Inisitituti
Mataupu 19: Mosaea 4–8

Mataupu 19

Mosaea 4– 8

Folasaga

Ina ua faalogo sa Nifae i le Tupu o Peniamina na latou iloa ai lo latou manaomia o le mana faaola o le Togiola. O se taunuuga, na latou tatalo mo le faamagaloga, maua le filemu o le mafaufau, ma tauave i o latou luga le suafa o Iesu Keriso. E pei o na sa Nifae, e mafai foi ona tatou maua se suiga o le loto ma ola i se tulaga tatou te “olioli ai i taimi uma, ma faatumuina i le alofa o le Atua, ma tumau i le faamagaloga o a [tatou] agasala.” O le lauga a le Tupu o Peniamina ua faatonuina ai i tatou i le ala e “tuputupu ae i le malamalama o le mamalu o ia na foafoaina i [tatou]” (Mosaea 4:12) e ala i le faatuatua, salamo, ma le faia ma tausia o feagaiga.

Faamatalaga

Mosaea 4:1–2, 5, 11. “Ua Le Tusa Ma Le Efuefu o le Eleele”

  • Na faatusa e le nuu o le Tupu o Peniamina i latou lava o ni [tagata] “faatauvaa i latou i le efuefu o le eleele.” O lenei uiga e faamatalaina ai le mea moni e faapea, a o usitai le efuefu o le eleele i faatonuga a le Atua (tagai Helamana 12:7–8), o i latou i le avea ai ma fanau a le Atua sa le o taimi uma na usiusitai ai i Ana faatonuga. Na latou faailoa lo latou faalagolago atoa atu i le Atua—e ao ona faalagolago le tagata i le Atua mo mea uma: ola ma le manava, meaai ma le auala e maua ai, soifua maloloina ma le malosi, faaolataga ma le ola e faavavau. A aunoa ma le Atua ma le Togiola, o le tagata lava, i se tulaga moni, o le mea noa. O le lotomaualalo e oo mai i le iloa o lo tatou faalagolago atu i le Alii. O le autu i lo tatou avea ma tagata maoae o le manatua lea o i tatou o ni mea noa pe a aunoa ma Keriso ma Lona Togiola. E pei ona aoao mai Iakopo, ana leai le Togiola e le mafai ona tatou toe ola ma o le a avea i tatou ma agelu i le tiapolo (tagai 2 Nifae 9:7–9).

Mosaea 4:2–3. Faaaogaina o le “Toto Togiola o Keriso”

  • Na iloa e le nuu o le Tupu o Peniamina lo latou manaomia o le mana e sili atu i lo latou malosi ina ia faatoilaloina ai lo latou tulaga agasala. Sa latou tatalo mo le alofa tunoa ma ole atu i le Tama Faalelagi e “faaaogaina le toto togiola o Keriso” (Mosaea 4:2) ina ia mafai ona faamagaloina a latou agasala. Na aoao mai e Peresitene Boyd K. Packer, o le Peresitene o le Korama a Aposetolo e Toasefululua, le ala e mafai ai e le Togiola ona faamaloloina i tatou mai o tatou sese:

    “Tatou te faia uma lava mea sese. O nisi taimi tatou te faatiga ai ia i tatou lava ma matuai faamanualia isi i ni auala tatou te le mafaia ona toe fonofono ai. Tatou te faaleagaina ni mea e le mafai ona tatou toe faaleleia. O iina la i lo tatou lava natura, tatou te lagonaina ai le tausalaina ma le faalumaina ma le mafatia lea e le mafaia e i tatou lava ona fofoina. O iina la o le a fesoasoani mai ai loa le mana o le Togiola …

    “Ana fai e le faia e Keriso Lana Togiola, semanu e faaopoopo atu faasalaga o mea sese o le tasi i luga o le isi. Semanu e leai se faamoemoega o le olaga. Ae na ia ofo mai o Ia lava ina ia taulagaina ina ia mafai ai ona togiolaina i tatou. …

    “E mafai ona tatou ‘faatumauina le faamagaloina o a [tatou] agasala’ [Mosaea 4:12]. O le papatisoga i le faatofuina mo le faamagaloina o a tatou agasala. O lena feagaiga e mafai ona faafouina e ala lea i le taumafa i le faamanatuga i vaiaso taitasi [tagai MFF 27:2].

