Lesona 2 Anomea mo le Sauniuniga o le Vasega: O Le Matafaioi a Perofeta i le Folafolaina o le Aoaoga Faavae Autu o le Aiga e Faavavau
“Lesona 2 Anomea mo le Sauniuniga o le Vasega: O Le Matafaioi a Perofeta i le Folafolaina o le Aoaoga Faavae Autu o le Aiga e Faavavau,” Anomea a le Faiaoga O Le Aiga e Faavavau (2022)
“Lesona 2 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Ata
leoleo i luga o se ‘olomatamata na fau i maa mai anamua
Lesona 2 Anomea mo le Sauniuniga o le Vasega
O Le Matafaioi a Perofeta i le Folafolaina o le Aoaoga Faavae Autu o le Aiga e Faavavau
Ua faamanuiaina i tatou e ola ai i se taimi ua toe valaauina ai e le Alii ni perofeta soifua e taiala ma puipuia i tatou. Na faapefea ona fesoasoani perofeta a le Alii ia te oe ia malamalama i le aoaoga faavae autu o le aiga e faavavau? Aʻo e suʻesuʻe i le lesona lenei, mafaufau pe mafai faapefea ona e maua se molimau sili atu i perofeta soifua, ma faalagolago atoatoa atili ai ia latou upu i lou olaga.
Vaega 1
O faapefea ona faaalia le alofa o le Atua i fautuaga a perofeta?
Ina ua valaauina Esekielu e le Alii e avea ma perofeta, sa Ia faatusatusaina le matafaioi fou a Esekielu i le matafaioi a se leoleo i le ‘olo. I aso anamua, sa tutu leoleo ‘olo i luga o pa po o ‘olo e fesoasoani e puipuia aai, tovine, po o fanua (tagai i le “Watchmen on the Tower,” Ensign, Apr. 2016, 28). O le maualuga o mea latou te vaai mai ai sa mafai ai ona latou iloa mea sa le mafai e isi ona vaaia, ma saunia ai e tuuina atu lapataiga talafeauga e uiga i tulaga matautia o le a oo mai.
Ata
aikona, suesue
Suesue e Sauniuni ai mo le Vasega
Faitau le Esekielu 3:17–19, ma mafaufau pe tutusa faapefea perofeta a le Alii ma tagata vaai i luga o le ‘olo.
E fesoasoani perofeta ia tatou iloa mea mai le vaaiga faavavau a le Atua. Na Te faamanuiaina i latou o ni tagatavaai ma se meaalofa paia o le vaaiga faaleagaga. Latou te mafai ona “iloa mea ua tuanai, faapea foi mea o le a oo mai” (Mosaea 8:17; tagai foi i le fuaiupu 15–16). Ua tuuina e le Alii i latou i tulaga e puipuia ai i tatou mai mea matautia faaleagaga ma faaletino.
Na aoao mai e Peresitene Russell M. Nelson le mea lenei e uiga i le tulaga faaosofia ma le tiutetauave o tagatavaai i ‘olo:
Ata
Peresitene Russell M. Nelson
O aposetolo taitasi a le Alii ua tutu i tulaga e mataitu ma lagonaina ai le alofa o le Tama Faalelagi mo Ana fanau, aemaise i latou o loo tauivi ma faigata. …
O nisi taimi, i le avea ai o i tatou o ni taitai e faitioina ona o le taofiofimamau i tulafono a le Atua, puipuia o le aoaoga faavae autu a le Faaola, ma le tetee atu i uunaiga faaleagafesootai o o tatou taimi. Ae o le poloaiga ia i matou o ni aposetolo faauuina o le “o atu i le lalolagi uma e folafola [Lana] talalelei i tagata uma” [Mataupu Faavae ma Feagaiga 18:28]. O lona uiga ua poloaiina i tatou e aoao atu mea moni.
O le faia o lena mea, o nisi taimi e tuua’ia i tatou i le faaleano a o tatou aoao atu tulaga manaomia e le Tama mo le faaeaga i le malo selesitila. Ae pe le sili atu ea ona tatou faaleano i le le tau atu o le upumoni---le aoao atu o mea ua faaalia mai e le Atua?
O le mea moni ona e loloto lo tatou amanaia o fanau uma a le Atua o lea tatou te folafola atu ai Lana upumoni. Atonu tatou te le ta’uina atu i taimi uma i tagata mea latou te fia faalogo i ai. O perofeta e seasea ona lauiloa. Ae o le a matou aoao atu pea lava le upumoni! (“The Love and Laws of God” [Brigham Young University devotional, Sept. 17, 2019], 3, speeches.byu.edu)
Ata
aikona, mafaufau loloto
Mafaufau Loloto i Sauniuniga mo le Vasega
O faapefea ona e lagonaina le alofa o le Atua e ala i lapataiga, faasa’oga, ma fautuaga a perofeta soifua?
