Meʻaʻofa ‘e Fā mei he Fakamoʻuí
Fai ʻe Palesiteni Russell M. Nelson
Mei he Fakataha Lotu Faka-Kilisimasi ʻa e Kau Palesitenisī ʻUluakí ʻi he 2018.
Tā fakatātaaʻi ʻe Kathleen Peterson
Siʻoku kāinga ʻofeina, ko ha faʻahitaʻu maʻongoʻonga moʻoni ʻeni! Tuku muʻa ke tau fakakaukau fakataha ki he ngaahi tāpuaki ʻoku tau maʻu ʻi he nofotaha ʻetau tokangá ʻi he moʻui, misiona, tokāteline, mo e Fakalelei ʻo e ʻEiki ko Sīsū Kalaisí.
ʻOku ou fakaafeʻi kimoutolu ʻi he lolotonga e faʻahitaʻú ni ke mou fakakaukau ki homou ngaahi holí. ʻOkú ke loto moʻoni nai ke hoko ʻo hangē ange ko Sīsū Kalaisí? ʻOkú ke loto moʻoni nai ke nofo mo e Tamai Hēvaní pea mo ho fāmilí ʻo taʻengata pea moʻui ʻo hangē ko Iá? Kapau ko ho lotó ia, ʻe fie maʻu ke ke tali e ngaahi meʻaʻofa lahi ʻoku ʻomi ʻe he ʻEikí ke tokoniʻi koe lolotonga ho taimi siviʻi ʻi he moʻui fakamatelié. Tau nofotaha muʻa ʻi he meʻaʻofa ʻe fā ʻi he ngaahi meʻaʻofa naʻe foaki ʻe Sīsū Kalaisi kiate kinautolu kotoa ʻoku loto fiemālie ke maʻu iá (vakai Tokāteline mo e Ngaahi Fuakava 88:33).
ʻUluakí, naʻá Ne foaki mai ʻa e malava taʻefakangatangata ke ʻofá. ʻOku kau ai e malava ke ʻofa ʻi he niʻihi ʻoku ʻikai ʻofaʻí mo kinautolu ʻoku ʻikai ke nau ʻofa ʻiate koé pea lolotonga fakatanga mo fai kovi atú (vakai, Mātiu 5:44–45).
ʻI he tokoni ʻa e Fakamoʻuí, te tau lava ʻo ako ke ʻofa ʻo hangē ko ʻEne ʻofá. ʻE ala fie maʻu ki ai ha liliu ʻo e lotó—ko ha fakavaivaiʻi moʻoni hotau lotó—ʻi hono akoʻi kitautolu ʻe he Fakamoʻuí ʻi he founga ke tau fetauhiʻaki moʻoni aí. Siʻoku kāinga ʻofeina, te tau lava ʻo ngāue fakaetauhi moʻoni ʻi he founga ʻa e ʻEikí ʻi heʻetau tali ʻEne meʻaʻofa ʻo e ʻofá.
Ko e meʻaʻofa hono ua ʻoku foaki atu ʻe he Fakamoʻuí ko e malava ko ia ke fakamolemolé. Te ke lava fakafou ʻi Heʻene Fakalelei taʻefakangatangatá, ʻo fakamolemoleʻi ʻa kinautolu kuo nau fakamamahiʻi koé pea mahalo he ʻikai ke nau teitei tokanga ki heʻenau angakoví. ʻE foaki atu ʻe he Fakamoʻuí ʻa e malava ke ke fakamolemoleʻi ha taha pē kuó ne ngaohikoviʻi koe ʻi ha faʻahinga founga pē.
Ko ha meʻaʻofa hono tolu mei he Fakamoʻuí ko e fakatomalá. ʻOku fakaafeʻi kitautolu ʻe he ʻEikí ke liliu ʻetau fakakaukaú, ʻiló, laumālié, pea naʻa mo ʻetau mānavá. Hangē ko ʻení, ʻi he taimi ʻoku tau fakatomala aí, ʻoku tau mānava ʻaki e houngaʻia ki he ʻOtuá, ʻa ia ʻokú ne foaki mai e mānavá ʻi he ʻaho takitaha (vakai, Mōsaia 2:21). Pea ʻoku tau holi ke fakaʻaongaʻi e mānava ko iá ʻi he tauhi kiate Ia mo ʻEne fānaú. Ko e fakatomalá ko ha meʻaʻofa maʻongoʻonga ia. Ko ha founga ia ʻoku ʻikai totonu ke ilifiaʻi. Ko ha meʻaʻofa ia ke tau maʻu ʻi he fiefia pea ke fakaʻaongaʻi—ʻo tali—ʻi he ʻaho takitaha ʻi heʻetau faifeinga ke hoko ʻo hangē ange ko hotau Fakamoʻuí.
