Mataupu 29

Alema 30–31

Folasaga

Mataupu 30–31 o Alema o loo faailoa ai tagata ma manatu ia e tetee ai ia Iesu Keriso. Sa saunoa mai Peresitene Ezra Taft Benson (1899–1994) e faapea:

“O le Tusi a Mamona e aumaia ai tagata ia Keriso e ala i auala faavae e lua. Muamua, o lo o faamatalaina i se auala manino e uiga ia Keriso ma lana talalelei. …

“Lona lua, o le Tusi a Mamona ua faailoa mai ai fili o Keriso. Ua faafememea’iina ai mataupu pepelo ma faaiuina ai foi finauga. (Tagai 2 Ni. 3:12.) Ua faamalolosia ai soo lotomaualalo o Keriso e tetee atu i le tiapolo, taupulepulega leaga, ma mataupu a le tiapolo i o tatou aso. O ituaiga o tagata faatautee o loo i le Tusi a Mamona e tutusa lava ma ituaiga o tagata o loo i ai i aso nei. O le Atua, faatasi ma lona poto e le mafaatusalia na te muai silafia ai mea o le a oo mai, na ia fuafuaina ai le Tusi a Mamona, ina ia tatou iloa ai le sese ma iloa ona tetee atu i aoaoga sese, o upu fai o malo, faalelotu, atoa ma talitonuga sese e uiga i o tatou nei aso.” (i le Conference Report, Ape. 1975, 94–95; po o leLiahona, Aok. 1975, 22 23).

E ala i le suesueina o le auala na saili atu ai ia Korioa e faaumatia le faatuatua o sa Nifae, o le a sili atu ona e iloa na lava finauga faataumaoi e tasi i o tatou aso. E ala i le suesueina o le tali atu a Alema ia Korioa, o le a saunia lelei ai oe e puipuia oe lava ia ma isi mai ia i latou o le a faaumatiaina lou faatuatua.

Faamatalaga

Alema 30. O Korioa o Ona Po Nei

• Sa faamanino mai e Elder Gerald N. Lund, o se tasi sa avea muamua ma Fitugafulu, e faapea e tele foi Korioa o i ai i ona po nei:

  “O le asō, ua faatumulia le lalolagi i filosofia e tali tutusa ma mea na sa aoaoaina e Korioa. Ua tatou faitau i ai i tusi, vaaia na mea o faalauiloa ai i tifaga ma luga o televise, ma faalogoina ua aoaoina i potuaoga ma isi taimi i le lotu i o tatou taimi. …

  “… Ua tatou vaai i le manino o faamaoniga o musumusuga na oo ia Mamona e tuuina mai ia i tatou le faamatalaga atoa o Korioa ma ana aoaoga. O aoaoga a Korioa o mataupu tuai, ae e pei lava o ni manatu faaonapo nei e pei o le saosaoa o le lolomi o falelomitusi ma satelite o aso nei” (“Countering Korihor’s Philosophy,” Ensign, July 1992, 20).

Alema 30:6. Aneti-Keriso

• O loo faamatala mai i le Lomifefiloi o le Tusi Paia e faapea o se aneti-Keriso o se “tagata po o se mea e faaseseina le moni o le talalelei po o le ata o le faaolataga ma ua faatuina faalilolilo pe faalauaitele foi e tetee ai ia Keriso. O le anetikeriso maoae lava o Lusifelo, ae e toatele agaga ma tagata foi o loo fesoasoani ia te ia.

  Sa aoao atili mai e Elder Bruce R. McConkie (1915–85) o le Korama a Aposetolo e Toasefululua: “O se anetikeriso o se tagata e faasagatau ia Keriso; o ia ose tasi o loo faatautee i le talalelei moni, o le Ekalesia moni, ma le ata moni o le faaolataga. (1 Ioane 2:19; 4:4–6.) O ia o se tasi ua ofoina atu le faaolataga i tagata i se isi tulaga nai lo mea ia ua faataatia e Keriso. O Serema (Iak. 7:1–23), Neoa (Alema 1:2–16), ma Korioa (Alema 30:6–60) o anetikeriso ia na latou faasalalauina o latou talitonuga sese i sa Nifae” (Mormon Doctrine, 2nd ed. [1966], 39–40).

Alema 30:7, 11. “Sa le Faatulafonoina le Faatuatua o se Tagata”

• Ana faapea sa “le faatulafonoina le faatuatua o se tagata,” atonu e ono fesili ni tagata pe aisea la na molia ai Korioa. Sa tuuina atu e le Tupu o Mosaea se folafolaga e folafola atu ai o se solitulafono i sa Nifae mo soo se tasi “e le talitonu na te faasalaina soo se isi o i latou e auai i le ekalesia a le Atua” (Mosaea 27:2).

  E manino lava, e pule foi Korioa ia i ona talitonuga, ae ina ua ia saili atu e faaumatia le Ekalesia, sa ia solia ai le folafolaga a le Tupu o Mosaea. E faananau lava e matau le mea lea, e ui lava o le toatele o tagata i Saraemila sa taliaina Korioa ma ana aoaoga, e oo foi i le nuu o Amona o e na mulimuli ma ola i le tele o taimi o lo latou soifuaga i talitonuga faaKorioa, “ua poloai atu ia aveeseina o ia ai le nuu” (Alema 30:21; tagai foi fuaiupu 18–20). Sa latou malamalama i le matautia o aoaoga a Korioa.

Alema 30:12–18

E faapefea e aoaoga a Korioa ona talafeagai ma finauga o loo faaaogaina e osofai ai lo tatou faatuatua i nei aso?

