Lesona 2

O Le Uluai Faaaliga a Iosefa Samita

Faatomuaga ma le Faasologa o Taimi

I lona talavou, sa saili ai Iosefa Samita ina ia malamalama i le mea na manaomia ona ia faia ia maua ai le faaolataga ma po o le fea o lotu e tatau ona ia auai. A o faitau i le Tusi Paia, sa musuia o ia e ole i le Atua mo le taitaiga. Ina ua tatalo Iosefa Samita i se togalaau latalata atu i lona aiga, sa faaali mai le Atua le Tama ma Iesu Keriso ma talanoa mai ia te ia. Ina ua mavae le aafiaga i lenei faaaliga, sa faamautu mai e Iosefa Samita lona moni e ui lava ina sa filifili isi e le talitonu ia te ia ma sauaina o ia (tagai Iosefa Samita—Talafaasolopito 1:27).

23 Tesema, 1805Na fanau ai Iosefa Samita i Sharon, Vermont.

Taumalulu 1816–17Sa siitia atu ai le aiga o Iosefa Samita i Palamaira, Niu Ioka.

O se mea o Ianuari 1819Sa siitia atu ai le aiga o Iosefa Samita i se faatoaga i Manchester, Niu Ioka.

Tautotogo 1820Na vaai ma talanoa Iosefa Samita i le Atua le Tama ma Lona Alo, o Iesu Keriso.

Faitauga a Tagata Aoga

Au Paia: O Le Tala o le Ekalesia a Iesu Keriso o le Au Paia i Aso e Gata Ai, Voluma 1, O Le Tagavai o le Upumoni, 1815–1846 (2018), mataupu 1–2

Fautuaga mo le Aoaoina Atu

Fesoasoani i tagata aoga ia faataunuu la latou matafaioi i le aoaoina faaleagaga

O le aoaoina faaleagaga e manaomia ai se vaega o le taumafaiga a le tagata aoao. Sa aoao mai Elder David A. Bednar o le Korama a Aposetolo e Toasefululua e faapea, “O se tagata aoao e faaaogaina le faitalia e ala i le ola e tusa ai ma mataupu faavae sao e na te tatalaina lona loto i le Agaga Paia ma valaaulia Ana aoaoga, mana molimau, ma le molimau faamaonia” (“Seek Learning by Faith,” Ensign, Sete. 2007, 64). E mafai ona e fesoasoani i tagata aoga e faataunuu la latou matafaioi i le faagasologa o le aoaoina, e ala i le valaaulia o i latou e suesue ma le maelega, mafaufau loloto, aoao atu, molimau e uiga i, ma galue i upumoni faalelagi.

Sa saili Iosefa Samita ina ia malamalama i le mea na manaomia ona ia faia ia maua ai le faaolataga ma po o le fea o lotu e tatau ona ia auai

Tusi le fasifuaitau lenei i luga o le laupapa: Taua o upu ma vevesi o taofi.

• O a ni manatu po o ni vaaiga e avatu e le fasifuaitau “taua o upu ma vevesi o taofi” i lou mafaufau?

Afai e manaomia, faamalamalama atu e faapea, sa faaaoga e Iosefa Samita le fasifuaitau lenei e faamatala ai faafinauga i mea taulotu sa ia molimauina ao i le va o le 12 ma le 14 tausaga o lona matua (tagai Iosefa Samita—Talafaasolopito 1:9–10).

• O a nisi o faataitaiga o auala e auai ai tagata i taua o upu ma le vevesi o taofi i o tatou aso?

• E ono mafai faapefea e nei taua o upu ma le vevesi o taofi ona faafaigata le mauaina po o le iloaina o le upumoni?

Valaaulia tagata aoga e vaavaai mo mataupu faavae ma aoaoga faavae a o latou suesue e uiga i le sailiga e Iosefa Samita o le upumoni, ia mafai ona fesoasoani latou te maua ma iloa ai le upumoni.

