Inisitituti
Lesona 19: O Aafiaga i le Falepuipui i Liperate ma Fa Uesi

“Lesona 19: O Aafiaga i le Falepuipui i Liperate ma Fa Uesi,” Talafaasolopito o le Au Paia o Aso e Gata Ai: 1815–1846 Anomea a le Faiaoga (2018)

“Lesona 19,” Talafaasolopito o le Au Paia o Aso e Gata Ai: 1815–1846 Anomea a le Faiaoga

Lesona 19

O Aafiaga i le Falepuipui i Liperate ma Fa Uesi

Faatomuaga ma le Faasologa o Taimi

I le aso 1 o Tesema, 1838, sa siitia atu ai le Perofeta o Iosefa Samita, Ailama Samita, Sini Rikitone, Lyman Wight, Alexander McRae, ma Caleb Baldwin i le falepuipui i le Itumalo o Kalei, lea na ta’ua mulimuli ane o le Falepuipui i Liperate. A o pagatia le Perofeta ma ana aumea i le falepuipui, sa faamalosia le Au Paia e tuua le setete o Misuri, o se taunuuga o le faatonuga a Kovana Boggs ia faate’aese [i latou]. I le aso 16 Aperila, 1839 a’o siitia atu pagota i le isi nofoaga, sa faatagaina i latou e sosola ese, ma sa latou toe faatasi ai ma le Au Paia ma o latou auaiga i Ilinoi. O le lua o aso talu ona sola ese le Perofeta, na amata ai e Polika Iaga ma isi sui o le Korama a Aposetolo e Toasefululua ona malaga atu i Fa Uesi, Misuri, e usitai ai i le poloaiga a le Alii e faataatia le maatulimanu mo se malumalu (tagai MFF 115:11–12).

1 Tesema, 1838Sa siitia atu ai Iosefa Samita ma isi e toalima i le Falepuipui o Liperate.

Ianuari–Aperila 1839Na o ese faamalosi ai le Au Paia mai Misuri.

16 Aperila, 1839Na faatagaina ai Iosefa Samita ma ana soa e sosola.

26 Aperila, 1839Na faataatia ai e aposetolo ma isi tagata o le Ekalesia le maatulimanu i sautesasae mo le malumalu i Fa Uesi.

Faitauga a Tagata Aoga

Au Paia: O Le Tala a le Ekalesia a Iesu Keriso o le Au Paia o Aso e Gata Ai, Voluma 1, O Le Tagavai o le Upumoni, 1815–1846 (2018), mataupu e 33

Fautuaga mo le Aoaoina Atu

Ua puapuagatia le Perofeta o Iosefa Samita ma isi uso e toalima i le Falepuipui i Liperate

Ata
O Iosefa Samita i le Falepuipui i Liperate

Faaali atu le ata o loo i ai i le lesona o Iosefa Samita i le Falepuipui i Liperate, ma tusi le fesili lenei i le laupapa: “Le Atua e, o fea o i ai oe?” (MFF 121:1).

  • E faavae i lau faitauga o le mataupu 33 o le Au Paia: Voluma 1, o a tulaga na taitai atu ai le Perofeta o Iosefa Samita e fai atu lenei fesili? (Afai e tatau ai, faamanatu atu i tagata aoga, na valavala Iosefa Samita ma isi usoga e toalima mai o latou aiga ma faafalepuipuiina i ni tulaga faalealofa ae o isi o le Au Paia sa veteina a latou meatotino, tutuliese mai o latou fale, sauaina faatautala, ma i nisi o tulaga na fasiotia.)

Valaaulia se tagata aoga e faitau leotele le saunoaga lea mai ia Elder Jeffrey R. Holland o le Korama a Aposetolo e Toasefululua. Fai atu i le vasega e faalogo mo le ala na faamatalaina ai e Elder Holland le fesili a Iosefa Samita.

