Ko Hoku Motu ʻo e Tuí
Tā fakatātā ʻa Allen Garns
ʻI heʻeku kei siʻi ʻi he Motu Lopinisoni Kulusoú, ʻoku tuʻu ʻi ha maile ʻe 416 (670) he matāfanga ʻo Sileí, naʻe akoʻi ai au mo e toenga ʻo ʻemau fānaú ʻe heʻemau ongomātuʻá fekauʻaki mo e tuí mo e loto-vilitakí.
Ko e taha ʻo ʻena ngaahi akonaki fakangalongataʻá naʻe hoko ia lolotonga ha ʻuha lōvai ʻi ha Sāpate ʻe taha. Naʻe ʻiloʻi ʻe heʻeku ongomātuʻá naʻe ʻi ai haʻana tukupā ke tauhi ki he ʻEikí—naʻe pau ke na ʻalu ki he lotú. Naʻe maumau homau ʻū fakamalú, pea ko homau sāketí pē mo e ʻū putí naʻa mau malu ai mei he matangí. Naʻe fakakaukau ʻeku fineʻeikí ke kofu ʻaki kimautolu ha ʻū milemila veve. Naʻe ʻikai ke mau mā he ko kimautolu pē ʻa e kakai naʻe lue he halá lolotonga e ʻuhá. Ne mau ʻiloʻi naʻa mau fai e meʻa naʻe finangalo e ʻEikí ke mau faí.
ʻI heʻemau tūʻuta he fale naʻa mau ngāue ʻaki ko ha falelotú, ne mau fakatokangaʻi ko kimautolu pē ʻe lotu he ʻaho ko iá. Naʻe lahi ha ngaahi Sāpate naʻe pehē pē. Naʻe hoko ʻeku tangataʻeikí ko e palesiteni fakakoló peá ne faʻa tataki e lotú pea ko e fānaú pē mo ha kau Fineʻofa ʻe niʻihi ne ʻi aí. Te ne tāpuakiʻi foki mo tufaki e sākalamēnití.
Naʻá ku manatu ʻofa ki he ngaahi ʻaho naʻa mau maʻu lotu ai ko ha fāmilí. ʻOku kei hoko ʻemau hiva fakataha mo ako fekauʻaki mo e Tamai Hēvaní mo Hono ʻAlo ko Sīsū Kalaisí, ko ha manatu melie mahuʻinga. ʻOku kei ʻi hoku lotó pē ʻa e Motu Lopinisoni Kulusoú. Naʻe hoko ai e ngaahi manatu melie kotoa pē ʻoku ou mau ki heʻeku kei siʻí, ʻo kau ai e ngaahi akonaki ʻo e ongoongoleleí naʻá ku maʻu mei heʻeku ongomātuʻá.
ʻI he tokosiʻi ʻa e kāingalotu ʻo e Siasí ʻi he motú, naʻe ʻikai ai ke mau maʻu e ngaahi polokalama pe maʻuʻanga tokoni ʻoku fakafiefia ki ha kau mēmipa tokolahi. Ka naʻe akoʻi kimautolu ʻe heʻemau ongomātuʻá ke mau ʻalu ki he lotú, lotu, mo lau e folofolá. Naʻá ku maʻu ha mālohi mo ha fakahinohino ʻi heʻeku lau e folofolá, peá u maʻu ha ngaahi momeniti ʻo e fakahā fakataautahá. ʻOku ou manatuʻi ha Sāpate ʻe taha naʻá ku maʻu ai e fakapapau ke u ngāue fakafaifekaú.
ʻI heʻeku ako ʻi he ʻunivēsití ʻi Vinia tela Mā, Sileí, naʻá ku manatuʻi ʻeku lue mo ʻeku ongomātuʻá he laʻaá, ʻuhá, ʻuha maká, mo e havilí. Naʻe ueʻi au ʻe he manatu ko ʻení he Sāpate kotoa ke u tuʻu hake mei he mohengá, teuteu, pea ʻalu ki he lotú—ʻo tatau ai pē pe ko e hā ʻoku hoko ʻi tuʻá.
Kuo hoko ʻa e ongoongolelei ʻo Sīsū Kalaisí ko e uho ia ʻo ʻeku moʻuí ʻi heʻeku kei siʻí, ngāue fakafaifekaú, pea ʻi heʻeku hoko ko ʻeni ko ha uaifi mo e faʻeé. Kuó u maʻu eni hoku fāmili pē ʻoʻoku, pea te u ʻoatu mo hoku husepānití ki heʻema fānaú e sīpinga faivelenga ʻa ʻeku ongomātuʻá.