« សៀវភៅសិក្សាសម្រាប់គ្រូបង្រៀន មេរៀនទី ២ ៖ ការនិមិត្តដំបូង » សៀវភៅសិក្សាសម្រាប់គ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )
« សៀវភៅសិក្សាសម្រាប់គ្រូបង្រៀន មេរៀនទី ២ » សៀវភៅសិក្សាសម្រាប់គ្រូបង្រៀនមូលដ្ឋានគ្រឹះនៃការស្តារឡើងវិញ
សៀវភៅសិក្សាសម្រាប់គ្រូបង្រៀន មេរៀនទី ២
ការនិមិត្តដំបូង
ព្រះជាព្រះវរបិតា និង ព្រះរាជបុត្រាទ្រង់ គឺព្រះយេស៊ូវគ្រីស្ទបានបង្ហាញព្រះកាយដល់យ៉ូសែប ស្ម៉ីធ ក្នុងឆ្នាំ ១៨២០ ។ មេរៀននេះរៀបចំឡើងដើម្បីជួយសិស្សឲ្យស្គាល់នឹងដំណើររឿងនៃការនិមិត្តដំបូងរបស់យ៉ូសែប ស្គាល់គោលលទ្ធិ និងគោលការណ៍នានាដែលពួកគេអាចរៀនពីការនិមិត្តរបស់លោក ហើយពង្រឹងទីបន្ទាល់របស់ពួកគេថា យ៉ូសែប ស៊្មីធបានឃើញព្រះវរបិតា និងព្រះរាជបុត្រា ។
កំណត់ចំណាំ ៖ ការស្វែងរកសេចក្ដីពិតរបស់ យ៉ូសែប ស៊្មីធដូចតំណាលនៅក្នុង យ៉ូសែប ស្ម៉ីធ—ប្រវត្តិ ១:៥–១៣ នឹងមានបញ្ជាក់លម្អិតជាងនេះនៅក្នុងមេរៀនទី ៣ នៃវគ្គសិក្សានេះ ។
យោបល់សម្រាប់ការបង្រៀន
ព្រះវរបិតាសួគ៌ និងព្រះយេស៊ូវគ្រីស្ទបង្ហាញព្រះកាយចំពោះយ៉ូសែប ស៊្មីធ ។
សូមបង្ហាញប្រយោគខាងក្រោមនេះមកពី យ៉ូសែប ស្ម៉ីធ — ប្រវត្តិ ១:២១ ៖
« សព្វថ្ងៃនេះ លែងមានការណ៍អ្វីជាការនិមិត្ត ឬវិវរណៈហើយ » ។
-
តើអ្នកមានអារម្មណ៍យ៉ាងណាអំពីប្រយោគនេះ ?
-
តើជីវិតរបស់បងប្អូននឹងខុសប្លែកយ៉ាងដូចម្ដេច បើបងប្អូនបានជឿលើប្រយោគនេះ ?
