ឯកសារគ្រូបង្រៀន មេរៀនទី ២៧ ៖ វិវរណៈអំពីបព្វជិតភាព

« ឯកសារគ្រូបង្រៀន មេរៀនទី ២៧ ៖ វិវរណៈអំពីបព្វជិតភាព » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ ( ឆ្នាំ ២០១៩ )

« ឯកសារគ្រូបង្រៀន មេរៀនទី ២៧ » ឯកសារគ្រូបង្រៀនមូលដ្ឋានគ្រឹះនៃការស្តារឡើងវិញ

ឯកសារគ្រូបង្រៀន មេរៀនទី ២៧

វិវរណៈអំពីបព្វជិតភាព

នៅថ្ងៃទី ១ ខែ មិថុនា ឆ្នាំ ១៩៧៨ ប្រធាន ស្ពែនស៊ើរ ដបុលយូ ឃឹមបឹល បានទទួលវិវរណៈមួយមកពីព្រះអម្ចាស់ដែលបានរឹតបន្តឹងការតែងតាំងបព្វជិតភាព និងពិធីបរិសុទ្ធក្នុងព្រះវិហារបរិសុទ្ធសម្រាប់សមាជិកសាសនាចក្រដែលជាសាសន៍អាហ្វ្រិកស្បែកខ្មៅ ។ មេរៀននេះនឹងជួយសិស្សឲ្យពន្យល់ពីកាលៈទេសៈ និងសេចក្ដីពិតដែលទាក់ទងទៅនឹងវិវរណៈនេះ ធ្វើសកម្មភាពដោយសេចក្ដីជំនឿ ពេលពួកគេជួបនឹងសំណួរ ឬស្ថានភាពពិបាកៗ ហើយទទួលបានការយល់ដឹងដ៏ធំមួយថា ព្រះកំពុងដឹកនាំសាសនាចក្ររបស់ទ្រង់តាមរយៈវិវរណៈដល់ពួកព្យាការីនៅរស់របស់ទ្រង់ ។

យោបល់សម្រាប់ការបង្រៀន

យើងអាចឆ្លើយតបនូវសំណួរអំពីការរឹតបន្តឹងដល់បព្វជិតភាព និងព្រះវិហារបរិសុទ្ធចេញពីទស្សនវិស័យនៃសេចក្ដីជំនឿ ។

អភិវឌ្ឍការបង្រៀន និងការរៀនសូត្ររបស់យើង

ដំណើររឿងទាំងឡាយអាចពង្រឹងសេចក្ដីជំនឿ ។ « ដំណើររឿងទាំងឡាយអាចជួយស្ថាបនាសេចក្ដីជំនឿរបស់សិស្សលើដំណឹងល្អរបស់ព្រះយេស៊ូវគ្រីស្ទ ។ វាអាចបង្កើតចំណាប់អារម្មណ៍ ហើយជួយសិស្សឲ្យយល់ពីដំណឹងល្អតាមរយៈបទពិសោធន៍ជំនួស ។ វាក៏អាចមានឥទ្ធិពលជាក់លាក់នៅក្នុងការជួយសិស្សឲ្យយល់ពីគោលការណ៍ទាំងឡាយនៃដំណឹងល្អដែលបានស្គាល់នៅក្នុងបណ្ដុំបទគម្ពីរមួយផងដែរ ។ តាមរយៈការបង្ហាញពីគោលការណ៍នៃដំណឹងល្អមួយក្នុងបរិបទសម័យទំនើប បន្ថែមពីលើបរិបទនៃបទគម្ពីរ នោះដំណើររឿងទាំងឡាយអាចជួយសិស្សឲ្យយល់ពីរបៀបដែលគោលការណ៍នៃដំណឹងល្អមួយទាក់ទងទៅនឹងជីវិតរបស់ពួកគេ ក៏ដូចជាជួយពួកគេឲ្យមានបំណងប្រាថ្នាដើម្បីអនុវត្តតាមវាផងដែរ » ( Gospel Teaching and Learning Handbook [ ឆ្នាំ២០១២ ] ៥.៥ ) ។