    “O le Togiola e i ai ona faatinoga taua ma faaletagata i aso uma lava; ia faaaoga i lou olaga. E mafai ona faamalosia i le amata i se tatalo. E le faapea o le a e saoloto ai mai faafitauli ma mea sese mulimuli ane ae e mafai ona aveesea ai le tausalaina e ala i le salamo ma maua ai le filemu” (i le Conference Report, Ape. 2001, 28–29; po o le Liahona, Iulai 2001, 26–27).

Mosaea 4:3. “Filemu o le Loto Fuatiaifo”

  • Na molimau mai Elder Richard G. Scott o le Korama a Aposetolo e Toasefululua, o le filemu o le lotofuatiaifo e oo mai i le salamo faamaoni ma le ola amiotonu:

    “E finagalo le Atua i Ana fanau taitoatasi ina ia olioli i le faamanuiaga sili o le filemu o le lotofuatiaifo [tagai i le Mosaea 4:2–3]. O se lotofuatiaifo toafilemu e valaaulia ai le saoloto mai le pagatia, faanoanoa, tausalaina, maasiasi, ma le fetuuina o le tagata lava ia. E maua ai se faavae mo le fiafia. …

    “… E mafai ona e toe maua le filemu o le lotofuatiaifo e ala i le salamo i au lava soligatulafono lea na mafua ai le le mautonu i lou loto. …

    “O le tulafono ua solia mai le agasala po o le solitulafono, e tupu ai le tiga o le mafaufau ma le loto mai se lotofuatiaifo ua tiga. I le iloaina lea o Ana fanau agaga uma, vagana ai Lona Alo Pele e Toatasi, o Iesu Keriso, o le a solia ma le leiloa po o le iloa Ana tulafono, ua saunia ai e lo tatou Tama Faalelagi se auala e faasa’o ai taunuuga o ia aga. E tusa lava pe tele pe laitiiti, le soligatulafono e tutusa lava le taunuuga: o le salamo atoatoa lea e ala i le faatuatua ia Iesu Keriso ma LanaTogiola ma le usiusitai i Ana poloaiga” (i le Conference Report, Oke. 2004, 14–15; po o le Liahona, Nov. 2004, 15–16).

  • Na apoapoai mai Peresitene Boyd K. Packer ia i latou o e sailia le filemu o le lotofuatiaifo e ala i le salamo ina ia finafinau pea seia latou maua le faamagaloga:

    “Ua a’oa’o mai le talalelei ia i tatou, o le mapusaga mai tiga ma le tausalaina e mafai ona maua e ala i le salamo. E vagana ai ni nai tagata toaitiiti o e filifilia le malaia ae ua uma ona latou iloa lelei, e leai se amio, leai se tuinanau, leai se agasala e tuusaunoa mai le folafolaga o le faamagaloga atoatoa. …

    “O lena taeao sili o le faamagaloga atonu e le oo mai i le taimi lava lena. ‘Aua le faavaivai pe afai e te toilalo i le taimi muamua. E masani lava o le vaega sili ona faigata o le salamo o le faamagaloina lea o oe lava. O le lotovaivai o se vaega o lena suega. “Aua le faavaivai. O le a oo mai lena taeao matagofie.

    “Ona toe oo mai lea i lou olaga ‘o le manuia [filemu] mai le Atua, e silisili i mea uma e … manatu i ai’. [Filipi 4:7]. Ma o oe, o le a pei o Ia, e le toe manatuaina au agasala. E faapefea ona e iloa? O le a e iloa! [tagai i le Mosaea 4:1–3]” (i le Conference Report, Oke. 1995, 22, 24; po o le Liahona, Ian. 1996, 23–24).

Mosaea 4:4–8. Ia Malamalama i le Togiola

  • Na molimau mai Peresitene James E. Faust (1920–2007) o le Au Peresitene Sili, e tatau i tagata uma o le Au Paia o Aso e Gata Ai ona suesue ma talia le Togiola:

    “O’u uso e ma tuafafine pele ma uo, ua ou sau ma le faamaualalo i lenei pulelaa i lenei taeao ou te fia tautala atu i nisi o mea silisili na tutupu i le talafasolopito atoa. O lena mea e tasi na tupu o le Togiola le mafaatusalia lea a lo tatou Alii ma le Faaola, o Iesu le Keriso. O le galuega sili lenei ona taua ua faataunuuina, ae peitai e aupito sili foi ona faigata ona malamalama i ai.