សូមពន្យល់ថា ប្រយោគនេះបានថ្លែងដោយអាចារ្យម្នាក់ពីពួកមេតូឌីស នៅពេល យ៉ូសែប ស៊្មីធវ័យក្មេងបានប្រាប់លោកអំពីការនិមិត្តដំបូងរបស់លោក ។ សូមឲ្យសិស្សអាន យ៉ូសែប ស្ម៉ីធ—ប្រវត្តិ ១:១៥–១៩ ហើយសូមឲ្យពួកគេគិតអំពីរបៀបដែលការពិពណ៌នារបស់យ៉ូសែបអំពីអ្វីដែលលោកបានដកពិសោធន៍ បដិសេធការអះអាងរបស់អាចារ្យនេះ ។ ក្រោយពីពួកគេអានហើយ សូមអញ្ជើញសិស្សឲ្យចែកចាយអំពីអ្វីដែលពួកគេគិត ។
អភិវឌ្ឍការបង្រៀន និងការរៀនសូត្ររបស់យើង
អញ្ជើញសិស្សឲ្យអានក្នុងថ្នាក់ ។ ការអាននៅក្នុងថ្នាក់អាចធ្វើឡើងតាមរបៀបផ្សេងៗដូចជា សិស្សអានពីព្រះគម្ពីររបស់គេផ្ទាល់ដោយស្ងាត់ស្ងៀម សិស្សម្នាក់អានឮៗ សិស្សប្ដូរវេនគ្នាអានខគម្ពីរឮៗ សិស្សអានឮៗរួមគ្នាជាដើម ។
សូមសរសេរសេចក្ដីពិតដូចតទៅនេះដាក់នៅលើក្ដារខៀន ៖ ព្រះជាព្រះវរបិតា និង ព្រះយេស៊ូវគ្រីស្ទបានបង្ហាញព្រះកាយដល់ យ៉ូសែប ស៊្មីធ ហើយបានមានបន្ទូលជាមួយនឹងលោក ។
សូមអញ្ជើញសិស្សពីរបីនាក់ ដែលចង់ថ្លែងទីបន្ទាល់អំពីការនិមិត្តដំបូងរបស់យ៉ូសែប ឲ្យឆ្លើយនឹងសំណួរខាងក្រោមនេះ ៖
-
តើសាក្សីខាងវិញ្ញាណរបស់បងប្អូនអំពីការនិមិត្តដំបូងកើតមានដល់បងប្អូនដោយរបៀបណា ?
យើងរៀនពីសេចក្ដីពិតដ៏សំខាន់ទាំងឡាយតាមរយៈដំណើររឿងការនិមិត្តដំបូង ។
សូមរំឭកសិស្សថា យ៉ូសែប ស៊្មីធបានផ្ដល់ដំណើររឿងបួនខុសៗគ្នាអំពីការនិមិត្តដំបូង ដែលយើងបានដឹង ។ យើងក៏មានដំណើររឿងប្រាំបន្ថែមទៀតអំពីការនិមិត្តនេះ ដែលត្រូវបានសរសេរដោយមនុស្សដែលបានឮយ៉ូសែបនិយាយវា ។ ដូចមានភាពខុសគ្នាក្នុងដំណើររឿងអំពីព្រះជន្មរបស់ព្រះអង្គសង្គ្រោះដែលបានកត់ត្រាដោយម៉ាថាយ ម៉ាកុស លូកា និងយ៉ូហានដែរ ដំណើររឿងនៃការនិមិត្តដំបូងរបស់យ៉ូសែបនីមួយៗគូសបញ្ជាក់ចំណុចខុសៗគ្នានៃបទពិសោធន៍របស់លោក ។ ប៉ុន្ដែដំណើររឿងទាំងអស់មានធាតុសំខាន់នៃអ្វីដែលយ៉ូសែបបានឃើញ និងបានឮ ។ មនុស្សមួយចំនួនប៉ុនប៉ងលុបចោលការនិមិត្តដំបូង ដោយសារតែភាពខុសគ្នាក្នុងដំណើររឿងផ្សេងៗគ្នា ។ ( ឧទាហរណ៍ ដំណើររឿងឆ្នាំ ១៨៣២ សង្កត់ធ្ងន់ថា យ៉ូសែបបានស្វែងរកការអភ័យទោសពីអំពើបាបរបស់លោក ហើយក៏ប្រើចំណងជើង « ព្រះអម្ចាស់ » ជាជាងសំដៅលើព្រះវរបិតាសួគ៌ និង ព្រះយេស៊ូវគ្រីស្ទដាច់ដោយឡែកពីគ្នា ។ ដំណើររឿងឆ្នាំ ១៨៣៥ ពិពណ៌នាពីព្រះកាយរបស់ព្រះវរបិតាសួគ៌មុន បន្ទាប់មកព្រះអង្គសង្គ្រោះ ) ។
ដើម្បីជួយពន្យល់ពីមូលហេតុនៃភាពខុសគ្នានៅក្នុងដំណើររឿងទាំងនេះ សូមឲ្យសិស្សគិតអំពីបទពិសោធន៍ដ៏សំខាន់ ឬដ៏មានន័យមួយ ដែលពួកគេបានមានក្នុងជីវិតរបស់ពួកគេ ។
-
តើការតំណាលរបស់បងប្អូនពីបទពិសោធន៍នោះខុសគ្នាយ៉ាងដូចម្ដេច អាស្រ័យលើនរណាជាអ្នកស្ដាប់បងប្អូន ? តើវាអាចផ្លាស់ប្តូរដោយរបៀបណា អាស្រ័យទៅលើពេលវេលា ឬមូលហេតុដែលបងប្អូនបានប្រាប់ពីបទពិសោធន៍នោះ ?