Alema 30:12–18. O Taupulepulega Leaga a Korioa

• Korioa

  Scott Snow, © 1982 IRI

  Sa faamalamalama mai e se tasi o faiaoga o le talalelei le vavalalata o filosofia a Korioa ma le tele o filosofia faaonapo nei: “Sa manao lava Korioa e tali faafitauli uma i le poto faasaienitisi ma faalemafaufau lava ia, ae o se isi lava mea ua na o ‘le fua lea o se mafaufau valea’ (Alema 30:13–16); sa ia taumafai malosi e tetee atu i pulega o uputuu anamua ma talitonuga faaanamua, lea na taitai atu ai tagata e talitonu i mea ia ‘e le tonu’ (Alema 30:16), ua ia valaau atu mo se faasaolotoina mai ‘uputuu faavalea a o latou tama’ (Alema 30:31). Sa ia valaau atu mo ni uiga fou ma le aveesea o tapu anamua (Alema 30:17–18, 25). Sa ia valaau atu mo le saolotoga tau tamaoaiga mai le soona puleaina e ositaulaga (Alema 30:27), ma le manao tele ina ia saoloto uma tagata ‘e faaaoga a latou lava mea’ (Alema 30:28). Sa ia talai atu se tulaga faalenatura e matua leai lava ma sona uiga: ‘Pe a oti le tagata o lona iuga lea’ (Alema 30:18), ma o ona taunuuga, ua na o mea lava ia faitino: ‘A ia taitasi le tagata i lenei olaga e tusa ma le faatatau o tagata’ (Alema 30:17). E mulimuli mai i lenei mea se filosofia faigofie ma le maoti o le lē aia fua o le tasi i mea e fai e le isi: ‘O lea e faamanuiaina ai tagata taitoatasi e tusa ma lona atamai, ma … ua manumalo tagata taitoatasi e tusa ma lona malosi,’ faatasi ai ma le sa’o ma le sese lea ua na o le tulafono mautu o le natura o le manuia ma le toilalo e fuatiaina ai: ‘Ma lea foi, soo se mea ua faia e le tagata e le agasala ai o ia’ (Alema 30:17). O le tulafono o lē pito sili ona malosi sa faaaogaina e fuatia ai amioga faaletagata, ma le aveesea o amioga anamua ma le taofia o amioga agamalu o se tala e lelei lea i le tele o tagata, ‘ua faamaualuga i latou i la latou amioleaga, ioe, sa taitaieseina fafine e toatele atoa ma tane … ia faitaaga ai’ (Alema 30:18). Faatasi ai la ma ona uiga na o le fia saoloto sa faatupuina ai e Korioa se au tau anoanoa’i ma feeseeseaiga o soo se itu tetee, lea ua maeaea lelei ona faauigaina ai ona mafaufauga i ona po nei, ua faaigoaina ai ia itu tetee uma o ‘mea faavalea’ (Alema 30:13–14), ‘faavalea’ (Alema 30:31), ma le faamaoniga o mafaufau valea ma manatu valea (Alema 30:16). Ma e ui mo Alema lava ia o se nuu saoloto o se nuu lea e pule lava soo se tagata i le mea e mafaufau i ai ma tautala i le mea e filifili i ai (Alema 30:7–12), ae mo Korioa ua na o le pau le nuu saoloto o le nuu lea e mafaufau tonu lava tagata uma i le mea la e na te mafaufau i ai (Alema 30:24)” (Hugh W. Nibley, Since Cumorah, 2nd ed. [1988], 379–80).

Alema 30:15–16. O Aoaoga Sese a Korioa

• O le aoaoga a Korioa e faapea “e le mafai ona outou iloa ia mea tou te le vaavaai i ai” o se filosofia o manatu uma ma le malamalama ia e sau mai i aafiaga ma e mafai ona faataitaia e ala i aafiaga ma na o le pau le auala e mafai ai ona tatou iloa na mea ua lofituina ai tatou e ala i o tatou lagona: vaai, sogisogi, tagotago, faalogo, po o le tofo. E talu ai la o aafiaga faaleagaga e aofia ai faaaliga mai le Atua e seasea oo mai e ala i sane o le vaai, sogisogi, tagotago, faalogo, po o le tofo, o i latou e talitonu i le filosofia a Korioa o le a latou faitauina ia faaaliga e leai se uiga.

  Sa faamatalaina e Peresitene Boyd K. Packer o le Korama a Aposetolo e Toasefululua, se aafiaga sa ia mauaina lea sa faailoa ai le mea moni e faapea o mea faaleagaga e le patino le aofia ai o sane e lima:

  “O le a tau atu ia te outou se aafiaga na ou maua a o lei avea au ma se Pulega Aoao lea na aafia loloto ai au. A o ou nofo i luga o le vaalele e sosoo ma se tagata e faafoliga mai o sē e le talitonu i le Atua o le na faailoa mai lona le talitonu i le Atua na faafuasei ai ona tuuina atu lau molimau ia te ia. ‘E sese oe,’sa ou fai atu ai, ‘o lo o i ai se Atua. Ou te iloa o lo o soifua o Ia!’

  “Sa ia tetee, ‘E te le iloa. E leai se isi e iloa lena mea! E le mafai ona e iloaina foi!’ Ae ou te lei toe fai atu, sa fesili mai le tagata lea e le talitonu i le Atua, o ia o se loia, i se fesili atonu o le fesili faigata lea i le mataupu o le molimau. ‘Ia ua lelei,’ sa ia fai mai ai i se auala aamu ma faasausili, ‘ua e fai mai e te iloa. Tau mai ia te au pe faapefea ona e iloa.’

  “A o ou taumafai e tali atu, e ui lava e i ai o’u faailoga maualuluga faaleaoaoga, sa ou le maua se fesoasoani e talanoa ai.

  “I nisi o taimi i lou talavou, o outou o faifeautalai talavou e maasiasi pe a faalumaina outou e tagata faitio ma le le talitonu ona ua leai ni a outou tali ua saunia mo mea uma. A o le i tauemuina, o nisi e liliu ese i le maasiasi. (Manatua le ai uamea, le fale tele, ma le tauemuina? Tagai 1 Ne. 8:28.)

  “Ina ua ou faaaogaina ia upu Agaga ma lemolimau, sa tali mai le tagata lea e le talitonu i le Atua, ‘Ou te le iloa le uiga o le mea o loo e tautala ai.’ O upu tatalo, iloaina o le lelei ma le leaga, ma le faatuatua, sa tutusa lelei foi le leai o ni uiga ia te ia. ‘Ua e vaai la,’ sa ia fai mai, ‘e te le iloaina foi. Ana faapea e te iloa, o le a mafai ona e tau mai ia te au pe faapefea ona e iloa.’

