Lesona 18: O Le Faate’aesega o le Au Paia mai Misuri
“Lesona 18: O Le Faate’aesega o le Au Paia mai Misuri,” Talafaasolopito o le Au Paia o Aso e Gata Ai: 1815–1846 Anomea a le Faiaoga (2018)
“Lesona 18,” Talafaasolopito o le Au Paia o Aso e Gata Ai: 1815–1846 Anomea a le Faiaoga
Lesona 18
O Le Faate’aesega o le Au Paia mai Misuri
Faatomuaga ma le Faasologa o Taimi
I le aso 1 o Tesema, 1838, sa siitia atu ai le Perofeta o Iosefa Samita, Ailama Samita, Sini Rikitone, Lyman Wight, Alexander McRae, ma Caleb Baldwin i le falepuipui o le Itumalo o Kalei, lea na ta’ua mulimuli ane o le Falepuipui o Liperate, i Liperate, Misuri, a o faatalitali ai le tulai i le faamasinoga mo tuuaiga pepelo o le fouvale. Ae o le taimi lea, o loo matuai tigaina ai le Au Paia i Misuri i matu i puapuaga o se taunuuga o sauaga. E ui ina sa ta’u atu i le Au Paia e mafai ona latou nonofo ai pea i Misuri seia oo i le tautotogo, ae sa faamalosia e vaega faatupu vevesi i le lotoifale le toatele o le Au Paia ia oo atu ia Fepuari 1839 ua o ese ma le setete. O le i ai o Iosefa Samita ma isi sui o le Au Peresitene Sili i le falepuipui ma le leai o se nofoaga ua ioeina e siitia atu i ai, na faaalu ai e le Au Paia faaaunuua le taimi na totoe o le taumalulu ma le amataga o le tautotogo e taape ai i luga a’e o le Vaitafe o le Misisipi i Aioua ma Ilinoi. O le toatele na maua ni sulufaiga le tumau i Quincy, Ilinoi, ina ua taliaina i latou ma le agalelei e tagatanuu i le lotoifale.
1 Tesema, 1838Sa faafalepuipuiina ai Iosefa Samita ma isi taitai e toalima o le Ekalesia i le Falepuipui o Liperate.
16 Ianuari, 1839I se tusi mai le Falepuipui i Liperate, na tofia ai e le Au Peresitene Sili le Korama a Aposetolo e Toasefululua e pulea mo se taimi le tumau ia mataupu a le Ekalesia.
26 Ianuari, 1839Sa faatulagaina ai se komiti a le Ekalesia e fesoasoani i e matitiva e o ese mai Misuri.
Fepuari 1839Na amata ai e le toatele o le Au Paia ona o ese mai Misuri.
27 Fepuari, 1839Na pasia ai e se komiti o tagatanuu o Quincy, Ilinoi, se vaifofo e tuuina atu ai le fesoasoani ma ni galuega i le Au Paia.
Faitauga a le Tagata Aoga
Au Paia: O Le Tala o le Ekalesia a Iesu Keriso o le Au Paia i Aso e Gata Ai, Voluma 1, O Le Tagavai o le Upumoni, 1815–1846 (2018), mataupu e 32
Fautuaga mo le Aoaoina Atu
Ua faamalosia le Au Paia i Misuri e o ese
Faaali atu le faafanua o loo i le lesona ,“O Eria o Misuri, Ilinoi, ma Aioua o le Iunaite Setete,” ma valaaulia tagata aoga e su’e ia Fa Uesi, i Misuri. Faamanatu atu i tagata aoga le faatonuga o le faate’aesega na tuuina mai e le kovana o Misuri o Lilburn W. Boggs i le aso 27 o Oketopa, 1838, lea na oo ai i na osofaia ma vete ai e vaega faatupu vevesi ia Fa Uesi ma isi nuu o Mamona i Misuri i matu. Ia faamanatu atu foi i tagata aoga, i le taimi lea, na pueina ai ma faafalepuipuiina ia le Perofeta o Iosefa Samita, ona fesoasoan i le Au Peresitene Sili, ma isi taitai o le Ekalesia, i Richmond ma Liperate, Misuri.