-
តើបងប្អូននឹងឆ្លើយតបទៅកាន់នរណាម្នាក់ ដែលប្រកែកថាភាពផ្សេងគ្នាក្នុងដំណើររឿងខុសគ្នានៃការនិមិត្តដំបូងនាំឲ្យមានសំណួរអំពីភាពពិតនៃបទពិសោធន៍របស់យ៉ូសែបយ៉ាងដូចម្ដេច ? ( បើចាំបាច់ សូមលើកទឹកចិត្តសិស្សឲ្យរំឭកនូវអ្វីដែលពួកគេបានសិក្សានៅក្នុងផ្នែកទី ២ នៃសៀវភៅសិក្សាការរៀបចំ ) ។
សូមបង្ហាញប្រយោគមិនពេញលេញដូចតទៅនេះ ៖ យើងរៀនមកពីការនិមិត្តដំបូងថា … ។
សូមពន្យល់ថា យើងអាចរៀនពីសេចក្ដីពិតដ៏អស្ចារ្យចេញពីដំណើររឿងទាំងអស់នៃការនិមិត្តដំបូងរបស់យ៉ូសែប ។ សូមរំឭកសិស្សថា ពួកគេត្រូវបានអញ្ជើញឲ្យរៀបចំបញ្ជីនៃសេចក្ដីពិតមួយ ដែលពួកគេបានរកឃើញចេញពីដំណើររឿងនៃការនិមិត្តដំបូងទាំងនេះសម្រាប់មេរៀននេះ ។ ប្រសិនបើចាំបាច់ សូមផ្ដល់ពេលឲ្យសិស្សរំឭកនូវអ្វីដែលពួកគេបានគូសចំណាំ និងសេចក្ដីពិតដែលពួកគេកត់ចំណាំទុក ។ ( បងប្អូនគួរតែផ្ដល់ពេលឲ្យសិស្សសិក្សាដំណើររឿងនៅក្នុងថ្នាក់ ប្រសិនបើបងប្អូនបញ្ចូលមេរៀនពីរដំបូងចូលគ្នា ហើយសិស្សមិនបានរៀបចំសម្រាប់មេរៀននេះទេ ) ។
សូមឲ្យសិស្សចែកចាយសេចក្ដីពិតមួយចំនួន ដែលពួកគេបានរកឃើញ និងខគម្ពីរទាំងឡាយ ឬចំណែកនៃដំណើររឿងដែលបង្រៀនពីសេចក្ដីពិតទាំងនោះផងដែរ ។ សូមសរសេរចម្លើយរបស់សិស្សនៅក្រោមប្រយោគមិនពេញលេញ ដែលអ្នកទើបបានបង្ហាញនោះ ។
កំណត់ចំណាំ ៖ សម្រាប់ឧទាហរណ៍នៃសេចក្ដីពិតដែលយើងអាចរៀនមកពីការនិមិត្តដំបូងរបស់យ៉ូសែប សូមមើលសុន្ទរកថា « The First Vision: Key to Truth » ( Ensign ខែ មិថុនា ឆ្នាំ ២០១៧ ទំព័រ ៦០–៦៥ ) ដោយអែលឌើរ រីឆាត ជេ ម៉េណេស បានយោងនៅក្នុង ផ្នែក « ចង់បានបន្ថែមទៀតទេ ? » នៃសៀវភៅសិក្សាការរៀបចំ ។
កាលសិស្សចែកចាយសេចក្ដីពិតដែលពួកគេបានរកឃើញ សូមពិចារណាសួរសំណួរពួកគេពីសំណួរតាមដានទាំងនេះមួយ ឬច្រើន ៖
-
ហេតុអ្វីបងប្អូនគិតថា សេចក្ដីពិតនេះសំខាន់ដើម្បីយល់ដឹង ?