  “Sa ou lagonaina, atonu, sa ou tuuina atu lau molimau ia te ia ma le le atamai ma ua ou toilalo ai e tusa ma le mea e fai. Ona oo mai lea o le aafiaga! Sa oo mai se mea i lou mafaufau. Ma ua ou ta’ua ai i i se faamatalaga a le Perofeta o Iosefa Samita: ‘E mafai ona manuia se tagata e ala i lona iloa o se uluai faailoga o le agaga o faaaliga; mo se faataitaiga, pe a e lagonaina le solosolo lelei o le atamai ua ia te oe, e mafai ona ia avatu ia te oe ni manatu faafuasei … ma o lea e ala i le iloaina o le Agaga o le Atua ma malamalama i ai, o le a mafai ai ona e tuputupu ae i mataupu faavae o faaaliga, seia oo lava ina faaatoatoaina oe ia Keriso Iesu.’ (Teachings of the Prophet Joseph Smith, comp. Joseph Fielding Smith, Salt Lake City: Deseret Book Co., 1977, p. 151.)

  “O se manatu faapena na oo mai i lo’u mafaufau ma ou faapea atu ai loa i le tagata lea e le talitonu i le Atua, ‘Sei ou fesili atu lava pe e te iloaina pe faape’ī le tofo o le masima.’

  ‘“Ioe ou te iloa,’ o lana tali lena.

  “‘O anafea na e tofo mulimuli ai i le masima?’

  “‘Faatoa uma la’u ‘aiga i luga o le vaalele.’’

  “‘O lena e te mafaufau e te iloaina le tofo o le masima,’ sa ou fai atu i ai.

  “Sa ia fai mai lava, ‘Ou te iloaina le tofo o le masima e pei ona ou iloaina o soo se mea lava.’

  ‘“Afai ou te avatu ia te oe se iputi masima ma se iputi suka ma e tofoina uma na mea e lua, pe mafai ona e iloa le eseesega o le masima mai le suka?’

  “‘O lena la o le a e faatamaitiiti,’ o lana tali lea. ‘Ioe e mafai ona ou iloa le eseesega. Ou te iloa le tofo o le masima. O se aafiaga o aso uma —ou te iloa lelei e pei foi ona ou iloa o soo se mea.’

  “‘Ia,’ ona ou fai atu lea, ‘manatu la e faapea ou te lei tofo lava i le masima, faamatala mai la ia te au pe faapei’ī lona tofo.’

  “Ina ua uma ona tau mafaufau, sa ia taumafai ma le lototoa e tau faamatala mai, ‘Ia e-e-e le suamalie ma e le oona foi.’’

  “Ua e ta’u maia le mea e le o i ai, ae le o le mea tonu o i ai.’

  “Ina ua maea nai ana taumafaiga, ioe, e lei mafai ona ia faia. E lei mafai ona ia tauina mai i upu lava ia, se aafiaga masani o le tofoina o le masima. Sa ou toe molimau atu ia te ia ma faapea atu, ‘Ou te iloa o loo i ai se Atua. Sa e faaamuamu i lena molimau ma e faapea mai afai ou te iloa, o le a mafai ona ou tauina atu tonu ia te oe pe faapefea ona ou iloa. Lau uo e, ou te tautala atu faaleagaga, ua ou tofo i le masima. E le mafai lava ona sili atu ona ou faamatalaina ia te oe i upu le auala na oo mai ai lenei malamalama nai lo lou tauina mai ia te au pe faape’ī le tofo o le masima. Ae ou te toe fai atu ia te oe, o loo i ai se Atua! O loo soifua o Ia! Ma talu ai e te le iloaina, aua la e te taumafai e tau mai ia te au ou te le iloaina, aua ou te iloa!’

  “A o ma faamavae, sa ou faalogo atu o loo ia tomumu, ‘Ou te le manaomia le tou lotu mo se fesoasoani! Ou te le manaomia.’

  “Talu mai lena aafiaga, ou te le i toe matamuli pe ma ona e le o mafai ona ou faamatalaina i upu lava ia mea uma ou te iloaina faaleagaga” (“The Candle of the Lord,” Ensign, Ian. 1983, 51–52).

Alema 30:17. Sa Aoao Atu e Korioa e faapea “Soo se Mea e Faia e le Tagata” E Le Agasala Ai

• E tusa lava po o le a le mea o talitonu i ai nisi tagata o le lalolagi, o loo aoao mai e le talalelei e faapea e leai se mea e ta’ua o se ituaiga o sootaga taua. O nisi aganuu ua foliga mai ua faatagaina ai pe faamalosia foi lenei fesootaiga saoloto i le olaga, ua faamalosia ai ituaiga togafiti o le le faamaoni i faigamalo, pisinisi, ma sootaga faaletagata. Ae ui i lea, ua aoaoina i tatou e le Tusi a Mamona, e i ai se sa’o ma sese ma ua tuuina mai ia i tatou le ki lea e faamasino atu ai (tagai Moronae 7:16–17).

• O le filosofia a Korioa e faapea e manuia se tagata “e tusa ma lona atamai; ma ua manumalo tagata taitoatasi e tusa ma lona malosi” ua faamutaina ai le manaomia o le Atua i o tatou olaga. O lana filosofia e faapea “soo se mea ua faia e le tagata e le agasala ai o ia” o le a faatupuina ai se manatu faapito ma se ituaiga o sootaga taua i le tagata.

• Sa faaali mai e Elder Neal A. Maxwell (1926–2004) o le Korama a Aposetolo e Toasefululua le manatu faapito o Korioa i ana aoaoga:

  “O nisi o ē manatu faapito ua talitonu sese e faapea afai e leai se tulafono e leai se agasala (tagai 2 Nifae 2:13). O le mea lea, ua fuafuaina e vaega o tagata manatu faapito, ni tu ma aga e fetaui lelei ma le manatu faapito. I le pulea la e se tagata o ia lava, e mafai ona ia manumalo i lona malosi ma lona atamai, aua ua manatu e le agasala ai o ia (tagai Alema 30:17).

  “E le o se mea foi e ofo ai, o le manatu faapito e taitaiina atu i mea sese matuia ma amioga faavalevalea faifai pea. Mo se faataitaiga, na faaleagaina lava Kaino i lona sailia o le pule, na ia faapea ai ina ua mavae ona ia fasiotia o Apelu, ‘Ua ou saoloto’(Mose 5:33; tagai foi i le Mose 6:15).

