Lotua e Faʻētangata ko Tení
Naʻe saiʻia ʻa ʻIsapela ke lotu! ʻI he pongipongí naʻá ne fai ha lotu “fakafeʻiloaki he pongipongí.” Naʻá ne fakamālō ki he Tamai Hēvaní koeʻuhí ko e huelo ʻo e laʻaá mo ha ʻaho foʻou.
ʻI he taimi kai hoʻataá naʻe fakamatala ange ʻe ʻIsapela ki he Tamai Hēvaní fekauʻaki mo hono ʻahó. Naʻá ne lotua ha tokoni ke angalelei ki hono ngaahi tokouá ʻi heʻenau aʻu ki ʻapi mei he akó.
ʻI he teuteu ke mohé, naʻe lotu fakataha e fāmili ʻo ʻIsapelá. Naʻa nau kamata ʻaki maʻu pē ʻenau talanoa fekauʻaki mo e kakai te nau ala fie maʻu ha ngaahi tāpuaki lahi angé.
Naʻe pehē mai e Tangataʻeikí he pooni, “Kātaki ʻo lotu maʻá e Faʻētangata ko Tení. Naʻe tukuange ia mei heʻene ngāue maʻuʻanga moʻuí.”
Naʻe ongoʻi lotomamahi ʻa ʻIsapela. Naʻe ʻikai ke ne ʻiloʻi lahi fekauʻaki mo e ngāue ʻa e kakai lalahí, ka naʻá ne ʻiloʻi naʻe kovi ʻa e mole e ngāué. Naʻá ne ʻofa ʻi heʻene faʻētangatá. Naʻe ifo ʻene ngaohi popikōní. Pea ʻi he taimi fakamuimuitaha naʻá ne haʻu aí, naʻá ne fakaʻaliʻali ange e founga tākisí!
“Te u lotua ia ke maʻu haʻane ngāue,” ko Malia ange ia. Ko e taha ia ʻo e ngaahi tokoua lalahi ange ʻo ʻIsapelá. Ko hono taimi eni ke lotu leʻo lahi ai maʻá e fāmilí.
ʻI he ʻaho hono hokó, naʻe fehuʻi ange ʻe ʻIsapela ki he Tangataʻeikí pe kuo maʻu ha ngāue ʻa Faʻētangata Teni.
“Teʻeki ai,” ko e Tangataʻeikí ange ia. “ʻI he taimi ʻe niʻihi, ʻoku ʻikai faʻa tali mai leva ʻetau ngaahi lotú he taimi pē ko iá.”
“ʻA ia ʻoku totonu ke tau kei lotu pē maʻana?” Ko e fehuʻi ange ia ʻa ʻIsapelá.
Naʻe kamo pē e tangataʻeikí. “ʻE mahuʻinga ʻaupito ia kia Faʻētangata Teni.
ʻI he ʻaho kotoa pē, naʻe kei lotua ai pē ʻe ʻIsapela mo hono ngaahi tokouá ʻa e Faʻētangata ko Tení. Naʻa nau lotua ke maʻu haʻane ngāue. Naʻa nau lotua ia ke ne maʻu ha paʻanga feʻunga ki he meʻa naʻá ne fie maʻú. Naʻa nau lotua ia ke ne ongoʻi ʻoku ʻofaʻi ia.
Naʻe fiefia ʻa ʻIsapela ʻi heʻene lava ʻo tokoni ki he Faʻētangata ko Tení ʻaki ʻene ngaahi lotú. Naʻá ne ongoʻi fiefia mo mālohi ʻi heʻene lotua iá.
Naʻa nau tokoniʻi ʻa e Faʻētangata ko Tení ʻi ha ngaahi founga kehe foki. Naʻa nau tokoni ki he Faʻētangata ko Tení ʻi ha ʻaho ʻe taha ke fakamaʻa hono falé. ʻI ha ʻaho ʻe taha, naʻe tuʻu atu ʻa ʻIsapela mo e Fineʻeikí ke mamataʻi ha foʻi faiva mo e Faʻētangata ko Tení.
Ne ʻosi atu ha lau uike. Ne faifai pē kuo ʻi ai ha ongoongo fakafiefia ʻa e Tangataʻeikí.
“ʻOku ʻi ai ha ʻinitaviu ʻe ua ʻa e Faʻētangata ko Tení he uiké ni!” Ko e Tangataʻeikí ange ia.
Naʻe ongoʻi ʻe ʻIsapela ʻokú ne fiefia loto. Naʻá ne fiefia ʻi heʻene lava ʻo lotua e kakai ʻokú ne ʻofa aí.
Tā fakatātaaʻi ʻe Holly Jones