Ata
Jeffrey R. Holland

“O se alaga tiga, ma patino lena—o se alaga mai le loto, o se tuuatoatasi faaleagaga lea atonu na i ai se taimi o o tatou olaga na tatou lagonaina ai” (Jeffrey R. Holland, “Lessons from Liberty Jail” [faeasaite a le Iunivesite o Polika Iaga, Sete. 7, 2008], 5, speeches.byu.edu).

Valaaulia tagata aoga e mafaufau i ni taimi na oo ai i latou po o se tasi latou te iloa i le tiga, tuuatoatasi faaleagaga, ma po o isi puapuaga. Fai atu i tagata aoga e vaavaai mo upumoni i le taimi o le lesona i le asō, e mafai ona fesoasoani pe a oo i latou po o i latou e alolofa i ai i mafatiaga.

Faamanatu atu i tagata aoga e faapea, sa ave faapagotaina ia Iosefa Samita ma isi o le usoga e le fitafita a Misuri i Fa Uesi i le aso 31 o Oketopa, 1838. Sa faasavavali atu e le fitafita ia alii mai Fa Uesi e o atu i Initipene, ma sosoo ai ma Richmond, Misuri. I Richmond, na aumai ai Iosefa Samita ma isi usoga i luma o Faamasino Austin A. King, o lē na ofo atu e faasaoloto i latou o e o le a “faafitia la [latou] tapuaiga ma lafoaia le Perofeta” (Justin R. Bray, “Within the Walls of Liberty Jail,” i le Revelations in Context, ed Matthew McBride and James Goldberg [2016], 257, po o le history.ChurchofJesusChrist.org). Sa teena e i latou taitoatasi le ofo. I le taimi o le tolaulauga muamua o le faamasinoga, na filifili ai Faamasino King e taofia Iosefa Samita ma isi o le usoga, o nisi o i latou o taitai o le Ekalesia, o ni pagota a o latou faatalitali i le faamasinoina i tuuaiga o le fouvale. I le aso 1 o Tesema, 1838, na aveina atu ai le Perofeta o Iosefa Samita, Ailama Samita, Caleb Baldwin, Sini Rikitone, Lyman Wight, ma Alexander McRae i le falepuipui i Liperate, Misuri. (Tagai Bray, “Within the Walls of Liberty Jail,” 256–63, po o le history.ChurchofJesusChrist.org.)

Ata
Falepuipui i Liperate

Faaali atu le ata pu’e o loo i le lesona o le Falepuipui i Liperate, na pueina pe a o le fasefulu tausaga talu ona mavae le faafalepuipuiina iina o le Perofeta. Faamalamalama atu, o le vaaiga latalata lea i foliga o le falepuipui i le taimi na faafalepuipuiina ai Iosefa Samita ma isi e toalima o le usoga iina.

Valaaulia se tagata aoga e faitau leotele le saunoaga lea mai ia Elder Jeffrey R. Holland e faatatau i le Falepuipui i Liperate:

Ata
Jeffrey R. Holland

“O le falepuipui, o se tasi o nai fausaga ma e mautinoa lava o se tasi o ia ituaiga fausaga e sili ona taufaafefe i lena itu, sa faapea e le mafai ona sola ese ai se pagota, ma atonu lava sa faapena. E lua ni ona fogafale sa i ai. O le pito i luga po o le fogafale autu sa na’o se faitotoa e tasi e laitiiti ma mamafa, na mafai ona iloa atu ai le lalolagi i fafo. I le ogatotonu o lena fogafale sa i ai se faitotoa e faamau i le fola lea e tuutuu ifo ai pagota i le fogafale pito i lalo po o le ana. O puipui o fafo o le falepuipui sa faia i ni maa’amu talatala e lua futu le mafiafia, ae o puipui o totonu o ni ogalaau aoa e ta’i 12 inisi. O nei puipui e lua sa va i se avanoa e 12 inisi na faatumu i maamaa lusi. A tuufaatasi o nei puipui na faia ai se papuipui matautia, na toeitiiti lava a le mafai ona uia, e fa futu le mafiafia” (Jeffrey R. Holland, “Lessons from Liberty Jail” [faeasaite a le Iunivesite o Polika Iaga, Sete. 7, 2008], 2, speeches.byu.edu).

