Tui, ʻAmanaki, mo Kuleisi, Konga 2
Ko ha Lotu ne Tali
ʻOku nofo e taha naʻá ne faʻú ʻi Niu Sēsī, USA.
Ko Kuleisí ko ha kiʻi taʻahine taʻu hiva naʻe nofo ʻi Hōlani he lolotonga ʻo e Tau Lahi Hono II ʻa Māmaní. Naʻe ʻosi ʻave ʻene tamaí ko ha taha pōpula ʻo e taú.
Hili hono ʻave ʻo e Tangataʻeikí, naʻe tokangaʻi leva ʻe he Fineʻeikí ʻa Kuleisi, mo hono ongo kiʻi tuongaʻané pea mo ha toko ua naʻa nau tokoua ʻaki. Naʻe tokolahi ʻa e niʻihi ke fafangá kae siʻi e meʻakai ke fakatotofu ʻakí. Ko e meʻa pē naʻe maʻu ʻe honau fāmilí ko ha kiʻi meʻi mahoaʻa, vesitapolo, mo ha pateta.
Naʻe tatangi e fafangu he matapaá ʻi ha ʻaho ʻe taha. Naʻe muimui atu ʻa Kuleisi ʻi he Fineʻeikí ke vakai pe ko hai. Ko e taimi naʻe fakaava ai ʻe he Fineʻeikí ʻa e matapaá, ne tuʻu ʻi he sitepú ha ʻōfisa Nasi kei talavou. Naʻe kamata ke vave e tā ʻo e mafu ʻo Kuleisí, pea fakamānava loloa. Ko e hā e meʻa naʻá ne fie maʻú?
Naʻá ne ʻeke fefeka atu, “Ko e kakai ʻe fiha ʻoku nofo ʻi he fale ko ʻení?”
Pehē ange Fineʻeikí, “Ko au pē, mo ʻeku fānaú ʻe toko tolu, pea mo hoku ongo ʻilamutu.”
Fehuʻi ange ʻe he ʻōfisá, “ʻOku ʻikai ke ʻi ai hao husepāniti ʻi heni?”
Tali ange ʻe he Fineʻeikí, “ʻIkai.” “Naʻe ʻave ia.”
Naʻe fakasio takai e ʻōfisá he loto falé. “ʻOku ʻi ai haʻamou leitō? ʻOku ʻikai ke mau fie maʻu ke mou fanongo ki he ngaahi polokalama mei hotau fili ʻi ʻIngilani mo ʻAmeliká.”
Ne toʻo mai leva ʻe he Fineʻeikí ʻa e letioó ʻo ʻoange ki he ʻōfisá.
Naʻá ne pehē mai, “Ko e fale lahi ʻeni,” pea toe fakasiosio holo. “Fuʻu lahi ki he kakai tokosiʻi ʻoku nofo hení. Kuo pau ke mou mavahe ʻa pongipongi. Te mau faʻao ʻe kimautolu ʻa e fale ko ʻení.” Naʻe tafoki leva ia ʻo ʻalu.
Naʻe ʻikai faʻa tui ʻa Kuleisi ki he meʻa naʻe fanongo ki aí. Naʻá ne siofi e fofonga ʻo e Fineʻeikí ʻi heʻene ʻohovalé. Pea tāpuniʻi leva ʻe he Fineʻeikí ʻa e matapaá pea lue hangatonu ki he tuʻafalé.
Naʻe muimui māmālie atu ʻa Kuleisi, ʻoku tā vave hono mafú. ʻE lava nai ʻa e sōtia ʻo foki moʻoni mai ke toʻo honau falé, hangē ko ʻene ʻave ʻenau leitoó? Ko e hā te nau ala faí? “Te nau oó ki fē? ʻE founga fēfē ha ʻilo ʻe he Tangataʻeikí e feituʻu ʻe maʻu ai kinautolú?
Ne tuʻu ʻa Kuleisi ʻi tuʻa he matapā ʻo e Fineʻikí ʻo fakasiosio ki loto. Naʻe lolotonga tūʻulutui ʻa e Fineʻeikí ʻo lotu. Naʻe foki fakalongolongo leva ʻa Kuleisi ki he loto falé kae ʻoua ke foki ange ʻa e Fineʻikí.
“ʻOiauē, Fineʻeiki, ko e hā te tau faí?” Ko e fehuʻi ia ʻa Kuleisí.
Ne pehē ʻe he fineʻeikí. “Ko e meʻa pē te tau lava ʻo faí ko e lotu mo falala ki he ʻEikí ke Ne maluʻi kitautolu.”
Naʻe ʻikai ke toe foki mai ʻa e ʻōfisa Nasi kei talavoú ʻi he ʻaho hono hokó pe ko e ʻaho hoko aí. Naʻe ʻikai pē ke toe foki mai! Naʻe lava ʻa Kuleisi mo hono fāmilí ke kei maʻu pē honau falé.
Naʻe ʻilo ʻe Kuleisi naʻe tokoniʻi ʻe he ʻOtuá hono fāmilí. Neongo naʻe teʻeki ʻosi ʻa e taú, ka naʻá Ne kei tokangaʻi pē kinautolu.
Ke toki hoko atu …