Vaega 2
O faapefea ona avea le folafolaga i le aiga ma faamaoniga o perofeta a le Alii o loo avea ma tagatavaai i luga o ‘olo i le taimi nei?
I le aso 23 o Setema, 1995, i se sauniga aoao a le Aualofa, na fofogaina mai ai e Peresitene Gordon B. Hinckley le “O Le Aiga: O Se Folafolaga i le Lalolagi.” A o lei faia lena mea, sa ia faamalamalama mai le mafuaaga ua lagona ai e le Au Peresitene Sili ma le Korama a Aposetolo e Toasefululua le manaomia ona tuuina mai lenei folafolaga.
Ata
Peresitene Gordon B. Hinckley
Faatasi ai ma le tele o faamatalaga sese ua talia o se mea sa’o, faatasi ai ma le tele o le taufaasese e faatatau i tulaga faatonuina ma tulaga faatauaina, faatasi ai ma le tele o taiga ma faatosinaga ina ia talia le faaleagaina lemu o le lalolagi, o lea ua matou manatu ai e lapatai atu ma muai lapatai atu. I le faateleina o lenei tulaga, o i matou o le Au Peresitene Sili ma le Aufono a Aposetolo e Toasefululua ua tuuina atu nei se folafolaga i le Ekalesia ma le lalolagi o se faalauiloaga ma se toe faamautuina o tulaga faatonuina, aoaoga faavae, ma faatinoga e faatatau i le aiga ia ua faaleoina so’o atu e perofeta, tagatavaai, ma talifaaaliga a lenei ekalesia i le faagasologa o lona talafaasolopito. (“Ia Tu Malosi e Tetee atu i Togafiti a le Lalolagi,” Ensign, Nov. 1995, 100)
O se fuaitau lenei mai le tala’o’oto o Peresitene Nelson o loo faamatala mai ai e mea na faia e le Alii ia mafai ai e Ana Aposetolo ona vaaia, na tau atu ai i le foafoaina o le folafolaga i le aiga.
I se tasi aso i le 1994, sa faaalu ai e le Korama a Aposetolo e Toasefululua se aso i le latou potu fono i le Malumalu o Sate Leki i le talanoaina o faafitauli o loo siomia ai le aiga. Sa latou iloiloina mea uma mai le pogai o le faateteleina o le salalau solo o ponokalafi e oo i ituaiga eseese o tulafono taufaaofi e tetee ai i le aiga. E le o se talanoaga fou lea, ae o lena aso o le mataupu talanoaina atoa lava sa taulai atu i lenei lava autu taua e tasi.
Sa iloiloina e le Toasefululua mea uma e lua, o aoaoga faavae ma aiaiga faavae, i le iloiloina ai o mea na e le mafai ona suia—aoaoga faavae—ma mea na e ono avea ma—aiaiga faavae. Sa latou talanoaina faafitauli na vaai ua oo mai, e aofia ai se tulei malosi faalesosaiete e faataga faaipoipoga o le itupa e tasi atoa ai ma aia tatau o tagata e sui ai o latou itupa. “Ae e le o le mutaaga lena o mea na matou vaaia,” sa faamalamalama mai ai Elder Nelson. “Sa mafai ona matou iloaina taumafaiga a nuu eseese e o ese mai tulaga faatonuina uma ma tapulaa o gaoioiga faafeusuaiga. Sa matou vaaia le fenumiaiga o itupa. Sa mafai ona matou vaaia le oo mai o ia mea uma.”
O lenei talanoaga faaumiumi, faatasi ai ma isi talanoaga mo se vaitaimi, na taitai atu ai i le faaiuga e tatau i le Toasefululua ona saunia se pepa o faamatalaga, masalo o se folafolaga, e otooto atu ai le tulaga o le Ekalesia e uiga i le aiga ma tuuina atu i le Au Peresitene Sili mo le iloiloga. (Sheri Dew, Insights from a Prophet’s Life: Russell M. Nelson [2019), 208)
Ata
aikona, mafaufau loloto
Mafaufau Loloto i Sauniuniga mo le Vasega
O le a se mea na tulagaese mai ia te oe mai le saunoaga a Peresitene Hinckley ma le tala e uiga ia Peresitene Nelson? O faapefea e le tuuina mai o le folafolaga i le aiga ona faapupula mai ai matafaioi a perofeta o ni tagatavaai i luga o le ‘olo?
