Lesona 25

Ua Faaee e Iosefa Samita Ki o le Malo i luga o Uso o le Toasefululua ma Tuuina atu le Lauga Ia King Follett

Faatomuaga ma le Faasologa o Taimi

Ia Ianuari 1844, na faailoa ai e Iosefa Samita o ia o se sui palota mo le tofi peresitene o le Iunaite Setete. Ia Mati 1844, na faatulaga ai e Iosefa le Aufono a le Toalimagafulu, o se faalapotopotoga na faavae e fesoasoani i le “faatuina o le malo o le Alii i luga o le fogaeleele” (Au Paia: O le Tala o le Ekalesia a Iesu Keriso i Aso e Gata Ai, Voluma 1, O le Tagavai o le Upumoni, 1815–1846 [2018], 518). Sa feiloai soo le aufono e taulima fuafuaga palota a le Perofeta mo le tofi Peresitene ma saili isi nofoaga mo le Au Paia. Faapea foi i le tautotogo o le 1844, na feiloai ai Iosefa ma le toaiva o Aposetolo e Toasefululua ma faamauina, pe faaee atu i ai, i luga o i latou ki uma o le perisitua e moomia e faaauau ai le galuega a le Alii. I le lauga mulimuli a le Perofeta i le konafesi aoao, ua faaigoa o le lauga ia King Follett, na ia aoao atu ai e uiga i le gafatia e le tagata ona avea faapei o le Atua.

Ianuari 29, 1844Ia Ianuari na faailoa ai e Iosefa Samita o ia o se sui palota mo le peresitene o le Iunaite Setete o Amerika.

Mati 11, 1844 Na faatulaga ai e Iosefa Samita le Aufono a le Toalimagafulu.

Tautotogo 1844Sa faaee atu e Iosefa Samita ki o le malo o le Atua i luga o uso o le Korama a le Au Aposetolo e Toasefululua.

Aperila 7, 1844Ua tuuina atu e Iosefa Samita le lauga ia King Follett.

Faitauga a Tagata Aoga

Au Paia: O le Tala o le Ekalesia a Iesu Keriso i Aso e Gata Ai, Voluma 1, O le Tagavai o le Upumoni, 1815–1846 (2018), mataupu 42–43

Fautuaga mo le Aoaoina Atu

Vaai atu i au tagata aoga o tagata e mafai ona avea ai i latou

O Peresitene Thomas S. Monson (1927–2018) na aoao mai: “O loo ia i tatou le tiutetauave e vaai atu ai i tagata, e le o le tagata o loo latou i ai ae o tagata e mafai ona avea ai i latou” (“Vaai Atu i Isi i Tagata e Mafai ona Avea ai i Latou,” Ensign po o le Liahona, Nov. 2012, 70). Tatalo ia mafai na e vaai atu i au tagata aoga faapei na vaai atu Tamā Faalelagi ia i latou. O se faiaoga o sē e tauivi e vaai atu i tagata aoga taitasi e ala i fofoga o Tamā Faalelagi o le a sili atu ona mafai ona malamalama i le taua o tagata aoga taitoatasi ma lagona le alofa ma le manatu popole o Tamā Faalelagi mo Ana fanau taitoatasi.

Ua avea Iosefa Samita ma se sui tauva i le tofi peresitene o le Iunaite Setete

Pepa faalauiloa mo le tamoega faaperesitene a Iosefa Samita

Faaali atu le ata o loo i ai i le lesona, ma faamalamalama atu o le ata lenei o se pepa faailo sa lomia i le nusipepa a le Ekalesia i Niu Ioka i le 1844 e faailoa ai le lagolago mo le avea ai o Iosefa Samita ma sui tauva mo le peresitene o le Iunaite Setete o Amerika.

• E faavae i lou faitauga o le Au Paia: Voluma 1, o a nisi o mea taua na tutupu na fesoasoani ai i le faaiuga a Iosefa Samita e alu o se sui tauva mo le peresitene o le Iunaite Setete?

