Ngaahi Ongoongo Fakalotofonuá
Fakatatali ʻe ha Tokotaha ʻAkapulu ʻIloa ʻEne Maʻuʻanga Moʻuí ke ʻAlu ʻo Ngāue Fakafaifekau
ʻOku fakatatali ʻe Young Tonumaipeá, ko ha tokotaha ʻakapulu ʻiloa ʻi he Melbourne Storm, ʻa e meʻa kotoa ʻi he malaʻe ʻakapulú ke ʻalu ʻo ngāue fakafaifekau ʻi Siamane.
“Ne u tailiili hono talaange ki he kalapú, naʻá ku ʻaukai mo lotu kimuʻa peá u ʻalu ʻo sio ki he faiako ʻakapulú. Naʻá ku ʻiloʻi he ʻikai faingofua ia he naʻá ku lolotonga tuʻukimuʻa ʻi heʻeku vaʻingá, ka ko e ʻaho naʻá ku fakakaukau ai ke u talanoa ki aí naʻá ma fetaulaki ʻi he loto holó. Ne u ʻilo ne ʻikai tupukoso ʻene hokó.”
Naʻe hū hangatonu ʻa e talavou taʻu 25 ʻi he Siteiki Melbourne, Craigieburn, mei he ako maʻolungá ki he ʻakapulu liiki fakapalofesinalé ʻa ia naʻá ne vaʻinga ai ʻi he meimei sipoti kotoa pē naʻe fai ai.
“Naʻá ku kau ʻi ha faʻahinga sipoti pē ʻi he akó, hangē ko e volipoló, pingipongó, soká, AFL mo e ʻakapulú, pea kuo faitāpuekina maʻu pē au ʻi he sipotí.”
Neongo ne ʻikai fuʻu mahino e fili ʻa Young ki heʻene kau poupoú, ka naʻe mahino fau ia ki he kalapú. “Ko hono moʻoní ne u ofo ʻi he poupou lahi kuo fai ʻe he kalapú maʻakú, kuó u ongoʻi mohu tāpuekina ʻaupito.”
ʻI he 2011, naʻe mavahe hono kaungā vaʻinga ko Lagi Setú, mei he Broncos kae ʻalu ʻo ngāue fakafaifekau ʻi Birmingham, England.
“ʻOku hoko ʻa Langi ko ha sīpinga māʻongoʻonga kiate au, neongo ne hoko ʻeku fakaʻānauá ʻi he vaʻinga ʻakapulú . . . ne u mamata tonu ʻi he ngaahi tāpuaki he moʻui ʻa Langí koeʻuhi ko ʻene ngāue fakafaifekaú.”
“Neongo naʻá ku toki fakapapauʻi pē ia ʻi he taʻu kuoʻosí, ka naʻe hoko e ngāue fakafaifekaú ko ha meʻa naʻá ku fakakaukau maʻu pē ki ai, kimuʻa peá u vaʻinga ʻakapulú.”
Neongo ne hā ia ko ha feilaulau kāfakafa lolotonga e tumutumu ʻo ʻene vaʻingá, ka naʻe pehē ʻe Young ko e ngāue fakafaifekaú e meʻa totonu ke faí.
“ʻOku ou ongoʻi ʻoku ʻikai ke u taau mo e ngaahi talamonuú koeʻuhi ko ʻeku fili ke ngāue fakafaifekaú; ʻi heʻeku hoko ko ha maʻu lakanga fakataulaʻeikí ko ha tufakanga ia ʻo e kau talavoú ke nau fakahoko.”
“Ko ʻeku faleʻi ki he kau talavoú pe kau YSA ke mou moʻui faitotonu ki he meʻa ʻoku mou ʻiló. Ko e ngaahi taimi faingataʻa taha ʻi heʻeku vaʻingá ʻa e ngaahi taimi naʻá ku mamaʻo ai mei he ngaahi akonaki ʻa e Tamai Hēvaní. ʻI he taimi ne u fai ai e meʻa totonú, naʻe lelei leva ʻeku sipotí.”
ʻOku fakapapauʻi ʻe he pule ko ia ʻa e Melbourne Storm, Dave Donaghy, kapau ʻe fie foki mai ʻa Young hili ʻene ngāue fakafaifekau taʻu ʻe uá, “ʻe kei lahi pē hono faingamālié.”
Naʻe pehē ʻe Young, “Kapau ʻoku ʻi ai ha meʻa te u fakaʻiseʻisa ai ʻi heʻeku moʻuí ko e ʻikai ko ia ke u ngāue fakafaifekau ʻi he ngaahi taʻu kimuʻa ʻo ʻeku moʻuí.”
ʻOku ʻikai fakapapauʻi ʻe Young e tuʻunga hono kahaʻú ʻi heʻene foki mai mei Siamane hili ha taʻu ʻe uá, “ka ʻoku ou tui ʻe faingamālie pē ʻa e meʻa kotoa.”