E faavae i lau faitauga o le mataupu e 32 o le Au Paia: Voluma 1, o a nisi o luitau patino na feagai ma le Au Paia i Misuri i matu ina ua uma ona faate’aina i latou mai o latou fale? (Sa le’i iloa e le Au Paia po o fea a o i ai, sa le lava a latou meaai ma sapalai, ae o ni isi sa faamanualiaina i le taimi o fetauiga ma fitafita a Misuri po o osofaiga a vaega faatupu vevesi.)
Ana faapea sa e i ai faatasi ma le Au Paia o e sa faamalosia le sosola ese ma Misuri i lena taimi, o a ni ou mafaufauga po o ni lagona e ono i ai ia te oe? Aisea?
A o feoma’i le Perofeta o Iosefa Samita i le Falepuipui i Liperate, o ai sa ia tofia e taitaia le aveeseina mai o le Au Paia mai Misuri? (O le Korama a Aposetolo e Toasefululua, ma Polika Iaga le peresitene.)
Fai atu i tagata aoga e su’e i le mataupu e 32 o le Au Paia: Voluma 1. Valaaulia ni nai tagata aoga e auauai e faitau leotele mai le itulau e 376, e amata atu i le parakalafa o loo amata i le, “Ua uma ona lesitala e Polika …” ae faaiu i le parakalafa i le itulau e 377 o loo amata i le “O le malaga tele e o ese ma Misuri …” Fai atu i le vasega e mulimuli ai, ma vaavaai mo le mea na apoapoai atu Polika Iaga i le Au Paia e fai a o latou tapena e o ese ma Misuri.
E faavae i le fautuaga a Polika Iaga, o le a le mataupu faavae e mafai ona tatou aoaoina e uiga i le tiutetauave ua ia i tatou i le avea ai o ni soo o Iesu Keriso? (E tatau ona faailoa mai e tagata aoga se mataupu faavae e tali tutusa ma lenei: I le avea ai o ni soo o Iesu Keriso, ua ia i tatou se tiutetauave ia fesoasoani atu i e matitiva ma lē tagolima.) Tusi lenei mataupu faavae i le laupapa.
O a nisi o auala e mafai ona faataunuu ai lo tatou tiutetauave o le fesoasoani i e matitiva ma lē tagolima i aso nei?
Faaali atu le ata o loo i le lesona, ma faamatala atu o le ata lea o Amanda Samita, o se tasi o le faitau afe o le Au Paia o e sa faamalosia le sosola ese mai Misuri.
Aisea na faapitoa ai le faigata ia Amanda Samita ma lona aiga ona usitaia le o ese uma e tusa ai ma le avea’i a le faatonuga o le faate’aeseina. (Afai e manaomia, faamanatu i tagata aoga, na fasiotia le toalua o Amanda ma se tasi o ona atalii i le fasiotiga tagata i le Vili Falaoamata a Hawn. E ala i le taitaiga faaleagaga faavavega, sa taitaia ai o ia ia iloa le ala e toe manuia ai lana tama tama e ono tausaga le matua, o Alema, lea na fana lona suilapalapa. Sa faatalitali lava o ia seia manuia le suilapalapa o Alema, ae ua amata ona o ese ma Misuri ia isi tagata o le Au Paia.)
Valaaulia se tagata aoga e faitau leotele le tala lenei a Amanda Samita: Fai atu i le vasega e faalogologo mo le auala na faaali ai e Amanfa le faatuatua ao nofo ai pea i le Vili Falaoamata a Hawn, e faatalitali ai seia manuia lelei Alema ona o ese lea.