Faaali atu le faafanua o loo i ai i le lesona, “Matuisasae o le Iunaite Setete.”

faafanua o matuisasae o le unaite Setete

Faamatala atu, ina ua 11 tausaga o Iosefa Samita, sa siitia atu lona aiga mai Vermont i Palamaira, Niu Ioka. E silia teisi atu ma se tausaga mulimuli ane, sa fuafua ai le au Samita e faatau mai le selau eka o fanua ua totolaauina i Manchester, i saute o Palamaira. Sa tapena e le aiga le fanua mo le faiga o le faatoaga ma iu ina fauina ai se faleogalaau i luga o le fanua. (Atonu e te manao e faaali atu se ata o le fale ogalaau na fauina o le aiga o Samita.)

faleogalaau o Samita

Faamatala atu e faapea, i le itu lea sa nonofo ai le aiga o Samita, sa i ai se “vavaō tulaga ese e uiga i le mataupu tau lotu” i le taimi o le talavou o Iosefa (Iosefa Samita—Talafaasolopito 1:5). Faaali atu le saunoaga lenei sa faamaumauina e le Perofeta o Iosefa Samita (1805–44), i lona talaaga i le 1832, ma fai i se tagata aoga e faitau leotele.

Iosefa Samita

“Pe tusa o le 12 o [o’u] tausaga, sa oo ina matuai faagaeetia lo’u mafaufau e uiga i atugaluga sili ona taua mo le manuia o lo’u agaga e faavavau. …

“… Sa ou mafaufau loloto i le tele o mea i lo’u loto e uiga i le tulaga o le lalolagi o tagata, o finauga ma fevaevaeaiga, o le amioleaga ma mea inosia, ma le pogisa lea na faatumulia ai mafaufau o tagata. Sa oo ina matuai atuatuvale lava lo’u mafaufau, ona sa ou lagonaina lo’u ta’usalaina i a’u agasala. … Sa ou lagona le faanoanoa i a’u lava agasala ma mo agasala a le lalolagi” (“Joseph Smith’s Accounts of the First Vision,” Circa Summer 1832 History, josephsmithpapers.org).

Faamatala atu o le popole o Iosefa mo le manuia o lona agaga na faaosofia ai o ia e auai i fonotaga a aulotu o tapuaiga eseese i le aluga o le isi lua tausaga na sosoo ai o lona olaga.

• Na faapefea ona saofaga faamatalaga a aulotu o tapuaiga eseese i le fenumia’i o Iosefa? (Afai e manaomia, e mafai ona e faasino atu tagata aoga i le Iosefa Samita—Talafaasolopito 1:5–10.)

Tulitatao faitauga atofaina a le tagata aoga

Fatufatu ni avanoa anoa i le vasega mo tagata aoga e faasoa mai ai mea ua latou aoaoina mai faitauga atofaina a le tagata aoga. O le faia faapena e mafai ona fesoasoani e faaosofia ai tagata aoga e faauma a latou faitauga atofaina a o le’i oo i le vasega ma omai saunia ai i le vasega e “aoao i le tasi” (MFF 88:77).

• E faavae i lau faitauga o le mataupu 1 i le Au Paia: Voluma 1, na faapefea ona taitai atu e suesuega a Iosefa mo le upumoni i aulotu o tapuaiga eseese, o ia ia maua se aafiaga taua i tusitusiga paia?

Atonu e te manao e faaali atu le saunoaga lenei a Elder B. H. Roberts (1857–1933) o le Fitugafulu, ma fai atu i se tagata aoga e faitau leotele:

B. H. Roberts

“Sa talai atu e le Faafeagaiga le Susuga a Lane o le lotu Metotisi se lauga e faaautu i le, ‘O le a le lotu e tatau ona ou auai ai?’ Sa ia sii mai le [Iakopo 1:5]. …

“O le anotusi na tupu ai se lagona loloto i le mafaufau o [Iosefa Samita]. Sa ia faitauina ina ua foi i le fale, ma sa mafaufau loloto i ai” (B. H. Roberts, A Comprehensive History of the Church, 1:52–53; tagai foi Au Paia: Voluma 1, 12–13).