Ata
ata faataitai o totonu o le Falepuipui i Liperate

Faaali atu le ata o loo i le lesona, ma faamatala atu o le ata lea o se toefauga o totonu o le Falepuipui i Liperate, e aofia ai le vaega o le ana lea sa tuu ai pagota.

Vaevae tagata aoga i ni vaega taitoalua pe taitoatolu, ma tuu atu i ai kopi o le pepa e tufa atu o loo auina faatasi atu ai, “O Tulaga i totonu o le Falepuipui i Liperate.” Valaaulia i latou e faitau le pepa ua tufa atu ma talanoa i a latou vaega a latou tali i le fesili o loo i le pepa ua tufa atu.

O Tulaga i totonu o le Falepuipui i Liperate

Ata
Jeffrey R. Holland

“I lo’u manatu, e oo mai i le maliufasia o [Iosefa Samita] i le lima ma le afa tausaga mulimuli ane, sa leai se isi taimi na sili ona faigata i le soifuaga o Iosefa nai lo o lenei faafalepuipuiina faalealofa, le faatagaina, ma lē ta’uamiotonuina i le Falepuipui i Liperate. …

“O meaai na tuuina atu i pagota sa leaga ma o nisi taimi na faaleagaina, sa matuai eleelea lea sa fai mai se tasi o i latou, ‘e le mafai ona latou aia seiiloga e faamalosia i [latou] e le matelaina’ [Alexander McRae, sii mai i le B. H. Roberts, A Comprehensive History of the Church, 1:521]. E faafa ni taimi sa latou tuuina atu ai ia i latou ni mea oona i a latou meaai, lea sa matuai mama’i tigaina ai i latou, o lea sa faapea ona auauai ai ona latou faasuati ma sa pei na fenumia’i o latou mafaufau, sa matuai le popole ai pe latou te ola pe feoti. I tusi a le Perofeta o Iosefa, sa ia saunoa ai e uiga i le falepuipui o se ‘seoli, na siomia i temoni … lea sa faamalosia ai ona matou le faalogo i se isi lava mea ae na’o upu leaga, ma molimauina se vaaiga o le upu leaga, ma le onānā ma le pepelo, ma le famaliega o tuinanau o soo se ituaiga’ [i le The Joseph Smith Papers, Documents, Volume 6: February 1838–August 1839, ed. Mark Ashurst-McGee and others (2017), 361; ua faalaugatasia le sipelaga ma le faasa’oga].

“… ‘O le peni, po o le laulaufaiva, po o agelu,’ sa tusia ai e Iosefa, e le mafai ona lava faamatalaina ai ‘le lotoleaga o seoli’ sa puapuagatia ai o ia iina [Letter to Emma Smith, 4 April 1839, i le Personal Writings of Joseph Smith, rev. ed., comp. Dean C. Jessee (2002), 463, 464; ua faalaugatasia le sipelaga ma le faamataitusi lapopoaina]. Ma o lenei mea atoa na tupu i le taimi, e pei ona sa ta’ua ai e nisi o tala, o le taumalulu aupito sili lea ona malulu na faamauina i le setete o Misuri” (Jeffrey R. Holland, “Lessons from Liberty Jail” [faeasaite a le Iunivesite o Polika Iaga, Sete. 7, 2008], 1–3, speeches.byu.edu).

