Ko e Lea Fakaʻosí
Kau Palōfitá: Ko ha Fakaʻilonga ʻo e ʻOfa ʻa e ʻOtuá
Fai ʻe ʻEletā Ulisses Soares
ʻO e Kōlomu ʻo e Kau ʻAposetolo ʻe Toko Hongofulu Mā Uá
Mei ha lea ʻi he konifelenisi lahi ʻo ʻEpeleli 2018.
ʻOku ou fie fakamoʻoni kiate kimoutolu ko Palesiteni Russell M. Nelson ko e palōfita ia ʻa e ʻOtuá ʻi he māmaní. Kuo teʻeki ke u mamata ʻi ha taha angaʻofa mo ʻofa ʻo hangē ko iá. Neongo ʻeku ongoʻi matuʻaki taʻefeʻunga ki he uiuiʻi toputapú ni ke u hoko ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá, ka kuó u ongoʻi ʻi heʻene ngaahi leá mo e fofonga ʻofá ʻi heʻene fakahoko mai e fatongiá ni, kuo ʻōʻōfaki au ʻi he ʻofa ʻa e Fakamoʻuí.
ʻIkai ko ha tāpuaki ia ke maʻu ha kau palōfita, kau tangata kikite, mo e kau tangata maʻu fakahā ʻi he māmaní ʻi he ngaahi ʻaho ko ʻeni ʻoku tau moʻui aí, ʻa ia ʻoku nau feinga ke ʻiloʻi e finanalo ʻo e ʻEikí pea muimui ki aí? ʻOku fakafiemālie ia ke ʻiloʻi ʻoku ʻikai ke tau tuenoa ʻi he māmaní, neongo e ngaahi faingataʻa ʻoku tau fehangahangai mo ia ʻi he moʻuí. Ko hono maʻu ʻo e kau palōfitá ko ha fakaʻilonga ia ʻo e ʻofa ʻa e ʻOtuá ki Heʻene fānaú. ʻOku nau fakahā ki honau kakaí e ngaahi talaʻofa mo e natula totonu ʻo e ʻOtuá pea mo Sīsū Kalaisí.
ʻOku ou fakamoʻoni ʻaki hoku lotó kotoa, ʻoku lea ʻa e kau palōfitá ʻi he mālohi ʻo e Laumālie Māʻoniʻoní. ʻOku nau fakamoʻoni kia Kalaisi mo Hono misiona fakalangi ʻi he māmaní. ʻOku nau fakafofongaʻi e finangalo mo e loto ʻo e ʻEikí pea ʻoku uiuiʻi kinautolu ke nau fakafofongaʻi Ia mo akoʻi kiate kitautolu e meʻa kuo pau ke tau faí ke tau toe foki ai ʻo nofo ʻi he ʻao ʻo e ʻOtuá mo Hono ʻAlo ko Sīsū Kalaisí. ʻOku tāpuekina kitautolu ʻi heʻetau fakaʻaongaʻi ʻetau tuí pea muimui ki heʻenau ngaahi akonakí. ʻOku fakafiefia ange ʻetau moʻuí mo siʻi e palopalemá ʻi heʻetau muimui kiate kinautolú, ʻoku faingofua ange ke fuesia hotau ngaahi faingataʻaʻiá mo e palopalemá, pea ʻoku tau fokotuʻu ha teunga tau fakalaumālie ke ne maluʻi kitautolu mei he ngaahi ʻohofi ʻa e filí ʻi hotau kuongá.
ʻOku ou fakamoʻoni ʻi he loto māluʻia kuo toe tuʻu ʻa Sīsū Kalaisi, ʻokú Ne moʻui pea ʻokú Ne tataki ʻa Hono Siasí ʻi he māmaní ʻo fakafou ʻi Heʻene kau palōfitá, kau tangata kikité, mo e kau tangata maʻu fakahaá. ʻOku ou fakamoʻoni ko Ia ʻa e Fakamoʻui mo e Huhuʻi ʻo e māmaní pea ʻe lava ke fakahaofi mo hakeakiʻi kitautolu ʻi he ʻao ʻo e ʻOtua ʻofeiná, ʻo fakafou ʻiate Ia. ʻOku ou ʻofa mo fakaʻapaʻapa kiate Ia. ʻOku ou fie muimui kiate Ia mo fai Hono finangaló pea hoko ʻo hangē ko Iá.