Fakaʻilekitulōnika Pē
Vahevahe ʻe he Kāingalotú e Ngaahi Tāpuaki mei he Haʻu, ʻo Muimui ʻIate Au
ʻOku ʻaonga ki he taha kotoa pē ʻa e ngaahi moʻoni te ke lava ʻo ako mei hono ngāue ʻaki ʻa e Haʻu, ʻo Muimui ʻIate Au ko ha maʻuʻanga tokoni ki he ako ʻo e folofolá.
Kuo lahi ha ngaahi liliu ʻi he Siasí kimuí ni mai, pea ʻoku fakaofo ʻa e vakai ki he lahi hono fakavaveʻi ʻe he ʻEikí ʻEne ngāué mo tokoniʻi e ongoongoleleí ke mafola ʻi he toenga ʻo e māmaní! Ko e liliu lahi ʻe taha, kuo tāpuekina ʻe he talateu ʻo e maʻuʻanga tokoni Haʻu, ʻo Muimui ʻIate Au ʻi he taʻu ní, ʻa e moʻui ʻo ha kāingalotu tokolahi ʻoku nau ʻi ha ngaahi tūkunga kehekehe. Mei ha ongomeʻa mali ki ha kau uitou, mei ha kakai lalahi kei talavou ki ha ngaahi mātuʻa ʻoku ʻikai ke nofo fakataha mo e fānaú, ʻoku fakahaaʻi mai ʻe heʻenau ngaahi aʻusia ʻi he Haʻu, ʻo Muimui ʻIate Au neongo pe ko e hā e tuʻunga hoʻo moʻuí, ʻe ʻaonga ʻa e ngaahi moʻoni te ke lava ʻo ako mei he ako ʻo e folofolá ki he taha kotoa pē, pea te nau lava ʻo ʻoatu ha founga ke maʻu ai ha ngaahi tāpuaki hangē ko hono fakamālohia ho fāmilí, ofi ange ki he Tamai Hēvaní, mo fakatokangaʻi mo maʻu ha fakahā fakataautaha. Ko ha ngaahi talanoa ʻeni ʻe niʻihi mei ha kau mēmipa ʻi he māmaní kuo fehuʻi kiate kinautolu pe kuo tāpuekina fēfē nai ʻenau moʻuí ʻi he hoko ʻa e Haʻu, ʻo Muimui ʻIate Aú ko ha maʻuʻanga tokoni ki hono ako ʻo e folofolá:
“ʻOku lahi ange ʻeku lau ʻa e folofolá he taimí ni mei he angamahení. … Kuó ne tāpuekina homau fāmilí peá u malava ʻo fakakaukau lahi ange ki ai he ʻaho kotoa. ʻOku lelei ange ʻa e fokotuʻutuʻu ki he uiké ʻo laka ʻi he ngaahi fokotuʻutuʻu kimuʻá.” —Tim Peppers, Utah, USA
“ʻOku lahi ange e kau mai mo e tokanga [e taha kotoa ʻi homau fāmilí ʻi heʻemau ako folofolá]. ʻOku malava ke tau toe ongoʻi lahi ange ʻa e Laumālié. … Kuo fakatahatahaʻi kimautolu ʻe he polokalama ko ʻení, pea ʻoku mau toe feohi mo fiefia lahi ange he feohi mo e niʻihi kehé pea mo fakaʻapaʻapaʻi e fakakaukau ʻa e niʻihi kehé.” —Nicky Christensen, Kentucky, USA