  “O le mea lea, o se tasi o taunuuga aupito sili ona leaga o le manatu faapito matuia, o le matua leiloa po o le fea e faataua, e pei o le le fetaui o le folo o le namu ae faapili le kamela (tagai Mataio 23:24; tagai foi Joseph Smith Translation, Matthew 23:21, footnote 24a). Mo se faataitaiga, o aso nei, o loo i ai i latou e matua popole i namu eseese ae folo le faapa’u o se pepe o le a fanau. O le mea lea, e le o se mea foi e ofo ai, le faateleina e le manatu faapito o le atasema tunu i se taumafataga ma avea tupe siliva e 30 e faapei o se tamaoaiga tele” (i le Conference Report, Ape. 1999, 29; po o le Liahona, Iul. 1999, 27 28).

Alema 30:20–23. O Aoaoga a Taitai Faalelotu

• Sa faafeiloai e le faitaulaga sili o Kitona ia Korioa ma fesili ia te ia pe aisea ua ia tautala ai e tetee i perofeta ma tetee i le moni o Iesu Keriso. Sa fe’alofa’i Korioa mai le fesili ma amata se osofaiga i faaupuga e faasagatau ai i e talitonu ma o latou taitai. Sa ia saili atu e fai ia foliga o se mea e faavalevalea mo soo se tasi e mulimuli i o latou taitai faalelotu. Sa aoao mai e Peresitene Henry B. Eyring o le Au Peresitene Sili le faafeagai:

  “Sa faitio Korioa e pei lava ona faitio sese alii ma tamaitai mai lava i le amataga, e faapea o le taliaina o fautuaga mai auauna a le Atua o le aveesea lea o le aia faaletagata lava ia na tuuina mai e le Atua. E sese faitioga, aua o loo taitaieseina ai le mea moni. A tatou teenaina le fautuaga lea e mai le Atua, tatou te le filifili la ina ia tatou tutoatasi i aafiaga o loo i fafo atu. Tatou te filifilia se isi aafiaga. Tatou te teenaina le puipuiga a se Tama Faalelagi e atoatoa lona alofa, e i ai le mana uma, ma o lona faamoemoega atoa e pei ona i ai i Lona Alo Pele, o le tuuina mai lea ia i tatou o le ola e faavavau, ia tuu mai ia i tatou mea uma o loo ia te Ia, ma toe aumaia i tatou i lona afioaga o ni aiga i aao o Lona alofa. A teenaina Lana fuafuaga, ua tatou filifilia le aafiaga a se isi mana, o lona faamoemoega o le aumaia lea o le faanoanoa ia i tatou ma o ona faamoemoega e inosia lea. Ua ia te i tatou le filifiliga saoloto o se meaalofa lea a le Atua. O le aia lena tatou te filifili ai ina ia tatou saoloto mai aafiaga, o le aia lena e le mafai ona aveesea lea tatou te gauai atu ai po o fea o na mana tatou te filifilia.

  “O se tasi o taufaasese o le talitonu lea e faapea o le filifiliga e talia po o le le taliaina o fautuaga a perofeta e le sili atu nai lo le fuafua pe talia fautuaga lelei ma maua ai ona faamanuiaga po o le tumau ai pea i le mea o loo i ai. Ae o le filifiliga e aua le taliaina fautuaga faaperofetaga e suia ai le tulaga o loo tatou i ai. O le a matuai sili lava ona leaga. O le toilalo e taliaina fautuaga a perofeta e faaitiitia ai lo tatou malosiaga e taliaina ai fautuaga musuia i le lumanai. O le taimi sili lava na fesoasoani ia Noa ina ia fausia le vaa o le taimi muamua lava na talosagaina ai o ia. O taimi uma lava na ia fesili ai ina ua mavae lena, o le leai foi lena o se tali ma faaitiitia ai lona malamalama i le Agaga. Ma o taimi uma lava e foliga mai ai e faavalevalea lana talosaga, seia oo lava ina ua to mai le timu. Ma ua tuai lava” (i le Conference Report, Ape. 1997, 33; po o le Liahona, Iul. 1997, 29).

  Aiga o lo o suesueina ata o Iosefa Samita ma Peresitene Hinckley

  © 2000 Steve Bunderson

Alema 30:25. O Aneti-Keriso e Masani Ona Faaaogaina ia Upumoni e le Sao Atoatoa

• O se tasi o mailei e masani lava ona faaaogaina e i latou o e taumafai e faaumatia le faatuatua ua ta’ua o se finauga a se tagata vaivai ua pupuni ai le moni o se mea. E fai lenei mea e ala i le faatuina o se foliga sese—o se tagata vaivai e pupuni ai le moni —o le upumoni ma ia osofaia ai le foliga sese ina ia faatalitonu ai isi o le foliga moni lava e sese. O se faataitaiga faigofie lava o lenei mea o se tamaitiiti ua tuuaia ona matua i le le faatagaina o ia e alu e taaalo sei iloga lava e maea uma ana feau e faapea e le o manao ona matua ia te ia ina ia fiafia. O se mafuaaga sese lenei, ae e faaaoga soo lava e faaseseina ai isi.

  O nisi taimi e faapea mai ai isi tagata o le Au Paia o Aso e Gata ai e talitonu i se mea lea tatou te le talitonu i ai. Latou te faapea mai o le talitonuga sese e sese, ma e faaali mai lava e sese. E le o i ai ma se afaina o le mea lea tatou te talitonu moni ai lava ae o se taumafaiga e faafoliga ai o tatou e sese. Sa faia e Korioa le mea lenei ia Kitona: “O lenei finauga ua ta’ua o le tagata e fai i le aputi o saito. O lona uiga, sa ia faauigaina ia Kitona se mea sa lei talitonu i ai Kitona— o le manatu e faapea ua tausalaina fanau ona o le agasala a Atamu. Sa iloa e Korioa e le mafai ona ia finau lelei i le upu moni ma manumalo ai, o lea na ia faamatala atu ai mataupu leaga ia Kitona, o se tagata e fai i le aputi o saito e mafai ona sasaina i faaupuga lelei” (Joseph Fielding McConkie and Robert L. Millet, Sustaining and Defending the Faith [1985], 90).