-
តើការដឹងសេចក្ដីពិតនោះបានផ្ដល់ពរជ័យដល់បងប្អូនយ៉ាងដូចម្ដេច ?
-
តើបងប្អូនរៀនអ្វីខ្លះ អំពីព្រះវរបិតាសួគ៌ និងព្រះយេស៊ូវគ្រីស្ទចេញមកពីអ្វីដែលបងប្អូនបានសិក្សាអំពីការនិមិត្តដំបូង ?
យើងអាចពង្រឹងទីបន្ទាល់របស់យើងអំពីការនិមិត្តដំបូង ។
សូមពន្យល់ថា មនុស្សជាច្រើនក្នុងសហគមន៍របស់យ៉ូសែបបានបដិសេធទីបន្ទាល់របស់លោក អំពីអ្វីដែលលោកបានឃើញ និងបានឮ ហើយថាមនុស្សជាច្រើនបានបៀតបៀនលោកដោយសារការណ៍នេះ ( សូមមើល យ៉ូសែប ស្ម៉ីធ—ប្រវត្តិ ១:២១–២៣ ) ។
សូមឲ្យសិស្សអាន យ៉ូសែប ស្ម៉ីធ—ប្រវត្តិ ១:២៤–២៥ ហើយរកមើលរបៀបដែលព្យាការីយ៉ូសែប ស្ម៉ីធឆ្លើយតបនឹងអស់អ្នកដែលសើចចំអកដាក់ទីបន្ទាល់របស់លោកអំពីការនិមិត្តនេះ ។
-
តើឃ្លាក្នុងទីបន្ទាល់របស់យ៉ូសែប ស៊្មីធណាខ្លះដែលបងប្អូនចាប់អារម្មណ៍ ? ហេតុអ្វីទៅ ?
-
តើគំរូរបស់ យ៉ូសែប ស៊្មីធអាចជួយបងប្អូនដោយរបៀបណា ប្រសិនបើបងប្អូនប្រឈមមុខនឹងការសើចចំអក ឬឧបសគ្គចំពោះទីបន្ទាល់របស់បងប្អូនអំពីការនិមិត្តដំបូង និងដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ?