Afai e manaomia, faamanatu i tagata aoga e faapea ia Novema ma Tesema 1939, na feiloai ai Iosefa Samita ma Elias Higbee faatasi ma taitai o le malo o le Iunaite Setete, e aofia ai ma Peresitene Martin Van Buren, e saili se fesoasoani mo sauaga ma mea faaleagaina a le Au Paia sa tupu mai i Misuri. Na ta’u atu i ai e le Peresitene: “Ou te le mafai ona faia se mea mo outou, alii. A ou faia, ua ou faasagatau i le setete atoa o Misuri, ma o le a tetee mai ia te a’u lena setete i le isi faigapalota” (i le The Joseph Smith Papers, Documents, Voluma 7: Setema 1839–Ianuari 1841, ed. Matthew C. Godfrey ma isi [2018], 260). Ia Novema, 1843, o se tausaga a o lumanai le palota faaleperesitene, na tusi atu ai Iosefa Samita i sui tauva o le palota faaleperesitene e toalima, “ma le faamoemoe e iloaina pe latou te lagolagoina taumafaiga a le Au Paia ia toe maua a latou mea na leiloloa i Misuri” (Au Paia: Voluma 1, 513). E toatolu sui tauva na tali mai, a e leai ma se tasi na folafola mai e fesoasoani i le Au Paia.

Valaaulia se tagata aoga e faitau leotele le faamatalaga lenei mai i le Perofeta o Iosefa Samita (1805-44). Fai atu i le vasega e faalogo po o le a le mea na saunoa mai ai Iosefa Samita e faatatau i lana faaiuga e avea ma se sui tauva mo le tofi peresitene.

Iosefa Samita

“Semanū ou te lē tuuina atu lava lo’u igoa e faaaoga e a’u uo i luga o se taumafaiga e avea o se peresitene o le Iunaite Setete po o se sui tauva mo lena tofi pe ana i ai ia te a’u ma a’u uo le avanoa e fiafia ai i a matou aia tatau faaletapuaiga ma faalelotoifale i le avea ai ma tagatanuu o Amerika, e o’o lava i nā aia tatau ia o loo puipuia i lalo o le Faavae mo ona tagatanuu uma. A e o lenei mea ua lē faia lava mo i matou o se nuu mai le amataga. O sauaga ua faasagatonu mai ia i tatou mai lea taimi i lea taimi mai vaega o le Iunaite Setete e pei o le pa leotele mai faalausosoo o faititili, ona o la tatou ekalesia, ma e leai lava se vaega o le malo e oo mai lava i le taimi lenei ua tulai mai mo so tatou toomaga, ma o se taunuuga, ua ou lagona ai o la’u aia ma le avanoa ia maua pe o le a lava le uunaiga po o le malosiaga ou te mafaia faaletulafono i le Iunaite Setete mo le puipuiga o e ua aafia fua ae e lē sala” (i le The Words of Joseph Smith, tuufaatasia ma teuteuina e Andrew F. Ehat ma Lyndon W. Cook [1991], 320: sipelaga, mataitusi tetele, ma faailoga ua laugatasia; tagai foi i le Manuscript History of the Church vol. E-1, p. 1886, josephsmithpapers.org).

• E mafai faapefea ona fesoasoani lenei saunoaga ia i tatou ina ia malamalama lelei i mafuaaga a Iosefa Samita na avea ai ma se sui tauava mo le tofi peresitene?

Faamalamalama atu faapea i aso nei ua faaaoga e le Ekalesia faaupuga o le saolotoga faaletapuaiga po o le saolotoga faalelotu e faatatau i le “aia tatau e ‘faatino’ ai po o le ola ai le tagata i lana tapuaiga e aunoa ma le faalavelavea mai e le malo po o isi, vagana ai pe a manaomia ina ia puipuia le soifua maloloina ma le saogalemu” (O le a le uiga ia i tatou pe a tatou talanoa e uiga i le saolotoga faaletapuaiga?” Tali i Fesili Masani, religiousfreedom.ChurchofJesusChrist.org). Pe a ma le ono masina a o le’i avea Iosefa Samita ma se sui tauva mo le tofi peresitene, na ia tuuina atu ai se lauga i Navu lea na faailoa ai ona lagona e uiga i le saolotoga tautapuaiga. Valaaulia se tagata aoga e faitau leotele le faamatalaga lenei mai i le Perofeta o Iosefa Samita mai lena lauga.