Alema 30:29. Aloese mai Tauaiupuga ma Finauga

• Sa aoao mai e le Perofeta o Iosefa Samita (1805–44) e faapea e tatau ona tatou aloese mai fefinauaiga: “Ia tuu atu i Toeaiina ina ia matua faaeteete e uiga i vevesi e le manaomia ma le faamanualiaina o lagona o tagata. Ia manatua o lau aia o le talai atu o le Talalelei i le lotomaulalo uma ma le agamalu, ma lapatai atu i e agasala ina ia salamo ma o mai ia Keriso. Ia aloese mai fefinauaiga ma tauaiupuga le aoga ma tagata e eleelea mafaufau, e le o i ai se manao e iloa le upumoni. Ia manatua o se aso o le lapataiga, ae le o se aso o le tele o upu.’ Afai latou te le taliaina la outou molimau i se tasi nofoaga, ia o atu i se isi nofoaga, ia manatua e aua le tuuaia fua isi, ia pe fai atu foi ni tala faatiga. Afai e te faia lou tiute, o le a lelei lava ia te oe, e peiseai o loo talisapaia e tagata uma le Talalelei” (History of the Church, 1:468).

Alema 30:37–44

Ia lisiina ni auala se tolu sa faaaoga e Alema e faamaonia ai le sese o tuuaiga a Korioa i le Ekalesia moni. E faapefea ona tatou saunia i le auala lava lea e tasi e puipuia le upumoni?

Alema 30:39. O Le Mana o le Molimau Patino

• Sa faamanino mai e Elder Jeffrey R. Holland o le Korama a Aposetolo e Toasefululua se tasi auala e tali atu ai i se aneti-Keriso:

  “Sa ulagia e Korioa ia ‘uputuu faavalea’ o le talitonu lea i se Keriso o le a afio mai.

  “O finauga a Korioa e foliga tutusa lelei lava ma mea ia e faitau i ai le tagata faitau o nei aso, ae sa faaaogaina e Alema se auupega silisili ona le faafitia ma le le i’u i le tali atu —o le mana o le molimau patino. Sa ita o ia ia Korioa ma i latou sa mulimuli ia te ia i lo latou tetee i le fiafia, sa fesili atu ai Alema, ‘Se a ea le mea e te aoao atu ai i lenei nuu e leai se Keriso, e faalavelave ai lo latou olioli?’ [Alema 30:22] ‘Ou te iloa o loo i ai se Atua’” (Christ and the New Covenant [1997], 121).

Alema 30:40. “O Le A Ea Lau Mau Ua Ia Te Oe E Leai Se Atua”

• Sa faamanino mai e Elder Gerald N. Lund le faigata na faamaonia e leai se Atua:

  “Ina ua fesiligia, sa faafitia lava ma le mautinoa e Korioa lona talitonu e i ai se Atua. Ona fesili atu lea o Alema, ‘O le a ea lau mau ua ia te oe e leai se Atua, e le afio mai foi Keriso? Ou te fai atu ia te oe e leai sau mau, a e na o lau upu.’ (Alema 30:40.)

  “O se malamalamaaga musuia lea i le vaega a Alema. E le o tumau foi ia Korioa i ona lava manatu. Afai e mafai moni lava ona tatou iloa na o na mea e i ai faamaoniga ua na o ni faataitaiga, ona le mafai lea ona tatou aoaoina atu e leai se Atua seiloga e i ai ni faamaoniga o na talitonuga. Ma e lei i ai ni faamaoniga ia Korioa.

  “Na pau faamaoniga o le a manatu i ai Korioa e ala i sane. I lea faiga, e sili atu ona faigofie ona faamaonia o loo i ai se Atua nai lo le faamaoniaina e le o i ai se Atua. Ina ia faamaonia e i ai se Atua, na pau le mea e fai e le tagata o le vaai, faalogo, ia po o se isi itu ia i ai sona aafiaga ma le Atua, ma mulimuli ane o le i ai o le Atua e le mafai la ona lē faamaoniaina. Ae o le mea lenei e ono fai e faamaonia ai e leai se Atua: Talu ai ona o le Atua e le mau i lenei lalolagi, e tatau la ona tatou saili i le atulaulau uma mo ia. Ua tatou manatu e mafai e le Atua ona femaliuai, o lea e le lava ai lo tatou amata i le tulaga A i le atulaulau ma saili ai atoa e tau i le tulaga Z. E faapefea la pe a tatou o ese mai le tulaga A, ae afio atu le Atua ma nofo ai iina mo le taimi atoa lava o le sailiga?

  “I se isi faaupuga, o le fai mai o Korioa e leai se Atua, e faavae i luga o manatu na faavaeina e ia lava ia, e ao ona ia iloa mita kupita o le atulaulau atoa i le taimi lava e tasi. E fausia ai ii se faamatalaga e foliga mai e faamautu ai se mea sa’o ae sese: Ina ia faamaonia mai la e Korioa e leai se Atua, e ao ona avea o ia ma se atua lava ia! O le mea lea, i le folafola ai e leai se Atua, ua ia galue ai i le ‘faatuatua,’ le mea tonu lea na te matuai faatausuai ai i taitai faalelotu!” (“Countering Korihor’s Philosophy,” Ensign, July 1992, 21).

Alema 30:41. “Ua ia te Au Mea Uma e Fai ma Molimau Ua Moni Ia Mea”

• Sa saunoa mai ia Peresitene Gordon B. Hinckley (1910–2008) e faatatau i le mana o le foafoaga a le Atua e faamalosia ai molimau ina ua ia faapea mai:

  “Pe mafai ea e se tagata ua savali i lalo ifo o fetu i le po, pe mafai ea e se tasi ua vaai i le pai mai o le tau totogo i luga o le lauelele ona masalosalo i le aao o le paia i le foafoaga? O lea a o matauina le matagofie o le lalolagi, e masani lava se tasi e tautala ai e pei ona fai mai ai le fai Salamo: ‘Ua tala mai e le lagi le mamalu o le Atua; ma ua faaalia i le vanimonimo le galuega a ona aao. O loo ta’u atu le upu e le tasi aso i le tasi aso, o loo faailoa foi le poto e le tasi po i le tasi po.’ (Sal. 19:1–2.)

  “O le matagofie uma i le lalolagi ua faailoa mai ai tulaga o tamatamaiaao o le Matai Foafoa” (i le Conference Report, Ape. 1978, 90; po o leLiahona, Oke. 1978, 59).