សូមបង្ហាញ ឬចែកសេចក្ដីថ្លែងការណ៍ខាងក្រោមដោយប្រធាន ហ្គរដុន ប៊ី ហ៊ិងគ្លី ហើយសូមឲ្យសិស្សម្នាក់អានវាឮៗ ៖
អស់ជាងមួយសតវត្សរ៍កន្លះមក ពួកសត្រូវ ពួកអ្នករិះគន់ និងពួកបញ្ញាវន្ដនាអនាគតមួយចំនួនបានណាយនឹងជីវិតរបស់ពួកគេ ក្នុងការព្យាយាមបញ្ជាក់ថាការនិមិត្តនោះពុំមានសុពលភាពឡើយ ។ ពិតប្រាកដណាស់ ពួកគេមិនអាចយល់ពីការនិមិត្តនេះបានឡើយ ។ ការណ៍របស់ព្រះត្រូវយល់ដោយព្រះវិញ្ញាណនៃព្រះ ។ គ្មានអ្វីអាចប្រៀបបានឡើយ តាំងពីព្រះរាជបុត្រានៃព្រះបានយាងមកនៅលើផែនដីនេះក្នុងព្រះជន្មរមែងស្លាប់ ។ បើគ្មានវាជាថ្មគ្រឹះសម្រាប់សេចក្ដីជំនឿ និងអង្គភាពរបស់យើងទេ នោះយើងគ្មានអ្វីសោះឡើយ ។ ដោយសារការនិមិត្តនេះ យើងក៏មានអ្វីគ្រប់យ៉ាង ។
មានអ្វីជាច្រើនត្រូវបានសរសេរមក ហើយនឹងមានអ្វីជាច្រើននឹងត្រូវសរសេរ ក្នុងកិច្ចខិតខំដើម្បីពន្យល់ពីវា ។… ប៉ុន្ដែទីបន្ទាល់នៃព្រះវិញ្ញាណបរិសុទ្ធ ដែលបានដកពិសោធន៍ដោយមនុស្សជាច្រើនរាប់មិនអស់ អស់រយៈពេលរាប់ឆ្នាំមកនេះតាំងពីវាបានកើតឡើងមក ថ្លែងជាសាក្សីថា វាពិត ថាវាបានកើតឡើងដូច យ៉ូសែប ស៊្មីធបានប្រាប់ថាវាបានកើតឡើងមែន ។ ( ហ្គរដុន ប៊ី. ហ៊ិងគ្លី « Four Cornerstones of Faith » Ensign ខែ កុម្ភៈ ឆ្នាំ ២០០៤ ទំព័រ ៥ )
សូមលើកទឹកចិត្តសិស្ស ដែលអាចចង់បានទីបន្ទាល់ដ៏រឹងមាំមួយអំពី យ៉ូសែប ស្ម៉ីធ និងការនិមិត្តដំបូងឲ្យធ្វើតាមគំរូរបស់យ៉ូសែប ក្នុងការស្វែងរកសេចក្តីពិតដោយបន្ដសិក្សាដំណើររឿងទាំងនេះ និងទូលសូមព្រះឲ្យបញ្ជាក់ពីភាពពិតនៃការនិមិត្តដំបូងដល់ពួកគេតាមរយៈព្រះវិញ្ញាណបរិសុទ្ធ ។ បងប្អូនអាចបញ្ចប់មេរៀននេះ ដោយការចែកចាយទីបន្ទាល់របស់បងប្អូនអំពីការនិមិត្តដំបូង និង ការស្ដារដំណឹងល្អឡើងវិញតាមរយៈព្យាការី យ៉ូសែប ស៊្មីធ ។
សម្រាប់ពេលក្រោយ
សូមឲ្យសិស្សគិតអំពីសំណួរដ៏ពិបាក ដែលពួកគេ ឬអ្នកផ្សេងមានអំពីការបង្រៀន ការអនុវត្ត ឬប្រវត្តិនៃសាសនាចក្រ ។ សូមពន្យល់ថា នៅក្នុងមេរៀនក្រោយ ពួកគេនឹងរៀនពីអ្វីដែលត្រូវធ្វើ នៅពេលមានសំណួរ ឬបញ្ហាពិបាកកើតឡើង ។ សូមលើកទឹកចិត្តសិស្សឲ្យសិក្សាសៀវភៅសិក្សារៀបចំសម្រាប់មេរៀនទី ៣ ដើម្បីពួកគេអាចមកថ្នាក់រៀនដោយបានរៀបចំខ្លួនជាមុន ហើយពិភាក្សាពីគោលការណ៍នានា ដែលនឹងជួយពួកគេឲ្យទទួលបានចំណេះដឹងខាងវិញ្ញាណដ៏ខ្លាំងជាងនេះ ។