    “O la’u mafuaaga ou te manao ai e aoaoina uma mea ou te mafaia e uiga i le Togiola e tau faapito foi: O lo tatou faaolataga e faalagolago lea i le talitonu ma le taliaina o le Togiola [tagai i le Mosaea 4:6–7]. O lea taliaina, e moomia ai se taumafaiga faifai pea ina ia malamalama atoa i ai. O le Togiola e fesoasoani ia i tatou ia alualu i luma ma faamaeaina la tatou faigamalaga i lenei olaga aoaoina e ala lea i le mafaia ona faaatoatoaina o i tatou [tagai i le Moronae10:32]. O i tatou uma lava na agasala ma e moomia ai ona salamo ina ia totogiina atoa ai la tatou vaega o le aitalafu. Pe a tatou salamo faamaoni, o le a totogiina e le togiola ofoofogia a le Faaola le vaega o loo totoe o le aitalafu [tagai i le 2 Nifae 25:23]” (i le Conference Report, Oke. 2001, 19; po o le Liahona, Ian. 2001, 19).

Mosaea 4:12. “Faatumau le Faamagaloga o Au Agasala”

  • Na fautuaina i tatou e Elder Neal A. Maxwell (1926–2004) o le Korama a Aposetolo e Toasefululua, ia salamo soo ma ia le aunoa ina ia tumau ai le faamagaloga o a tatou agasala: “Na tele se faamamafa na tuuina mai e le Tupu o Peniamina i le faatumau o le faamagaloga o a tatou agasala (tagai i le Mosaea 4:26). Tatou te le mafaufau loloto tele i lena aoaoga i le ekalesia. Ua tatau ona tatou mafaufau soo i ai. O le faatumauina e faalagolago malosi lea i lo tatou salamo e le aunoa. I le ekalesia tatou te popole, ma e tatau, i le faatumauina o tagata fou o le ekalesia, ae o le faatumauina o le faamagaloga o a tatou agasala o le faapogai lea o se popolega e sili atu” (“King Benjamin’s Sermon: A Manual for Discipleship,” i le John W. Welch and Stephen D. Ricks, eds., King Benjamin’s Speech: “That Ye May Learn Wisdom” [1998], 16).

Mosaea 4:14–15. Tausia o Fanau Amiotonu

  • Na aoao mai e le Tupu o Peniamina le taua o le aiga ma le manaomia o ni matua amiotonu. Ua molimau mai foi perofeta o nei ona po ua poloaiina e le Alii ia Ona soo faamaoni ia tausia a latou fanau i le amiotonu ma aoao atu i ai mataupu faavae o le talalelei: “Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia i le faaleagaga ma le faaletino, ia aoao i latou e alolofa ma feauaunaa’i, [ma] ia tausia poloaiga a le Atua” (“O Le Aiga: O Se Folafolaga i le Lalolagi,” Liahona, Oke. 2004, 102).

  • I le avea ai o se molimau o nei ona po i matafaioi a matua o le aoao o a latou fanau, na faailoa mai ai e Elder Russell M. Nelson o le Korama a Aposetolo e Toasefululua ni nai mau e fesoasoani i matua ia malamalama ai i a latou matafaioi “O loo faatonuina e tusitusiga paia ia matua ina ia aoao atu le faatuatua ia Iesu Keriso, salamo, papatisoga, ma le meaalofa o le Agaga Paia [tagai i le Moronae 8:10]. E ao i matua ona aoao atu le ata o le faaolataga [tagai i le Mose 6:58–62] ma le taua o le ola atoatoa e tusa ma poloaiga a le Atua [tagai i le Levitiko 10:11; Teuteronome 6:7; Mosaea 4:14]. A leai, o le a mautinoa le puapuagatia o a latou fanau i le le iloa o tulafono togiola ma le faamalologa a le Atua [tagai i le 2 Nifae 2:26]. E tatau foi i matua ona aoao atu e ala i faataitaiga i le auala e ositaulagaina ai o latou olaga—i le faaaogaina o o latou taimi, taleni, sefuluai, ma mea e maua [tagai i le Mosaea 4:21–26; 18:27; Alema 1:27] ina ia faatuina ai le Ekalesia ma le malo o le Atua i le lalolagi [tagai i le JST, Mataio 6:38]. O le ola ai i lena tulaga o le a faamanuiaina ai a latou fanau” (i le Conference Report, Oke. 2001, 85; po o le Liahona, Ian. 2002, 82).

