Fanga Sipí mo Honau Tauhi-sipí
Fai ʻe ʻEletā Vern P. Stanfill
ʻO e Kōlomu ʻo e Kau Fitungofulú
Mei ha ‘initaviu mo Christina Crosland.
“Ko hoku tauhí ʻa [e ʻEikí]” (Saame 23:1).
Naʻá ku tupu hake ‘i ha faama pulu ʻi Monitana, USA. Naʻe ʻi ai foki hamau fanga sipi ʻe toko 300 nai ʻi he fāmá. Naʻe fakatau mai ia ʻe heʻeku faʻeé ko ha founga ke mau maʻu ai ha paʻanga ki heʻemau ngāue fakafaifekaú.
Ko ʻeku ngāue naʻe faí ko hono tokangaʻi e fanga lami ne ʻikai ha faʻē ke ne tokangaʻi kinautolú. ‘I he taimi ʻoku laka hake ai e ʻuhiki ʻa ha sipi ʻi he toko tahá, ʻoku ʻikai ke ne faʻa tokangaʻi kotoa e fanga lamí. Ko ia ko e fanga lami ia ne u tokangaʻí. Naʻe ʻi ai ha fanga lami peheni ʻe toko 5 ki he 10 he taʻu takitaha.
Ko e ʻaho kotoa pē, ʻoku ou fakaʻuli ki he loto ʻataʻataá ʻi heʻemau kiʻi kā lanu pulū ʻoku ui ko e Vokisiuākeni Pītolo, pea fakalea e hōní. Peá u fakaava leva e matapā ʻo e kaá. ‘E lele mai e fanga lami ko ʻení mei he feituʻu pē ʻoku nau ʻi ai ʻi he loto ʻataʻataá. Naʻa nau ‘iloʻi e leʻo ʻo e Vokisiuākeni motuʻa ko iá. Te nau puna hake ʻo heka ʻi mui ʻi he kaá, pea te u fakaʻuli ʻo ʻave kinautolu ki he fale tauhiʻanga ʻo e fanga monumanú pea fafanga kinautolu.
‘Oku tau hangē ko e fanga kiʻi lami ko ʻení. ʻOku tau nofo ʻi ha ngaahi feituʻu kehekehe pea fepaki mo ha ngaahi faingataʻa kehekehe ʻi heʻetau moʻuí. Ka ‘oku tokoni mai ʻa Sīsū kiate kitautolu takitaha. Te tau lava ʻo ako ke fakafanongo ki Hono leʻó. Te tau lava ʻo tafoki kiate Ia ke maʻu ha nonga mo e malu. Te tau lava ʻo ongoʻi ʻokú Ne ʻofa mo e Tamai Hēvaní ʻiate kitautolu.
Kuo liliu ʻeku moʻuí ʻi heʻeku hanga taha kia Sīsū ko e Tauhi-sipi ʻi heʻeku moʻuí. ‘I heʻetau muimui ki he finangalo ʻo e Fakamoʻuí, te tau ongoʻi ʻa ʻEne ʻofá pea ako ke falala kiate Ia. ●