សូមដាក់បង្ហាញរូបភាពអមនៃ បងប្រុស ចូច រីកហ្វ័ដ ៖

រូបភាព

បងប្រុស ចូច រីកហ្វ័ដ

សូមអញ្ជើញសិស្សម្នាក់ឲ្យអានដំណើររឿងអំពីបុរសម្នាក់ឈ្មោះ ចូច រីកហ្វ័ដ ដូចតទៅនេះឲ្យឮៗ ៖

នៅឆ្នាំ ១៩៦៩ ចច រីកហ្វ័ដ ដែលជាយុវមជ្ឈិមវ័យម្នាក់រស់នៅក្នុងរដ្ឋលេសេសស្ទើរ ប្រទេសអង់គ្លេស បានជួបនឹងពួកអ្នកផ្សព្វផ្សាយសាសនាមកពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដំបូងឡើយ ចូច បានបដិសេធនឹងសារលិខិតរបស់ពួកគេ ប៉ុន្តែនៅទីបំផុត លោកបានចាប់ផ្ដើមជួបនឹងពួកអ្នកផ្សព្វផ្សាយសាសនា ។ បន្ទាប់ពីការស៊ើបអង្កេតដ៏ដិតដល់អស់រយៈពេលបីខែមក នៅព្រឹកមួយ ចូចបានក្រោកឡើងពី ដំណេកជាមួយនឹងការជឿជាក់ថា សាសនាចក្រនេះគឺជាសាសនាចក្រពិត ។

ចូច មានចិត្តអន្ទះសារចង់ចែកចាយទីបន្ទាល់ថ្មីរបស់លោកជាមួយនឹងពួកអែលឌើរ ប៉ុន្តែពីមុនលោកអាចធ្វើកិច្ចការនោះបាន ពួកគេបានជម្រាបលោកថា លោកពុំអាចទទួលបព្វជិតភាពបានទេ ប្រសិនបើលោកចូលរួមនឹងសាសនាចក្រ ដោយសារតែលោកមានខ្សែស្រឡាយនឹងសាសន៍អាហ្វ្រិកស្បែកខ្មៅ ។

ចូច មានចិត្តរន្ធត់ពេលបានឮដំណឹងនេះ ។ លោកបាននឹកចាំថា « ខ្ញុំបានមានប្រតិកម្មយ៉ាងខ្លាំង ។ ខ្ញុំបានខឹងសម្បារ ហើយបន្ទាប់ពីការពិភាក្សាដ៏ក្ដៅមួយចំនួនមក ខ្ញុំក៏បានបណ្ដេញពួកគេចេញ ។… ខ្ញុំបានស្ដីបន្ទោសពួកគេខ្លាំងៗអំពីការរើសអើង និងពូជសាសន៍និយម និងពាក្យពេចន៍គ្រប់បែបយ៉ាង » ។

ពេលពួកអ្នកផ្សព្វផ្សាយសាសនាបានចេញទៅ ចូចបានយំ ។ ( សូមមើល Elizabeth Maki « I Will Take It In Faith » នៅលើគេហទំព័រ history.ChurchofJesusChrist.org ) ។

សូមឲ្យសិស្សបើកទៅផ្នែកទី ១ នៃឯកសាររៀបចំ ។ សូមសួរសំណួរដូចតទៅនេះដល់ពួកគេ ដោយទុកពេលខ្លះឲ្យពួកគេពិចារណាពីរបៀបដែលពួកគេឆ្លើយតប ៖

