Ne u Toe Taʻu 14
Lolotonga haʻaku ʻi ha meʻa fakapisinisi ʻi Losesitā, Niu ʻIoke, USA, naʻá ku fakakaukau ke kiʻi fakaʻuli taimi nounou ki he ngaahi feituʻu hisitōlia ʻo e Siasí ʻi Palemailá, ko ha maile nai ʻe 25 (kilomita ʻe 40) hono mamaʻó. Naʻe tautautefito ʻeku fie ʻalú ke mamata ki he Vao ʻAkau Tapú.
ʻI he taimi ko iá, naʻá ku fefaʻuhi mo ha ngaahi meʻa fakatupuʻita ʻi he ngāué mo ʻapi fakatouʻosi, pea naʻá ku fakaʻamua ha aʻusia toputapu pē maʻaku ʻa ia te ne fakapapauʻi mai kiate au e founga fakaʻeiʻeiki ʻoku ʻafioʻi ai au ʻe he Tamai Hēvaní.
Naʻe hoko eni ʻi ha ngaahi taʻu lahi ia kimuʻa pea toki langa e Senitā Takimamata ʻo e Moʻunga Komolá mo e Temipale Palemaila Niu ʻIoké. Naʻá ku tau pē ʻo ofi ki he ʻapi ʻo e fāmili Sāmitá, peá u hifo mei he kaá, ʻo muimui he ngaahi fakaʻilonga ki he Vao ʻAkau Tapú. Naʻá ku lue ʻi he halá ʻo fou atu he ʻuluʻakaú mo lotu pē ʻi hoku lotó. Naʻá ku fakalaulauloto ʻi heʻeku lué, pea aʻu pē ʻou tūʻulutui ʻo lotu. Naʻá ku ongoʻi fiemālie, ka naʻe ʻikai ke u mamata ki ha pou maama pea ʻikai ke u maʻu ha ongo mālohi. Naʻá ku kei fakakaukau lahi ki he ngaahi meʻa naʻá ku hohaʻa ki aí.
ʻI heʻeku kiʻi loto-mamahí, ne u lue atu ki he fale ʻakau ne toe langa, ʻa ia naʻe nofo ai e fāmili Sāmitá. Neu fakakaukauloto atu ki heʻenau ngāue, lau e folofolá, mo lotu aí. Naʻá ku ʻaʻahi ki he loki mo e peito he fungavaka ʻi ʻolungá, mo hono tafuʻanga afi pilikí, ʻū tēpile mo e sea ʻakaú, faliki papá, mo e ngaahi naunau fale faingofuá. Ne u ofo ʻi he fakakaukau atu naʻe nofo he ʻapi ko ʻení ha kiʻi tamasiʻi taʻu 14, naʻe lahi ʻene ngaahi fehuʻí, peá ne fakapapauʻi ke ʻalu ʻo fehuʻi ki he ʻOtuá.
ʻI heʻeku tuʻu ʻi he matapaá ʻo teuteu ke u mavahé, naʻá ku sio atu ki he Vao ʻAkau Tapú. Naʻá ku ʻiloʻi naʻe ʻalu ʻa Siosefa Sāmita ki he vao ʻakau ofi maí ʻo lotu, peá ne mamata ki he ʻOtua ko e Tamaí mo Hono ʻAlo ko Sīsū Kalaisí. Ne fakafokifā pē kuo ake ʻiate au e manavaʻofa kia Siosefa. Naʻe hangē kuó u ongoʻi e meʻa naʻe ongoʻi ʻe Siosefa kimuʻa peá ne lotú. Naʻá ku masiva ʻi he potó, ka naʻá ku ʻiloʻi te u lava ʻo kole ki he ʻOtuá pea maʻu ha ngaahi tali (vakai, Sēmisi 1:4–5). Naʻá ku manatuʻi ʻeku lotu ʻi he tui heʻeku kei talavoú peá u ongoʻi ha melino mo ha fakapapau. Naʻá ku ongoʻi hono fakafonu hoku lotó ʻe he ʻamanaki lelei mo e ʻofa tatau. Naʻe hangē kuó u toe taʻu 14.
Naʻá ku punou hoku ʻulú pea ʻohake ha kiʻi lotu loto houngaʻia fakalongolongo. Kuo maʻu ʻeku talí. Naʻe ʻafioʻi au ʻe he Tamai Hēvaní. Pea kapau ʻe hokohoko atu ʻeku falala kiate Iá, ʻe hokohoko atu ʻEne tali maí.