Ko e hā ʻe lava ʻo tokoni ke mahino kiate au e tohi ʻo e Fakahaá?
ʻOku tau maʻu ha ngaahi tokoni ʻe niʻihi ke mahino e tohi ʻo e Fakahaá koeʻuhí ko e kau palōfita ʻi onopōní. Naʻe ʻomi ʻe Siosefa Sāmita ha ngaahi meʻa mahuʻinga ki he tohí ni. Hangē ko ʻení:
-
Tokāteline mo e Ngaahi Fuakava 77. ʻOku ʻomi ʻa e fakahā ko ʻení ʻi ha sīpinga ʻo e fehuʻi-mo e-tali pea ʻoku ʻomi ai ha ngaahi fakakaukau mahuʻinga ki he tohi Fakahaá. ʻOku fakamatalaʻi ai ha ngaahi meʻa mahuʻinga ʻo e vahe 4–11 mo fakamamafaʻi e founga ʻoku nau fekauʻaki ai ki he ngāue ʻa e ʻEikí ʻi he ngaahi ʻaho kimui ní.
-
Ko e Liliu ʻa Siosefa Sāmitá. ʻOku lahi ha ngaahi veesi ʻi he tohi Fakahaá naʻe tokoni ʻa Siosefa Sāmita ke fakamahino ʻi heʻene liliu fakalaumālie e Tohi Tapú. Te ke lava ʻo maʻu ʻeni ʻi he ngaahi tokoni ki he akó ʻi he scriptures.ChurchofJesusChrist.org.
Naʻe tokoni ʻa Siosefa Sāmita ke tau vakai ko e tohi ʻa Fakahaá ʻoku ʻikai ko e misiteli taʻeʻiloa ia ʻoku fakakaukau ki ai e niʻihi. Pea naʻá ne akoʻi mai foki kapau naʻe teʻeki ʻomai ʻe he ʻOtuá ha fakaʻuhinga ki ha meʻa-hā-mai, he ʻikai ʻekeʻi meiate kitautolu pe ʻoku tau ʻiloʻi (vakai, History of the Church, 5:343). Naʻá ne tokoni ke tau vakai ʻoku nofotaha ʻa e tohí ʻia Sīsū Kalaisi—ʻa e ʻamanaki lelei ʻoku tau maʻu ʻo fakafou ʻiate Ia ke ikunaʻi ai e māmaní pea toe foki ki he Tamai Hēvaní.