Ua Osia e Atamu ma Eva Taulaga, saunia e Keith Larson

Lesona 6 Anomea mo le Sauniuniga o le Vasega

Faaaogaina o Faatusa e Malamalama Atili ai i le Mana Togiola o Keriso

Ua e maitauina le tele o taimi e faaaoga ai e tusitusiga paia ia faatusa e aoao ai i tatou e uiga ia Iesu Keriso? Mo se faataitaiga, ua faatusaina o Ia i le vai (tagai Ioane 4:14), areto (tagai Ioane 6:48), malamalama (tagai Ioane 8:12), o se papa (tagai Helamana 5:12), o le la (tagai Malaki 4:2), ma se leoleo mamoe (tagai Salamo 23:1). E oo lava a o lei soifua mai o Ia, sa faaaoga e Ieova ia faatusa e fesoasoani ai i Ona soo e tulimatai atu i Lona afio mai ma Lona mana togiola. A o e suesue i nisi o faataitaiga i lenei lesona, mafaufau pe mafai faapefea e faatusa faatusi paia ona faalolotoina lou malamalama ma le alofa mo lou Togiola.

Vaega 1

O le a se mea e mafai ona ou aoaoina e uiga ia Iesu Keriso e ala i faatusa o taulaga e osi i manu?

E pei ona tusia i se tasi o tusitusiga e uiga i le mana o faailoga: “O se faatusa o le talalelei o se mea faitino, o se mea na tupu, faatinoga, po o se aoaoga e faatusaina i ai se upumoni faaleagaga. … ‘O faatusa e mafai ona tatou tuuina atu se auala e malamalama ai i manatu ma lagona lea e le mafai ona faamatalaina e upu. Latou te aveina atu i tatou i tua atu o upu ma tatou maua lelei ai le faamatalaina o lagona’ [Joseph Fielding McConkie and Donald W. Parry, Taiala i Faatusa Faale-Agaga (1990), 1]“ (”Aisea [e faaaoga ai] Faatusa?,“ Ensign, Feb. 2007, 13, 14).

I tusitusiga paia, o se tasi o uluai faatusa mamana o le Faaola o le taulaga i manu. Ina ua uma ona aai Atamu ma Eva i le fua faasaina ma sa tatau ona tuua le Faatoaga o Etena, sa poloaiina i laua e tapuai atu i le Alii ma osi atu se tamai mamoe e fai ma taulaga ia te Ia.

tamaloa o loo uuina se mamoe

aikona, suesue

Suesue e Sauniuni ai mo le Vasega

Faitau le Mose 5:4–8, ma mafaufau loloto po o le a le faatusa o le ofoina atu o se tamai mamoe e ta‘umamaina, e mafai ona aoao ai i tatou e uiga i le alofa o le Atua ma le taulaga a Iesu Keriso. (Manatua: O se faatusa o se foligatutusa, faatusatusaga, po o se faailoga.)

I le taulai atu i faatusa o taulaga e osi i manu, sa molimau atu ai le Aposetolo o Peteru e faapea, e na o le “toto tāua o Keriso pei o lo le tamai mamoe e le pona lava, e leai foi sona leaga” (1 Peteru 1:19; tagai foi Alema 34:36).

Ua Osia e Atamu ma Eva ia Taulaga, saunia e Del Parson

Sa tausia e le nuu o le feagaiga a le Alii le tulafono o taulaga e osi i manu o se faatusa o le taulaga a Iesu Keriso—ma o lena taulaga o se faamanatu o le a Ia togiola mo a latou agasala. Sa fesoasoani ia i latou e tulimatai atu ai i lena aso.

Na aoao mai Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

E ala i le ofoina atu o ā latou lava tama’i mamoe e fai ma faatusa i le olaga nei, sa faailoa atu ai e Atamu ma ana fanau lo latou malamalamaaga ma le faalagolagoga i le taulaga togiola a Iesu o Lē ua Faauuina. (“Faauta i le Tamai Mamoe a le Atua,” Liahona, Me 2019, 44)

aikona, mafaufau loloto

Mafaufau Loloto e Sauniuni ai mo le Vasega

E mafai faapefea e le malamalama i faatusa o taulaga e osi i manu ona faalolotoina ai lou alofa ma le talisapaia o le taulaga togiola a Iesu Keriso mo oe?

Vaega 2

E mafai faapefea e faatusa o le Paseka ona musuia a‘u e saili le mana togiola o le Faaola i lo’u olaga?

Sa faaauau pea le ositaulagaina o tamai mamoe ulumatua i taimi o le Feagaiga Tuai. O lenei faiga na faapitoa le anoa ia Isaraelu ina ua faasaolotoina i latou mai lo latou nofo pologa i tagata Aikupito.