ប្រសិនបើមនុស្សម្នាក់បានសួរអ្នកថា ហេតុអ្វីបានជាការរឹតបន្តឹងបព្វជិតភាព និងព្រះវិហារបរិសុទ្ធកើតមាន តើចំណុចចម្បងដែលអ្នកចង់ពិភាក្សាគឺជាអ្វី ? ( សូមគិតពីការសរសេរចម្លើយរបស់សិស្សដាក់លើក្ដារខៀន ) ។

សូមអញ្ជើញសិស្សឲ្យសញ្ជឹងគិតពីសំណួរដែលពួកគេអាចមានអំពីការរឹតបន្តឹងបព្វជិតភាព និងព្រះវិហារបរិសុទ្ធ ។ សូមលើកទឹកចិត្តពួកគេឲ្យគិតអំពីសំណួរទាំងនោះអំឡុងមេរៀននេះ ហើយយកចិត្តទុកដាក់នឹងការពិភាក្សា និងការបំផុសគំនិតមកពីព្រះវិញ្ញាណបរិសុទ្ធដែលអាចជួយផ្ដល់ចម្លើយចំពោះសំណួរទាំងនោះ ។

សូមបង្ហាញសេចក្តីថ្លែងការណ៍ដូចខាងក្រោម ហើយសូមអញ្ជើញសិស្សម្នាក់ឲ្យអានវាឲឭៗ ៖

សព្វថ្ងៃនេះ សាសនាចក្រមិនទទួលស្គាល់ទ្រឹស្ដីដែលមានពីអតីតកាលថា ស្បែកខ្មៅគឺជាសញ្ញាមួយនៃការមិនគាប់ចិត្ត ឬបណ្ដាសានៃស្ថានសួគ៌ ឬថាស្បែកខ្មៅឆ្លុះបញ្ចាំងពីសកម្មភាពមិនសុចរិតនៅក្នុងជីវិតមុនជីវិតនៅលើផែនដី ថាអាពាហ៍ពិពាហ៍លាយជាតិសាសន៍គឺជាអំពើបាប ឬថាពួកស្បែកខ្មៅ ឬមនុស្សមកពីសាសន៍ផ្សេងទៀត ឬជាតិពន្ធផ្សេងគ្មានអាទិភាពតាមរបៀបណាមួយចំពោះអ្នកផ្សេងទៀតនោះទេ ។ ថ្នាក់ដឹកនាំសាសនាចក្រនាសព្វថ្ងៃថ្កោលទោសយ៉ាងដាច់ខាតលើរាល់ការរើសអើងពូជសាសន៍ពីអតីតកាល និងបច្ចុប្បន្នកាលតាមគ្រប់ទម្រង់ទាំងអស់ ។( « Race and the Priesthood » Gospel Topics នៅលើគេហទំព័រ topics.ChurchofJesusChrist.org )

ហេតុអ្វីអ្នកគិតថា វាជារឿងដ៏សំខាន់ដើម្បីចៀសវាងការប៉ាន់ស្មានអំពីហេតុផលដែលបានផ្ដល់កាលពីមុន សម្រាប់មូលហេតុដែលការរឹតបន្តឹងបព្វជិតភាព និងព្រះវិហារបរិសុទ្ធនេះបានកើតមាន ?

សូមអញ្ជើញសិស្សឲ្យប្រាប់ពីអ្វីដែលពួកគេដឹងអំពីកាលៈទេសៈដែលបានដឹកនាំទៅរកវិវរណៈមកពីព្រះអម្ចាស់ ដែលបានដាក់ការរឹតបន្តឹងបព្វជិតភាព និងព្រះវិហារបរិសុទ្ធ ។

សូមពន្យល់ថា សេចក្តីប្រកាសជាផ្លូវការទី ២នៅក្នុងគោលលទ្ធិ និង សេចក្តីសញ្ញា មានសេចក្ដីប្រកាសជាផ្លូវការអំពីវិវរណៈដែលបានទទួលដោយប្រធាន ស្ពែនស៊ើរ ដបុលយូ ឃឹមបឹល ព្រមទាំងបានទទួលយក ហើយបានអនុម័តដោយទីប្រឹក្សារបស់លោកនៅក្នុងគណៈប្រធានទីមួយ និងសមាជិកក្នុងកូរ៉ុមនៃពួកសាវកដប់ពីរនាក់នៅខែ មិថុនា ឆ្នាំ ១៩៧៨ ។