Mosaea 4:16–25. Foai atu i e Matitiva

  • Na faamanatu mai e le Tupu o Peniamina o i tatou uma o ni tagata aiisi i luma o le Atua ma e tatau ona tatou faaalia le alofa mutimutivale i isi pe a tatou manano e toe faaali mai [e se tagata] le alofa mutimutivale. Na faapena foi ona fautuaina i tatou e Peresitene Gordon B. Hinckley (1910–2008) ina ia tatou vaai atu i isi ma le agaalofa:

    “Ia sili atu lo tatou agaalofa. Ia tatou aveesea le faasausili i o tatou olaga, o le faamaualuga, o le manatu faapito. Ia sili atu lo tatou alofa, ia matua agalelei, faatumuina i le loto pulea ma le onosai ma se fuataga maoae o le faaaloalo i le tasi ma le isi. I le faia o lea mea, o a tatou faataitaiga o le a mafai ai ona sili atu le agaalofa o isi, ma o le a sili atu lo tatou mauaina o le alofa tunoa o le Atua o lē i Lona alofa o le a agalelei ia i tatou.

    “‘Aua faauta, e le ni tagata aiisi ea i tatou uma? …’ [Mosaea 4:19].

    “Sa faapena ona saunoa le Tupu o Peniamina. Ou te faaopoopo atu i ai o le mana o le Matai e moni ma o Ana afioga e mautinoa. Na te tausia Lana folafolaga ia i latou o e alolofa. ‘Amuia e alolofa atu: aua e alofaina mai i latou’ (Mataio 5:7).

    “Ou te mautinoa o le a oo mai le taimi e moomoo ai i tatou taitoatasi mo le alofa tunoa pe, tatou te mamai pe le lava le malosi, o le mativa po o tiga, o tulaga le manuia e faasagatau mai pe mai le tagata po o le natura. Ma afai, e ala i o tatou olaga, na tatou tuuina atu le alofa tunoa i isi, tatou te mauaina mo i tatou lava” (i le Conference Report, Ape. 1990, 89; po o le Ensign, Me 1990, 70).

Mosaea 4:27. “E le Tatau I se Tagata Ona Momo’e Vave ia Silia Le Malosi Ua ia te Ia”

  • Na tauina mai e Elder Neal A. Maxwell, ua utiuti le taimi ma le malosi o loo ia i tatou, o lea e tatau ai ona tatou taulai atu i mea e sili ona taua:

    “Pe a tatou momo’e vave atu nai lo le mea e mafaia, tatou te le mafai ona faatulaga lelei [se mea] ma vaivai. …

    “O loo i ai i luga o le puipui o lou ofisa se faamanatu aoga na saunia e Anne Morrow Lindbergh e faatatau i se tasi o mea moni o le olaga. Na ia tusia, ‘E le mafai e lo’u olaga ona faatinoina faatonuga uma a tagata o e e tali atu i ai lo’u agaga.’ O se fautuaga lelei lena mo i tatou uma, e le o se ‘alofaga e le faia ai tiute, ae i se tulaga poto, ua faatatau i le saoasaoa ma le manaomia o le tulaga lelei i fegalegaleaiga” (Deposition of a Disciple [1976], 58).

Mosaea 5:2. “O se Suiga Tele ia i Matou”

  • Na faamalamalama mai e Elder Robert D. Hales o le Korama a Aposetolo e Toasefululua le faagasologa lea tatou te maua ai le aafiaga o le liuaina o le loto: “O le taimi lava tatou te maua ai se molimau o le Agaga, e faamalosia a tatou molimau e ala i le suesue, tatalo, ma ola ai i le talalelei. O a tatou molimau tuputupu ae e aumaia ai le faateleina o lo tatou faatuatua ia Iesu Keriso ma Lana fuafuaga mo lo tatou fiafia. E faaosofia i tatou ia salamo ma usitai i poloaiga, lea e taitaiina atu ai ma se suiga tele i le loto i lo tatou liuaina. Ma o lo tatou liuaina e aumaia ai le faamagaloga paia, faamaloloina, fiafia, ma le manao e faailoa atu a tatou molimau i isi” (i le Conference Report, Oke. 2003, 31–32; po o le Liahona, Nov. 2003, 30).