Iosefa Samita

“Afai ua faaalia na ou naunau ou te oti mo se ‘Mamona,’ ou te toa e folafola atu i luma o le Lagi ua tutusa lava ma lo’u saunia ou te oti i le puipuia o aia tatau a se Peresipetiriane, o se Papatiso, po o se tagata lelei o soo se ituaiga lotu; mo le mataupu faavae lava e tasi lea e solia ai aia tatau a le Au Paia o Aso e Gata Ai lea foi e solia ai aia tatau a le Katoliko Roma, po o soo se isi lava ekalesia o e atonu e le ta’uta’ua pe e vaivai tele foi e puipuia i latou lava.

“O le alofa o le saolotoga lea e musuia lo’u agaga—o saolotoga faaletagata ma le faalelotu o tagata uma lava” (Aoaoga a Peresitene o le Ekalesia: Iosefa Samita [2007], 345).

• O le a se mea o tulaga ese mai ia te oe i lenei fuaiupu?

• O le a se mataupu faavae e mafai ona tatou aoaoa mai i le faataitaiga ma aoaoga a le Perofeta e faatatau i le saolotoga faalelotu? (A uma ona tali mai tagata aoga, tusi le mataupu faavae lea i luga o le laupapa: O le alofa o le saolotoga e mafai ona musuia i tatou e fesoasoani e puipuia saolotoga faaletagata ma saolotoga faaletapuaiga a tagata uma.)

• Aisea e te manatu ai e taua mo i tatou le fesoasoani e puipuia saolotoga faaletagata ma saolotoga faalelotu a tagata uma?

Faamalamalama atu faapea ia Mati 11, 1844, na faatulaga ai e Iosefa Samita se vaega o alii e fesoasoani e vaavaaia le atinaeina o le malo o le Atua i luga o le fogaeleele ma le puipuiga o le Au Paia ma o latou saolotoga faalelotu. O lenei vaega sa faaigoaina o le Aufono a le Toalimagafulu. Sa latou feiloai so’o i lena tautotogo e fesoasoani e faatautaia le faiga palota a le Perofeta mo le tofi Peresitene ma talanoaina taumafaiga e saili se isi nofoaga e aumau ai le Au Paia ma tapuai ai e aunoa ma sauaga mai isi. Ia Aperila 1844, na valaauina ai faifeautalai, e aofia ai uso o le Korama a le Toasefululua, e talai le talalelei ma fausia i le Iunaite Setete atoa le lagolago mo taumafaiga a Iosefa Samita o le sui tauva mo le tofi o le peresitene. Ae latou te le’i malaga mo a latou misiona, sa feiloai so’o Aposetolo ma le Perofeta.

Sa faaee atu e Iosefa Samita ki o le malo o le Atua i luga o uso o le Korama a Aposetolo e Toasefululua

O loo aoao e Iosefa Samita uso o le Toasefululua.

Faaali atu le ata o loo feiloai ai Iosefa Samita ma uso o le Korama a Aposetolo e Toasefululua i Navu. Faamalamalama atu e faapea i le tautotogo o le 1844, na feiloai ai le Perofeta ma uso e toaiva o le korama ma tuu atu ia i latou se tiutetauave faapitoa. (E toatolu Aposetolo o e e lei i ai atonu sa itiiti lo latou faatuatua i lena taimi; o i latou taitoatasi na liliuese i nai tausaga na sosoo ai.) (Tagai i le Alexander L. Baugh and Richard Neitzel Holzapfel, “‘I Roll the Burthen and Responsibility of Leading This Church Off from My Shoulders on to Yours’: The 1844/1845 Declaration of the Quorum of the Twelve Regarding Apostolic Succession,” BYU Studies, vol. 49, nu. 3 [2010], 13–14.)

Vaevae le vasega i ni vaega laiti, ma tuu atu i tagata aoga taitasi se kopi o le pepa tufa, “Ua Tuu Atu e Iosefa Samita le Tiutetauave i le Korama a Aposetolo e Toasefululua e Faaauau le Galuega o le Malo.” Fai atu i tagata aoga e faitau faatasi ma talanoaina a latou tali i fesili o loo i luga o le pepa tufa.