សូមឲ្យសិស្សម្នាក់អានកថាខណ្ឌពីរដំបូងនៃសេចក្តីប្រកាសជាផ្លូវការទី ២ នៅក្រោមពាក្យថា « ជូនចំពោះបងប្អូនប្រុសទាំងឡាយ »ដោយស្ងៀមស្ងាត់ ។ សូមឲ្យពួកគេរកមើលអ្វីដែលថ្នាក់ដឹកនាំសាសនាចក្របានមានប្រសាសន៍ដែលពួកគេបានឃើញ ហើយប្រាប់ពីអ្វីដែលពួកគេរកឃើញ ។

បន្ទាប់ទៀត សូមឲ្យសិស្សប្រាប់ពីដំណើររឿងរបស់បងប្រុស ប៊ីលី ចនសុន និងក្រុមជំនុំរបស់គាត់នៅប្រទេសហ្គាណាក្នុងផ្នែកទី ២ នៃឯកសាររៀបចំ ។

តើបុគ្គលទាំងនេះបានបង្ហាញពីគំរូនៃ « ភាពស្មោះត្រង់នៃអ្នកដែលបព្វជិតភាពត្រូវបានដកចេញ » យ៉ាងដូចម្ដេច ?

សូមអញ្ជើញសិស្សម្នាក់ឲ្យអានបន្ថែមទៀតពីដំណើររឿងរបស់ចូច រីកហ្វ័ដ ហើយសូមឲ្យសិស្សក្នុងថ្នាក់ស្ដាប់រករបៀបដែលចចបានជ្រើសរើសដើម្បីធ្វើសកម្មភាពដោយសេចក្ដីជំនឿ បន្ទាប់ពីលោកបានដឹងពីការរឹតបន្តឹងបព្វជិតភាព ៖

ថ្ងៃមួយ ចូច កំពុងនិយាយនឹងមិត្តម្នាក់អំពីបទពិសោធន៍របស់គាត់ជាមួយនឹងពួកអ្នកផ្សព្វផ្សាយសាសនា ហើយបានចាប់ផ្ដើមបង្រៀនមិត្តគាត់អំពីព្យាការីយ៉ូសែប ស្ម៊ីធ ។ គាត់បាននឹកចាំថា « ពេលខ្ញុំបានប្រាប់ពីដំណើររឿងនោះ ខ្ញុំមានចិត្តរំភើបយ៉ាងខ្លាំង ហើយ បានធូរស្រាល » ។

បទពិសោធន៍នោះបានបញ្ជាក់ជាថ្មីដល់ទីបន្ទាល់របស់ចូច ប៉ុន្តែកង្វល់របស់គាត់ពីការរឹតបន្តឹងបព្វជិតភាពនៅតែមានដដែល ។ ពេលគាត់អធិស្ឋានសូមការយល់ដឹងបន្ថែមទៀត សារលិខិតនេះបានកើតមានចំពោះគាត់ ៖ « អ្នកពុំយល់អ្វីគ្រប់យ៉ាងអំពីដំណឹងល្អរបស់យើងឡើយ ពីមុនអ្នកប្ដេជ្ញាចិត្តចំពោះដំណឹងល្អនោះ ។ ហេតុអ្វីអ្នកមិនបង្ហាញសេចក្ដីជំនឿរបស់អ្នកដោយទទួលយកអ្វីដែលអ្នកបានឮ ហើយទុកអ្វីដែលនៅសេសសល់នៅក្នុងព្រះហស្ដរបស់យើង ? »