Ko e meʻaʻofa hono fā mei hotau Fakamoʻuí ko ha talaʻofa moʻoni—ko ha talaʻofa ʻo e moʻui taʻengatá. ʻE toetuʻu e tokotaha kotoa pē pea aʻusia e moʻui taʻe-faʻa-maté. Ka ko e moʻui taʻengatá ʻoku mahulu atu ia ʻi ha tuʻunga pau ʻo e taimí. Ko e moʻui taʻengatá ko e faʻahinga mo e tuʻunga ia e moʻui ʻa e Tamai Hēvaní pea mo Hono ʻAlo ʻOfaʻangá. ʻI he taimi ʻoku ʻomi ai ʻe he Tamaí ʻa e moʻui taʻengatá, ʻoku hangē ʻokú Ne pehē mai, “Kapau te ke fili ke muimui ki hoku ʻAló—kapau ko ho holí ke ke hoko moʻoni ʻo hangē ange ko Iá—te ke malava ʻi he fakalau ʻa e taimí ʻo moʻui hangē ko kimauá pea pule ki he ngaahi māmaní mo e ngaahi puleʻangá.”
ʻE ʻomi ʻe he ngaahi meʻaʻofa makehe ʻe fā ko ʻení ha fiefia lahi ange ʻi heʻetau tali kinautolú. Naʻe malava ʻo fakahoko ia koeʻuhí naʻe āfeitaulalo ʻa Sihova ke hāʻele mai ki he māmaní ko e pēpē ko Sīsuú. Naʻe ʻaloʻi ia ʻi ha Tamai taʻe-faʻa-mate mo ha faʻē fakamatelie. Naʻe ʻaloʻi ia ʻi Pētelihema ʻi he ngaahi tūkunga maʻulalo tahá. Ko Sīsū Kalaisi ʻa e meʻaʻofa fisifisimuʻa ʻa e ʻOtuá—ko e meʻaʻofa ʻa e Tamaí ki he kotoa ʻo ʻEne fānaú (vakai, Sione 3:16).
ʻI he nofotaha pehē ʻetau fakakaukaú mo e ngaahi ongó ʻi he Fakamoʻui ʻo e māmaní, ko e hā leva ʻoku fie maʻu ke tau faí ke maʻu ai e ngaahi meʻaʻofa ko ʻeni naʻe foaki loto fiemālie mai ʻe Sīsū Kalaisí? Ko e hā ʻa e founga ke ʻofa ai ʻo hangē ko ʻEne ʻofá, fakamolemole hangē ko ʻEne fakamolemolé, fakatomala ke hoko ʻo hangē ange ko Iá, pea nofo mo Ia mo ʻetau Tamai Hēvaní?
Ko e foungá ke fakahoko mo tauhi ʻa e ngaahi fuakava toputapú. ʻOku tau fili ke moʻui pea fakalakalaka ʻi he hala ʻo e fuakava ʻa e ʻEikí pea ke nofo ai. ʻOku ʻikai ko ha hala ʻoku faingataʻa. Ko e founga ia ki he fiefia moʻoni ʻi he moʻuí ni mo e moʻui taʻengata hili ʻa e moʻuí ni.
Siʻoku kāinga ʻofeina, ko ʻeku holi taupotu tahá ke maʻu ʻe he fānau kotoa ʻa e Tamai Hēvaní ʻa e faingamālie ke fanongo ki he ongoongolelei ʻo Sīsū Kalaisí pea fai pau ki Heʻene ngaahi akonakí. ʻOku ou fakatauange te tau tui pea maʻu e ʻofa ʻoku maʻu ʻe he Fakamoʻuí maʻatautolú. Naʻe tākiekina Ia ʻi Heʻene ʻofa taʻefakangatangata mo haohaoa ʻiate kitautolú ke Ne fakalelei maʻatautolu. ʻOku fakaʻatā ʻe he meʻaʻofa ko iá—ʻa ʻEne Fakaleleí—ke tau maʻu kotoa e toenga ʻo ʻEne ngaahi meʻaʻofá.