Vaevae tamaiti i paga po o vaega laiti. Fai atu ia i latou e suesue le Iosefa Samita—Talafaasolopito 1:11–16 ia latou paga po o vaega, ma vaavaai mo mataupu faavae e mafai ona tatou aoao mai i le aafiaga a Iosefa Samita e mafai ona fesoasoani ia i tatou i la tatou suesuega mo le upumoni. Valaaulia tagata aoga e mafaufau e faailoga mea ua latou maua.

A ua lava loa se taimi mo tagata aoga e suesue ma talanoa ai i fuaiupu 11–16, valaaulia ni nai tagata aoga e lipoti mai se mataupu faavae na latou faailoaina. A o latou faia lea mea, mafaufau e fai atu ia i latou e faamatala pe faapefea ona fesoasoani lena mataupu faavae ia i tatou i la tatou sailiga mo le upumoni.

Afai e le ta’uaina e tagata aoga, faailoa atu le mataupu faavae lenei o loo aoaoina i le Iakopo 1:5 (e pei ona tusia i le Iosefa Samita—Talafaasolopito 1:11): Afai tatou te ole atu i le Atua, o le a Ia tuu mai ia i tatou le poto ua tatou sailia. Faaali atu le saunoaga lenei a Peresitene Henry B. Eyring o le Au Peresitene Sili, ma fai i se tagata aoga e faitau leotele:

Henry B. Eyring

“O faaiuga faaletagata ma manatu faautauta o le a lē lava e maua ai tali i fesili e aupito sili ona taua i le olaga. Tatou te manaomia faaaliga mai le Atua” (Henry B. Eyring, “Faaaliga Faifaipea,” Ensign po o le Liahona, Nov. 2014, 70).

• O a nisi o auala ua faamanuiaina ai oe i le iloaina e mafai ona e ole atu i le Atua ma maua le poto e ala mai i faaaliga?

Uunaia tagata aoga e ole atu i le Atua pe a latou manaomia le poto ma faaaliga.

Sa faaali mai le Atua le Tama ma Lona Alo, o Iesu Keriso, ia Iosefa Samita i le tali i lana tatalo.

Valaaulia ni nai tagata aoga e auauai e faitau leotele mai i le Iosefa Samita—Talafaasolopito 1:17–19. Fai atu i le vasega e mulimuli i le faitauga, ma vaavaai pe na faapefea ona taliina le tatalo a Iosefa Samita.

• O a ni upumoni e mafai ona tatou faailoa mai i le fuaiupu 17–19? (Atonu e faailoa mai e tagata aoga nisi o upumoni, e aofia ai ma lenei: Na faaali mai ma talanoa le Atua le Tama ma Lona Alo o Iesu Keriso, ia Iosefa Samita. Tusi le upumoni lenei i luga o le laupapa.)

Faasino i le fasifuaitau “Taua o upu ma vevesi o taofi” i luga o le laupapa.

• E mafai faapefea ona fesoasoani lo tatou malamalama e uiga i le faaaliga vaaia a Iosefa Samita i le Tama Faalelagi ma Iesu Keriso, e faatoilalo ai le le mautonu lea e tulai mai mai taua o upu ma vevesi o taofi i o tatou aso?

Faamalamalama atu e faapea, e faaopoopo atu i le tala o le Uluai Faaaliga na faamaumauina i le 1838 ma lomia mulimuli ane i le Iosefa Samita—Talafaasolopito, sa faamaumauina foi e le Perofeta o Iosefa Samita se tala i lana talaaga i le 1832, faamalau atu se tala mo lana apitalaaga i le 1835, ma faamalau atu se isi tala i le 1842 i se tusi na faatuatusi atu i le faatonu o se nusipepa na igoa ia John Wentworth. E i ai foi faamatalaga e lima o le Uluai Faaaliga na faamatalaina e isi tagata na faamaumauina e tagata na ola i le vaitaimi lava lea ma Iosefa Samita (tagai “First Vision Accounts,” Gospel Topics, topics.ChurchofJesusChrist.org).

