwiiʼaahii dahwééʼaahgo tseebídiin dóó biʼaan tʼááłáʼí ałtso nááhai.

36 Áádóó tseebídiin dóó biʼaan naaki yiihah góneʼ Bóhólníihii biDiyin God doo yikʼeh dahółʼį́įgo yaa nínáádiikai. Áádóó tseebídiin dóó biʼaan tááʼ yiihah góneʼ yéego bąąhági ádaatʼį́ daazlį́į́ʼ. Áádóó tseebídiin dóó biʼaan dį́į́ʼ yiihah góneʼ tʼáadoo beʼiina łahgo ándeiyiidlaa da.

37 Áádóó baa hoolzhiizh tseebídiin dóó biʼaan ashdlaʼ yiihah góneʼ tsʼídá yéego bidziil dóó yéego ádaadazódlí daazlį́į́ʼ, dóó doo yáʼáshóonii yaa naakai; áádóó áko bidiʼdoolchxǫǫłgo yiká hastʼeʼánáádadiilyaa.

38 Áádóó kótʼáó tseebídiin dóó biʼaan ashdlaʼ yiihahígíí ałtso bił ahoolzhiizh.