Alema 30:48.Tagata e Saili i Faailoga

• Sa aoao mai le Perofeta o Iosefa Samita, “O soo se taimi lava e te vaaia ai se tagata o saili i se faailoga, atonu o le a e iloa ai, o ia o se tagata e mulilua” (History of the Church, 3:385).

  Mulimuli ane, sa tusia e le Perofeta: “A o ou talai ai i Filatelefia, sa valaau mai se tagata o le Au Saluu mo se faailoga. Sa ou fai atu ia te ia e filemu. Ina ua maea le sauniga, sa ia toe fesili mai foi mo se faailoga. Sa ou tau atu i le faapotopotoga o le alii lea o se tagata mulilua; aua o se tupulaga amioleaga ma le mulilulua e saili i se faailoga; ma na fetalai mai le Alii ia te au i se faaaliga, o soo se tagata lava e manao i se faailoga o se tagata mulilua lena. ‘E moni lava,’sa faapea mai ai se tasi, ‘aua sa ou mauaina o ia o mulilua,’ lea na mulimuli ane ai tautau atu agasala a le tagata lea, ina ua papatisoina o ia” (History of the Church, 5:268).

• Sa faamanino atili mai e Peresitene Iosefa F. Samita (1838–1918) le lamatia o le faalagolago i vavega mo lo tatou faatuatua: “Ia faaali mai ia te au le Au Paia o Aso e Gata Ai o loo manaomiaina ia vavega, faailoga, ma faaaliga ina ia latou tutumau ai ma le le mafaagaeetia i le Ekalesia, ma o le a ou faaali atu ia te outou ia tagata o le Ekalesia e le o tutu i ni tulaga lelei i luma o le Atua, ma ē o lo o savavali i ala maseesee” (Gospel Doctrine, 5th ed. [1939], 7).

Alema 30:52. Pepelo ma Faa’ole’olega

• Ina ia malamalama atili i le leaga o le pepelo, sa faamalamalama mai ai e Robert J. Matthews, o sē sa avea muamua ma faauluuluga o mataupu faalelotu i le BYU e faapea, “o le matautia o le pepelo, e le na o le manua po o le tiga e oo i ai le tagata ua faaseseina e fua i ai. O le pepelo e i ai foi lona aafiaga faataumaoi i le tagata na te faia. E faoa ai le faaaloalo mai le tagata pepelo ma faaumatia ai lona agavaa e iloa le eseesega o le mea moni ma le mea sese. Afai e faia soo se pepelo, e oo lava i le tagata o loo ia faasalalauina ma lona iloa, o le a amata ona talitonu i ai. O le mea lea na tupu i le anetikeriso o Korioa i le Tusi a Mamona (tagai Alema 30:52–53 )” (“Aua E Te Molimau Pepelo,” Liahona, Nov. 1998, 56).

• Sa saunoa mai le Perofeta o Iosefa Samita e uiga i le malaia o tagata taitoatasi e pei Korioa: “E leai se manuaga sili atu o le fanau a tagata nai lo le aafia i se uunaiga a se agaga pepelo ae ua latou manatu ua latou maua le Agaga o le Atua” (History of the Church, 4:573).

Alema 30:53. O Le Taufaasese a le Tiapolo ma le Manatu i la le Tino

• O le manatu i la le tino o le taulai atu lea i tuinanau faaletino po o mea faitino nai lo mea a le Agaga. E faigata mo tagata e i ai manatu i la le tino ona iloaina mea a le Agaga. Sa faailoa mai e Elder Neal A. Maxwell o mea ia e ‘“le o toe lagona ai i lona loto fuatiaifo,’ ua faafilemuina mai le faamalieina o le manatu i la le tino” (i le Conference Report, Ape. 1999, 29; po o le Liahona, Iul. 1999, 28).

Alema 31:3, 8–29. O Tapuaiga Sese a Sa Sorama

• E ui lava na fasiotia e sa Sorama ia Korioa, ae sa foliga mai sa latou faia foi lea lava tulaga tutusa o talitonuga. Ia matau ia fuaiupu o lo o mulimuli mai i le Alema 31 lea e faamatala ai talitonuga o sa Sorama:

  Tagata o lo o tapuai i tupua

  Jerry Thompson, © IRI

  “Ua pauu i latou i mea sese e tele” (fuaiupu 9).

  Sa latou teenaina ia uputuu na latou lagonaina sa “tuufaasolo mai … ona o le faatamaiti o o latou tamā fuaiupu 16

  Latou te lei mananao e “taitaieseina i uputuu faavalea a o [latou] uso, ua noanoatia ai i latou i le faatuatua ia Keriso fuaiupu 17

  Sa latou mumusu “e talitonu i mea e oo mai, o mea ua latou le iloa ai se mea e tasi” (fuaiupu 22).

• Sa saunoa mai ia Elder Jeffrey R. Holland e uiga i le uunaiga a Korioa i aoaoga sese a sa Sorama:

  “O ituaiga o aoaoga a [Korioa] sa le mataofia lava le i ai o ona aafiaga i nisi o tagata faatuatua iti o ē, e pei o le nuu tuaoi o sa Soramā, ua uma lava ona latou tuuina atu e ‘faapiopio ai ala o le Alii.’

  “O Sorama ma ona tagata o se tasi o vaega liliuese e sili ona manatuaina o lo o taua muamua i le Tusi a Mamona aua latou te manatu ia i latou o ni tagata e le masani ona amiotonu. … E faatasi i le vaiaso ona latou tutu i luga o se olo e tatalo ai ua taua o le Rameutoma ma, faaaoga ai pea ‘le tatalo lava e tasi,’ e faafetaia ai le Atua ona ua sili atu i latou nai lo isi tagata uma, o se nuu ‘filifilia ma le paia’ ua ‘filifilia’e le Atua ina ia faaolaina ae o isi uma tagata sa ‘filfilia’ tutusa e lafoina i lalo i seoli. I le faamautinoaina ai o le saogalemu o nei mea uma, ua faasaoina foi i latou i soo se talitonuga i ia ‘uputuu faavalea’ (ua aliali mai ai i i le faamaoniga o le talaaga o Korioa) o se talitonuga i se Faaola, aua ua ‘faailoa atu’ ia i latou e le tatau ona i ai se Keriso. …

  “Sa vave lava ona tali atu Alema i ia tatalo lē paia faapea ma ana foi tapuaiga lē paia i lana lava tatalo mo le fesoasoaniga paia e tetee atu ai i lenei ituaiga o agasala manatu faapito lea na gasegase moni ai lava lona loto” (Christ and the New Covenant, 121–22).

