ʻUlise mo ʻEmilia Maio

Pooto, Potukali

ʻĪmisi

Emilia, Custodia, and Ulisses

Naʻe fanauʻi ʻa e tokoua ‘o ʻEmilia Maió, ʻa Kasitōtia, mo ha faingataʻaʻia fakaesino lahi. ʻI he taʻu ʻe hongofulu mā nima kuo hilí, naʻe haʻu ai ʻa Kasitōtia ʻo nofo mo ʻEmilia mo hono husepāniti ko ʻUlisé. Kuo nau ako ʻi heʻenau hoko ko e fāmilí, ko e ngāue tokoni taʻesiokita fakafāmilí ko ha maʻuʻanga fiefia lahi ia.

Leslie Nilsson, Faitaá

ʻEmilia:

ʻI hono fanauʻi mai hoku tehina ko Kasitōtiá, naʻe lava pē ke u tala he taimi ko iá, naʻe ʻomi ia mei he langí. Naʻá ku vakai ki ai ʻi hono fofongá. Naʻá ku vāofi mo Kasitōtia ʻi heʻema tupu haké. Naʻá ku faʻa fua ia he naʻe ʻikai ke ne lava ʻo lue koeʻuhí ko hono ngaahi fakangatangatá. Ko e ngaahi taimi ʻe niʻihi, naʻe tuʻolahi ʻene puke he mahaki teté ʻi ha ʻaho pē ʻe taha, ko ia ai naʻe faʻa faingataʻa ke tokangaʻi ia, ka naʻá ku faʻa ofi maʻu pē ke tokoni ki heʻeku fineʻeikí. ʻI he puke ʻeku fineʻeikí, naʻá ku tokangaʻi fakatouʻosi kinaua.

ʻI he taimi ko iá, naʻe fakaʻau ke motuʻa ange ʻeku fineʻeikí pea faingataʻa ange hono tokangaʻi ʻo Kasitōtiá. Naʻá ne fakakaukau ke ne ʻalu ki ha senitā ke tokangaʻi ai ia. Naʻe ʻalu ʻa Kasitōtia ki ha feituʻu ʻoku tokangaʻi ai e kakai ʻoku faingataʻaʻia fakaesinó. Naʻe kamata mei ai ʻema ʻalu ʻo ʻomi ia ke mau nofo he fakaʻosinga kotoa pē ʻo e uiké. Naʻá ma fakahoko ʻeni ʻi ha taʻu nai ʻe fā.

Kimuʻa siʻi pē pea mālōlō ʻeku fineʻeikí, ne u ʻaʻahi atu mo hoku husepānití kiate ia. Naʻá ne kuku homa ongo nimá mo talamai naʻá ne falala te ma tokangaʻi ʻa Kasitōtia. Naʻá ma talaange te ma fai ia. ʻI he taʻu ʻe 15 kuo ʻosí, kuo nofo hoku tehiná mo kimaua pea kuó ma tokangaʻi ia.

Ko e moʻoni naʻe faingataʻa ʻi he kamataʻangá. Naʻe pau ke u tukuange ʻeku ngāué ke tokangaʻi hoku tehiná. Ka kuo hoko ia ko ha tāpuaki. ʻI heʻema fuofua mali mai mo ʻUlisé, naʻá ma ʻiloʻi ai he ʻikai ke ma lava ʻo maʻu ha fānau. ʻOku hangē ʻa Kasitōtia ko ha kiʻi taʻahine ne ʻomi ʻe he ʻOtuá ke ma tokangaʻí. ʻOkú ne toʻo atu ʻi ha ngaahi founga lahi, e ongo taʻe-kakato ʻokú ma maʻu ʻi he ʻikai haʻama fānaú. ʻOkú ne angaʻofa mo tokanga. ʻOkú ne saiʻia ke kata pea manako he ʻalu ki he lotú. Ko ha fiefiaʻanga ia.

ʻUlise:

ʻI hono uiuiʻi au ke u hoko ko ha pīsopé, naʻe pau ke u fakakaukau pe te u lava ʻo fakakakato hoku ngaahi fatongia ʻi ʻapí mo hoku uiuiʻí. Naʻá ku talanoa mo ʻEmilia ki ai pea ne ma ʻilo te ma lava ʻo fakahoko fakataha ʻeni kapau te ma falala ki he ʻOtuá.

Kuo langaki fakalaumālie maʻu pē au ʻe heʻeku ngāue tokoni ki hoku fāmilí. Neongo ʻoku ʻikai ke ma maʻu ha taimi fakataautaha lahi ko ha ongomeʻa mali, ka ʻokú ma vāofi fakalaumālie. ʻOku mau vāofi ange ko ha fāmili. Kuó ma mātā he taimi kotoa e toʻukupu ʻo e ʻEikí ʻi hono tokoniʻi kimautolú. Kuó Ne fakahaaʻi mai ha ngaahi mana lahi. ʻOkú ma mohu tāpuekina moʻoni.