Fakakomipiuta Pē: Kakai Lalahi Kei Talavoú
Founga Hono Tokoniʻi Au ʻe ha kiʻi Tamasiʻi ke Mahino e ʻOfa ʻa e Fakamoʻuí Kiate Aú
Koeʻuhi ko hoku ʻilamutu taʻu nimá, ʻoku ou maʻu ai ha loto falala lahi mo mamata ki he Fakamoʻuí ʻi hoku ʻātakaí ʻi he ʻaho kotoa.
ʻOku nofo ʻa e tokotaha naʻá ne faʻú ʻi ʻIutā, USA.
ʻI ha ʻaho ʻe taha kimuʻa ʻi he Taʻu Foʻoú, naʻá ku ʻaʻahi atu ai mo hoku tuofefiné, mo hono husepānití mo e fānaú, ki he Senitā Takimamata ʻi he Temipale Seni Siaosi ʻIutaá. ʻI he taha ʻo e ngaahi lokí, naʻe ʻi ai ha ngaahi fakaʻaliʻali ʻo e ʻAloʻí mei he tapa kehekehe ʻo e māmaní. Naʻá ku manumanumelieʻia ʻi he makehe e ngaahi meʻa takitaha—ʻa hono lalahí, lanú, nāunau ne ngaohi ʻakí, fakafōtunga kehekehe ʻo honau fofongá, etc. Naʻe fakamāfana mo fakalaumālie.
Naʻe loto hoku kiʻi fakafotu taʻu nima ko Sulietí ke u fua ia, pea ne ma lue takai ai pē. ʻI he lōngonoa ʻa e lokí, naʻe kamata ke toutou lea ʻaki ʻe Sulieti e “Ko Sīsū ē! Pea ko Sīsū ē! Pea ko Sīsū mo ē! Pea ko Sīsū ē!” ʻi heʻema fakalaka atu ʻi he fakaʻaliʻali takitaha ʻo e ʻAloʻí. Naʻá ne leʻo fiefia ʻi heʻene tuhu ki he valevale ko Sīsuú. Naʻá ne loto ke ʻi he ofi taha te ne lavá kiate kinautolu. Naʻá ku feinga ke kole ange ke toe kiʻi fakaleʻosiʻi, ka naʻe ʻikai—naʻá ne fuʻu fiefia ʻaupito. Naʻá ne ʻai ke u toe takai hake ki he kamataʻangá ʻi he taimi kotoa pē ne mau aʻu ai ki he fakaʻaliʻali fakaʻosí, pea ne mau toutou fakahoko ia ʻi ha miniti ʻe 20 lolotonga iá ʻokú ne kei kaila pē, “Pea ko Sīsū ē! Pea ko Sīsū mo ē! ʻI he taimi ne mau mavahe ai mei he lokí, naʻe mamahi hoku tuʻá pea helaʻia hoku ongo umá, ka naʻe ongoʻi maʻamaʻa ange hoku lotó. Naʻe pau ʻene fiefiá ʻi heʻene sio mo ʻiloʻi naʻe tuku ʻe he Fakamoʻuí ha fakaʻilonga ʻiate au.
Naʻe ʻikai ke u fakakaukau lahi ki he aʻusia ko ʻení ka ne taʻeʻoua ʻeku tangutu ʻi he lotú ʻi ha ngaahi uike mei ai pea hivaʻi ʻe he kāingalotú ʻa e “ʻOku Moʻui Hoku Huhuʻí” ʻi he himi tukú (Ngaahi Himí, fika 68). Kuó u hivaʻi tuʻo lahi ʻa e himi ko iá ʻi heʻeku moʻuí ka naʻe makehe ʻene ongó he taimi ko ʻení. ʻI heʻeku hiva, “Pea ko siʻene ʻofá [ʻOkú Ne moʻui ke tāpuekina ʻaki au ʻene ʻofá. Ko hoku fiefiaʻangá [ʻOkú Ne moʻui ke tautapa maʻaku]. Ko Koe hoku ungaʻangá [ʻOkú Ne moʻui ke fakanonga hoku lotó]. ʻI he ngaahi faingataʻá [ʻOkú Ne moʻui ke tāpuekina au ʻi he taimi faingataʻá],” naʻe faingataʻa hono puʻakí ko e kamata ke u tangí. Naʻe tuku ʻeku hivá kau tangi ʻi heʻeku fakafanongo ki he toenga ʻo e ngaahi vēsí. Naʻe ongo moʻoni ʻa e foʻi lea kotoa pē mo fakafiemālie kiate au ʻi he momeniti ko iá. Naʻá ku ongoʻi naʻe fāʻofua ʻa e Fakamoʻuí kiate au pea ne u ongoʻi naʻe ʻikai ke fakangaloʻi pe manukia au.
