Kuo Tuku Mai ʻE he Siasí Ha Tohi Tuʻutuʻuni Foʻou Maʻá e Kau Faifekaú

Loki Ongoongó

Fetongi ʻe he ʻNgaahi Tuʻunga Mo’ui Fakafaifekau maʻá e Kau Ākonga ʻa Sīsū Kalaisí’ ʻa e tatau ʻo e 2010.

Kuo tuku mai ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha tohi tuʻutuʻuni foʻou mo e fakamatala fakamuimui taha, maʻá e kau faifekau ʻoku nau ngāue he funga māmāní.

ʻOku fetongi ʻe he tohi tuʻutuʻuni, “Ngaahi Tuʻunga Moʻui Fakafaifekau maʻá e Kau Ākonga ‘a Sīsū Kalaisí,” ʻa e tohi tuʻutuʻuni kimuʻa naʻe ʻoatu ai e fakamatala fakamuimui tahá ʻi he 2010. ʻOku toutou vakai e kau faifekaú ki he tohi tuʻutuʻuní ki ha fakahinohino ʻi he founga fengāue’akí ʻi ha ngaahi tūkunga kehekehe pea ke tokoni ke nau ngāue ʻo fakatatau mo ia.

ʻOku pehē ʻe ha tohi mei he Kau Palesitenisī ʻUluaki mo e Kōlomu ʻo e Kau ʻAposetolo ʻe Toko Hongofulu Mā Ua ʻo e Siasí ʻi hono ngaahi fuofua peesi ʻo e tohi tuʻutuʻuni foʻoú, “Ke hoko ko ha faifekau lelei, kuo pau ke ke hoko ko ha ākonga faivelenga ‘a Sīsū Kalaisi. ʻOku mau fakaafeʻi koe ke fakalahi ho ngaahi talēnití mo e taukeí ki hono fakalangilangiʻi ʻo e ʻOtuá. ʻE fakatupulekina koe ʻe Sīsū Kalaisi. ʻOku ʻofa ʻa e Tamai Hēvaní ʻiate koe, pea te Ne tokoniʻi koe ke ke ʻofa mo tāpuakiʻi ʻEne fānaú ʻi ha feituʻu pē te ke ngāue ai.

ʻOku fakataumuʻa e ngaahi tefitoʻi moʻoni ʻi he tohi tuʻutuʻuni foʻoú ke tokoniʻi e kau faifekaú ke fakatupulaki ha ngaahi tōʻonga moʻui mo ha ngaahi angafai te ne fakamālohia honau ʻulungaangá pea maʻu ha fiefia ʻo ʻikai ngata pē ʻi heʻenau ngāue fakafaifekaú, ka ʻi he hili mo ʻenau foki ki ʻapí.

ʻOku pehē ʻe he fakalea ʻo e tohi tuʻutuʻuní, “Naʻe ʻikai kamata moʻoni hoʻo ngāue fakafaifekaú ʻi he ʻaho ne vaheʻi ai koé pea ʻe ʻikai ʻosi ia ʻi he ʻaho ʻoku tukuange ai koé. ʻOku ʻikai hangē ʻa e ngāue fakafaifekaú ko ha tui ʻo ha teunga ngāue pe teunga ako ʻi he pongipongí pea toʻo ia ʻi he ʻosi ʻa e ʻahó. ʻE malava ke hoko hoʻo ngāue fakafaifekau taimi kakató ko ha aʻusia liliu moʻui ka ʻoku totonu foki ke toe hoko ia ko ha konga mahuʻinga ʻo e misiona ʻo ho moʻuí.

Naʻe ʻoatu ha tatau fakafeʻiloaki ʻo e tohi tuʻutuʻuní ʻi Sune maʻá e kau taki fakamisiona foʻoú – kau palesiteni fakamisioná mo honau ngaahi hoá—ʻi he Seminā Ako Fakatakimuʻa Fakamisiona ʻo e 2019 ʻi Provo, Utah. ʻE lava ke maʻu kakato atu e tohi tu’utu’uni faka’ilekitulōniká pea mo e pākí maʻá e kau faifekau fakamāmani lahi kotoá he taimí ni.

Naʻe pehē ʻe ʻEletā Tieta F. ʻUkitofa ʻo e kōlomu ʻo e Kau ʻAposetolo ʻe Toko Hongofulu Mā Uá pea ko e sea ʻo e Fakataha Alēlea Pule ʻo e Kau Faifekaú, “ʻOku mau ʻofa ʻi heʻetau kau faifekaú pea fakaʻamua lahi ʻa ʻenau leleí mo e malu fakatu’asinó, fakalaumālié mo e fakaelotó. ʻE tokoni e ngaahi tuʻunga moʻui ko ‘ení ki hono maluʻi mo tataki kinautolu ʻi heʻenau fekumi ke ngāue tokoni maʻa hotau Fakamoʻui ko Sīsū Kalaisí.”

ʻOku kau ʻi he ngaahi meʻa foʻou kuo tānaki atu ki he tohi tuʻutuʻuní ha konga fakalahi ki he konga ʻo e malu ʻa e faifekaú. ʻI he tohi tuʻutuʻuní, ʻoku tataki ai e kau faifekaú ki ha ngaahi vitiō naʻe toki tuku mai ʻe he Siasí fekau’aki mo e ngaahi kaveinga pau ʻo e malú.

ʻOku ʻomai foki ʻe he tohi tuʻutuʻuní ha ngaahi fakahinohino ke tokoniʻi e kau faifekaú ke nau malava ʻo ʻiloʻi e ʻulungaanga fakafonuá pea ke nau ongoʻingofua, fakamatalaʻi e ngaahi tuʻutuʻuni fekauʻaki mo hono fakaʻaongaʻi ʻo e tekinolosiá mo fokotuʻu e ngaahi founga ke tokangaʻi e ongoʻi mafasiá mo maʻu ha tokoni ki he ngaahi pole ʻo e moʻui lelei fakaʻatamaí.

ʻOku ʻomi foki ʻe he tohi tuʻutuʻuní ha ngaahi fakahinohino ki he founga fetuʻutaki e faifekaú, ʻa ē naʻe fanongonongo ʻi Fēpueli 2019. ʻI he tuʻutuʻuni ko iá, ʻoku lava ai e kau faifekaú ʻo fetuʻutaki mo honau ngaahi fāmilí ʻi heʻenau ngaahi ʻaho teuteú ʻi he ngaahi pōpoaki text, pōpoaki ʻi he ‘initanetí, telefoni pe talanoa vitiō ʻi he ‘initanetí, ʻo tānaki ki he faitohí mo e ʻīmeilí.

ʻOku maʻu fakataha mo e tohi tuʻutuʻuní ha tohi fakamatala fakalahi ʻi he ʻinitanetí ke faingamālie ki he kau faifekaú, ʻo fakaikiiki ange ai e fakamatala ki he moʻui leleí, malú, fakaʻaongaʻi totonu ʻo e tekinolosiá mo e ngaahi fatongia fakatakimuʻa ʻo e faifekaú.

ʻOku pehē ʻe he tohi tu’utu’uní, “Fiefia ʻi hoʻo a’usia e ngāue fakafaifekaú ʻi hoʻo ʻofa ki he ʻOtuá mo ʻofa ki ho kaungāʻapí. Ko ha taimi ʻeni ke fiefia pea ke aʻusia ʻa e fiefia mo e melino ʻoku tolongá ʻia Sīsū Kalaisi.”