“O le fa masina na saisaitia ai i totonu o le Falepuipui i Liperate … na oo ai ni taunuuga ogaoga faaletino i pagota. Sa tau le suluia e le la ia faamalama uamea laiti e lua sa faapea ona maualuluga tele mo le vaai atu ai, ma o itula uumi o le pouliuli na mafua ai ona vaivai le vaai a alii. … E ui ina sa faatagaina se afi laitiiti, ae o le leai o se alā’asu e alu ai le ‘asu, sa faapea ona faateteleina ai le afaina o mata o pagota. Sa tiga o latou mata, sa gatete o latou neura, ma i ai foi se taimi na pau maualalo ai le toto o Ailama Samita. …

“Ae atonu o le mea na sili ona faalotovaivaia ai pagota na totoe, o le manatu lea e faapea, o aiga o le Au Paia o Aso e Gata Ai, e aofia ai ma o latou lava aiga, na taapeape solo, augapiu ma se mea, ma fetulina’i solo i le setete o Misuri” (Justin R. Bray, “Within the Walls of Liberty Jail,” i le Revelations in Context, ed. Matthew McBride and James Goldberg [2016], 259, po o le history.ChurchofJesusChrist.org).

  • Ana e i ai i le Falepuipui i Liperate, mata e te ono aafia faapefea faaletino, faalelagona, ma faaleagaga ona o nei tulaga?

Ata
pepa e tufa atu o Tulaga i totonu o le Falepuipui i Liperate

A ua lava loa se taimi o tagata aoga e toeiloilo ai le pepa ua tufa atu, ia faaali atu le faamatalaga lenei a Elder Jeffrey R. Holland, ma valaaulia se tagata aoga e faitau leotele.

Ata
Jeffrey R. Holland

“O le toatele o i tatou, i le tele o taimi, e talanoa ai i le nofoaga i Liperate o se ‘sela‘ po o se ‘falepuipui‘---ma e moni o le mea lava lena. Peitai, sa saunoa Elder Brigham H. Roberts, i le faamaumauina o le talafaasolopito o le Ekalesia, e uiga i lenei nofoaga o se malumalu, po o le, faaupuga e sili ona sa’o, o se ‘falepuipui-malumalu’ [tagai B. H. Roberts, A Comprehensive History of the Church, chapter 38 heading, 1:521]” (Jeffrey R. Holland, “Lessons from Liberty Jail” [faeasaite a le Iunivesite o Polika Iaga, Sete. 7, 2008], 3, speeches.byu.edu).

  • O le mafaufau atu i mea uma sa oo i ai Iosefa Samita ma isi pagota i le Falepuipui i Liperate, o a ni auala e te manatu, e mafai ona faatusa ai le falepuipui i se malumalu? (O le falepuipui sa o se nofoaga lea sa faalatalata atu ai le Perofeta o Iosefa Samita i le Alii ma maua ai faaaliga.)

Faamalamalama atu e faapea, e lua tusi na faalau atu e le Perofeta o Iosefa Samita i le Au Paia ia Mati 1839, lea na i ai nisi o faaaliga sa ia mauaina. O vaega o nei tusi o loo aofia ai i le Mataupu Faavae ma Feagaiga 121–23.

Valaaulia se tagata aoga e faitau leotele le Mataupu Faavae ma Feagaiga 121:7–9 ona valaaulia lea o se isi tagata aoga e faitau leotele le Mataupu Faavae ma Feagaiga 122:7–9 . Fai atu i le vasega e vaavaai mo le mea na faaali mai e le Alii ia Iosefa Samita e faatatau i puapuaga.

  • O a ni mataupu faavae e mafai ona tatou faailoa mai mai i folafolaga a le Alii ia Iosefa Samita e faatatau i ona puapuaga? (E mafai ona faailoa mai e tagata aoga ni nai mataupu faavae, e aofia ai ma lenei: Afai tatou te talitalia lelei o tatou puapuaga, o mea uma tatou te pagatia ai, o le a tatou maua ai le potomasani ma e mo lo tatou lelei. Tusi le mataupu faavae lenei i luga o le laupapa.)

  • O le a sou manatu i le uiga o le talitalia lelei o o tatou puapuaga?