Naʻá ku faʻa fakakaukau naʻe hoko ʻeku ngaahi tōnounoú ke siʻi ai ʻeku taau ke maʻu e ʻofa ʻa e Fakamoʻuí. Ka ʻi heʻeku mamata ki hono fakafiefiaʻi ʻo Sīsuú ʻo fakafou ʻi he fakakaukau ʻo ha kiʻi taʻu nimá, ko ha meʻa ia ne u fie maʻu ke u ikunaʻi ʻaki ʻeku fakasiʻia aú peá u falala ʻokú Ne ʻofa moʻoni ʻiate au neongo ʻa e ʻikai ke u haohaoá. Naʻe fie maʻu ke u falala ʻokú Ne tokoniʻi au ʻi he ʻaho kotoa pē ke lelei ange ʻeku moʻuí pea ke hoko hoku ngaahi vaivaiʻangá ko hoku ngaahi mālohinga. Falala ʻokú Ne tokoniʻi au ke u ikunaʻi hoku ngaahi faingataʻaʻiá. Falala te u lava ʻo mavahe mei he ngaahi haʻi fakamamahi kuo fakangatangata fakaekitá, tukuhifó, mo e fakaʻiseʻisá, pea mo ha toe meʻa pē ʻaki ʻEne ʻofá, pea tuku kotoa ʻi Hono lalo vaʻé. Falala ko ha founga ʻeni ʻoku tau tauʻi ʻaki ʻa e natula ʻo e tangatá mo e ngaahi haʻahaʻa ʻo e moʻuí, pea ʻokú Ne tauhi mai mo kātakiʻi e meʻa kotoa pē.
Naʻe ʻikai ha toe momou pe veiveiua ʻia Sulieti ʻi heʻene mamata kia Sīsū Kalaisí mo fakatokangaʻi Ia ʻi he feituʻu kehekehe naʻá ne ʻi aí—naʻá ne ʻilo pau. Naʻe fakanatula pē ʻene ʻiloʻí pea ʻokú ne ʻiloʻi ʻEne ʻofa ʻiate iá. Pea naʻe mahulu hake ʻa ʻene malimalí kiate au, ʻokú ne ʻiloʻi mo ʻofa ʻiate Ia. ʻOku kamata ke mahino kiate au ʻa e ʻuhinga naʻe fekau ai ʻe he Fakamoʻuí ke tau hoko ʻo hangē ko e fānau īkí kae lava ke hū ki Hono puleʻangá. ʻOku ou fie hoko ʻo hangē ko Sulietí.
Talu mei he ongo aʻusia ʻe ua ko iá, kuó u feinga lahi ange ke u loto-falala ange mo fakatokangaʻi ʻa e Fakamoʻuí ʻi hoku ʻātakaí. Pea kuo hoko ia! ʻOku ou mamata kiate Ia ʻi he ngaahi lea mo e tōʻonga angaʻofa ʻa e solá mo e ngaahi kaungāmeʻá, ʻi he mata ʻo kinautolu ʻoku ou talanoa ki aí, ʻi he taimi ʻoku ulo ai e laʻaá mo u fanongo ki he hiva ʻa e manupuná, kuo kamata ke siʻi ʻeku ongoʻi faingataʻaʻiá ka u ʻamanaki lelei ange. Kuó u kamata ke pehē loto, “Ko Sīsū ē, ko Sīsū ē, ko Sīsū ē.” ʻOku ou loto ke pehē ʻeku moʻuí kotoa. ʻOkú Ne ʻi he feituʻu kotoa pē pea ʻoku pau ke tau fili ke tau mamata kiate Ia, ʻi he ngaahi meʻa iiki mo lalahí. Ko e meʻaʻofa maʻongoʻonga tahá ia.