1 Áádóó baa hoolzhiizh diné ałtsʼákai, łaʼ kojigo łaʼ nahjígo ałtsʼá íldeeʼ, Nephi tʼáásáhí silį́į́ʼ, yitahgi sizį́įgo.

2 Áádóó baa hoolzhiizh Nephi bighanjigo dah diiyá, Diyin Bóhólníihii bił ííshją́ą́ áyiilaaʼígíí yéego yaa nitsékeesgo.

3 Áádóó baa hoolzhiizh yéego nitsékeesgo—Nephi dineʼé doo yáʼádaashóonii yaa nidaakaiígíí biniinaa yéego biʼdiiłʼáago, chahałheełgo nanilʼingo ádaʼałʼíinii, nidaʼałtseedgo, adaʼiijááhgo, dóó bąąhági átʼéii ałʼąą átʼéego ádaʼałʼį́įgo—áádóó baa hoolzhiizh bíjéi yéego yiyiʼ ntsákeesgo, áko shooh, anééʼ bichʼįʼ haadzííʼ kóníigo:

4 Nikʼihojisdliʼ, Nephi, íinilaaígíí biniinaa; háálá doo niʼkónínééhgóó saad bee naʼnítin, éí naahályé, díí diné bichʼįʼ. Dóó doo bináníldzidgóó, dóó doo neʼiinaʼ baantsiníkeesgóó, ákondi nisinígíí bíká ánítʼį́įgo, dóó shibee hazʼáanii bikʼeh honíłʼį́įgo.

5 Áádóó kʼad díí doo niʼ kónílééhgóó íinilaaígíí biniinaa, áko shooh, hoolʼáágóó nikʼihodeeshdliił; saad dóó íʼíłʼíinii bichʼįʼ nidziilgo ándeeshłííł; iinídlą́ dóó nanilnishígíí bee; aooʼ, áko tʼáá ałtsoní áníłʼį́į doo bee háánídzihígíí bikʼehgo, háálá nisinígíí doo bikʼijįʼ naʼídíłkid da doo.

6 Áko shooh, Nephi éí danijiní, dóó shí éí Diyin God nishłį́. Áko shooh, shá nidaalʼaʼí binááł bee náhaasdzííʼ, díí diné bikʼi nidziil doo, dóó nahasdzáán dichin, dóó naałniihii bikááʼ hólǫ́ǫgo báhadíídzih, díí diné doo yáʼáshóonii yaa naakaiʼígíí bikʼehgo.

7 Áko shooh, adziil nąąh ninishłé, tʼáá haʼátʼííshį́į́ nahasdzáán bikááʼ hoolʼáágóó diyingo ahéstłʼǫ́ǫgo éí yáʼąąshdi ałdóʼ hoolʼáágóó diyingo ahéstłʼǫ́ǫ doo; dóó nahasdzáán bikááʼ bídíníchidgo yáʼąąshdi ałdóʼ bididoochił; kótʼáo díí diné bitahgóó adziil nee hólǫ́ǫ doo.

8 Áádóó áko, díí diyin bighan ałtsʼáníltǫǫh bidíníniidgo, éí bohodoolnííł.

9 Áádóó áko, díí dził ábidíníniidgo, Naniłdaas dóó diikǫǫh, éí bohodoolnííł.

10 Áádóó áko shooh, díí diné éí Diyin God atíbidoolíił diníniidgo, éí bohodoolnííł.

11 Áádóó áko shooh, anishʼaah, díí diné baadiinááł dóó bichʼįʼ hadiidzih, áko Bóhólníihii Diyin God, Ayóó Ábóodziilii nilíinii, ání: Doo ádaa ńdaʼoohkąąhgóó atínihidiʼdoolnííł, azhą́ ánihididooldįįłjįʼ ndi.

12 Áádóó áko shooh, kʼad baa hoolzhiizh Diyin Bóhólníihii díí saad Nephi yee yichʼįʼ haadzíiʼgo, niiltłah dóó doo bighangóó nádzáá da, ákondi dah daʼíldééhgóó nádzá éí kéyah bikááʼgóó daʼníłtsʼą́ąjigo ałtsʼádabidiʼneeskaadę́ę, dóó Diyin Bóhólníihii bizaad yee yichʼįʼ ayaʼniiłtiʼ éí bee bił hóoneʼ, éí doo ádaa ńdaʼookąąhgóó ábidiʼdooldįįł hoʼdooʼniid.

13 Áko kʼad shooh, azhą́ Nephi ayóó átʼáo álílee áyiilaa ndi éí aláahdi ánhwiiʼaahii biʼdiisxį́įgo yaa hoolneʼ ndi, bijéí deistłʼis dóó tʼáadoo Diyin Bóhólníihii bizaad yikʼehdahoołʼįįd da.

14 Áko Nephi Diyin Bóhólníihii bizaad yaa hoolneʼ, kóníigo: Doo ádaa ńdaʼoohkąąhgóó, Diyin Bóhólníihii ání, atínihidiʼdoolnííł ásoołdįįdjįʼ ndi.

15 Áádóó baa hoolzhiizh Nephi saad yaa hoolneʼgo, áko shooh, tʼahdii bijéí deistłʼis dóó bizaad doo yikʼeh dahółʼį́į da; áko bichʼįʼ bádahóóchįįd, dóó deiyiisiłgo yichʼįʼ dahdiijééʼ áko yah adeidoołtʼeeł biniyé.

16 Ákondi shooh, Diyin God bibeʼadziil bił hólǫ́, dóó chʼééh deiyiisił yah adeidoołtʼeeł biniyé, áko Iiʼ Sizíinii dahbidiiłtį́ dóó bitahdóó dahbiʼdiiltį́.

17 Áádóó baa hoolzhiizh Iiʼ Sizíinii bił hólǫ́ǫgo ákǫ́ǫ́ níyá, ałʼąą dah daʼíldééhgóó, Diyin God bizaad yaahalneʼgo, azhą́ tʼáá ałtso yił hoolneʼjįʼ ndi, éí doodago diné bitahgóó chʼíyizʼą́.

18 Áádóó baa hoolzhiizh bizaad doo deiyíistsʼą́ą́ʼ da; áádóó saad áłchʼįʼ adeiyiinííł, áko ałtsʼáheeskaigo ałkʼijįʼ daazlį́į́ʼ dóó béésh hał yee nidaʼahiltseed.

19 Áádóó áko tseebídiin dóó biʼaan tʼááłáʼí ałtso yíhai ándahwiiʼaahii Nephi bidineʼé yikʼidahwéeʼaahgo.