Faaali atu le saunoaga lenei a Elder Jeffrey R. Holland ma valaaulia se tagata aoga e faitaua leotele. Na faamalamalama mai e Elder Joseph B. Wirthlin o le Korama a Aposetolo e Toasefululua, le ala e mafai ai e puapuaga ona tuuina mai ia i tatou le poto masani ma e mo lo tatou lelei.

Ata
Jeffrey R. Holland

“E mafai ona e maua ni aafiaga paia, faafaaaliga, loloto le aoaoga ma le Alii i soo se tulaga o e i ai. Ioe, sei ou fai atua ma sina malosi teisi atu lena faamatalaga: E mafai ona e maua se aafiaga paia, faafaaaliga, ma loloto le aoaoga faatasi ma le Alii i aafiaga aupito sili ona faanoanoa o lou olaga---i nofoaga sili ona leaga, a o onosaia faamasinoga le sa’o aupito sili ona tiga, a’o feagai ma mea e sili ona matautia le faigata ma le tetee ua e oo i ai.

“… O le mea e gata ai le malosi o le tagata, o le avanoa lena o le Atua, ma afai tatou te lotomaulalo ma faamaoni, afai o le a tatou talitonu ma tatou le fetuuina le Atua ona o o tatou faafitauli, e mafai ona Ia faaliliuina falepuipui le tonu ma leai se alofa ma faalotovaivai o o tatou olaga i ni malumalu---po o se tulaga e mafai ona aumaia ai le mafanafana ma faaaliga, mafutaga paia ma le filemu. …

“… Pe a pagatia, o le mea moni atonu ua tatou latalata atili atu i le Atua nai lo o se isi lava taimi o o tatou olaga atoa. O lena malamalama e mafai ona liliuina tulaga uma faapena ia pei o totonu o se malumalu” (Jeffrey R. Holland, “Lessons from Liberty Jail” [faeasaite a le Iunivesite o Polika Iaga, Sete. 7, 2008], 3–4, 6, speeches.byu.edu).

  • O le a le mea e sili ona taua ia te oe i lenei saunoaga a Elder Holland?

  • E fesoasoani faapefea le filifili ia lotomaualalo, faamaoni ma talitonu, i le tapenaina o o tatou loto ia maua faaaliga mai le Alii e tusa lava po o a o tatou tulaga?

  • O le a se taimi na e lagonaina ai o se puapuaga faapitoa ua tuuina atu ai ia te oe le poto masani aoga ma sa mo lou lelei? (Faamanatu i tagata aoga e aua le faasoaina mai soo se mea e paia na’uā pe patino tele.) Atonu e te manao foi e faasoa atu se aafiaga.)

Fai atu i tagata aoga e mafaufau e uiga i se puapuaga atonu o loo latou feagai. A ua lava loa le taimi, valaaulia i latou e tusi se fuafuaga e faamatala ai po o le a se mea o le a latou faia e talitalia lelei ai lena puapuaga.

Faamalamalama atu e faapea, ia Aperila 1839, a o faafeao atu i le Itumalo o Boone, Misuri, sa faapea ona faatagaina ai Iosefa Samita ma ana soa e sosola. Sa latou agai atu i Quincy, Ilinoi, lea sa latou toe faatasi ai ma o latou aiga.

Ua toe malaga atu Aposetolo i Fa Uesi e faataunuu le poloaiga a le Alii

Fai atu i tagata aoga e su’e le mataupu e 33 o le Au Paia: Voluma 1. Valaaulia ni nai tagata aoga e auauai e faitau leotele mai le itulau e 386, e amata atu i le parakalafa o loo amata i le, “A o tauivi Iosefa …” ae faaiu i le parakalafa o loo i le itulau 387 o loo amata i le “Sa manao o ia i aposetolo i Quincy …”

  • Afai e te filifili pe e te toe foi i Fa Uesi pe leai, o le a sou manatu, o le a se mea o le a e filifili e fai? Aisea?