Faaali atu le fuaitau lenei ma valaaulia se tamaitiiti aoga e faitau leotele:

“O tala eseese o le Uluai Faaaliga ua faamatalaina ai se tala e tutusa, e ui lava e masani ona eseese mea e faamamafaina ma faamatalaga. O tusitalafaasolopito e faamoemoe afai e toe faamatalaina e se tasi se aafiaga i ni tulaga eseese ini tagata faalogologo i ni tausaga se tele, o tala taitasi o le a faamamafa ai ni manatu eseese o le aafiaga ma e maua ai ni faamatalaga tulaga ese. E moni lava, o eseesega e pei ona iai i le uluai faaaliga o loo maua i le tele o tala faatusitusiga paia o le faaaliga a Paulo i le ala i Tamaseko ma le aafiaga a Aposetolo i le Mauga o Liua. Ae e ui lava i eseesega, e i ai pea se faavae tumau i tala uma o le Uluai Faaaliga. O nisi ua finau sese e faapea, soo se eseesega lava i le toefaamatalaina o le tala o se faamaoniga o se talafatu. I le isi itu, o le faamaumauga anoa o le talafaasolopito, ua mafai ai ona tatou aoao atili e uiga i lenei mea taua na tupu, nai lo le mea semanu tatou te aoaoina pe ana faapea e laitiiti faamatalaga na maua” (First Vision Accounts,” Gospel Topics, ChurchofJesusChrist.org/topics).

Ina ia fesoasoani i tagata aoga ia malamalama atili i le aafiaga a Iosefa Samita o le vaai ma talanoa ma le Tama Faalelagi ma Iesu Keriso, vaevae le vasega i ni vasega se tolu, ma tuu atu i tagata aoga taitasi se kopi o le pepa e tufa atu o loo auina atu faatasi ai, “Tala Faaopoopo o le Uluai Faaaliga na Faamatalaina e Iosefa Samita.” Tofi vaega taitasi e suesue se tasi o tala o le Uluai Faaaliga o loo i le pepa e tufa atu, ma vaavaai mo faamatalaga e fesoasoani latou te malamalama lelei ai i le mea na tupu i le taimi o le Uluai Faaaliga. Valaaulia tagata aoga e mafaufau e maka faamatalaga e tulagaese ia i latou.

Tala Faaopoopo o le Uluai Faaaliga na Faamatalaina e Iosefa Samita

Talafaasolopito, o se taimi o le Taumafanafana 1832

Vao Paia

“Sa ou tagi atu i le Alii mo le alofa tunoa, aua sa leai se isi na mafai ona ou alu i ai e maua mai ai le alofa tunoa. Ma sa faafofogaina e le Alii la’u tagi i le togavao, ma a’o i ai i le agaga o le valaau atu i le Alii, i le sefuluono o tausaga o lo’u olaga, sa alu ifo mai luga se malamalama faaniutu e sili atu i le pupula o le la i le aoauli, ma nofo i o’u luga. Sa faatumulia a’u i le agaga o le Atua ma sa tatala e le Alii ia le lagi i o’u luga ma sa ou vaai i le Alii.

“Ma na ia fetalai mai ia te a’u, e faapea, ‘Iosefa, lou atalii e, ua faamagaloina au agasala. Alu i ou ala, savali i a’u tulafono ma tausi i aʼu poloaiga. Faauta, o a’u o le Alii o le mamalu. Sa faasatauroina au mo le lalolagi ina ia mafai ona maua e i latou uma o e talitonu mai i lou igoa le ola e faavavau. Faauta, o le taimi nei ua taoto le lalolagi i le agasala, ma ua leai se tasi o faia le lelei, e leai, e leai lava se tasi. Ua latou faasaga ese mai le talalelei ma ua le tausia a’u poloaiga. Ua latou faalatalata mai ia te a’u i o latou laugutu, a o o latou loto ua mamao mai ia te a’u. Ma ua oso lo’u ita e faasaga i e nonofo i le lalolagi, ia asia i latou e tusa ma lo latou amioleaga ma ia faataunuu ai mea na tautalagia e fofoga o perofeta ma aposetolo. Aua faauta, e pei ona tusia e uiga ia te a’u, ou te vave sau, i ao, e ofu i le mamalu o lo’u Tama.

