Toko 33
Mpomba ny Mpanjaka mifanohitra amin’ny olona afaka
Nisy Nefita sasantsasany izay nitady an’i Pahôràna lohan’ny mpitsara mba hanova ny lalàna sasany.
Rehefa nandà i Pahôràna dia tezitra ny olona ka nitady ny hanala an’i Pahôràna tsy ho lohan’ny mpitsara. Mpanjaka no tian’izy ireo fa tsy mpitsara.
Nantsoina hoe olon’ny mpanjaka izy ireo ka nanantena fa ny iray amin’izy ireo no ho lasa mpanjaka sy handidy ny vahoaka.
Ireo Nefita izay te hitazona an’i Pahôràna ho lohan’ny mpitsara dia nantsoina hoe olona afaka. Te hanana fahafahana miaina sy manompo araky ny safidiny izy ireo.
Nifidy ny vahoaka na homba ny olona afaka na homba ny mpomba ny mpanjaka. Nifidy ho an’ny olona afaka ny ankamaroan’izy ireo.
Nandritra izany fotoana izany dia nanomana tafika Lamanita lehibe hanafika ny Nefita i Amalekià.
Raha naheno momba ny fiavian’ny Lamanita ireo mpomba ny mpanjaka dia nifaly ary nandà ny hiaro ny firenen’izy ireo.
Tezitra tamin’ny mpomba ny mpanjaka i Kapiteny Môrônia noho ny tsy fetezan’izy ireo hiady. Efa niasa mafy ho an’ny fiarovana ny fahafahan’ny Nefita izy.
Nangataka fahefana tamin’ny governora izy hanery ny mpomba ny mpanjaka hiady amin’ny Lamanita na hamono azy ireo ho faty.
Rehefa nanome izany fahefana izany an’i Môrônia ny governora Pahôràna dia nitondra ny tafikany hiady amin’ireo mpomba ny mpanjaka i Môrônia.
Maro ireo mpomba ny mpanjaka no maty. Ny sasany nampidirana am-ponja. Ny sisa dia nanaiky hanampy amin’ny fiarovana ny fireneny amin’ny Lamanita.