Ua Faatonuina e Iosefa Samita le Korama a Aposetolo e Toasefululua e Faaauau le Galuega o le Malo.

Na faamaumauina e Peresitene Uilifoti Uitilafi (1807–98) le tala lea o loo faamatalaina ai le fonotaga na faia e le Perofeta o Iosefa Samita ma Aposetolo i le tautotogo o le 1844:

Uilifoti Uitilafi

“Sa valaauina faatasi ai e Iosefa, le Perofeta a le Atua, ia le Au Aposetolo e Toasefululua … ma faaaluina aso e tele faatasi ma i matou i le tuuina mai ia i matou o o matou faaeega paia, ma le aoaoina mai o i matou i na aoaoga faavae mamalu ia sa faaalia mai e le Atua ia te ia. Ma i se tasi o na taimi sa ia tu ai i ona aao i le lotolotoi o i matou e toeitiiti atoa le tolu itula, e folafola mai ia i matou le tisipenisione faaiu ma le maoae lea sa tuuina i ai e le Atua Lona aao ina ia faatinoina i luga o le fogaeleele i nei aso mulimuli. Ua faatumulia le potu e pei o se afi mumu; sa faaofuina le Perofeta i le mana tele o le Atua, ma sa susulu ona foliga ma matua manino lava, ma sa ia faaiuina lena tautalaga, e le mafai-ona-galo i taimi uma ma le faavavau, i le gagana lenei:

“Uso e, ua ia te a’u se ootiaga loloto i lo’u loto ona o lo’u popole ina nei aveesea atu a’u ma le lalolagi faatasi ma ki o le malo o le Atua o loo ia te a’u, e aunoa ma le faamauina i luga o ulu o isi taitai. Sa faamauina e le Atua i luga o lo’u ulu ki uma o le malo o le Atua e manaomia mo le faatulagaina ma le fausiaina o le Ekalesia, o Siona , ma le malo o le Atua i luga o le fogaeleele, ma ia saunia ai le Au Paia mo le toe afio mai o le Atalii o le Tagata. O lenei uso e, ou te faafetai i le Atua ua ou ola ou te vaai i le aso ua mafai ai ona ou tuuina atu ia te outou faaeega paia, ma o lenei ua ou faamaufaailogaina i luga o o outou ulu ia mana uma o le perisitua Arona ma Mekisateko ma le galuega faaaposetolo, faatasi ma ki ma mana uma o iai, ia sa faamaufaailogaina e le Atua i o’u luga; ma o lenei ou te faataavaleina ese atu le galuega, le avega ma le tausiga o lenei Ekalesia ma le malo o le Atua i luga o o outou tauau, ma ou te poloaiina nei outou i le suafa o le Alii o Iesu Keriso ina ia tuufaatasi o outou tauau, ma tauaveina lenei Ekalesia ma le malo o le Atua i luma o le lagi ma le lalolagi, ma luma o le Atua, agelu ma tagata’” (Aoaoga a Peresitene o le Ekalesia: Uilifoti Uitilafi [2004], 20–21).

• O le a se mea o tulaga ese mai ia te oe i nei fuaiupu?

• Aisea na tatau ai mo Aposetolo ona umia ki o le malo o le Atua?

Pepa tufa: Ua Tuuina Atu e Iosefa Samita le Tiutetauave i le Korama a Aposetolo e Toasefululua e Faaauau le Galuega o le Malo.

A ua lava loa se taimi, fai atu i tagata aoga e otooto mai upu moni e mafai ona tatou aoaoina mai i le tala a Peresitene Uilifoti Uitilafi. E mafai e tagata aoga ona faailoa mai ni upu moni e aofia ai lenei: Sa faaee atu e Iosefa Samita ki o le malo o le Atua i luga o uso o le Korama a le Au Aposetolo e Toasefululua.

• Faamata e aisea na ono lagona ai e le Perofeta o Iosefa Samita le tatau ona natinati le faaee atu o ki o le malo o le Atua i luga o Aposetolo? (O ki e manaomia e taitai ai le galuega a le Atua i le lalolagi, ma sa atugalu Iosefa ina nei mea ane ua leiloa ki pe afai e maliu o ia e aunoa ma le faaee atu o ki i isi.)