“Na faatumulia lo’u agaga i le fiafia, ma mo le tele o aso, na mafai ona ou olioli ma le fiafia tele.”

Apitalaaga, 9-11 Novema, 1835

“Sa ou faatoga atu i le Alii i le tatalo faatauanau. Na faaali mai se afi faaniutu i luga a’e o lo’u ulu. Sa nofo i ou luga ma faatumulia ai au i le olioli e le mafaamatalaina. Na faaali mai se peresona i le totonugalemu o lenei taulotoaʼiga o le poutu o le apefai mumu, ua salalau solo ma mu, ae e leai se mea na faaleagaina. Na lei pine ae faaali mai se isi peresona e faapei o le na muamua. Sa ia fai mai ia te au, ‘Ua faamagaloina au agasala.’ Na ia molimau mai ia te a’u o Iesu Keriso o le Alo o le Atua. Ma sa ou vaai i le tele o agelu i lenei faaaliga vaaia.”

“Talafaasolopito o le Ekalesia,” 1 Mati, 1842 (Tusi a Wentworth)

Sa ou alu atu ise nofoaga faalilolilo i se togavao ma amata ona valaau atu i le Alii. A o [o’u] auai ma le faatauanau i le olega, sa aveesea lo’u mafaufau mai mea na faapea ona siomia ai a’u, ma sa fusifusia au i se faaaliga faalelagi ma vaai i le mamalu o ni tagata e toalua e foliga tutusa lava i vaaiga, ma faatusa, ua siomia e se malamalama pupula lea na punitia le la i le aoauli. Sa laua fai mai ia te au o tapuaiga faalelotu uma ua talitonu i aoaoga faavae sese, ma e leai so latou na aloaia le Atua e faapea o lana ekalesia ma le malo. Ma sa faatonuina manino au e ‘aua le mulimuli atu ia te i latou,’ ma i le taimi lava lea na maua ai se folafolaga o le a faaalia mai ia te au le atoatoaga o le talalelei i se taimi o le lumanai.”

(“Tala a Iosefa Samita e uiga i le Uluai Faaaliga,” josephsmithpapers.org.)

Pepa e tufa atu: Tala Faaopoopo o le Uluai Faaaliga na Faamatalaina e Iosefa Samita

A ua lava se taimi e suesue ai tagata aoga, valaaulia tagata aoga mai vaega taitasi e lipoti mai i le vasega mea na latou maua.

• E faapefea ona fesoasoani faamatalaga mai tala eseese ua tatou talanoaina, ia e malamalama lelei ai i le aafiaga a Iosefa Samita i le Uluai Faaaliga?

• E faavae i nei tala, na faapefea ona fesoasoani le savali a le Faaola ia Iosefa i ona atugaluga e uiga i le manuia o lona agaga?

Valaaulia tagata aoga e mafaufau loloto i fesili nei, ma mafaufau e tusi a latou tali i a latou apitalaaga o suesuega:

• E faapefea ona e iloa na vaai ma talanoa Iosefa Samita i le Tama Faalelagi ma Iesu Keriso?

• O faapefea ona aafia lou olaga i lau molimau i le Uluai Faaaliga?

Valaaulia se tagata aoga se toatasi pe toatele e faasoa mai i le vasega pe a latou maua lagona lelei e fai ai.

Ua faamaonia e Iosefa Samita le moni o le Uluai Faaaliga

Faamalamalama atu e faapea, sa teena e se failotu ma isi i le nuu o Iosefa Samita lana molimau ma sauaina o ia ina ua ta’u atu ia i latou e uiga i le faaaliga sa ia mauaina (tagai Iosefa Samita—Talafaasolopito 1:21–23).