Mosaea 5: 7–8. Avea ai o ni Fanau a Keriso

  • Na faamalamalama mai e Peresitene Iosefa Filitia Samita (1876–1972) le auala tatou te mafaufau ai ia Iesu Keriso o lo tatou Tama:

    “Afai tatou te talanoa ia Iesu Keriso i le avea ai ma o tatou Tama, tatou te le o faia se mea sese aua, i le faaleagaga, o ia na fanauina i tatou. E leai se fesili e uiga i ai—na ia tuufaatasia le agaga ma le tino, saunia se toetu mo mea uma e ola. Tatou te le o faia se mea sese i le talanoa o le Faaola o lo tatou Atua, o lo tatou Tama, ma i le avea ai foi ma Alo o le Atua aua sa ia mauaina uma le pule. Na folafola mai e Iesu na faaee atu ia te ia e le Tama le pule uma, ma ua avea ai o ia ia i tatou o le Tama. Ae sili ai, ua ia fanaua faaleagaga i tatou i le Toetu. …

    “… O i tatou o ona atalii ma afafine. O Ia o le Tama ia i tatou aua o ia na fanaua i tatou ma laveaiina i tatou mai le oti, ma tuufaatasia le agaga ma le tino. O le a le mea e ta’u o le tamā, ae ua o se tasi e tuuina mai le ola?” (“The Fatherhood of Christ” [unpublished address to seminary and institute of religion personnel, Brigham Young University, Iulai 17, 1962], 5–6).

    Tagai i le faamatalaga mo le Mosaea 15:1–7 (itulau e 153).

Mosaea 5:8–10 . Tauave i o Tatou Luga Lona Suafa

  • Na faalolotoina e Elder Dallin H. Oaks o le Korama a Aposetole e Toasefululua, lo tatou malamalama i le tauaveina o le suafa o Iesu Keriso i o tatou luga:

    “Ua tatou iloa tatou te ave i o tatou luga le suafa o Keriso pe a papatisoina i tatou i lona suafa, pe a tatou auai i lana Ekalesia ma ta’uta’u atu lo tatou talitonu ia te ia, ma pe a tatou faia le galuega o lona malo.

    “E i ai foi isi uiga, o uiga e loloto atu e tatau i tagata o le Ekalesia ua i ai uiga faatagata matua, ona malamalama ma manatunatu loloto i ai a o ia tagofia le faamanatuga.

    “O se mea taua afai tatou te tagofia le faamanatuga, tatou te le molimau atu tatou te tauave i o tatou luga le suafa o Iesu Keriso. A e tatou te molimau atu tatou te loto e faia faapea. (Tagai i le MFF 20:77.) O le mea moni e faapea ua na ona tatou molimau atu i lo tatou naunautaiga, ua ta’u mai ai e i ai se isi mea e tatau ona faia ae tatou te lei tauave i o tatou luga lena suafa paia i se lagona matua taua. …

    “O lo tatou loto e ave i tatou luga le suafa o Iesu Keriso e tatau ona malamalama i ai o le loto e ave i o tatou luga le pule a Iesu Keriso. E tusa ai ma lenei faauigaga, o le tagofia o le faamanatuga, tatou te molimau atu ai ua tatou loto e auai i sauniga paia o le malumalu, ma ia maua faamanuiaga aupito maualuluga o loo i ai, e ala i le suafa ma le pule a le Faaola pe a finagalo o ia e faaee mai na faamanuiaga i o tatou luga.

    “… O lo tatou loto e ave i o tatou luga le suafa o Iesu Keriso, ua faamautuina ai lo tatou tautino atu e faia mea uma tatou te mafaia e faitaulia faatasi ai ma i latou o e o le a filifili e tutu i lona itu taumatau, ma valaauina i lona suafa i le aso gataaga. I lenei la faauigaga paia, o la tatou molimau ua tatou loto e ave i o tatou luga le suafa o Iesu Keriso, ua i ai la tatou tautinoga o le tausinio mo faaeaga i le malo selesitila. O le faaeaga o le ola lea e faavavau, ‘o le mea alofa sili lea i lo mea alofa uma a le Atua’ (MFF 14:7)” (i le Conference Report, Ape. 1985, 102–3, 105; po o le Liahona, Iulai 1985, 77–78, 79).