  Alema 31:5

  E tusa ai ma Alema, aisea na matuai mamana ai le talaiga o le upu? E faapefea e lenei mea ona fesoasoani e faamatala ai le pogai e taua ai le suesueina o tusitusiga paia i aso taitasi?

Alema 31:5. O Le Mana o le Upu

• O le pule po o le mana o le upu a le Atua o loo i ai se vaega ua faamalamalama mai e le moni o le faatasi ai o le molimau a le Agaga. Sa fetalai mai le Alii pe a faailoa mai e Lona Agaga ia Ana afioga, o Lona siufofoga lava ia (tagai MFF 18:34–36). Sa mafaufau Alema e taumafai e talai atu le upu i le au sa Sorama ua liliuese e ui lava ua uma ona latou faalogo i ai ma teenaina (tagai Alema 31:8–9).

  Sa faamanino mai e Peresitene Boyd K. Packer se tasi mafuaaga e tatau ai ona tatou aoaoina ia mataupu faavae o le malo:

  “O mataupu faavae moni, e malamalama i ai, e suia ai uiga ma amioga.

  “O le suesuega o mataupu faavae o le talalelei o le a vave ona faaleleia ai le amio nai lo se suesuega o le amio o le a faaleleia ai le amio. … O le pogai lena matou te faamamafa atu ai ma le malosi tele le suesueina o mataupu faavae o le talalelei” (i le Conference Report, Oke. 1986, 20; po o leLiahona, Ian. 1987, 19).

• Sa saunoa mai ia Peresitene Spencer W. Kimball (1895–1985) e uiga i le mana o tusitusiga paia lea e fesoasoani tatou te latalata ai i le Atua: “Ua ou iloa afai ua noa ia te au lau sootaga ma le paia o le Atua ma a foliga mai ua leai se taliga faalelagi o faafofoga mai ma leai se siufofoga faalelagi o fetalai mai, ua ou mamao, mamao ese lava. Afai ou te faatofuina au i tusitusiga paia, o le a faaitiitia le mamao ma e toe foi mai le faaleagaga. Ou te iloa ua ou alofa silisili atu ai ia i latou e tatau ona ou alofa ai ma lou loto atoa ma le mafaufau ma le malosi, ma alofa atili ai ia i latou. Ou te iloa ai ua faigofie ona ou usisuitai i a latou fautuaga” (“What I Hope You Will Teach My Grandchildren and All Others of the Youth of Zion” [address to Church Educational System religious educators, July 11, 1966], 4).

• Sa faamalamalama mai e Peresitene Ezra Taft Benson le auala e mafai ai ona avea tusitusiga paia ma ala mamana e faamanuiaina ai i tatou ma tali ai fesili faigata o le olaga: “Ua masani ona tatou faaalu taumafaiga maoae ia faateleina gaoioiga i a tatou siteki. Ua tatou galulue ma le filiga ia siitia i luga pasene o i latou e auai i sauniga faamanatuga. Ua tatou galulue ia maua se pasene maualuga atu o alii talavou e o i le misiona. Ua tatou taumafai ia faaleleia le numera o i latou e faaipoipo i le malumalu. O nei taumafaiga uma o taumafaiga tauleleia ma taua i le tuputupu ae o le malo. Peitai, afai e faatofuina e le aunoa e tagata taitoatasi i latou ma o latou lava aiga i tusitusiga paia, ma faia soo, o isi vaega uma o gaoioiga o le a otometi lava ona oo mai. O le a faateleina molimau. O le a faamalosia tautinoga. O le a faamalosiauina aiga. O le a tafe mai faaaliga patino” (“O Le Mana o le Afioga,” Liahona, Iul. 1986, 81).

Alema 31:9–11. Aloese mai le Mafuaaga o le Liliuese

• I le nuu o Anetionuma, o le malosiaga o le galuega faafaifeautalai a Alema ma ana soa na tau mai i se vaega o tagata vavaeese o sa Nifae sa faaigoaina ia sa Sorama. Sa lei gata na tusia e Mamona sa mauaina e sa Sorama le afioga a le Atua lea na talai atu ia i latou, ae sa ia faailoa mulimuli mai foi le pogai o lo latou liliuese: ua latou le tausia poloaiga, ua latou le toe ole atu foi i le Alii i tatalo i aso taitasi, ua latou faapiopio ala o le Alii, ma o tatalo na latou tuuina atu i le Alii o tatalo le aoga ma leai se uiga. Sa latou le amanaiaina ia mea faavae, e pei o le mauaina o se mausa o le faia o tatalo anoa ma le suesue i tusitusiga paia i aso taitasi.

  Sa faamamafa mai e Elder Donald L. Staheli o le Fitugafulu le taua o le tumau i aso taitasi i mea faavae o le talalelei:

  “O tatalo faatauanau i aso taitasi e saili ai le faamagaloga ma le fesoasoani ma le taitaiga faapitoa e taua tele i o tatou olaga ma le faafaileleina o o tatou olaga. Afai tatou te faananati, tautu i upu, po o le faatalanoa, po o le galo ona faia a tatou tatalo, o le a oo ina tatou le maua le latalata mai o le Agaga, lea e matuai taua lava i le taitaiga faaauau pea lea tatou te moomia ona pulea lelei ai ia luitau o o tatou olaga i aso uma. O tatalo faaleaiga i afiafi ma taeao taitasi e faaopoopo mai ai faamanuiaga faaopoopo ma le mana i a tatou tatalo ma i a tatou molimau.

  “O le aofia ma le faamaoni o le tagata lava ia i tusitusiga paia e maua mai ai le faatuatua, faamoemoe, ma tali i o tatou luitau i aso taitasi. O le faitau soo, mafaufau loloto i ai, ma le faaaogaina o lesona o tusitusiga paia, a tuufaatasi ma le tatalo, o le a avea ma se vaega e le mafai ona toe suia i le mauaina ma le faatumauina o se molimau malosi ma le ola” (i le Conference Report, Oke. 2004, 40; po o le Liahona, Nov. 2004, 39).