O le tala i le laveaiina o Isaraelu mai le faatagataotauaina i Aikupito e mafai ona fesoasoani tatou te malamalama ai i le ala e laveai ai i tatou e le Alii mai ituaiga eseese o le faatagataotauaina tatou te oo i ai. E ui o le nofopologa o Isaraelu o se ituaiga o pologa faaletino, sa aoao mai Elder Quentin L. Cook o le Korama a Aposetolo e Toasefululua e mafai foi ona tatou oo i le nofo pologa ona o le agasala, vaisu, po o le talitonu i manatu sese (tagai “Auega a Ieremia: Faaeteete i le Nofopologa,” Liahona, Nov. 2013, 88–91).

E tusa ma le 400 tausaga na nofo pologa ai Isaraelu i Aikupito. Ae sa lei faagaloina lava i latou e le Alii. Sa Ia silafia o latou faanoanoaga ma faafofogaina a latou tagi. Na sau o ia e laveai i latou ma valaauina Mose e fesoasoani. I le aso na sosoo ma le laveaiina o Isaraelu, sa folasia mai ai e le Alii le Paseka, lea sa faatumulia i faatusa sa faamoemoe e aoao atu ai le mana o le Faaola e laveai ai i latou uma o e o le a mulimuli ia te Ia.

tamai mamoe

aikona, suesue

Suesue e Sauniuni ai mo le Vasega

Faitau le Esoto 12:3–13 (ma, afai e mafai, matamata le ata vitio “O le Paseka” [3:07]), ma faailoa mai faailoga o loo aoao mai ai e uiga i le mana faaola o Iesu Keriso ma le auala e maua ai.

aikona, tusi faamaumau

Tusi faamaumau Ou Manatu

I le siata o loo sosoo ai, tusi faamaumau ou manatu i le uiga o faatusa taitasi o le Paseka. Mafaufau po o a mea e ono aoao mai e nei faailoga ia i tatou e uiga i le mana togiola o le Faaola ma le auala e maua ai. Atonu e te manao e suesue ia mau lagolago ina ia maua ai ni malamalamaaga faaopoopo.

Faatusa o le Paseka

Fuaiupu	Faailoga	Uiga e Ono I Ai	Mau Lagolago*
Fuaiupu 3	Faailoga Sa ositaulagaina e fale taitasi se tamai mamoe	Uiga e Ono I Ai O le mana togiola o Iesu Keriso e mo tagata uma.	Mau Lagolago* 2 Nifae 26:25–28, 33
Fuaiupu 5	Faailoga O le tamai mamoe po’a e le ponā	Uiga e Ono I Ai	Mau Lagolago* Ioane 1:29; Eperu 5:8–9
Fuaiupu 7	Faailoga Sa faaaoga le toto i luga o pou o faitotoa o fale taitasi	Uiga e Ono I Ai	Mau Lagolago* Mosaea 4:2; Alema 5:21
Fuaiupu 8	Faailoga Falaoa e le faafefeteina (falaoa e faia e aunoa ma le mea faafefete, lea e afua ai ona faaleagaina le falaoa ma legalegā)	Uiga e Ono I Ai	Mau Lagolago* Ioane 6:35, 48, 57–58; 1 Korinito 5:7–8
Fuaiupu 8	Faailoga Laau Oona	Uiga e Ono I Ai	Mau Lagolago* Alema 41:11; Mataupu Faavae ma Feagaiga 19:18
Fuaiupu 11	Faailoga Fusia sulugatiti, fai seevae, tootoo i le lima, aai faanatinati	Uiga e Ono I Ai	Mau Lagolago* Alema 34:32–33

• Manatua: O fuaitau lagolago ua faamoemoe e tuuina atu ai se malamalamaaga faaopoopo e uiga i faatusa o loo faaaogaina i le Paseka ma e le o faamoemoe e tuuina atu ai o ni faauigaga maoti o na mea.

O taiala nei e mafai ona fesoasoani ia te oe e malamalama atili ai i le auala e faauiga ai faatusa faatusi paia:

• Saili ia malamalama i le faatusa i le afuaga o le fuaitau.

• Faaaoga fesoasoaniga mo suesuega, e pei o vaefaamatalaga, O le Taiala i Tusitusiga Paia, ma le Bible Dictionary.

• Saili pe na saunoa mai perofeta anamua po o aso nei e uiga i fuaiupu ma a latou faatusa.

• Mafaufau loloto, manatunatu, ma tatalo e uiga i le fuaitau ma ona faatusa.