Mosaea 5:12. “Iloa le Siufofoga”

  • O le aoao ia iloa ma mulimuli i le siufofoga o le Alii e taua mo le alualu i luma faaleagaga. Na aoao mai Elder M. Russell Ballard o le Korama a Aposetolo e Toasefululua, ua faamoemoe mai le Atua ia tatou faalogo ma iloa Lona siufofoga i lenei olaga: “Pe a maea lau auaunaga, o le a le sili atu le taua o soo se lauga na ou tuuina atu i le silafaga a le Alii; ae o le mea o le a taua ia te ia o lo’u faalogo i lona siufofoga ma tali atu i ana musumusuga” (“Respond to the Prompting of the Spirit” [o se afiafi ma Elder M. Russell Ballard, Ian. 8, 1988], 4, www.ldsces.org).

Mosaea 6:4–7. Tupu o Mosaea

  • Na faaigoa e le Tupu o Peniamina lona atalii i le igoa o lona tama. O lea la, atonu tatou te ta’ua le tama o le Tupu o Peniamina o Mosaea1 ma le atalii o le Tupu o Peniamina o Mosaea2. O Mosaea lava na1 poloaiina e le Alii e ave i latou o e mulimuli ia te ia ma o ese atu mai le nuu o Nifae e agai atu i le vao ona o le amioleaga o sa Nifae (tagai i le Ominae 1:12). Ae peitai, o le tusi a Mosaea, o loo faaigoaina ia Mosaea2; o ia lava na tausia faamaumauga.

Mosaea 7:1–14; 8:7–21. Faigamalaga a Sa Nifae

  • Ina ia malamalama i le tulaga o le talafaasolopito a Mosaea 7–8, atonu e manaomia lou toe iloilo o mea na tutupu o loo i le Ominae 1:27–30 ma aotelega o le mataupu mai le Mosaea 7–8. O nei faatatauga o loo ta’ua ai taitai o tagata i le nuu o Saraemila (Mosaea1, Tupu o Peniamina, ma Mosaea2) faapea foi ma tupu i le nuu o Liae-Nifae (Senifa, Noa, ma Limae). O loo ta’ua ai foi faigamalaga a vaega eseese o tagata i le va o le aai o Saraemila ma le nuu ua faato’aina o Senifa i le laueleele o Liae-Nifae. Ina ia malamalama lelei i nei faigamalaga, suesue le faafanua o loo i ai.

Mosaea 8:13. Faamatala Tusi

  • Na tuuina mai e Peresitene Iosefa Filitia Samita lenei aotelega iloga o le “faamatala tusi” o loo faatatau i ai le Tusi a Mamona:

    “Na umiaina e le Tupu o Mosaea ‘… ni maa se lua na faamauina i li’o e lua o le mea e pei o se tioata’ [Mosaea 28:13] ma na tau e sa Nifae o ‘[Maa e] Faamatala ai gagana,’ lea sa ia faaliliuina ai faamaumauga a sa Iareto [Mosaea 28:11–14], ma o nei maa sa tuufaasolo mai i lea tupulaga i lea tupulaga mo le faamoemoega e faamatala ai gagana. E le o tauina mai i faamaumauga le auala na maua ai e Mosaea nei ‘maa e lua’ po o le Urima ma le Tumema, ae e sili ai le faapea atu o se ‘meaalofa mai le Atua’ [Mosaea 21:28]. Na i ai ia Mosaea lenei ‘meaalofa’ po o le Urima ma le Tumema a o lei mauaina e le nuu o Limae faamaumauga a Eteru. Atonu na latou mauaina ina ua aumaia ia Mosaea le ‘maa tele’ sa i ai i luga ni togitogiga, lea sa ia faamatalaina e ala i le ‘mea foaifuaina ma le mana o le Atua’ [Ominae 1:20–21]. Atonu na tuuina atu ia te ia, po o se isi perofeta a o lei oo i ona aso, e pei foi ona sa maua mai e le uso o Iareto—mai le Alii.