• O le a le aafiaga o lenei faatulagaga i le Ekalesia i nei aso? (Pe a tatau ai, fesoasoani i tagata aoga ia malamalama o nei ki o loo faaaogaina i aso nei i lalo o le taitaiga a le Peresitene o le Ekalesia e uso o le Au Peresitene Sili ma le Korama a Aposetolo e Toasefululua e pulea ma taitaia ai le Ekalesia ma faatagaina ai le faia o sauniga o le perisitua ia e tatau mo lo tatou faaolataga ma le olataga.)

Faamatala atu e faapea i le 1844 na feagai ai Iosefa Samita ma le faatupulaia o le tetee—e aofia ai mai nisi o tagata o le Ekalesia.

• E faavae i lau faitauga o le mataupu 42 o le Au Paia: Voluma 1,, aisea ia William Law, le fesoasoani o Iosefa Samita i le Au Peresitene Sili, ona amata ona ia tetee i le Perofeta? (Ina ua talosaga William Law e faamau o ia i lona toalua, o Jane, na faaali e le Alii ia Iosefa Samita e le mafai e William ona maua le sauniga i le taimi lea ona o loo aafia o ia i le mulilua. Sa to’atama’i William ma sa amata ona ia fono faalilolilo ma isi tagata tetee ma taupulepule faasagatau i le soifua o le Perofeta. [Tagai i le Au Paia: Voluma 1 511 -12.])

• O le a le fesoasoani na tuuina atu e alii talavou e toalua e igoa ia Denison Harris ma Robert Scott i le Perofeta o Iosefa i lea taimi? (Na la auai i fonotaga faalilolilo a William Law ma ripoti atu faamatalaga fesoasoani i le Perofeta [tagai i le Au Paia: Voluma 1 522].)

Ua tuuina atu e Iosefa Samita le lauga ia King Follett

Faamalamalama atu faapea e ui lava o se vaega toaitiiti o tagata o le Ekalesia na tetee ia Iosefa Samita ma faapea mai o ia o se perofeta pa’ū, ae o le toatele lava o tagata o le Ekalesia na faaauau pea ona lagolagoina o ia. Ia Aperila 7, 1844, na tuuina atu ai e Iosefa Samita se lauga i le Konafesi aoao i Navu. I le amataga o lana lauga, na ta’ua ai e le Perofeta ia se tagata o le Ekalesia o King Follett, o lē na maliu i ni nai vaiaso na muamua atu. O le taunuuga,o lenei lauga ua tele ina ta’ua o le lauga ia King Follett.

Ia ‘alo’ese mai taumatematega

E ui lava na faaalia e le Alii le tele o upu moni mamalu i le Perofeta o Iosefa Samita, o loo tele pea mea e tatou te lē malamalama atoatoa i ai. E tatau ona tatou ‘alo’ese mai taumatematega e uiga i faamatalaga auiliili e le’i faaalia mai e le Alii pe e lē o lagolagoina e punavai faatuatuaina.

Faaali atu vaega nei o aoaoga a le Perofeta o Iosefa Samita mai le lauga ia King Follett. Valaaulia ni nai tamaiti aoga e feauauai e faitau leotele palakalafa nei. Fai i le vasega ia mulimuli i le faitauga, ma vaavaai mo upumoni na aoao mai e Iosefa Samita.

Iosefa Samita

“E matua toaitiiti lava ni tagata i le lalolagi o e malamalama tonu i uiga o le Atua. O le toatele o tagata e le mamalama lava i se mea e tasi … e tusa ai ma la latou faia ma le Atua. Latou te le iloa, latou te le malamalama foi i le natura o lena faia. …

“O le Atua lava Ia na avea o ia e pei o i tatou nei, ma o se tagata faaeaina, ma o loo nofotupu o ia i le lagi! O le mealilo sili lea. Afai e tatalaina le veli i le aso, ma faailoa mai e le Atua Ia lava, o le Atua silisili o le o loo taofia le lalolagi i lona taamilosaga, ma o le o loo faatumauina lalolagi uma ma mea uma e ala i Lona mana,—ou te faapea atu, afai e mafai ona e vaai ia te Ia i le aso, o le a e vaai ia te Ia e foliga i se tagata—e pei o oe lava i le tino, foliga, ma le fausaga o se tagata lava. …