Valaaulia se tagata aoga e faitau leotele le saunoaga lenei mai ia Peresitene Uilifoti Uitilafi (1807–98). Fai atu i le vasega e faalogologo mo auala na tali atu ai Aposetolo i le poloaiga a le Alii:

Ata
Uilifoti Uitilafi

“O Aposetolo e Toasefululua sa valaauina e ala i le faaaliga e o atu i Fa Uesi … e faataatia le faavae o le maatulimanu o le Malumalu. … Sa tauto tagata Misuri i le faavavau atoa o le Atua e faapea, afai na faataunuuina uma isi faaaliga na ala mai ia Iosefa Samita, e le tatau la ona faataunuuina lena faaaliga. … O le lagona atoa i le Ekalesia, e tusa ai ma lo’u iloa, o le, i lalo o tulaga [na i ai i lena taimi], sa le mafai ona ausia le galuega, ma o le a talia e le Alii le loto i ai i le galuega. … Ina ua fai atu e Peresitene Iaga le fesili i le Toasefululua, ‘Uso e, o le a se mea o le a outou faia e uiga i lenei mea?’ O le tali o le: ‘Ua fetalai le Alii ma e tatau ona tatou usitai.’ Sa matou lagonaina na tuuina mai e le Alii le Atua … le poloaiga, ma sa i ai lo matou faatuatua e agai ai i luma ma faataunuu ai, ma sa [matou] lagonaina, e pule lava o Ia pe matou te ola pe oti i lona faataunuuga” (Wilford Woodruff, “Discourse,” Deseret News, Dec. 22, 1869, 543).

  • O a ni mataupu faavae e mafai ona tatou aoaoina mai i le faataitaiga a nei Aposetolo? (E mafai ona faailoa mai e tagata aoga ni mataupu faavae, e aofia ai ma lenei: E mafai ona tatou filifili e usitai i poloaiga a le Alii e tusa lava po o a tulaga [o tatou i ai]. Pe a tuu lo tatou faatuatuaga i le Alii, e mafai ona tatou ausia mea ua Ia poloai mai ai.)

Faamalamalama atu e faapea, i le taeao po lava o le aso na tuupoina o le aso 26 o Aperila, 1839, sa savavali atu ai Polika Iaga ma isi Aposetolo e toafa, na latou o faatasi ma isi tagata o le Ekalesia, i le tulaga o le malumalu i Fa Uesi. Sa faataavale atu e Alpheus Cutler, o le na faapea e avea ma taitai o le au faigaluega o le malumalu, se alā telē i le tulimanu i sautesasae o le fanua o le malumalu. Sa usuina e le vaega toaitiiti ia viiga ma tatalo. Ma le isi, sa faauuina ai Uilifoti Uitilafi ma Siaosi A. Samita o ni Aposetolo e faatumu ai avanoa i le Korama a le Toasefululua. A o sauni le vaega toaitiiti o le Au Paia e tuua Fa Uesi, sa afe Theodore Turley i le fale o lana uo ua leva o Isaac Russell, o le na liliuese mai le Ekalesia ma nofo ai pea i Fa Uesi. Sa te’i Isaako i le i ai o Theodore i Fa Uesi faatasi ma sui o le Toasefululua, ma le faataunuuina o le valoaga a le Alii na tuuina mai e le Alii e ala mai ia Iosefa Samita (tagai Manuscript History of the Church, vol. C-1, addenda, 26 April 1839, second of two entries, p. 14).

Faaiu i le molimau atu e uiga i upumoni sa outou talanoaina i le lesona lenei, ma uunai tagata aoga e galulue i na upumoni.

Valaaulia tagata aoga e sauni mo le isi vasega i le faitauina o mataupu e 34–35 o le Au Paia: Voluma 1.

Ata
pepa e tufa atu O Tulaga i totonu o le Falepuipui i Liperate