Ata
Amanda Samita
“E le mafai ona ou tuua le tala pagatia e aunoa ma le faamatalaina atu o nisi o mea na tutupu i na vaiaso e lima a o avea a’u ma se pagota faatasi ma si a’u tama manu’a i Misuri, e latalata ane i le vaaiga o le fasiotiga faalealofa o tagata, e le mafai ona usitai i le faatonuga o le faate’aesega,
“O Mamona uma i nuu tuaoi na sosola ese o le Setete, vagana ai nai aiga o tamaitai ma tamaiti lotofaavauvau. …
I lo matou matuai faanoanoa tele, o a ni mea e mafai e i matou o tamaitai ona fai, ae ua na’o le tatalo? Na pau lava lo matou puna o le faamafanafanaga o le tatalo lea; ae na pau lo matou fesoasoani, ua na’o lo matou Tama Faalelagi. …
“I se tasi aso, sa sau ai se alii o le vaega faatupu vevesi mai le vili falaoamata ma le [avea’i] a le kapeteni:
“‘Fai mai le kapeteni afai e le tuua e outou na fafine a outou … tatalo, o le a ia auina mai se vaega o alii e fasi outou … uma taitoatasi!’ …
“Na fifilemu a matou tatalo ona o le fefefe. Sa le tofotofo se isi o i matou ia faalogoina se leo o tatalo i totonu o le fale. E mafai ona ou tatalo leleoa i lo’u moega, ae e le mafai ona ou ola faapenei o se taimi umi. …
“E le mafai ona ou onosaia. Sa le mafai ona ou tatalia lo’u toe fia faalogo i lo’u lava leo i le tatalo atu i lo’u Tama Faalelagi.
“Sa ou alu faalilolilo i totonu o se toga sana, ma totolo i totonu o se [faaputuga aputisaito]. Sa pei lava o le malumalu o le Alii ia te a’u i lena taimi. Sa ou tatalo leotele ma le matuai loto i ai.
“Ina ua ou aluese mai le toga sana, sa tautala mai se leo ia te a’u. Sa o se leo na matuai manino lava i la’u faalogo. Sa le o se uunaiga leleoa, ma malosi a le agaga, ae o se leo, na tautala faafia mai i se fuaiupu o le viiga a le au paia:
O lē ua faamoemoe o ia ia te a’u,
Ou te le tuulafoaia o ia i fili;
O lena agaga, po o le a lava o lona malosi,
E lē lafoa’ia, e a’u o ia!
“Mai i le taimi lava lena, sa le’i toe i ai so’u fefe. Sa ou lagonaina e leai se mea e mafai ona faaafāina a’u” (Amanda Smith, i le Edward W. Tullidge, The Women of Mormondom [1877], 129–30).
O le a se mea e mafai ona tatou aoao mai i le faataitaiga a Amanda e mafai ona fesoasoani ia i tatou i taimi o o tatou tofotofoga ma puapuaga? (Atonu e mafai e tagata aoga ona faailoa mai ni mataupu faavae eseese, e aofia ai ma lenei: A tatou tatalo ma le matuai loto i ai i taimi o o tatou puapuaga, o le a faamafanafana ma faamalosia i tatou e le Ali. Tusi le mataupu faavae lenei i luga o le laupapa.)
Valaaulia nai tagata aoga e auauai e faitau leotele mai le itulau e 379 o le Au Paia: Voluma 1, e amata atu i le parakalafa o loo amata i le “O upu na faamalosiaina …” ae faaiu i le parakalafa i le itulau lava lea o loo amata i le “O le le amanaiaina o ia …” Fai atu i le vasega e mulimuli i le faitauga, ma vaavaai mo auala na faamalosia ai e le Alii ia Amanda ma lona aiga ona ua uma lana tatalo. Valaaulia tagata aoga e lipoti mai mea ua latou mauaina.
O le a se taimi na e maua ai le faamafanafanaga po o le malosiaga mai le Alii a o e tatalo faatauanau atu i ni taimi o ou puapuaga?
Na maua e le Au Paia na Faaaunuua le sulufaiga mo se taimi le tumau i Quincy, Ilinoi.