Alema 31:6–38. O Tagata Liliuese o sa Sorama

• O le Alema 30:59 ua faailoa mai ai sa vavaeeseina mai sa Sorama mai sa Nifae i lalo o le taitaiga a le tagata e igoa ia Sorama. O se aotelega lenei o mea ua tatou iloa e uiga i o latou talitonuga ma faiga liliuese:

  Latou te lei usitaia tulafono a Mose (tagai Alema 31:9).

  Ua latou faagaloina ia tatalo i aso taitasi (tagai fuaiupu 10).

  Ua latou faapiopio ala o le Alii (tagai fuaiupu 11).

  Sa latou fausiaina sunako mo faamoemoega o tapuaiga e tasi le aso o le vaiaso (tagai fuaiupu 12).

  O le asō o lo o i ai i latou ua pauu atu foi i faatinoga sese lava nei e tasi. Ae sei vagana ua tatou faaeteete e puipuia mai ai, e mafai foi ona tatou pauu atu i nisi o na mailei e tasi o tatalo faatulagaina, o tapuaiga faalevaiaso mo na o le taimi o le poloka-tolu-itula ma lē toe mafaufau ai i le Atua i le vaiaso atoa, ua na o le tatalo lava i se nofoaga faapitoa, pe magaga i mea o le lalolagi ma le faamaualuga.

Alema 31:26–35

Ia faitau le tatalo a Alema mo sa Sorama. O le a se mea ua tatou aoaoina e uiga i le auala e tatau ona lagona e se soo o Keriso e faatatau i ona uso a tagata?

Alema 31:26–35. O Le Tatalo a Alema mo Sa Sorama

• Sa iloa e Alema e taua i le Atua ia agaga o tagata liliuese o sa Sorama. O lea, na tatalo ai Alema mo le mana ma le poto e toe faafoisia mai ai i latou i le Alii. O le tatalo a Alema ua avea ma faataitaiga o uiga e tatau ona atiina ae e tagata uma ma faifeautalai. E taua tele ia tagata uma, ma o le mana o le Atua e mafai ai ona toe faafoisia mai i latou ia te Ia.

  A o avea o se tasi o Fitugafulu, sa aoao mai ai e Elder Carlos E. Asay (1926–99) e faapea e taua tagata uma i le Atua ma e tatau foi ona taua uma ia i tatou:

  “O agaga o o tatou uso ma tuafafine o e ua foliga mai ua sili atu ona vaivai ma lē faamamaluina e taua. Ua manaomia e le Ekalesia i latou. E tatau ona tatou faia taumafaiga uma e iloa ai i latou ma fesoasoani ia i latou ia mauaina faamanuiaga atoatoa ma olioliga o le talalelei a Iesu Keriso. O a tatou tatalo e tatau ona faapei o le tatalo a Alema: ‘O lea ia e foai mai ia te i matou, le Atua e, le mana ma le poto, ina ia matou faafoisia mai ia te oe i latou nei, o matou uso.’(Tagai Alema 31:35.)

  “E tatau ona tatou manatuaina o lo tatou faaolataga e fesootai ma le faaolataga o isi. E tatau ona tatou popole tele mo i latou ua foliga mai ua le popole mo lo latou faatuatua” (“Nurturing the Less Active,” Ensign, Oct. 1986, 15).

Alema 31:31–33. Faamafanafanaina i Puapuaga

• Sa saunoa mai ia Peresitene Lorenzo Snow (1814–1901) e uiga i faamanuiaga e sau mai i puapuaga:

  “Ou te manatu o loo ou talanoa atu i nisi o loo i ai popolega ma faafitauli ma loto tiga ma sauaga, ma e i ai taimi ua mafua ai ona mafaufau latou te lei faamoemoeina lava e oo i le tele o nei mea. Ae mo mea uma lava ua e puapuaga ai, mo mea uma lava ua tupu ia te oe sa e manatu ai o se mea leaga i lena taimi, o le a e mauaina sautuafa, ma o lena puapuaga o le a avea ma se faamoemoe e avea ai oe ma se tagata lelei atu ma malosi atu ma e lagona ai ua faamanuiaina oe. Afai e te toe vaavaai i tua i ou aafiaga o le a e iloa ai ua e agai mamao i luma ma ua e a’e maualuga i le apefai agai atu i le faaeaga ma le mamalu. …

  “Pe tauaveina taitasi pe tauaveina atoa, ua tatou puapuagatia ma e tatau ona tatou toe puapuagatia foi; ma pe aisea? Aua e manaomia e le Alii mai ia i tatou mo lo tatou faapaiaga” (The Teachings of Lorenzo Snow, comp. Clyde J. Williams [1984], 117–18).

Manatu e Mafaufau Loloto i ai

• Aisea o le a foliga mai ai e faatosina ia aoaoga a Korioa i ni tagata taitoatasi patino? O a nisi o faataitaiga o na aoaoga i le asō?

• Sa foliga mai na faaosofia ia Alema e toe faafoisia mai ia sa Sorama ona o le alofa o le Atua ma le alofa mo sa Sorama. E faapefea ona tatou atiina ae lenei lava ituaiga alofa e tasi?

• Na faapefea ona ese le tatalo a Alema mai le tatalo a sa Sorama? O a auala e ono tutusa ai a tatou tatalo ma tatalo a sa Sorama? (tagai Alema 31:15–18). E faapefea ona tali tutusa i le tatalo a Alema? (tagai Alema 31:30–35).

Galuega Fautuaina

• O a nisi o aoaoga sese a Korioa? Ia faamatala i se uo le pogai e matuai faatoilaloina ai ia ituaiga finauga (tagai Alema 30:13–18

• Ina ua fesili ia Korioa mo se faailoga o le i ai o se Atua, o a faailoga na tuuina atu e Alema sa fai ma molimau o loo soifua le Atua? (tagai Alema 30:44). E faapefea e nei faamaoniga ona fesoasoani e faamalosia lou faatuatua? Ia tusi se palakalafa e faamatala puupuu ai pe faapefea ona avea ia mamanu ma le faatulagaga i le atulaulau o se molimau o le i ai o le Atua.