Lesona 9 Anomea mo le Sauniuniga o le Vasega: Tuufaatasia o Aiga mo le Faavavau
“Lesona 9 Anomea mo le Sauniuniga: Tuufaatasia o Aiga mo le Faavavau,” Anomea a le Faiaoga O Le Aiga e Faavavau (2022)
“Lesona 9 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Ata
o se aiga o loo tilotilo atu i le malumalu
Lesona 9 Anomea mo le Sauniuniga o le Vasega
Tuufaatasia o Aiga mo le Faavavau
Na folafola mai e Peresitene Russell M. Nelson: “O lou tapuai ai i totonu o le malumalu ma lau auaunaga iina mo ou tuaa o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o feagaiga” (“A’o Tatou Agai Faatasi Atu i Luma,” Ensign, Apr. 2018, 7). A o e suesueina lenei lesona, mafaufau po o le a se mea e mafai ona e faia ina ia e iloa atoatoa ai nei faamanuiaga mo oe lava ma pe mafai faapefea ona e fesoasoani e tuufaatasia le aiga e faavavau o le Atua e ala i le faatinoina o sauniga o le malumalu mo ou tuaa ua maliliu.
Vaega 1
O a ni auala e faamalosia ai au e sauniga ma feagaiga o le perisitua?
O le upumoni e faapea “o le aiga o le totonugalemu lea o le fuafuaga [a le Tama Faalelagi]” o loo i ai ni nai aafiaga loloto (“O Le Aiga: O Se Folafolaga i le Lalolagi,” ChurchofJesusChrist.org). Na aoao mai Peresitene Iosefa F. Samita e uiga i se tasi o nei aafiaga:
Ata
Peresitene Iosefa F. Samita
E ao lava ona i ai se sooga mau faatasi ma se tuufaatasiga o matua ma fanau ma fanau ma matua seia oo ina sosoo mau faatasi uma le filifili atoa o le aiga o le Atua i le filifili e tasi, ma avea uma ai i latou ma aiga o le Atua ma Lona Keriso. (Aoaoga a Peresitene o le Ekalesia: Iosefa F. Samita [2011],411)
Ua tautino mai e perofeta o aso e gata ai le ala e mafai ai e lenei “mau faatasi” o aiga taitasi—ma mulimuli ane o le aiga o le Atua—ona faia: “O sauniga ma feagaiga paia e maua i malumalu paia ua mafai ai e tagata taitoatasi ona toe foi atu i le afioaga o le Atua ma mo aiga ina ia toe faatasia e faavavau” (“O Le Aiga: O Se Folafolaga i le Lalolagi”).
O nei sauniga ma feagaiga paia o le perisitua ua sili atu nai lo na o galuega e faamaea. E ala i nei sauniga ma feagaiga, ua finagalo le Atua e faamamanaina i tatou ia avea atili e faapei o Ia (tagai Mataupu Faavae ma Feagaiga 84:19–22) ma agavaa mo le ola e faavavau faatasi ma Ia ma faatasi ai ma o tatou aiga.
E tusa ai ma le mana o sauniga ma feagaiga o le malumalu, na aoao mai ai Peresitene Nelson:
Ata
Peresitene Russell M. Nelson
I le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua—le ola e faavavau. O sauniga o le malumalu ma feagaiga tou te osia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. (“A’o Tatou Agai Faatasi Atu i Luma,” 7)
Na ia toe faasoa mai mulimuli ane:
O i latou ua maua faaeega paia i le maota o le Alii ua mauaina se meaalofa o le mana o le perisitua a le Atua e tusa ma le paia o a latou feagaiga, faatasi ma se meaalofa o le poto e iloa ai le auala e utuvai ai mai lena mana. …
… O taimi uma lava e te auauna atu ai ma tapuai ma le agavaa i le malumalu, e te tuua ai le faaauupegaina i le mana o le Atua ma faatasi ai ma Ana agelu e “tausi” outou [Mataupu Faavae ma Feagaiga109:22]] (”O Oa Faaleagaga,” Ensign po o le Liahona, Nov. 2019, 77, 78)
Ata
aikona, mafaufau loloto
Mafaufau Loloto e Sauniuni ai mo le Vasega
O a ni auala ua faamanaina ai pe faamalosia ai oe ma lou aiga e sauniga ma feagaiga o le perisitua?
Vaega 2
O le a se aafiaga e mafai ona i ai i lo‘u olaga ona o le faia o talafaasolopito o aiga ma le faatinoina o sauniga o le malumalu mo o’u tuaa ua maliliu?
Na folafola mai e le Alii e auina mai le perofeta o Elia i aso e gata ai e toefuatai mai le pule e manaomia mo aiga ina ia tuufaatasia ai e faavavau.
Ata
aikona, suesue
Suesue e Sauniuni ai mo le Vasega
Faitau le Malaki 4:5–6, ma matau le aafiaga o le a i ai i le lalolagi i le oo mai o Elia.
Sa faamalamalama mai e le Perofeta o Iosefa Samita e faapea o le upu faaliliuina e pei ona faaaogaina i le fuaiupu 6 “e tatau ona faaliliuina fusia, po o le faamaufaailogaina” (Aoaoga a Peresitene o le Ekalesia: Iosefa Samita [2007],472). O le valoaga a Malaki o loo tusia i nei fuaiupu sa faataunuuina se vaega i le Malumalu o Katelani i le aso 3 Aperila, 1836. I lena aso, na oo mai ai le perofeta o Elia ia Iosefa Samita ma Oliva Kaotui ma faaee atu i o laua luga ki o faamauga o le Perisitua Mekisateko (tagai Mataupu Faavae ma Feagaiga 110:13–16). E ala i lenei pule, o sauniga e faatinoina i le lalolagi e mafai ona faaauau i le oti ma “aoga i le malo selesitila o le Atua” (Aoaoga a Peresitene o le Ekalesia: Iosefa Filitia Samita [2013], 219).