    “A faapea o le Urima ma le Tumema, po o maa e lua, na tuuina atu i le uso o Iareto o [maa] lava na sa umia e Mosaea, e foliga mai e sa’o ona o le faamatalaga lenei i le Tusi a Mamona:

    “Na poloaiina le uso o Iareto e faamaumauina ana tusitusiga o faaaliga na ia vaaia i le faaali atu o Keriso ia te ia, ina ia le mafai ona faitauina e ona tagata. O le gagana o lenei faaaliga, sa le i malamalama i ai se tasi, aua sa taofia lona aumaia seia maea le toetu o Keriso. Na faamaufaailogaina foi le Urima ma le Tumema ina ia mafai ona le faaaogaina mo le faamoemoega o le faamatalaina o na tusitusiga paia o lenei faaaliga, seia oo i le taimi ua tuuina mai ai e le Alii se tagata e na te faamatala ia i latou. Pe a faaalia i latou, e tatau ona faamatalaina i latou e ala i le fesoasoani mai o le Urima ma le Tumema [Eteru 3:21–28]. …

    “Na mauaina e Iosefa Samita faatasi ma le ‘ufifatafata’ ma papatusi o le Tusi a Mamona, le Urima ma le Tumema, lea na natia e Moronae ina ia aumaia i aso amuli o se auala e mafai ai ona faaliliuina faamaumauga anamua, lea na tuuina atu ai le Urima ma le Tumema i le uso o Iareto [MFF 17:1]” (Answers to Gospel Questions, comp. Joseph Fielding Smith Jr., 5 vol. [1957–66], 1:160–62).

Mosaea 8:15. “E Maoae atu le Tagatavaai nai lo se Perofeta”

  • Ata
    O le Perofeta o Iosefa Samita o loo u’uina tusitusiga

    Alvin Gittins, © 1959 IRI

    Na faamalamalama mai e Peresitene Howard W. Hunter (1907–95) le tulaga ese o le matafaioi o le avea ma tagatavaai ma le ala e eseese ai le silafia e le tagatavaai o mea nai lo isi: “O se tagatavaai o se tasi e vaai. O lona uiga e le faapea e mafai ona vaai atu i ona mata faaletagata ae e ala i ona mata faaleagaga. O le meaalofa o le tagatavaai o se meaalofa e silisili atu i lo le natura” (The Teachings of Howard W. Hunter, ed. Clyde J. Williams [1997], 224).

  • Na faamalamalama atili mai e Elder John A. Widtsoe (1872–1952) o le Korama a Aposetolo e Toasefululua se tagatavaai o se tasi e “malamalama i le uiga o mea e foliga mai e faigata ona malamalama i ai isi; o lea o ia o se faamatala upu ma se faamanino o mea moni e faavavau. E na te muai silafia le lumanai mai le tuanai ma le taimi nei. E na te faia lea e ala i le mana o le Alii e galueaiina sao atu ia te ia, po o le le tuu sao foi faatasi ai ma le fesoasoani o meafaigaluega faalelagi e pei o le Urima ma le Tumema. I le faapuupuuga, o ia na te iloa, o le savali i le malamalama o le Alii ma ni fofoga matala” (Evidences and Reconciliations, arr. G. Homer Durham (1960), 258.

Manatu e Mafaufau Loloto i ai

Galuega Fautuaina

  • Suesue le Mosaea 4:5–13 ma sue nisi o uiga o le Atua na faailoa mai e le Tupu o Peniamina i lana lauga.

  • O le Mosaea 4:12–16 o loo iloiloina ni uiga o le ola ai i le talalelei. Filifili mai ai ni uiga se lua e sili atu lona aoga ia te oe ma faia se fuafuaga e faaaoga ia mea ma le atoatoa i lou olaga.

Ata
Significant Nephite Journeys in the Book of Mosiah

Faigamalaga Taua a Sa Nifae i le Tusi a Mosaea

Taiala i le Faafanua

Ata
Faigamalaga Taua a Sa Nifae i le Tusi a Mosaea

A

Aai o Saraemila

Nuu o Saraemila

1

6

2

7

5

Nuu o Liae-Nifae

E

Aai o Liae-Nifae

3

Nuu na Faaumatia o Sa Iareto

Talafaasolopito a sa Iareto i le tusi a Eteru

U

E le o mailoa pe o le a le mamao i matu o Saraemila na i ai le laueleele a sa Iareto.

4

Helama

O

8

Nofoia o le aai o Helama

I

Vai o Mamona

N