Fakaʻilekitulōnika Pē: Kakai Lalahi Kei Talavoú
Founga ʻOku Ou ʻIloʻi Ai ʻOku Uiuiʻi pea Tataki ʻe he ʻOtuá ʻa e Palōfitá
Naʻe liliu ʻeku fakamoʻoni ki he palōfita moʻuí ʻi he ʻaho ne ʻaʻahi ai ha ʻAposetolo ki Haiti.
ʻOku nofo ʻa e tokotaha naʻá ne faʻú ʻi Haiti.
ʻI heʻeku tupu hake ʻi he Siasí, naʻá ku fefaʻuhi maʻu pē mo hono ʻiloʻi ʻo e ngaahi moʻoní pea mo hono tauhi ke mālohi ʻeku fakamoʻoní. ʻOku ou manatuʻi e pongipongi Tuʻapulelulu ʻe taha ʻi he seminelí, naʻe akoʻi kimautolu ʻe he faiakó fekauʻaki mo e kau palōfitá mo e kau ʻaposetoló. Naʻá ne lea ʻaki ha kupuʻi lea kuo teʻeki ke ngalo ʻiate au: “Ko Palesiteni Tōmasi Sipenisā Monisoní [ʻa ia ko e palōfita he taimi ko iá] ko ha palōfita ia ʻa e ʻOtuá, pea ko hai pē ʻokú ne fie ʻilo pe ʻoku moʻoni ʻa e meʻá ni, ʻe lava ke ne lotu fakamātoato ke ne maʻu ʻa e talí.” Naʻe ongo moʻoni kiate au ʻene ngaahi leá.
ʻI heʻeku aʻu ki ʻapi ʻi he ʻaho ko iá, naʻá ku tūʻulutui ʻo kole ki he Tamai Hēvaní ke Ne fakaʻilo kiate au pe naʻá Ne uiuiʻi ʻa Palesiteni Monisoni ke ne hoko ko e palōfitá. ʻI he momeniti ko iá, ne u ongoʻi ne fakafonu ʻaki au ha fiefia lahi mo lelei—ko ha meʻa ne taʻe-mafakamatalaʻi. Talu mei he ʻaho ko iá, naʻá ku ʻiloʻi ko e māfana ne u ongoʻi he momeniti ko iá ne haʻu ia mei he ʻOtuá, pea naʻá ne fakapapauʻi mai ʻa ʻeku tui ki he palōfitá. Naʻe tupulaki ʻeku ʻofá ʻo aʻu ki he tuʻunga ne u ʻiloʻi ai naʻá ku fie maʻu ʻa e tataki ʻa e palōfitá ʻi heʻeku moʻuí. Ne ʻikai ke u lava ʻo mavahe mei ai. Naʻá ku fakaʻamu ke u fanongo mo talangofua maʻu pē ki heʻene ngaahi lea ʻi he konifelenisi lahí. ʻI heʻeku ʻilo ʻa e pekia ʻa Palesiteni Monisoni hili ha ngaahi taʻu siʻi mei aí, naʻá ku loto-mamahi lahi he naʻá ku ʻofa lahi kiate ia.
ʻI hono hikinimaʻi ʻo Palesiteni Lāsolo M. Nalesoni ko e palōfita foʻoú, naʻá ku fifili pe te u toe maʻu fēfē nai ha ʻofa lahi kiate ia ʻo hangē ko ia ne u ongoʻi kia Palesiteni Monisoní! Ka naʻe ʻafioʻi ʻe he Tamai Hēvaní ʻa e holi hoku lotó, ʻa ia ko e fakatupulaki ha ʻofa lahi ki he tangata kotoa pē ʻokú Ne ui ke tataki Hono Siasí. Pea ʻoku ou tui naʻá Ne finangalo ke hokohoko atu ʻeku aʻusia e ngaahi meʻa te ne fakangofua au ke fakahoko iá.
