Ngaahi Ongoongo Fakalotofonuá
Ngāue Tokoni ʻa e Kau Māmongá ʻi he Puleʻanga Tongá ʻAki ʻEnau Fakamaʻa e Kelekele ʻEiki ko Vilá
Ne fakataha e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní he konga kimuʻa ʻo Meé ki he Nofoʻanga Fakatuʻi ko Vilá ke fakamatamataleleiʻi hono ʻātakaí. Ko e ngāue fakamatamatalelei ko ʻení ko ha hokohoko atu ia ʻo e tukupā naʻe tomuʻa fai ʻe he taki fakalotofonua ʻo e Siasí ko, Ian C. Tu’ihalangingie, ki he Kuini Fehuhú, Halaevalu Mataʻaho ʻAhomeʻe.
Naʻe foaki ʻe Palesiteni Tuʻihalangingie ʻo e Siteiki Kolomuʻá e tokoni ʻo ʻene siteikí, ʻi hono fakamaʻa ʻo e nofoʻanga fakatuʻi ko Vilá.
Fakatatau ki he lahi ʻo e ngāué, naʻe fakaafeʻi ai ʻe Palesiteni Tuʻihalangingie e ngaahi siteiki Central, Harbour mo Liahona ke nau kau foki ʻi he fakamaʻa ko ʻení.
Ne ʻi ai ha kau fana vai, kau kosi mīsini teke mo e kau kosi mīsini kini ne ngāue ʻi he tafungofungá pea takatakai ʻi he ʻapí, lolotonga ia ha ngāue ʻa ha kakai tangata, fefine mo e fānaú ʻi he foʻi halá ʻo aʻu ki he hala lahí ʻo fakaʻaongaʻi ʻa e “hele pelú” ke kini ʻaki e musie kuo fuʻu loloa ʻi he tafaʻaki ʻo e halá pea ki hono kini ʻaki foki ʻo e musié. Ne tafi ʻaki ʻe he kau fafiné e “taufale” ʻa e meʻa ne kiní ʻo fokotuʻu ʻa ia ne hiko ʻe he toʻu tupú mo e kau faifekaú pea uta ʻi ha ngaahi loli ne tatali ke uta ai.
Ne tufi ʻe ha kau tangata tokolahi mo e kau faifekaú ha ngaahi kongokonga ʻakau, piliki mo e sima. Ne nau fevahevaheʻaki ha ngaahi talanoa mo fefakakata ʻaki ke tokoni hono fakavaveʻi e taimí mo fakafiefiaʻi e tokotaha kotoa he naʻe fuʻu vevela e ʻaho ko iá pea naʻe fuoloa pea toki kakato e ngāué.
ʻI he fakamāʻopoʻopo ʻa e tokotaha kotoa ke mavahé, ne hāʻele mai e Kuiní ʻo fakamālō ʻaki haʻane taʻataʻalo lotoʻofa ki he kau ngāue mo e kau taki ʻo e Siasí ʻi heʻenau ngāué.