Valaaulia se tagata aoga e faitau leotele le Iosefa Samita—Talafaasolopito 1:24–25 . Fai atu i le vasega e mulimuli i le faitauga, ma vaavaai pe na faapefea ona tali atu Iosefa Samita ina ua filifili tagata e le talitonu i lana molimau. Valaaulia tagata aoga e mafaufau e maka fasifuaitau e tulagaese ia i latou.

• O le fea o fuaitau i fuaiupu 24–25 e tulagaese ia te oe? Aisea?

• O a ni mataupu faavae e mafai ona tatou aoao mai i le faataitaiga a Iosefa Samita o le tumau faamaoni i lana molimau? (Atonu e faailoa mai e tagata aoga ni mataupu faavae e pei o lenei: O le malamalama tatou te maua mai le Atua e moni e tusa lava pe teena e le lalolagi. E mafai ona tatou filifili e tumau faamaoni i la tatou molimau e tusa lava pe itagia ma sauaina ai i tatou mo le faia o lea mea. Tatou te faalefiafiaina le Atua ma ta’usalaina pe afai tatou te le tumau faamaoni i le molimau ua Ia tuuina mai ia i tatou.)

Faailoa atu e faapea, e pei lava o aso o Iosefa Samita, o loo i ai tagata i aso nei o e saili e faavaivaia le moni o le molimau a Iosefa Samita e uiga i le Uluai Faaaliga. Faaali atu le fuaitau lenei mai ia Peresitene Gordon B. Hinckley (1910–2008), e faatatau i le Uluai Faaaliga, ma valaaulia se tagata aoga e faitau leotele:

Gordon B. Hinckley

“Mo le silia i se seneturi ma le afa, ua faaaluina ai e fili, aufaitio, ma nisi o tagata fia atamamai, o latou olaga i le taumafai e faasese le moni o lena faaaliga. Ioe, e le mafai ona latou malamalama i ai. O mea a le Atua e malamalama i ai e ala i le Agaga o le Atua. E leai se mea e faatusalia le taua talu mai ona femaliuai i le lalolagi le Alo o le Atua i le olaga nei. A aunoa ma lea, i le avea ai o se maa faavae mo lo tatou faatuatuaga ma le faalapotopotoga, e aunoa i tatou ma se mea. O le i ai o lea mea, ua tatou maua ai mea uma.

“E tele mea ua tusia, e tele mea o le a tusia, i se taumafaiga e aveesea ai e ala i faamatalaga. … Ae o le molimau a le Agaga Paia, na maua e tagata e le faitaulia i tausaga talu mai ona tupu, ua molimau mai e moni, e faapea na tupu e pei ona fai mai Iosefa Samita na tupu” (Gordon B. Hinckley, “Four Cornerstones of Faith,” Ensign, Feb. 2004, 5).

• O a ni auala e avea ai le Uluai Faaaliga a Iosefa Samita o se “maa faavae” mo lo tatou faatuatuaga?

• O le a se mea e mafai ona tatou faia, o le a fesoasoani ia i tatou ia tumau faamaoni ai i la tatou molimau e uiga i le Uluai Faaaliga?

Ia faasoa atu lau molimau e uiga i upumoni na talanoaina i le lesona lenei. Uunaia ia tagata aoga e faatino na upumoni.

Valaaulia tagata aoga e sauni mo le vasega e sosoo ai i le faitauina o mataupu 3–4 o le Au Paia: Voluma 1.

Manatu Faaopoopo Faafaiaoga

Aoaoga i le vitio—“Ole Atu i le Atua: O Le Uluai Faaaliga a Iosefa Samita”

Ina ia fesoasoani i tagata aoga e vaaifaalemafaufau i faamatalaga faaopoopo ma malamalamaaga tatou te maua mai le suesueina o tala eseese o le Uluai Faaaliga, mafaufau e faaali atu le vitio “Ole Atu i le Atua: O Le Uluai Faaaliga a Iosefa Samita” (6:36), lea o loo faaalia ai faamatalaga na aumai mai tala taitasi. O loo maua lenei vitio i le ChurchofJesusChrist.org.

Pepa e tufa atu: Tala Faaopoopo o le Uluai Faaaliga na Faamatalaina e Iosefa Samita