ដោយបានទទួលការលួងលោមចិត្តមកពីសារលិខិតនោះចូចបានឆ្លើយតបប្រកបដោយការអធិស្ឋានថា « បពិត្រ ព្រះអម្ចាស់ ទូលបង្គំនឹងធ្វើតាម ។ ទូលបង្គំនឹងទទួលយកដំណឹងល្អដោយសេចក្ដីជំនឿ ។ ហើយសូមអរព្រះគុណទ្រង់យ៉ាងខ្លាំង » ។ ពីរខែក្រោយមក ចូចបានជ្រមុជទឹក ហើយបានក្លាយជាសមាជិកដ៏ស្មោះត្រង់ម្នាក់ក្នុងសាសនាចក្រ ។

ចូច បានសរសេរនៅឆ្នាំ ១៩៧៥ ( បីឆ្នាំពីមុនវិវរណៈអំពីបព្វជិតភាព ) ថា លោកបានទទួលយកការរឹតបន្តឹងបព្វជិតភាព « ដោយសេចក្ដីជំនឿ » ហើយបានបង្ហាញជំនឿរបស់គាត់ថា ទោះជាពេលនោះគាត់មានស្ថានភាពបែបណាក្ដី ក៏ព្រះទ្រង់មានយុត្តិធម៌ដែរ ។ « ខ្ញុំមានអំណរគុណដែលបព្វជិតភាពរបស់ព្រះអម្ចាស់មានជាថ្មីម្ដងទៀតលើផែនដីនេះ រួមទាំងរាល់ពរជ័យ សិទ្ធិអំណាច និងការទទួលខុសត្រូវរបស់វា ។ វាពុំមែនជាបញ្ហាចំពោះខ្ញុំនោះទេថានរណាមានវា ឬគ្មាននោះ ប៉ុន្តែសំខាន់គឺរបៀបដែលវាត្រូវបានប្រើប្រាស់ » ។ ( នៅក្នុង Maki « I Will Take It in Faith » នៅលើគេហទំព័រ history.ChurchofJesusChrist.org )

តើយើងអាចរៀនអ្វីខ្លះ មកពីគំរូរបស់ចូច រីកហ្វ័ដដែលអាចជួយយើង ពេលយើងមានសំណួរដែលគ្មានចម្លើយអំពីដំណឹងល្អ ? ( បន្ទាប់ពីសិស្សបានចែកចាយហើយ សូមសរសេរសេចក្ដីពិតដូចតទៅនេះដាក់នៅលើក្ដារខៀន ៖ នៅពេលយើងមានសំណួរដែលគ្មានចម្លើយ យើងអាចឆ្ពោះទៅមុខដោយសេចក្ដីជំនឿបាន ពេលយើងពឹងផ្អែកលើពន្លឺ និងចំណេះដឹងដែលព្រះបានប្រទានដល់យើង ) ។
តើសេចក្ដីពិតដ៏មុតមាំអាចជួយមនុស្សម្នាក់ដែលអាចនឹងមានបញ្ហាជាមួយនឹងសេចក្ដីជំនឿរបស់គាត់ ដោយសារតែសំណួរដែលគ្មានចម្លើយអំពីដំណឹងល្អតាមរបៀបណា ?

សូមឲ្យសិស្សម្នាក់អានសេចក្ដីថ្លែងការណ៍ខាងក្រោមនេះឲ្យឮៗមកពីអែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ ៖