Toe tagai atu i le faafanua “O Eria o Misuri, Ilinoi, ma Aioua o le Iunaite Setete,” ma valaaulia tagata aoga e su’e Quincy, Ilinoi. Faamalamalama atu e faapea, i le va o Ianuari ma Mati o le 1839, o le toatele lava o le tusa ma le 8,000 i le 10,000 o le Au Paia na nonofo i Misuri i matu, na tiaia pe faatauese o latou fanua, fale, ma le tele o a latou meatotino a o latou o ese ma le setete. O le toatele na maua se sulufaiga mo se taimi le tumau i le isi itu o le Vaitafe o le Misisipi i Quincy, Ilinoi, o se aai pe a ma le 170 maila (275 kilomita) mai Fa Uesi. Sa onosaia e na tagata sulufai ia tulaga faigata i la latou malaga i le taumalulu, e aofia ai le fiaaai, maatiati o le tau malulu, timuga, kiona ma le palapala.
Na faaosofia faapefea e le faafuasei o le taunuu atu o le Au Paia ni faigata mo tagata na nofoia Quincy, Ilinoi?
Ia faamalamalama atu e faapea, i le faaiuga o Fepuari 1839, na faapotopoto ai tagatanuu o Quincy i le falefaamasino e faalogologo i lipoti a se komiti na tofiaina e suesuea tulaga o tagata sulufai o le Au Paia o Aso e Gata Ai. Valaaulia se tagata aoga e faitau leotele le vaega lenei o le faaiuga a le komiti. Fai atu i le vasega e faalogologo mo le mea na filifili tagatanuu o Quincy e fai.
“O tagataese na taunuu lata mai nei mai le Setete o Misuri, ua lauiloa i le igoa o le Au Paia o Aso e Gata Ai, ua agavaa mo la tatou manatu malamalama ma le agalelei, ma … matou te fautuaina atu i Tagatanuu o Quincy ia faasafua atu ia i latou uma le agalelei i lo latou malosi e mafai ona tuuina atu ai, aua o i latou o ni tagata ua pagatia. …
“… Matou te fautuaina atu i tagatanuu uma o Quincy, e faapea, i a latou fegalegaleaiga uma ma tagataese, ina ia latou … matuai faaeteete ia aua ne’i faaleagaina i soo se talanoaga po o ni amioga e faaali atu ua fuafuaina e faamanualia ai o latou lagona, pe o soo se auala e atagia atu ai ia i latou, o e, i soo se tulafono lava faaletagata soifua, ua agavaa mo la tatou lotomalamalama ma le faanoanoa manū” (Quincy Argus, Mar. 16, 1839, [1]; ua faalaugatasia le sipelaga; tagai foi Manuscript History of the Church, vol. C-1, p. 889, josephsmithpapers.org).
Afai sa e i ai i le tulaga o tagata sulufai o le Au Paia o Aso e Gata Ai, o a ni ou lagona e i ai e faatasi i tagata na nofoia Quincy?
Faamalamalama atu e faapea, e le gata i le fesoasoani agaalofa na tuuina atu e tagata na nofoia Quincy, o le aofaiga toatele o tagata fai mai o le Au Paia na siitia atu i Quincy, na iu ai i le toatele o le Au Paia na faotui i totonu o faleie, faleapa, faleoo, ma falemo’u e nonofo ai i le taimi o le taumalulu ma le tautotogo o le 1839.
Vaevae tagata aoga i ni vaega toalaiti, ma tuu atu ia i latou le pepa e tufa atu o loo i le lesona, “O le Aiga o Hendricks i Quincy, Ilinoi.” Fai atu i tagata aoga e faitau faatasi le pepa e tufa atu ma talanoa i a latou tali i fesili o loo i le pepa ua tufa atu.
Faitau le tala lenei i le aiga o Hendricks e pei ona faamatalaina e Elder Jeffrey R. Holland o le Korama a Aposetolo e Toasefululua:
Ata
Jeffrey R. Holland
“I le totonugalemu o le feitagai leaga tele i Misuri lea o le a tuu ai le Perofeta i le Falepuipui o Liperate ma tutuliesea faamalosi ai le faitau afe o le Au Paia o Aso e Gata Ai mai o latou fale, na taunuu ai Sister Drusilla Hendricks ma lana tane pipili o James, o le na fanaina e fili o le Ekalesia i le Taua i le Vaitafe Piopio, faapea ma le la fanau i se falemo’u foliga na tatope le faiga i Quincy, Ilinoi, e faatalitali ai le tautotogo o lena tausaga faigata.