“…O le i ai o se malamalama o le Atua e amata ai ona tatou iloa le ala tatou te o atu ai ia te Ia, ma le ala e aioi atu ai ina ia maua se tali. “Pe a tatou malamalama i le uiga o le Atua, ma iloa le auala e o atu ai ia te Ia, e amata ona Ia tatala mai le lagi ia i tatou, ma ta’u mai ia i tatou mea uma e faatatau i ai. Pe a tatou saunia e o mai ia te Ia, ua Ia saunia foi e afio mai ia i tatou. …

“O iinei, la, le ola e faavavau—ia iloa le Atua poto ma le moni; ma ia e iloa ona aoao e avea oe lava ma atua, ma avea ma tupu ma faitaulaga i le Atua, … e ala i le amata mai i se tulaga laitiiti i le isi, ma amata mai i se vaega laitiiti i se vaega tele, mai lea alofa tunoa i lea alofa tunoa, mai lea faaeaina i lea faaeaina, seia e maua le toe tu mai le oti, ma mafai ona nofo i le afi mu tele faavavau, ma nofo i le mamalu, e pei o i latou o loo nonofo faapaleina i le mana e faavavau” (Aoaoga a Peresitene o le Ekalesia: Iosefa Samita, [2007], 39–41, 221).

• O a ni upumoni e mafai ona tatou aoao mai i nei aoaoga? (Atonu e faailoa mai e tagata aoga nisi o upumoni, e aofia ai ma lenei: O Tamā Faalelagi o se tagata faaeaina ma e pei o i tatou i foliga ma le fausaga. I le alualu ai i luma mai lea tama’i tikeri i se isi e i’u lava ina mafai ai ona avea i tatou faapei o le Atua.)

Faamamafa atu faapea e le mafai ona avea i tatou faapei o le Atua ala i le na’o a tatou lava taumafaiga. Nai lo lena, e tatau ona tatou “o mai ia Keriso, ma ia faaatoatoaina ia te ia” (Moronae 10:32; tagai foi i le MF&F 76:69; Mose 6:57).

• Aisea e te manatu ai e taua le iloa o lo tatou Tamā Faalelagi o se tagata faaeaina pe faaatoatoaina ma e faapei o i tatou i foliga ma le fausaga?

• E mafai faapefea e le iloa e mafai ona tatou alualu i luma mai lea tama’i tikeri i se isi ma i’u lava ina mafai ona avea ai i tatou faapei o le Atua ona aafia ai filifiliga tatou te faia?

• O a nisi o auala e fesoasoani ai le talalelei a Iesu Keriso ia i tatou ia alualu i luma mai lea tama’t tikeri i se isi? (Lisi i luga o le laupapa ia tali a tagata aoga. Atonu e ono ta’ua e tagata aoga e faapea o le talalelei a Iesu Keriso e mafai ai ona tatou faatoilaloina o tatou vaivaiga ma agasala a o tatou faaaogaina le faatuatua ia Iesu Keriso ma ole atu mo Lana fesoasoani, salamo ia tatou agasala, ma usitai i Ana Poloaiga.)

• O anafea na e lagona ai le fesoasoani a Tamā Faalelagi ia te oe ia alualu i luma mai lea tama’i tikeri i se isi ina ia avea atili teisi e pei o Ia?

Molimau atu e ala i le alualu i luma mai lea tama’i tikeri i se isi o le a mafai ai i se taimi mulimuli ane ona avea e pei o le Atua. Valaaulia tagata aoga ia galueaiina upumoni ua outou talanoaina i le filifilia lea o se auala e tasi o le a latou saili atu ai ia avea atili faapei o Tamā Faalelagi ma tusia se fuafuaga e faataatia manino atu ai pe faapefea ona latou faia o lena.

Valaaulia tagata aoga e sauni mo le isi vasega e sosoo ai i le faitau o le mataupu 44 o le Au Paia: Voluma 1.

Pepa e Tufa Atu: Sa Faatonuina e Iosefa Samita le Korama a Aposetolo e Toasefululua e Faaauau le Galuega o le Malo