Mafaufau i auala ua faamanuiaina ai oe e le toefuataiga o ki o faamauga? E ala i nei ki, ua mafai ai e tane ma ava, faapea foi ma matua ma fanau, ona tuufaatasia e faavavau. O nei ki foi e tatala faavavega ai faitotoa e faia ai auaunaga faalemalumalu mo o tatou tuaa ua maliliu.
Sa aoao atu e le Alii ia Iosefa Samita ma isi uluai tagata o le Ekalesia e uiga i le taua o le faatinoina o sauniga mo o latou tuaa ua maliliu i le malumalu.
Ata
aikona, suesue
Suesue e Sauniuni ai mo le Vasega
Faitau le Mataupu Faavae ma Feagaiga 128:15, ma vaavaai pe faapefea ona milo faatasi lo tatou faaolataga ma le faaolataga o o tatou tuaa.
O le iloaina o o tatou tuaa ua maliliu ma le faatinoina o sauniga o le malumalu mo i latou, ua avea atili ai i tatou e pei o le Faaola. Na aoao mai e Peresitene Gordon B. Hinckley le auala tatou te avea ai faapei o faaola mo na tagata o le aiga:
Ata
Peresitene Gordon B. Hinckley
E pei lava ona ofoina atu e lo tatou Togiola Lona soifua e ositaulaga e fai ma sui o tagata uma, ma o le faia o lena mea ua avea ai ma o tatou Faaola, e faapena foi ia i tatou, i se auala itiiti lava, pe a tatou faia galuega e sui ai i totonu o le malumalu, e avea [i tatou] ma faaola ia i latou o loo i le isi itu, o ē ua leai se mea latou te toe mafaia e alualu ai i luma, vagana ua i ai se mea e fai mo i latou e i latou o loo i le fogaeleele. (“Tuleiga Faaiu,” Ensign po o le Liahona, Nov. 2004, 105)
Mafaufau pe o faapefea ona e tuuina atu oe lava pe a e auai i le auaunaga o talafaasolopito o aiga ma le malumalu.
Ua folafola mai e le Alii ia i tatou faamanuiaga taua pe afai tatou te filifili e auai i lenei galuega paia. Matamata le vitio “The Promised Blessings of Family History” (3:24), ma faalogologo mo se faamanuiaga se tasi pe sili atu e te manao e vaai ua faataunuuina i lou lava olaga.
Ata
aikona, mafaufau loloto
Mafaufau Loloto e Sauniuni ai mo le Vasega
Aisea e te manatu ai e manaomia le faaolataga o o tatou tuaa mo lo tatou lava faaolataga ma le atoatoaga? O a faamanuiaga e fesootai ma auaunaga o malumalu ma talafaasolopito o aiga e sili ona e manaomia i le taimi nei?
Vaega 3
E mafai faapefea ona ou tuufaatasia lo‘u aiga ma fesoasoani i le Tama Faalelagi i le tuufaatasia o Lona aiga e ala i sauniga o le malumalu?
Ua naunau lo tatou Tama Faalelagi e fesoasoani ia te oe i le tuufaatasia o lou aiga ma Lona aiga atoa e ala i sauniga o le malumalu. Sa faamalamalama mai e Elder David A. Bednar o le Korama a Aposetolo e Toasefululua se meaalofa se tasi e tuuina mai e le Tama Faalelagi e lagolago ai i tatou i lenei galuega paia:
Ata
Elder David A. Bednar
Ua aoao mai Elder Russell M. Nelson e faapea, o le Agaga o Elia ”o se faaaliga mai le Agaga Paia o loo molimau i le natura paia o le aiga” (”O Le Taimi o se Seleselega Fou,” Ensign, Me 1998, 34). O lenei uunaiga tupito a le Agaga Paia e ta’a’ina ai tagata ia iloa, faamaumau, ma faatauaina o latou augatuaa ma tagata o aiga—ua mavae ma le taimi nei.
O le Agaga o Elia e aafia ai tagata i totonu ma fafo o le Ekalesia. (“O le a Liliu atu Loto o le Fanau,” Ensign po o le Liahona, Nov. 2011, 25)
Matamata le vitio “Gathering God‘s Family” (3:33), ma mafaufau po o a nisi mea e mafai ona e faia e auai ai i le auaunaga o le malumalu ma talafaasolopito o aiga.
Ata
aikona, faatino
Faatino
O leFamilySearch.org ma le polokalama o le FamilySearch Family Tree o ni nofoaga sili ia e auai ai i taumafaiga e “faailoa, faamaumau, ma faapelepele” ou tuaa ua maliliu (David A. Bednar, “O le a Liliu atu Loto o le Fanau,” 25). (O le polokalama FamilySearch Family Tree e mafai ona maua i le faleoloa o le polokalama i luga o lau masini eletonika.) Faaalu sina taimi e faamasani ai pe faaaoga ai se tasi o nei punaoa. E mafai ona e fausia lou gafa o le aiga, faaopoopo manatuaga ma ata o tagata o le aiga, faailoa sauniga o le talalelei e manaomia ona maua e tuaa ua maliliu, faamaumauga o faasinoupu ina ia mafai ai e isi ona faailoa o latou tuaa, ma isi mea. Afai e manaomia, faafesootai se faufautua o le malumalu ma talafaasolopito o aiga i lau uarota po o le paranesi e fesoasoani ia te oe.