រូបភាព
អែលឌើរ នែល អិល អាន់ឌើរសិន

សេចក្ដីជំនឿពុំដែលចង់បានចម្លើយគ្រប់សំណួរនោះទេ ប៉ុន្តែស្វែងរកការអះអាង និងសេចក្ដីក្លាហានដើម្បីឆ្ពោះទៅមុខ ពេលខ្លះដោយទទួលស្គាល់ថា « ខ្ញុំពុំដឹងអ្វីគ្រប់យ៉ាងទេ ប៉ុន្តែខ្ញុំដឹងល្មមគ្រប់គ្រាន់ដើម្បីបន្តលើផ្លូវនៃភាពជាសិស្ស » ។ ( នែល អិល អាន់ឌើរសិន « Faith Is Not by Chance, but by Choice » Ensign ឬ Liahona ខែ វិច្ឆិកា ឆ្នាំ ២០១៥ ទំព័រ ៦៦ )

តើពន្លឺ និងចំណេះដឹងដែលព្រះបានប្រទានដល់អ្នកបានជួយអ្នកឲ្យឆ្ពោះទៅមុខដោយសេចក្ដីជំនឿយ៉ាងដូចម្ដេច ពេលអ្នកបានជួបនឹងសំណួរដែលគ្មានចម្លើយ ឬស្ថានភាពពុំប្រាកដប្រជា ?
តើយើងអាចជួយមនុស្សម្នាក់ដែលកំពុងជួបនឹងសំណួរដែលគ្មានចម្លើយឲ្យឆ្ពោះទៅមុខតាមរបៀបណា ?

សូមទុកពេលឲ្យសិស្សពិចារណាពីរបៀបដែលពួកគេអាចអនុវត្តតាមគោលការណ៍នៃការធ្វើសកម្មភាពដោយសេចក្ដីជំនឿក្នុងជីវិតរបស់ពួកគេផ្ទាល់ ឬប្រើវាដើម្បីជួយមនុស្សម្នាក់ដែលពួកគេស្គាល់ ។ សូមឲ្យសិស្សពិចារណាកត់ត្រាផែនការណ៏របស់ពួកគេនៅក្នុងសៀវភៅកំណត់ហេតុរបស់ពួកគេ ។

ពរជ័យបព្វជិតភាព និងព្រះវិហារបរិសុទ្ធ ឥឡូវនេះគឺមានចំពោះសមាជិកសាសនាចក្រគ្រប់រូបដែលសក្ដិសម ។

សូមអញ្ជើញសិស្សម្នាក់ឲ្យអានឮៗនូវកថាកណ្ឌទីបី និងទីបួននៅក្រោម « ជូនចំពោះបងប្អូនប្រុសទាំងឡាយ » នៅក្នុងសេចក្តីប្រកាសជាផ្លូវការទី ២ ដោយចាប់ផ្ដើមជាមួយនឹង « ទ្រង់បានឮពាក្យអធិស្ឋានទាំងឡាយរបស់យើង » ។

តើយើងអាចរៀនអ្វីខ្លះមកពីកថាកណ្ឌទាំងនេះ អំពីរបៀបដែលព្រះអម្ចាស់ដឹកនាំសាសនាចក្ររបស់ទ្រង់ ? ( បន្ទាប់ពីសិស្សឆ្លើយតប សូមសរសេរសេចក្ដីពិតដូចតទៅនេះនៅលើក្ដារខៀន ៖ ព្រះអម្ចាស់ដឹកនាំសាសនាចក្ររបស់ទ្រង់តាមរយៈវិវរណៈទៅកាន់ពួកព្យាការីរបស់ទ្រង់ ) ។
តើនៅពេលណាដែលអ្នកបានឃើញព្រះអម្ចាស់ដឹកនាំសាសនាចក្ររបស់ទ្រង់តាមរយៈវិវរណៈទៅកាន់ពួកព្យាការីរបស់ទ្រង់នៅក្នុងជីវិតរបស់អ្នក ?