Hili ha kiʻi taimi mei hono uiuiʻi ʻo Palesiteni Nalesoní, naʻá ne fekauʻi atu ʻa ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ke fakataha mo e toʻu tupu ʻo Haití. Naʻá ku fiefia ʻi he fakakaukau te u ʻalu ʻo mamata kiate iá. Naʻá ku fie ʻilo pau pe naʻe uiuiʻi moʻoni ia ʻe he ʻOtuá.
Ko Hono ʻIlo ʻa e Moʻoní
Hili ha fononga lōloa, naʻá ku tūʻuta ʻi he kolomuʻa ʻo hoku fonuá peá u nofo ʻi hoku nofoʻangá ʻi he fale ne mau fakataha ai mo ʻEletā Lenilaní. Ko e taimi naʻá ne hū mai ai ki he lokí, ne u ongoʻi ha māfana moʻoni ʻi hoku lotó. Naʻe kamata ʻene pōpoakí ʻaki ʻene pehē naʻe fekauʻi ia ʻe Palesiteni Lāsolo M. Nalesoni ke ne ʻaʻahi mai kiate kimautolu. Naʻá ku ʻiloʻi ʻi he momeniti ko iá ne ʻafioʻi ʻe he ʻOtuá ʻemau fie maʻu ke ongoʻi e ʻofa mo e poupou ʻa e palōfita foʻoú, pea naʻá Ne tuku ke mau maʻu ʻa e faingamālie ko iá.
Ko e taimi ne kole mai ai ʻe ʻEletā Lenilani ha tokotaha ke ne lau ʻa e talateu ʻo e Tohi ʻa Molomoná ki he kulupú, ne u ongoʻi mālohi ʻa e Laumālié—ne u tuʻu ki ʻolunga taʻe te u ʻiloʻi e meʻa ne u faí. Naʻá ku lue ki muʻa ki he tuʻunga malangá peá u tuʻu vāofi ki he ʻAposetoló ke laukonga. Naʻe kamata ke vave e tā hoku mafú, pea naʻe ʻikai ke u lava ʻo mafakamatalaʻi ʻa e mālohi ʻo e Laumālie ne u ongoʻí. Naʻe hangē ne ʻafio ʻa e ʻOtuá ʻi he lokí, pea ko ha ongo fakaofo ia ke aʻusia. Naʻe mole kotoa ʻeku ngaahi fehuʻí mo e veiveiuá ʻi he taimi pē ko iá. Naʻá ku ʻiloʻi ko ʻEletā Lenilaní ko ha ʻAposetolo moʻoni ia kuo ui ʻe he ʻOtuá. Naʻá ku ongoʻi ha ʻofa lahi kiate ia—pea mo e palōfita naʻá ne fekauʻi ia ke haʻu ʻo lea kiate kimautolú.
ʻOku ʻofa lahi ʻa e Tamai Hēvaní ʻiate kitautolu pea ʻokú Ne fakahaaʻi Ia mo ʻEne fakahinohinó ʻo fakafou ʻi Heʻene kau taki fakaofó. ʻOku ou fakamoʻoni ko e kau palōfitá mo e kau ʻaposetoló ʻoku uiuiʻi kinautolu ʻe he ʻOtuá, pea ʻoku muimui ʻa Palesiteni Nalesoni ki he ngaahi tuʻutuʻuni mo e fakahā ʻa e ʻOtuá, pea te ne tataki maʻu pē kitautolu ʻi he hala totonú. Talu meia Siosefa Sāmita, kuo kamata ʻa e ngāue ki hono toe fakafoki mai ʻo e ongoongoleleí, pea ʻoku kei hokohoko atu pē ʻa e ngāue ko iá ʻi he ʻahó ni. Pea ʻi heʻetau fai hotau lelei tahá ke muimui ki he faleʻi ʻo ʻetau kau palōfitá mo vahevahe ʻa e moʻoní mo e niʻihi kehé, te tau lava foki ʻo kau atu ki he hokohoko atu hono Toe Fakafoki Mai ʻo e Ongoongoleleí.