Founga Fakakomipiutá Pē
ʻOku ʻIkai Ha Makatuʻunga Ho Mahuʻingá
Neongo pe ko e hā e lau ʻa e māmaní, ka ʻoku ʻafioʻi ʻe he Tamai Hēvaní ho mahuʻinga totonú.
Ko ha kakai taʻengata kitautolu ʻoku ʻi ai hotau tukufakaholo fakalangi. Ka ʻoku taʻetūkua hono ʻohofi kitautolu ʻe he ngaahi faingataʻa fakaemāmani ʻa ia ʻokú ne fakangaloki ʻiate kitautolu hotau tuʻunga totonú. ʻE founga fēfē haʻatau ʻilo hotau mahuʻinga totonú? Ko ha ngaahi fakakaukau ʻeni ke tau manatuʻi.
-
ʻOku ʻikai makatuʻunga ho mahuʻingá ʻi he ngaahi ivi tākiekina mei tuʻá.
Hangē kuo tau ʻosi faʻa fanongo aí, ko e meʻa ʻoku mahuʻinga moʻoní ʻa e meʻa ʻi ho lotó. ʻOku loto ʻa Sētane ke ke tui ʻoku makatuʻunga ho mahuʻingá mei he ngaahi meʻa hangē ko e matamata lelei fakatuʻasinó, potó, ngaahi talēnití, moʻui leleí, lavameʻá, mo e manakoá. Ka “ʻoku ʻikai mamata ʻa [e ʻEikí] ʻo hangē ko e mamata ʻa e tangatá; he ʻoku sio ʻa e tangatá ki he anga ʻoku hā ʻi tuʻá, ka ʻoku ʻafioʻi ʻe [he ʻEikí] ʻa e lotó” (1 Samuela 16:7). ʻOku ʻafioʻi ʻe he Tamai Hēvaní ho mahuʻinga totonú koeʻuhí ʻoku mahino kiate Ia ho ngaahi fakaʻamú pea mo e ʻulungaanga ʻa ho laumālié.
-
ʻOku fakaʻofoʻofa ho sinó—neongo kapau ʻoku ʻikai fakatatau ia ki he ngaahi tuʻunga moʻui ʻa e māmaní.
Ko e tokolahi ʻo kitautolu ʻoku tau fefaʻuhi ke tau ongoʻi leleiʻia hotau fōtungá. Ka ke fiemālie pē, ʻoku fakaʻofoʻofa ho sinó, neongo pe ʻoku fōtunga fēfē. Naʻe faʻu koe ʻi he ʻīmisi totonu ʻo e ʻOtuá, neongo pe ko ha tangata pe fefine koe (vakai, Sēnesi 1:27). Ko e Tamai Hēvaní ʻa e Tupuʻanga maʻongoonga ʻo e ʻunivēsí—pea ko koe ʻa ʻEne ngāue maʻongoʻonga tahá! Ko ho sinó ko ha mana ia—ʻoku pelepelengesi, mālohi, fakaʻofoʻofa mo fakaofo ʻi he taimi tatau. ʻOku lahi fau ha ngaahi meʻa fakaofo ʻi hono fōtungá mo e ngāué ʻo kapau te ke feinga ke vakai ki ai ko ha meʻaʻofa fakaʻofoʻofa.
-
ʻI he taimi ʻokú ke muimui ai ki he Fakamoʻuí, ʻoku mahulu atu ai e fakaʻofoʻofa ʻa ho laumālié.
Naʻe “ʻikai ha fakaʻofoʻofa” ʻa Sīsū Kalaisi ʻi he vakai ʻa e tangatá (vakai, ʻĪsaia 53:2). Ka ʻoku anga fēfē ʻa e ʻikai fakaʻofoʻofa e Fakamoʻuí? Ko Hono fakaʻofoʻofá ne tupu ia mei Heʻene leleí mo e haohaoá. Pea ʻoku pehē pē mo koe! ʻOku ʻikai fekauʻaki e matamata lelei ʻa e kau ākonga moʻoni ʻa Kalaisí mo e anga honau fōtungá. ʻI hoʻomou “maʻu … hono tataú ʻi homou fofongá” ( ʻAlamā 5:14), ʻoku mou maʻu ai ha maama ʻoku malama mei loto ki tuʻa. Pea ʻi he taimi ʻe ʻilo ai ʻe he niʻihi kehé homou māmá, ʻoku mou matamata lelei ange kiate kinautolu. Ka ko e meʻa lelei tahá, ko hoʻo maʻu ko ia ha loto falala lahi ange ʻi hoʻo ʻaʻeva angatonu ʻi he ʻao ʻo e ʻOtuá.
-
ʻOku ʻi ai ho mahuʻinga taʻefakangatangata ʻi he tuʻunga pē ʻokú ke ʻi aí.
Naʻe akoʻi ʻe Kolihoa ko e fili ʻo Kalaisí, “ʻoku tuʻu ʻa e tangata ʻi he moʻuí ni ʻo fakatatau ki he anga ʻo ʻene ngāue ʻaʻaná” ( ʻAlamā 30:17). ʻI hono fakalea ʻe tahá, ʻoku fakapapauʻi ho mahuʻingá he anga hoʻo mouí—ko ha meʻa kuo pau ke ke feinga ke maʻu pe fakamoʻoniʻi. Ka ʻoku ʻikai moʻoni ia! Neongo ʻoku totonu ke tau feinga maʻu pē ke tau fakalakalaka, ka “ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá” (T&F 18:10) ʻo tatau ai pē. Naʻa mo e taimi ʻokú ke fakahoko ai ha fehalākí, ʻoku ʻikai hōloa ai ho mahuʻingá. Hangē ko ia ne akoʻi ʻe Sisitā Soi D. Sōnasí, Palesiteni Lahi ʻo e Palaimelí, “Kapau te tau faiangahala, ʻoku tau taʻetaau, ka ʻoku ʻikai ʻaupito ke tau taʻe-mahuʻinga!” (“Mahuʻinga Taʻe-Hano Tatau,” Ensign pe Liahona, Nōvema, 2017, 14).
Neongo ʻoku ʻikai ke ke faʻa fakatokangaʻi ia, ka ʻoku ʻi ai ha maama fakalangi ʻiate koe. ʻOku ʻiate koe ia, naʻa mo e taimi ʻokú ke ongoʻi taʻe-taau aí. Pea ʻoku ʻafioʻi ia ʻe he ʻOtuá—he taimi kotoa pē. Kapau te ke tanumaki e maama ko iá, te Ne lava ʻo fakatupulaki koe ʻo laka ange he meʻa ʻokú ke tui ʻe malavá.