Vaega 3
E mafai faapefea ona ou maua ma tali atu ma le faamaoni i upu a perofeta a le Atua?
I Lona pitonuu o Nasareta, sa teena le Faaola ina ua Ia folafola atu o Ia o le Mesia folafolaina. I le tali atu i le tele o masalosaloga, sa fetalai atu ai le Faaola, “E le taliaina se perofeta e lona lava nuu” (Luka 4:24).
E faapena foi, i o tatou taimi, e filifili nisi tagata e le taliaina perofeta a le Alii. E i ai taimi, atonu foi tou te iloa le faigata ona malamalama pe mulimuli i fautuaga ma aoaoga a perofeta o aso nei.
I le aso sa faatulagaina ai Le Ekalesia a Iesu Keriso o le Au Paia o Aso e Gata ai, sa maua ai e le Perofeta o Iosefa Samita se faaaliga mai le Alii sa i ai se poloaiga ma folafolaga i tagata o Lana Ekalesia.
Ata
aikona, suesue
Suesue e Sauniuni ai mo le Vasega
Faitau le Mataupu Faavae ma Feagaiga 21:4–6 (matau o fuaiupu nei o loo faasino i le Perofeta o Iosefa Samita ma, i le faalautelega, e mafai ona faatatau foi i le Peresitene o le Ekalesia a le Alii o loo i ai nei. Vaavaai pe o faapefea e tagata o le Ekalesia ona maua ia upu a perofeta ma faamanuiaga ua folafola mai e le Alii pe a tatou faia. (Manatua: O se tasi faauigaga o le upu luluina i le fuaiupu 6 o le tatalaina lea po o le faamatuu mai o se mea mai se mea sa lagolagoina ai po o se koneteina [tagai i le Merriam-Webster.com Dictionary, “shake”]. O lea la, o le tasi faaliliuga o lenei fuaiupu e faapea, a oo ina faia e le Alii ia “luluina le lagi mo lo [tatou] lelei,” Na Te faamatuu mai faaaliga ma faamanuiaga, ma liligi mai i luga o i latou o e mulimuli i Ana perofeta soifua.)
Mafaufau pe o le a le uiga o le mauaina o afioga a le Alii e ala mai perofeta “i le onosai uma ma le faatuatua” (fuaiupu 5). Mafaufau foi i faamanuiaga na folafola mai mo le faia o lena mea. E tele tala o i tusitusiga paia e uiga i tagata na filifili e faaaoga le onosai ma le faatuatua i upu a perofeta. Filifili se tasi pe sili atu o mau nei e suesue ai:
1 Nifae 2:11–16 (Ua tuua Ierusalema e Nifae e pei ona faatonuina ai e le perofeta o Liae)
1 Tupu 17:8–24 (O le fafine Sarefata ua oti lana tane o loo tali atu i se talosaga a le perofeta o Elia i le taimi o se oge)
2 Tupu 5:9–14 (O Naamanu, le Suria, o loo saili ina ia faamaloloina lona lepela e le perofeta o Elisaia)
Ata
aikona, tusifaamaumau
Tusifaamaumau Ou Manatu
Mafaufau i mea faatoa e faitauina, tusi au tali i fesili nei i se api po o se polokalama feaveai e faamaumau ai faamatalaga.
O le a se mea e mafai ona e aoao mai le taumafaiga a le tagata ia maua upu a se perofeta ma le onosai ma le faatuatua?
Aisea atonu na faigata ai ona maua ma uai atu i upu a le perofeta a le Alii i nei tulaga?
O le a se mea ua e aoaoina e uiga i le Alii e ala i mea na Ia talosagaina mai le tagata sa e faitau ai?
A o auauna ai o se fesoasoani i le Au Peresitene Aoao o Tamaitai Talavou, sa matauina ai e Sister Carol F. McConkie le mea lenei:
Ata
Sister Carol F. McConkie
E tusa ai ma tulaga faatonuina o le lalolagi, o le mulimuli i le perofeta e ono inosiaina, lē sa’o i manatu faaupufai, po o le lē taliaina faaleagafesootai. Ae o le mulimuli i le perofeta e sa’o i taimi uma lava . (“Ola e Tusa ma Upu a Perofeta,” Liahona, Nov. 2014, 78)
E mafai ona i ai lo tatou talitonuga mauai i le mulimuli i le perofeta a le Alii.