“I totonu o le lua vaiaso, na matuai tu lava i le laumeavale le auaiga o Hendricks ona o le matelaina, lea sa na’o le tasi le sipuni tumu o le suka ma se falai na tumu i le polesi na totoe o a latou meatotino. … Sa fai e Drusilla se paluga mo James ma tamaiti, ma ua faapea ona gata mai ai le fālōina o le mea e maua ai i le tele e mafai ona maua ai. Ina ua uma ona ai e lona aiga fiaaai lena luutaga itiiti, sa ia fufuluina mea uma, faamama si o latou tama’i falemo’u i le mae’a’ea sa ia mafaia ai, ona faatalitali filemu loa lea e oti.
“E le’i leva lava, ae toe tu i luga Drusilla ona o le pao o se taavaletoso. O le latou tuaoi o Reupena Allred. Sa fai mai o ia, sa ia maua se lagona ua leai se latou meaai, o lea la, a o agai atu i le taulaga, sa ia aumaia ai se taga fatu ua vili i se meaai mo i latou.
“E le’i leva foi lena, ae taunuu ane Alexander Williams ma amo mai ni taga meaai tetele se lua. Sa fai atu o ia ia Drusilla, sa matuai pisi lava o ia ae na musumusu atu le Agaga ia te ia ‘O loo pagatia le aiga o Uso Hendricks, o lea na ou tuua ai mea uma ae ou [momo’e] mai’ [Drusilla Doris Hendricks, “Historical Sketch of James Hendricks and Drusilla Doris Hendricks,” Church Archives, Salt Lake City, 14-15]” (Jeffrey R. Holland, “A Handful of Meal and a Little Oil,” Ensign, May 1996, 31).
O a ni mataupu faavae e mafai ona tatou aoaoina mai i lenei tala?
Faitau atu le faamatalaga lenei mai ia Peresitene Thomas S. Monson (1927–2018):
Ata
Thomas S. Monson
“O le aafiaga aupito matagofie na ou iloa i le olaga o le lagonaina lea o se uunaiga ma faatinoina ma iloa mulimuli ane o le faataunuuina o le tatalo a se tasi po o le manaoga o se tasi” (Thomas S. Monson, i le William R. Walker, “Mulimuli i le Perofeta,” Liahona, Ape. 2014, 40).
O le a se taimi na e tali atu ai i se uunaiga mai le Agaga Paia ma taitaiina ai i le fesoasoani i se tasi na manaomia le fesoasoani?
A ua lava loa le taimi, fai atu i nai tagata aoga e lipoti mai ni mea ua latou aoaoina mai le pepa na tufa atu. E mafai ona faailoa mai e tagata aoga se mataupu faavae e pei o lenei: Afai tatou tali atu i uunaiga mai le Agaga Paia, e mafai ona taitaiina i tatou ia fesoasoani ia i latou e manaomia le fesoasoani. Mafaufau e faasoa atu lau molimau i lenei mataupu faavae.
Valaaulia tagata aoga e mafaufau i ni tagata latou te iloa atonu o manaomia le fesoasoani. Valaaulia i latou ia saili ma le agaga tatalo ma tali atu i musumusuga mai le Agaga Paia ia fesoasoani i na tagata. E mafai ona e uunaia tagata aoga e tusi i lalo ni uunaiga faaleagaga latou te maua ina ia mafai ona latou manatua e tulitatao ia na uunaiga.
Faamalosiau i tagata aoga e saunia mo le vaega o le a sosoo ai i le faitauina o le mataupu 33 o le Au Paia: Voluma 1. Fai atu i tagata aoga e vaavaai mo lesona e mafai ona latou aoaoina mai le Perofeta o Iosefa Samita ma isi taitai o le Ekalesia a o latou puapuagatia i le Falepuipui o Liperate.
Ata
pepa e tufa atu, o le Aiga o Hendricks i Quincy, Ilinoi
