Ko e Ngaahi Tāpuaki ʻo e Mēmipasipi ʻi he Siasí
ʻOku tau fakamanatua ʻi he taʻú ni e taʻu 200 ʻo e ʻaʻahi mai ʻa e Tamaí mo e ʻAló kia Siosefa Sāmitá. Hili ha taʻu ʻe hongofulu mei he ʻUluaki Mata Meʻa-Hā-Maí, naʻe fokotuʻu e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻo ʻomi ai e ngaahi ouau, ngaahi akonaki ʻo e ongoongoleleí, mo e mafai ʻo e lakanga fakataulaʻeiki ʻoku fie maʻu ki hotau fakamoʻuí.
ʻI ha māmani ʻoku tupulaki ai e ʻilo fakaemāmaní, ʻoku tokolahi ha kakai ʻoku nau fifili pe ko e hā ʻoku fie maʻu ai ha faʻunga ki he tui fakalotú. ʻOku nau ongoʻi te nau lava pē ʻo ofi ki he ʻOtuá ʻi ha ngaahi feituʻu mavahe mei ha siasi. Neongo ʻoku moʻoni te tau lava ʻo ongoʻi e Laumālie ʻo e ʻEikí ʻi ha ngaahi feituʻu kehekehe, ʻoku ʻoatu ʻe he Liahona ko ʻení ha ngaahi ʻuhinga ʻe niʻihi naʻe fokotuʻu ai ʻe he ʻEikí Hono Siasí mo e founga ʻoku fakatefito ai ʻe Hono Siasi kuo fakafoki maí ʻetau akó mo fakatupulaki ange ʻetau ongoʻi ngofua fakafoʻituitui Hono Laumālié ki he leleí ʻi hotau kuongá.
Hangē ko ʻeku tohi ʻi heʻeku fakamatala he peesi 24, ʻoku muimui e kāingalotú ki he akonaki ʻa e Palōfita ko Siosefa Sāmitá ke “fafangaʻi ʻa e fiekaiá, fakakofuʻi e telefuá, … fakafiemālieʻi e faingataʻaʻiá, ʻo tatau ai pē ʻi he siasí ni, pe toe meʻa kehe.” ʻI heʻeku ngāue ʻi he ngaahi Tokoni ʻOfa Fakaetangata ʻa e Kau Māʻoniʻoni ʻi he Ngaahi ʻAho Kimui Ní, kuó u mātā tonu ʻi he ngaahi tokoni lahi faufaua ʻoku fakahoko ʻe he Siasí ʻi ha ngaahi fonua ʻe 100 tupu ʻi he taʻu takitaha. Koeʻuhí ko e ngaahi foaki iiki mei he kāingalotú, kuo faitāpuekina ai hotau kāinga ʻi he funga ʻo e māmaní ʻaki e ngaahi fiemaʻu ʻo e moʻuí pea toe mahulu hake ai.
ʻOku fakamatalaʻi ʻe Palesiteni Tāleni H. ʻOakesi ʻi he peesi 12 ʻa e ʻuhinga ʻoku tataki ai ʻe he ʻEikí Hono Siasí ʻo fakafou ʻi he kau palōfitá mo e kau ʻaposetoló, pea ʻi he peesi 18, ʻoku vahevahe ai ʻe Sisitā Sini B. Pingihami, ʻa ia ʻoku ou ngāue fakataha mo ia ʻi he Kau Palesitenisī Lahi ʻo e Fineʻofá, ha pōpoaki fekauʻaki mo e ivi takiekina ʻo e houʻeiki fafiné mo e founga te tau lava ai ʻo fetokoniʻaki ke aʻusia hotau tuʻunga malava fakalangí ʻaki ʻetau ngāue fakataha ʻi he Siasí.
ʻOfa ke tāpuekina fakafoʻituitui mo fakalūkufua kitautolu ʻe he ʻOtuá ʻi heʻetau hokohoko atu e ngāue fakaetauhí ʻi ha founga māʻolunga mo māʻoniʻoni ange kae ʻoua kuo toe hāʻele mai e Fakamoʻuí.
Sisitā Sharon Eubank
Tokoni ʻUluaki ʻi he Kau Palesitenisī Lahi ʻo e Fineʻofá