សូមពន្យល់ថា ក្រោយពីថ្ងៃដែលវិវរណៈអំពីបព្វជិតភាពត្រូវបានទទួល ចូច រីកហ្វ័ដ ត្រូវបានតែងតាំងជាសង្ឃនៅក្នុងបព្វជិតភាពអើរ៉ុន ហើយមិនយូរប៉ុន្មានបានទទួលបព្វជិតភាពមិលគីស្សាដែក ។ នៅខែ តុលា ឆ្នាំ ១៩៧៨ ចូច និងភរិយារបស់គាត់ឈ្មោះ ជូន ត្រូវបានផ្សារភ្ជាប់នឹងគ្នា ព្រមទាំងនឹងកូនបួននាក់របស់ពួកគេជាគ្រួសារដ៏អស់កល្បមួយនៅក្នុងព្រះវិហារបរិសុទ្ធឡុងដុង ប្រទេសអង់គ្លេស ( សូមមើល Maki « I Will Take It in Faith » នៅលើគេហទំព័រ history.ChurchofJesusChrist.org ) ។

តើវិវរណៈនោះមានឥទ្ធិពលអ្វីខ្លះលើសាសនាចក្រ សមាជិករបស់សាសនាចក្រ និងមនុស្សជុំវិញពិភពលោកនេះ ?

ដំណឹងល្អនៃព្រះយេស៊ូវគ្រីស្ទគឺសម្រាប់មនុស្សគ្រប់គ្នា ។ ព្រះគម្ពីរមរមនចែងថា « ទាំងខ្មៅ ទាំងស ទាំងបាវគេ និងសេរី ទាំងប្រុស និងស្រី … ដូចគ្នាចំពោះព្រះ » ( នីហ្វៃទី ២ ២៦:៣៣ ) ។ នេះគឺជាការបង្រៀនជាផ្លូវការរបស់សាសនាចក្រ ។( « Race and the Church: All Are Alike Unto God » ថ្ងៃទី ២៩ ខែ កុម្ភៈ ឆ្នាំ ២០១២ នៅលើគេហទំព័រ newsroom.ChurchofJesusChrist.org )

ដើម្បីបញ្ចប់មេរៀននេះ សូមអញ្ជើញសិស្សឲ្យពិចារណា ( ឬអនុវត្តតាម ) ដោយផ្អែកទៅលើអ្វីដែលពួកគេបានរៀននៅថ្ងៃនេះ អំពីរបៀបដែលពួកគេអាចឆ្លើយតប ប្រសិនបើពួកគេត្រូវគេសួរថា ហេតុអ្វីសាសនាចក្រពុំបានតែងតាំងបព្វជិតភាពដល់សាសន៍អាហ្វ្រិកស្បែកខ្មៅនៅគ្រាមួយនោះ ។ សូមគូសបញ្ជាក់ថា វាសមរម្យដើម្បីពន្យល់ដល់មនុស្សដទៃថា យើងពុំដឹងពីហេតុផលដែលការរឹតបន្តឹងបព្វជិតភាព និងព្រះវិហារបរិសុទ្ធបានចាប់ផ្ដើមនោះទេ ។ ប៉ុន្តែយើងអាចចែកចាយ ហើយថ្លែងទីបន្ទាល់ពីសេចក្ដីពិតដែលយើងបានដឹង រួមបញ្ចូលទាំងសេចក្ដីពិតដែលបានពិភាក្សានៅថ្ងៃនេះផងដែរ ។

សម្រាប់ពេលក្រោយ

សូមពន្យល់ដល់សិស្សថា ដើម្បីរៀបចំខ្លួនសម្រាប់សប្ដាហ៍ក្រោយ ពួកគេនឹងសិក្សាពីអ្វីដែលពួកព្យាការី ទាំងពីបុរាណ និងសម័យទំនើប បានបង្រៀនអំពីជោគវាសនានៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ សូមលើកទឹកចិត្តសិស្សឲ្យត្រៀមខ្លួនពិភាក្សាពីរបៀបដែលពួកគេអាចជួយនៅក្នុងកិច្ចការនៃសេចក្ដីសង្គ្រោះរបស់ព្រះអម្ចាស់នៅថ្ងៃចុងក្រោយ ។