“ʻOku makehe ʻa ʻeku aʻusia ʻi he Haʻu, ʻo Muimui ʻIate Aú koeʻuhí ʻokú ne ʻai ke u ongoʻi ofi ange ki heʻeku Tamai Hēvaní. ʻOku pehē he ʻikai ke ke lava ʻo ʻofa ki ha taha ʻoku ʻikai ke ke ʻiloʻi. Pea ʻi heʻeku ako ki he ngaahi moʻui ʻo e kau palōfitá mo Sīsū Kalaisí, ʻoku ou lava ai ʻo ʻiloʻi mo ʻofaʻi kinautolu. ʻOkú ne ʻai ke u ongoʻi e ʻofa ʻa e Tamai Hēvaní ʻi he ngaahi meʻa kotoa pē. … Kuó ne ngaohi au ke lahi ange ʻeku malava ʻo mamata ki he ngaahi meʻa iiki ʻokú Ne fai maʻaku he ʻaho kotoa pē, ʻa ia ne ʻikai ke u fakatokangaʻi kimuʻa.” —Carla Imelda Gutierrez, Mexico City, Mexico
“ʻOku lava ke tāpuekina moʻoni ʻe he Haʻu, ʻo Muimui ʻIate Aú ʻa e kakai lalahi kei talavoú he ʻokú ne poleʻi kinautolu ke nau lau ʻa e folofolá he ʻaho kotoa pē … mo ongoʻi ʻa e ʻofa ʻa e ʻOtuá, mo mamata ki he meʻa ʻokú Ne finangalo ke nau akó mo ia ʻokú Ne teuteuʻi maʻanautolú.” —Angela Rivera, Kentucky, USA
“Naʻá ne liliu e anga ʻeku vakai ki heʻeku aʻusia he Sāpaté, kae mahalo ko e meʻa mahuʻinga tahá, naʻá ne liliu e anga ʻeku vakai ki he aʻusia hoku fāmilí. ʻOku mau fefakamālohiaʻaki mo tupulaki fakataha he uiké kakato.” —Kim Peterson, Utah, USA
“Kuó ne liliu ʻa e founga ʻoku ou ako ʻaki ʻa e folofolá. … ʻOku ou vēkeveke ke lau he ʻaho kotoa pē. Pea ʻoku fakaʻofoʻofa ia. [ʻOku ou ongoʻi] naʻe faʻu ʻa e ngaahi lēsoní maʻaku.” —Maria Eugenia Cervin, Mexico City, Mexico
“Kuo hoko ʻa e polokalama ko ʻení ke u fakakaukau ai ki he ngaahi tui ʻaʻakú mo tokoni ke u ongoʻi ofi ange ki he Tamai Hēvaní. Kuo nonga ange ʻeku moʻuí. ʻOku ou fiefia lahi ange ʻi hono teuteuʻi ʻa e lēsoní he taimí ni. ʻI heʻeku hoko ko e faiakó, ʻokú ne ngaohi au ke u ongoʻi ʻokú ne liliu e moʻui [ʻeku kau akó].” —Jack Long, Kentucky, USA
“[Hili ʻeku] foki ki ʻapi mei heʻeku ngāue fakafaifekaú, naʻá ne tokoniʻi lahi au ʻi heʻeku liliu ke ako mo ʻeku ongomātuʻá he ʻaho kotoá. [ʻI he kuohilí,] ne mau ako fakafoʻituitui peá ne ʻikai ke mau maʻu ha fakafehokotaki—naʻe ʻikai ha fefakamālohiaʻaki. Ka ko e talu mei heʻemau kamata ke ako fakataha ko ha fāmilí, ʻoku ou lava ʻo sio ki he lahi hono fakamalohia hoku fāmilí. … Ko e taimi kotoa pē ʻoku mau ako ai, ʻoku mau lava ʻo ongoʻi ʻa e Laumālié.” —Alan Vela, Mexico City, Mexico
“Ko e taimi ʻoku fakaafeʻi mai ai ʻa e Laumālié ki heʻeku moʻuí he ʻaho kotoá, ʻoku ou fiefia ʻaupito. ʻOku ou ongoʻi ʻoku ou toe lelei ange. Kiate au, ko e founga lelei taha ne u ʻiloʻi ke u tokangaʻi ʻaki ʻeku moʻui kuo fonu veiveiua mo taʻepaú, ko hono ʻiloʻi mo ongoʻi moʻoni ʻoku tokoniʻi au ʻe he ʻEikí.” —Jenna Peterson, Kentucky, USA