Mo se fesoasoani faaopoopo ia malamalama ai i faatusa o le talalelei, tagai Gerald N. Lund, “Understanding Scriptural Symbols,” Ensign, Oct. 1986, 22–27.

Vaega 3

O a isi faailoga o le Feagaiga Tuai e mafai ona aoao mai ia te au e uiga i le mana togiola o le Faaola?

Na aoao mai e Elder Bruce R. McConkie o le Korama a Aposetolo e Toasefululua:

Elder Bruce R. McConkie

O sauniga paia uma po o faatinoga ua faauuina e le Atua, o osigataulaga uma, faatusa, ma tulaga talitutusa … [sa] faatuina … ia molimau atu e uiga ia [Iesu Keriso]. …

E atoatoa ma talafeagai ona vaavaai mo faatusa o Keriso i soo se mea ma faaaoga pea lava pea e ala i le tausia o ia ma ana tulafono silisili i o tatou mafaufau. (The Promised Messiah: The First Coming of Christ [1978], 28, 453)

tagata o loo suesue i tusitusiga paia

aikona, suesue

Suesue e Sauniuni ai mo le Vasega

Ua faatumulia le Feagaiga Tuai i le tele o faailoga matagofie o loo molimau mai i le mana togiola o le Faaola. Ina ia faalolotoina lou malamalama, faitau se tasi o fuaitau o loo i lalo ona mafaufau loloto lea i fesili suesue o loo mulimuli mai.

• Ua maua e Isaraelu le areto mai le lagi: Esoto 16:1–4, 14–16, 35 (tagai foi Ioane 6:5–14, 48–51)

• Vai e sau mai se papa: Esoto 17:1–6 (tagai foi Ioane 4:7–15)

• O Le Aso o le Togiola: Levitiko 16:2–6, 17 (tagai foi Eperu 9:6–12; 10:11–12)

• O Isaraelu na faasaoina mai gata: Numera 21:4–9 (tagai foi Ioane 3:14–15; Alema 33:19–21)

Fesili mo Suesuega

• O a ni faatusa talafeagai o Iesu Keriso (i se isi faaupuga, o le a le mea faitino, mea na tupu, tulaga, po o tagata e faasino i ai pe fai ma sui o Ia) i lenei fuaitau?

• O a ni mea e ono faatusa i ai nei faatusa ma aoao ai i tatou e uiga i le misiona paia a Iesu Keriso?

• E mafai faapefea e le malamalama i nei faatusa ona faamalosia lo‘u faatuatua ia Iesu Keriso ma Lona mana e laveai ai a’u?

E Te Fia Aoao Atili? (Tuu i le faitalia)

O a ni faatusa faaopoopo faatusi paia o le Feagaiga Tuai e mafai ona fesoasoani ia te au e aoao atili ai e uiga ia Iesu Keriso?

O ni nai faataitaiga nei o faatusa faatusi paia o loo aoao mai e uiga i le Faaola:

• Ua ofo atu e Aperaamo lona atalii o Isaako: Kenese 22:1–13 (tagai foi Iakopo 4:5)

• Ua valaaulia e Isaia i latou o e fia feinu: Isaia 55:1–2 (tagai foi 2 Nifae 9:50–51)

• Ua foloina Iona e se i’a Iona 1:17; 2:10 (tagai foi Mataio 12:38–40)

O fea e mafai ona ou aoao atili ai e uiga i le faatusa faatusi paia?

O le mataupu “Examples of Symbols Used in Scriptures” (mai le Scripture Study—The Power of the Word Teacher Manual, o loo maua i le ChurchofJesusChrist.org) o loo lisi mai ai ni faatusa eseese faatusi paia ma mea e ono suitulaga ai.

Pe na tuuina atu e taulaga i manu anamua le faamagaloga mo le agasala?

Sa aoao mai le Perofeta o Iosefa Samita e faapea, o le Faaola ua na o le pau lea o le punavai o le faamagaloga. Peitai, o le tagata e faia taulaga i manu i aso anamua, sa faamanatu atu ai ia te ia lenei meaalofa paia:

O Le Perofeta o Iosefa Samita

O le mea moni, o le faamaligiina o le toto o se manu e leai se aoga i le tagata, vagana ai na faia e faataitai ai, pe o se faatusa, po o se faamalamalamaga o mea sa tatau ona ofoina, e ala i le meaalofa a le Atua lava Ia—ma o lenei faatinoga e faia ma se manatu e taulai atu i le faatuatua i le mana o lena Taulaga sili mo le faamagaloga o agasala. (Aoaoga a Peresitene o le Ekalesia: Iosefa Samita [2007],48)