ʻOku Hangē ʻa e Kau ki he Siasí Ko Ha …
Ke tokoni ki hono fakamanatua e taʻu 200 ʻo e ʻUluaki Mata Meʻa-Hā-Maí, ʻoku tau fakamanatua ʻi he makasini ko ʻení e ngaahi tāpuaki ʻo e kau atu ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko ha ngaahi founga eni ʻe tolu kuo fakamatalaʻi ʻaki ʻe he kau taki ʻo e Siasí ʻa e kau ki he Siasí.
Hoko ko ha Pepe Fakatuʻí
“Hangē ko e fanga pepe fakatuʻí, ʻoku tau fononga ki hotau ʻapi fakalangí ke tau fakataha ai mo ʻetau Ongomātuʻa Fakalangí. Hangē ko e fanga kiʻi pepé, kuo foaki mai kiate kitautolu ha ngaahi ʻulungaanga fakalangi ʻokú ne fakaʻatā kitautolu ke faifolau ʻi he moʻuí. … Hangē ko kinautolú, kapau ʻe lalanga fakataha hotau lotó, maluʻi kitautolu ʻe he ʻEikí … pea ʻai kitautolu ke tau hangē ha pupunga pepe fakaʻofoʻofá.”
Sisitā Reyna I. Aburto, Tokoni Ua ʻi he Kau Palesitenisī Lahi ʻo e Fineʻofá, “ʻI he Loto Taha,” Liahona, Mē 2018, 78.
Hoko ko ha Tokotaha Tokoni ki he Niʻihi Kehé
“ʻI heʻetau tauhi ʻetau ngaahi fuakavá, ʻoku tau kehe ai mei he niʻihi kehe ʻi hotau anga fakafonuá mo e sosaietí, ka ʻoku tau maʻu ai e ueʻi fakalaumālié koeʻuhí ke tau lava ʻo fakakaukau ki ha founga tokoni, founga fakahoko, mo ha founga fakaʻaongaʻi makehe. He ʻikai ke tau fenāpasi maʻu pē mo e māmaní, ka ʻi heʻetau makehe ʻi ha ngaahi founga leleí, ʻoku tau lava ai ʻo tokoni ki he niʻihi kehe ʻoku faingataʻaʻiá.”
Sharon Eubank, Tokoni ʻUluaki ʻi he Kau Palesitenisī Lahi ʻo e Fineʻofá, “Fakaulo Atu Hoʻomou Māmá,” Liahona, Nōvema 2017, 9.
Kau ʻi ha Kuaea
“Ko ha fokotuʻutuʻu fakalangi ke kehekehe ʻa e ngaahi leʻo he kuaeá. Kuo pau ke faʻahi kehekehe—ʻa e soló mo e ʻōlotó, tēnoá mo e laulaló—pea toki maʻu ai ha hiva mālie. …
“… ʻOua naʻa liʻaki ho fatongia ʻi he hivá. Ko e hā hono ʻuhingá? Koeʻuhi he ʻokú ke makehe; ʻoku ʻikai malava ke fetongi koe. ʻOku fakavaivaiʻi ʻe he mole ʻa ha foʻi leʻo ʻe tahá e toenga e kau hiva ʻi he fuʻu kuaea fakamatelie ʻoku tau kau ki aí, kau ai ʻa kinautolu ʻoku nau ongoʻi ʻoku ʻikai fie maʻu ʻe he sosaietí pe ongoʻi tukuhausia he Siasí.”
ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá:, “Ngaahi Hiva ʻoku Hivaʻi mo ʻIkai Hivaʻí,” Liahona, Mē 2017, 49, 50.